News

POST TYPE

EDITORIAL

စေတနာသည်သာ အရင်းခံ (Daily, Vol-5/No-260)
10-Feb-2018 tagged as

Forever Group Co., Ltd. က စီစဉ်ထုတ်လွှင့်သော 4-TV အခပေး ရုပ်သံလိုင်းများကို ပရိသတ်အား ကြိုတင်အသိပေး အကြောင်းကြားခြင်းမရှိဘဲ Canal + ရုပ်သံလိုင်းများဖြင့် ရုတ်တရက် အစားထိုးပြသလိုက်သောကြောင့် ဝေဖန်ကန့်ကွက်မှုများ ဆူညံသွားခဲ့သည်။

မြန်မာ့ရုပ်သံထုတ်လွှင့် ပြသမှုနယ်ပယ်တွင် နိုင်ငံပိုင် မြန်မာ့အသံနှင့် ရုပ်မြင်သံကြားပြီးလျှင် ပုဂ္ဂလိကအနေနှင့် သက်တမ်း အရှည်ကြာဆုံး ထုတ်လုပ်သူ၊ ထုတ်လွှင့်သူ၊ အခပေး ရုပ်သံလိုင်း ဈေးကွက် ဦးဆောင်သူဖြစ်သော ရုပ်သံမီဒီယာ ကုမ္ပဏီတစ်ခု၏ ထိုသို့သော လုပ်ဆောင်ချက်မှာ များစွာ နားလည်ရခက်လှသည်။

မြန်မာစားသုံးသူ ပရိသတ်များအတွက် ပိုကောင်းသော အစီအစဉ်သစ်များ ပါဝင်သည့် ချယ်နယ်အသစ်များ တိုးချဲ့ခြင်း၊ အစားထိုးခြင်းမှာ ကမ္ဘာပေါ်ရှိ ရုပ်သံမီဒီယာများ အာလုံးလိုလို လုပ်ဆောင်နေကြသည့် သမားရိုးကျလုပ်ငန်း ဖြစ်သည့်အတွက် ပြောစရာ မရှိပေ။ သို့သော် ပရိသတ်ကို ကြိုတင်အသိမပေးဘဲ ရုတ်တရက် ပြောင်းလဲလိုက်ခြင်းမှာမူ နားလည်ရခက်လှသည်။

နှစ်ပေါင်းများစွာ အာဏာရှင်အစိုးရ အပါအဝင် ယင်းအဝန်းအဝိုင်းနှင့် ထိတွေ့ဆက်ဆံလာခဲ့သူများ စီးပွားရေးဈေးကွက် အသီးသီးတွင် ဦးဆောင်သူ ဖြစ်နေသောကြောင့် မြန်မာနိုင်ငံတွင် စားသုံးသူ ပရိသတ်အပေါ် လေးစားမှု အားနည်းခြင်းပေလောဟု ပညာတတ် ပရိသတ်အချို့၏ ဝေဖန်စောကြောစရာ ဖြစ်သွားခဲ့သည်။ 

သို့သော် နေပြည်တော်အခြေစိုက် မြန်မာနိုင်ငံ စားသုံးသူရေးရာ ဦးစီးဌာနက ယင်းပြဿနာကို ကြားဝင်ညှိနှိုင်း ဖြေရှင်းပေးနိုင်လိုက်ခြင်းမှာ အဆိုးထဲမှ အကောင်းဟုဆိုနိုင်သည်။ နှစ်ပေါင်းများစွာ အာဏာရှိသူ၊ ၎င်းတို့နှင့်အကျိုးတူ ပူးပေါင်းကာ စီးပွားရေးလုပ်ငန်း ထူထောင်ထားသူများ ထင်သလို ခြယ်လှယ်ခံလာခဲ့ရသည့် မြန်မာပြည်သူများအတွက် အစိုးရက ဦးစီးဌာနတစ်ခု ပထမဦးဆုံး ထူထောင်ကာ စားသုံးသူ အခွင့်အရေးကို အကာအကွယ်ပေးလာခြင်းမှာ များစွာ အသိအမှတ်ပြုရမည်ဖြစ်သည်။

အဆိုပါ ဦးစီးဌာနက ညိနှိုင်းဆွေးနွေးပေးသောကြောင့် ပရိသတ်များကို ပြန်လည် လိုက်လျော ဖြည့်ဆည်းပေးရသည်ဆိုခြင်းထက် ယင်းမတိုင်မီ ကာယကံရှင် ရုပ်သံမီဒီယာ ကုမ္ပဏီကိုယ်တိုင်က လူသိရှင်ကြား အသိပေး ရှင်းလင်းခြင်း၊ လူသိရှင်ကြား တောင်းပန်ခြင်းမျိုးဖြင့် ချက်ချင်းဆိုသလို တုံ့ပြန်သင့်လှသည်။

စင်စစ်အားဖြင့် ရုပ်သံ မီဒီယာလောက အပါအဝင် နယ်ပယ်အားလုံးတွင် အပြိုင်အဆိုင် များလွန်းလှသည့် ခေတ်ကာလသို့ ရောက်ရှိနေကြောင်း သက်ဆိုင်ရာ လုပ်ငန်းထူထောင်ထားကြသူများ သိထားပြီးဖြစ်သည်။ မြန်မာနိုင်ငံတွင်မူ နှစ်အတန်ကြာ ပြိုင်ဘက်မရှိ အခွင့်ထူးရရှိခဲ့ပြီး အကျိုးအမြတ်ကြီးစွာ ရလာခဲ့ကြသောကြောင့် ပရိသတ်သည်သာ နံပါတ်တစ် ဦးစားပေးဆိုသည့် အချက်ကို မေ့လျော့နေလေ့ရှိသည်။

ပရိသတ်ကို မလေးမစား လုပ်လိုသော၊ ဂရုမစိုက်သော ရည်ရွယ်ချက်မရှိဘဲ မလွှဲမရှောင်သာသော အခြေအနေတစ်ခုကြောင့် ရုတ်ခြည်း ပြောင်းလဲလိုက်ရသည်ဟု ဆိုနိုင်သော်ငြား ခွင့်လွှတ်၊ နားလည်ပေးတတ်သော မြန်မာပရိသတ်၏ သဘောကောင်းမှု၊ မိမိတို့၏ ပျက်ကွက်မှုတို့နှင့် လျော်ညီထိုက်တန်သော တောင်းပန်၊ တုံ့ပြန်မှုပေးအပ်ရန် တာဝန်ရှိပေသည်။

မည်သို့ပင်ဖြစ်စေ ကာလကြာရှည် စနစ်ဆိုးကြီးကို ဖြတ်သန်းလာခဲ့သော မြန်မာနိုင်ငံအနေနှင့် အစိုးရအပါအဝင် နယ်ပယ် အသီးသီးတွင် ဒီမိုကရေစီစနစ်၊ ပွင့်လင်းလူ့အဖွဲ့အစည်းတို့နှင့် လျော်ညီစေမည့် ပြုပြင်ပြောင်းလဲရေး လုပ်ငန်းများ အကောင်အထည်ဖော်စ ဖြစ်နေသောကြောင့် အထက်ဆိုခဲ့ပါ ရုပ်သံမီဒီယာ ကုမ္ပဏီ၏ လုပ်ဆောင်မှု၊ တုံ့ပြန်ဖြေရှင်းမှုကို လောလောဆယ် နားလည်ပေး၍ ရသေးသည်။

သို့သော် အပြိုင်အဆိုင် များလွန်း၊ မရေရာ မသေချာမှုများ ရောပြွမ်းလှသည့် ကမ္ဘာကြီးတွင် လုပ်ငန်း၊ ဈေးကွက်တစ်ခုသည် အချိန်တိုအတွင်း အောင်မြင်၊ ကျရှုံး၊ အကျိုးဖြစ်၊ ဆုံးရှုံးသွားနိုင်ခြေလည်း များသည်။ ယနေ့ခေတ်သည် စေတနာ၊ ဝန်ဆောင်မှုနှင့် ဆန်းသစ်တီထွင် ဖန်တီးမှုတို့ချင်း အထူးအားပြိုင်နေရသောခေတ်ဖြစ်သည်။ 

ဝန်ဆောင်မှုကောင်း၊ ဆန်းသစ်တီထွင်ဖန်တီးမှုကောင်းပါက အောင်မြင်နိုင်သည်။ သို့သော် စေတနာမပါလျှင် စားသုံးသူအပေါ် လေးစားမှု အားနည်းသည့်သဘော၊ မလေးစားသည့်သဘော သက်ရောက်သောကြောင့် အောင်မြင်မှုကို ရေရှည်ထိန်းသိမ်းနိုင်မည်မဟုတ်ပေ။ စီးပွားရေးနယ်ပယ် တစ်ခုတည်းတွင် သာမက အခြားသော နယ်ပယ်အားလုံးလည်း ထိုအတိုင်းပင် စေတနာသည်သာ အရင်းခံဖြစ်ကြောင်း သိစေလိုရင်းဖြစ်သည်။

အယ်ဒီတာ (၈-၂-၂၀၁၈)

  • TAGS