News

POST TYPE

EDITORIAL

အဝေဖန်ခံနိုင်သော အစိုးရ ဖြစ်စေလို (Daily Vol-4/No-84)
18-Jul-2016
ဒီမိုကရေစီနည်းကျ ရွေးကောက်တင်မြှောက် ခံရသည့် အစိုးရ ဖြစ်လာလျှင် ပြည်သူလူထုက မျှော်လင့်ချက်ကြီးကြီး ထားကြခြင်းမှာ သဘာဝကျသည်။ ထို့အတူ အစိုးရတစ်ရပ်ကို အကြံပြုခြင်း၊ ဝေဖန်ခြင်း၊ အပြစ်တင်ခြင်းများ ရှိတတ်သည့် သဘာဝကိုလည်း လက်ခံနားလည်ပေးရန် လိုသည်။

ဖြတ်သန်းလာသော ပတ်ဝန်းကျင်နှင့် သင်ယူလေ့လာခဲ့သည့် ပုံစံများ ကွဲပြားခြားနားမှုကြောင့် လူအများအကြားတွင် မတူညီသော သဘောထားများ ရှိတတ်သည့် သဘာဝကိုလည်း အစိုးရ တာဝန်ထမ်းဆောင်သူများ နားလည်ပေးရန် လိုအပ်သည်။

ထို့ကြောင့် အကြံပြုခြင်း၊ ဝေဖန်ခြင်းနှင့် အပြစ်တင်ခြင်းများကို ခွဲခွဲခြားခြား သိရှိထားရန် လိုအပ်ပြီး ခံယူတတ်ပါက တစ်ခုချင်းအလိုက် မိမိတို့ အစိုးရအဖွဲ့ တိုးတက်ရာ တိုးတက်ကြောင်း တွန်းအားများအဖြစ် ကောက်ယူကာ အပြစ်ရှာရခက်သော ဖွံ့ဖြိုးရေးလုပ်ငန်းများ အသွင် ပြောင်းယူနိုင်သည်။ 

အကြံပြုခြင်း ဆိုသည်မှာ အစိုးရ၏ မူဝါဒရေးရာများ၊ စီမံကိန်း ရေးဆွဲမှုများ၊ စီမံကိန်း၊ နယ်ပယ်အသီးသီးအလိုက် အသိပညာရှင်၊ အတတ်ပညာရှင် တာဝန်ပေးမှုများ၊ အကောင်အထည်ဖော်မှု လုပ်ငန်းများကို မည်သို့ဆိုလျှင် ပိုကောင်းမည်ဟု ညွှန်ပြခြင်းပင် ဖြစ်သည်။

ဝေဖန်ခြင်း ဆိုသည်မှာ အထက်ဆိုခဲ့ပါ မူဝါဒ၊ စီမံကိန်း၊ ခန့်ထားတာဝန်ပေးမှု၊ အကောင်အထည်ဖော်မှုများမှ လွဲချော်၊ မှားယွင်းနေသည်များကို ပညာရပ်အားဖြင့်သော်လည်းကောင်း နိုင်ငံရေးအားဖြင့်သော် လည်းကောင်း ထောက်ပြခြင်း ဖြစ်သည်။

အထက်ဆိုခဲ့ပါ အကြံပြုခြင်းနှင့် ဝေဖန်ခြင်းတွင် ပိုကောင်းစေလိုသော စေတနာ ပါဝင်သည့်အတွက် ယင်းတို့ကို အချိန်ယူပြီး လေးနက်စွာ နားထောင်ခြင်း၊ လက်ခံပြုခြင်းအားဖြင့် အပေါင်းလက္ခဏာဆောင်သော အပြောင်းအလဲများ ရရှိနိုင်သည်။

အပြစ်တင်ခြင်းမှာမူ ရာနှုန်းပြည့် အနုတ်လက္ခဏာသဘော ဆောင်သည့်အတွက် ဥပေက္ခာ ရှုရမည် ဖြစ်သော်လည်း အပြစ်တင် မခံရစေရန် ကြိုးစားလိုစိတ်၊ အားနည်းချက် နည်းနိုင်သမျှ နည်းစေရန် အားထုတ်လိုစိတ် ဖြစ်စေရန် တွန်းအားအဖြစ် မှတ်ယူနိုင်သည်။

အာဏာရှင်စနစ်အောက်တွင် ခါးသီးစွာ ဖြတ်သန်းလာခဲ့သော ပြည်သူလူထု အနေနှင့် ရွေးကောက်ပွဲတွင် လွန်ကဲသော အချစ်၊ အမုန်းစိတ် နှစ်မျိုးဖြင့် တစ်ခဲတစ်နက် မဲပေးခဲ့ကြခြင်းကြောင့် လက်ရှိအစိုးရအပေါ်တွင် မျှော်လင့်ချက် ကြီးကြီးထားကြခြင်းမှာ အပြစ်မဆိုသာပေ။

မျှော်လင့်ချက်ကြီးသည့် အလျောက် အစိုးရ၏ လုပ်ကိုင်ဆောင်ရွက်မှုများကိုလည်း မျက်ခြည်မပြတ်ကြည့်ကာ ဝေဖန်၊ ထောက်ပြ၊ အကြံပြုကြသည်များ ရှိသလို အပြစ်တင် အဆိုးပြောခြင်းများလည်း ရှိတတ်သည်။

သက်ဆိုင်ရာ နယ်ပယ်အလိုက် ကျွမ်းကျင်နှံ့စပ်သူများ၊ ပညာရှင်များ၊ ပရော်ဖက်ရှင်နယ်များ၏ သုံးသပ်အကြံပြုချက်၊ ဆန်းစစ် ဝေဖန်ထောက်ပြချက်များကို လေးလေးစားစား နားထောင်ပေးခြင်းဖြင့် အဆိုးပြော အပြစ်တင်ခံရမှု နည်းပါးသော မူဝါဒနှင့် စီမံကိန်းများ ဖြစ်ပေါ်လာနိုင်သည်။

ထို့အပြင် အစိုးရ ဖြစ်လာပါက အဝေဖန်ခံနိုင်ရန် ပြင်ဆင်ထားရမည် ဖြစ်ပြီး အဝေဖန် မခံနိုင်လျှင် အစိုးရတာဝန် လက်ခံရန် မသင့်ပေ။ အစိုးရအပေါ် အချစ်လွန်ကာ လုပ်ကိုင်ဆောင်ရွက်သမျှ ခေါင်းညိတ်ထောက်ခံပေးနေပါလျှင် အလိုလိုက်ခံထားရသည့် ကလေးဆိုးသွမ်းသွားသည့်ပမာ လမ်းလွဲရောက်သွားနိုင်သည်ကိုလည်း သတိချပ်သင့်သည်။

ရန် ငါစည်းခြားသော အမြင်ဖြင့် ဝေဖန်၊ ထောက်ပြမှုများကို ဆန့်ကျင်သူ၊ ထောက်ခံသူ တံဆိပ် အလွယ်တကူကပ်ကာ မျက်မှန်စိမ်းတပ် ကြည့်နေပါက၊ ထိုသို့ မျက်မှန်စိမ်းတပ် ကြည့်သူများကိုသာ နေရာပေး၊ တာဝန်ပေးထားပါက ပြည်သူလူထု၏ စိတ်ပျက်မှု၊ သံသယဖြစ်မှုနှင့် ယုံကြည်မှု လျော့ပါးပျောက်ဆုံးကာ ပန်းတိုင်နှင့် အလှမ်းဝေးသထက် ဝေးသွားနိုင်ကြောင်း သိစေအပ်ပေသည်။

အယ်ဒီတာ (၁၇-၇-၂၀၁၆)