News

POST TYPE

EDITORIAL

အိုးမဲအသုတ်ခံနေသော ကြက်များနှင့် ပန်းတိုင် (Daily, Vol-5/No-258)
မြန်မာနိုင်ငံသား အချင်းချင်းအကြား ယနေ့အချိန်အထိ မသင့်မတင့် ဖြစ်နေခြင်း၊ တစ်ဖက်စွန်းစီမှ အပြန်အလှန် တိုက်ခိုက်နေကြခြင်း၊ အုပ်စုစွဲ၊ ဝါဒစွဲဖြင့် ရန် ငါ စည်းခြားနေခြင်းတို့မှာ မလှပခဲ့သော သမိုင်းကြောင်း၏ တုပ်နှောင်မှုကြောင့်ပင်လောဟု မေးခွန်းထုတ်စရာ ရှိလာသည်။

မြန်မာနိုင်ငံ လက်ရှိ ရင်ဆိုင်နေရသော အခက်အခဲ ပြဿနာများကို သေချာစွာ စေ့ငုဆန်းစစ်ကြည့်ပါက ပြင်ပ ပယောဂထက် မိမိတို့အချင်းချင်း မသင့်တင့်ကြခြင်း တစ်နည်းအားဖြင့် စည်းလုံးညီညွတ်မှု မရှိခြင်းက အဓိက တရားခံ ဖြစ်နေသည်ကို တွေ့ရသည်။

“နွားကွဲလျှင် ကျားဆွဲ”ဆိုသကဲ့သို့ အချင်းချင်းအကြား ညီညွတ်မှု မရှိခြင်းကြောင့် ဘေးပယောဂများ၊ ဖိအားများ၊ အနှောင့်အယှက်များဒဏ်ကို မခံနိုင်ဘဲ ဒုက္ခတွေ့နေရခြင်းဖြစ်သည်။

ယနေ့ ဖြစ်ပေါ်နေသော ပြဿနာ၊ အကျပ်အတည်း အများစုနောက်ကွယ်တွင် အချင်းချင်းအကြား သွေးကွဲ၊ ဆန့်ကျင်နေစေရန် တမင် ရည်ရွယ်ချက်ဖြင့် ရန်တိုက်ပေးနေသည့် အရိပ်လက္ခဏာများ တွေ့နေရသည်။ 

မြန်မာလူ့အဖွဲ့အစည်း၏ အမြင့်ဆုံး ဘာသာရေး နယ်ပယ်တွင်ပင် သက်ဆိုင်ရာ ဘာသာအသီးသီး၏ အစစ်အမှန် အဆုံးအမများ၊ မေတ္တာတရားများနှင့် သွေဖည်သော အဓမ္မ အတွေးအခေါ်များ၊ အမုန်းမီးများ တဖြည်းဖြည်း စိမ့်ဝင်လောင်မြိုက်လာသည်။

ထို့အတူ နိုင်ငံရေး၊ စီးပွားရေး၊ လူမှုရေး နယ်ပယ် အသီးသီးတွင်လည်း အုပ်စုစွဲ၊ ပုဂ္ဂိုလ်စွဲ၊ ဝါဒစွဲဆန်သော “မူ” ထက် “လူ”ကို ဦးတည်ပစ်မှတ်ထားသော အပြန်အလှန် စွပ်စွဲ၊ ပုတ်ခတ်၊ တိုက်ခိုက်မှုများ လွှမ်းမိုးလာသည်။

များသောအားဖြင့် ထိုသို့သော အချင်းချင်းအကြား သွေးကွဲ၊ ရန်စောင်လာကြခြင်းသည် အာဏာနိုင်ငံရေး ကစားပွဲကို မရိုးဖြောင့်သော နည်းလမ်းဖြင့် အနိုင်ရရှိရန် ကြိုးစားလာကြခြင်းက အဓိက အချက်ဖြစ်သည်။

ရခိုင်ပြဿနာသည်ပင်လျှင် အာဏာနိုင်ငံရေးကို ဗဟိုပြုထားသည့် ကစားကွက်တစ်ခုဖြစ်ပြီး မူလက ဤမျှလောက် ကြီးမားလာမည်ဟု မျှော်လင့်မထားဘဲ ပြဿနာကို မီးမွှေးခဲ့ခြင်းဖြစ်ပုံရကြောင်း ခန့်မှန်းသုံးသပ်မှုများ ရှိသည်။

ဆိုလိုသည်မှာ ခေတ်အဆက်ဆက် အာဏာကို ဗဟိုပြုကာ အိမ်ကြက်ချင်း အိုးမဲသုတ်ခွပ်နေကြခြင်းကြောင့် နိုင်ငံနှင့် ပြည်သူများက ကြားမှ မြေစာပင် ဖြစ်ကာ ငြိမ်းချမ်းရေး၊ ဒီမိုကရေစီအရေးနှင့် ဖွံ့ဖြိုးတိုးတက်ရေးကဲ့သို့ ပန်းတိုင်များ ဝေ၀ါးသွားရခြင်းကို ဆိုလိုသည်။

ယခု လတ်တလောကာလတွင်ပင် အာဏာနိုင်ငံရေး အဝန်းအဝိုင်းမှ အစွန်းနှစ်ဖက်ရှိ လူပုဂ္ဂိုလ်အချို့ လုပ်ကြံခံရခြင်း၊ ကွယ်လွန်ခြင်းကိုပင် ဝမ်းသာအားရဖြစ်ခြင်း၊ လူမြင်ကွင်း၌ လုပ်ကြံသတ်ဖြတ်သူကို ထောက်ခံ၊ ဝန်းရံခြင်းတို့မှာ လူ့ဘောင် လူ့ကျင့်ဝတ်များနှင့် ဖီလာပြုနေရုံမျှမက စုံလုံးကန်းနေသည့်သဘော သက်ရောက်နေပေသည်။ 

ထိုကဲ့သို့ အိုးမဲအသုတ်ခံကာ အချင်းချင်း ခွပ်နေသော ကြက်များ ရှိနေသမျှ မြန်မာနိုင်ငံနှင့် နိုင်ငံသားများ သွားချင်၊ ရောက်ချင်သော ရေတို၊ ရေရှည် ပန်းတိုင်များနှင့် အလှမ်းဝေးနေဦးမည်ဖြစ်ကြောင်း သိစေလိုရင်းဖြစ်သည်။

အယ်ဒီတာ (၆-၂-၂၀၁၈)