News

POST TYPE

EDITORIAL

မြေနိမ့်ရာ လှံစိုက်တတ်သည့် အတွေးအခေါ်ဆိုး (Daily, Vol-5/No-254)
03-Feb-2018 tagged as

မကြာသေးခင်က တက္ကစီဒရိုင်ဘာတစ်ဦး၏ မုဒိမ်းကျင့်သတ်ဖြတ်ခံခဲ့ရသော မိန်းကလေးတစ်ဦး၏ သတင်းထွက်ပေါ်လာပြီးနောက် မိန်းကလေးများ ရန်ကုန်မြို့တွင်း ညဘက် သွားလာသည့်ကိစ္စနှင့်ပတ်သက်၍ လူမှုကွန်ရက်များအပေါ်တွင် လွဲမှားသည့် ထင်မြင်သုံးသပ်ချက် များစွာကို တွေ့မြင်ခဲ့ရပေသည်။ အများစုက မုဒိမ်းကျင့် သတ် ဖြတ်ခံလိုက်ရသော အဆိုပါ မိန်းကလေးအတွက် အထူးပင် ဝမ်းနည်းကြောင်းစာနာသည့်သဘောဖြင့် ပြောဆိုကြသည်မှာ ဖြစ်သင့်ဖြစ်ထိုက်သော်လည်း မိန်းကလေး (အမျိုးသမီး)များ ညဘက် အပြင်ထွက်သည့်ကိစ္စကို မဖြစ်သင့်သည့်ကိစ္စသဖွယ် သတ်မှတ်ပြောဆိုကြသည်ကို တွေ့ရသည်မှာ လွန်စွာ စိတ်ပျက်စရာ ကောင်းလှပေသည်။ 

ရန်ကုန်မြို့တွင် ညဘက် ၈ နာရီ၊ ၉ နာရီခွဲကျော်မှ အလုပ်မှပြန်ရသည့် မိန်းကလေး များစွာရှိသလို အကြောင်းကိစ္စ အမျိုးမျိုးကြောင့် တစ်ဦးတည်း တစ်ယောက်တည်း အပြင်ထွက်ရသည့် အမျိုးသမီးများစွာလည်း ရှိသည်ကို ကောင်းစွာ သိထားလျက်နှင့် တစ်စုံတစ်ခုဖြစ်ပါက အပြင်ထွက်သူ မိန်းကလေး၏ အမှားသဖွယ် ဝေဖန်ပြောဆိုကြသည်မှာ လူ့အဖွဲ့အစည်းတွင်း ပြဿနာဖြေရှင်းရာ၌ စဉ်းစားပုံ စဉ်းစားနည်း ကြီးမားစွာ လွဲမှားနေသည့်အချက်ကို ဖော်ကျူးရာ ရောက်ပေသည်။ ညဘက် အပြင်ထွက်သည့် မိန်းကလေး တစ်စုံတစ်ခု ဖြစ်ပေါ်ပါက ၎င်း၏အပြစ်သာဖြစ်သည် ဟူသော စဉ်းစားနည်းမျိုးသည် ပြဿနာကို ဝိုင်းဝန်းတာဝန်ယူဖြေရှင်းလိုခြင်းထက် Victim Blaming သဘောမျိုးသို့ သက်ရောက်နေပေရာ မြန်မာတို့မနှစ် သက်သည့် လူ့အဖွဲ့အစည်း အချို့တွင်ရှိသည့် မုဒိမ်းကျင့်ခံရပါက အကျင့်ခံရသူမှာ အပြစ်ရှိသည်ဆိုသော အယူအဆမျိုးသို့ သက်ရောက်နေပေသည်။ 

အဆိုပါ စဉ်းစားနည်းအတိုင်း ဆိုပါက မြန်မာမိန်းကလေးများ အားလုံး အိမ်တွင်းပုန်းများသာ ဖြစ်ရဖွယ်ရှိခြေသည်။ ထို့ပြင် ယင်းအချက်ကိုကြည့်လျှင် လူ့အဖွဲ့အစည်းတွင်း တစ်ဦးနှင့်တစ်ဦး ပြဿနာမဖြစ်အောင် ပူးပေါင်း ကာကွယ်ပေးလိုသည့် စိတ်ဓာတ် လျော့ကျနေသလို Social Cohesion လုံးဝမရှိတော့သည့် သဘောမျိုးလည်းဖြစ်နေပေသည်။ အမှန်တွင် အမျိုးသမီးများလွတ်လပ်စွာ၊ လုံခြုံ စိတ်ချမှုရှိစွာ သွားလာနိုင်ရေးအတွက် မည်သို့ကြည့်ရှု စောင့်ရှောက်ကြမည်နည်း ဟူသော အချက်ကိုသာ စဉ်းစားကြရမည်ဖြစ်သည်။ 

ထို့အတူပင် ပြီးခဲ့သည့်ရက်ပိုင်းအတွင်း ဗေဒင်ဆရာတစ်ဦးက ဗေဒင်လာမေးသူ အမျိုးသမီးများနှင့် မိန်းကလေးများကို ကာအိနြေ္ဒပျက်ပြားအောင် လုပ်ခဲ့သည်ဟူသော သတင်းနှင့်ပတ်သက်၍လည်း လူမှုကွန်ရက်များအပေါ်တွင် လူအများစု၏ တုံ့ပြန်မှုမှာ ထိုနည်းအတိုင်းပင် ဖြစ်နေပြန်သည်။ စိတ်ပိုင်းဆိုင်ရာ နှစ်သိမ့်ဆွေးနွေးပေးသည့် စိတ်ကျန်းမာရေးဆရာဝန်(Psychiatrist)များဟုဆိုတိုင်း စိတ်မနှံ့သူ၊ မူးယစ်ဆေးစွဲသူတို့နှင့်သာ ဆိုင်သည်ဟူသော အယူအဆရှိသည့် မြန်မာ့လူ့အဖွဲ့အစည်းတွင် ကျန်းမာရေး၊ လူမှုရေး၊ ပညာရေး စသည်တို့နှင့်ပတ်သက်၍ စိတ်မချမ်းသာစရာ၊ မကျေနပ်ဖြစ်စရာ ရှိလာတိုင်း ဗေဒင်မေးသည့် အလေ့အထ ရှိသည်ကို သိပါလျက်နှင့် “ဗေဒင်မေးချင်မှတော့ ခံရပြီပေါ့” ဟူသော သဘောမျိုး ပြောဆိုကြသည်မှာလည်း ဝမ်းနည်းဖွယ်ဖြစ်ပေသည်။ 

အမှန်တွင် ဗေဒင်လာမေးသူများကို ကာအိနြေ္ဒ ပျက်ပြားအောင် ပြုမူဆက်ဆံသည်ဟု ကြားသိရပါက သက်ဆိုင်ရာ အာဏာပိုင်များက အသွင်ယူ စုံစမ်းဖော်ထုတ်မှုများ မလွဲမသွေ ပြုလုပ်ရမည်သာ ဖြစ်ပေသည်။ မည်သို့ပင်ဖြစ်စေ အထက်တွင် ထောက်ပြခဲ့သော ပြဿနာတစ်ခုဖြစ်တိုင်း Victim Blaming ခေါ် ကျူးလွန်ခံရသူကို အပြစ်ပုံချသည့် အကျင့်စရိုက်နှင့် အတွေးအခေါ်သည် ပြစ်မှုကျူးလွန်သူများကို တစ်ဖက်တစ်လမ်းက အားပေးအားမြှောက်ပြုရာ ရောက်သလို နိုင်ငံ၏ တရားဥပဒေ စိုးမိုးမှုနှင့် နိုင်ငံသားတို့၏ စိတ်ပိုင်းဆိုင်ရာ လွန်စွာအောက်တန်း ရောက်နေသည်ကို ဖော်ပြရာရောက်ကြောင်း အထူး သတိပေးလိုပေသည်။ ထို့အတူ အမျိုးသမီးများ အပါအဝင် နိုင်ငံသား အားလုံး လုံခြုံစိတ်ချစွာ သွားလာနိုင်ရေးကို အပြည့်အဝ တာဝန်ယူ စောင့်ရှောက်ပေးနိုင်မည့် အာဏာပိုင်များ မွေးထုတ်ပေးရန်လည်း နိုင်ငံတော်ကိုယ်တိုင် တာဝန်ရှိကြောင်း ဖော်ပြလိုပေသည်။ 

အယ်ဒီတာ (၁-၂-၂၀၁၈)

  • TAGS