News

POST TYPE

EDITORIAL

ပန်းစီသော မင်္ဂလာပွဲနှင့် နိုင်ငံရေးရေချိန် (Daily, Vol-5/No-234)
10-Jan-2018 tagged as နိုင်ငံရေး

အွန်လိုင်း လူမှုကွန်ရက်ပေါ်တွင်လည်းကောင်း၊ ပြင်ပ လူမှုပတ်ဝန်းကျင်တွင်လည်းကောင်း ယခုရက်ပိုင်းအတွင်း ဝေဖန်ပြောဆိုမှု၊ ဆွေးနွေးငြင်းခုံမှု အများဆုံး ဖြစ်နေသည်မှာ NLD ပါတီ ဗဟိုကော်မတီအဖွဲ့ဝင် ဦးဝင်းထိန်၏သား မင်္ဂလာဆောင် ခမ်းနားကြီးကျယ်မှုနှင့်ပတ်သက်၍ ဖြစ်သည်။

လက်ရှိအစိုးရ သို့မဟုတ် NLD ပါတီနှင့် ဆန့်ကျင်ဘက် အယူအဆရှိသူများက အဆိုပါ မင်္ဂလာဆောင်၏ ခမ်းနားကြီးကျယ်မှုကို အငြိမ်းစား ဗိုလ်ချုပ်မှူးကြီး သန်းရွှေ၏သမီးလတ် မင်္ဂလာဆောင် “စိန်စီသောည”နှင့် နှိုင်းယှဉ်ကာ မသိမသာ တစ်မျိုး၊ သိသိသာသာတစ်မျိုး အပြစ်တင်၊ ရှုတ်ချ၊ ဝေဖန်နေကြသည်ကို တွေ့ရသည်။

အထက်ပါ အယူအဆရှိသူများနှင့် ဆန့်ကျင်ဘက်အမြင်ရှိသူ သို့မဟုတ်NLD ပါတီကို အမြဲထောက်ခံသူများကမူ ဆိုခဲ့ပါဝေဖန်၊ အပြစ်တင်မှုများမှာ အလွန်အကြူး ချဲ့ကားပြောခြင်းသာဖြစ်ကြောင်း၊ သတို့သားနှင့် သတို့သမီးတို့၏ ပညာအရည်အချင်း၊ အလုပ်အကိုင်တို့ကို ထောက်ချင့်ကာ ဤမျှသော ကုန်ကျစရိတ်မျိုး၊ ခမ်းနားမှုမျိုးကို နိုင်ငံတော်ဘဏ္ဍာ၊ ရိက္ခာ အလွဲသုံးစား မလုပ်ဘဲ အကုန်အကျခံနိုင်သူများဖြစ်ကြောင်း ခုခံတုံ့ပြန်ခဲ့ကြသည်။

စင်စစ်အားဖြင့် ဆိုခဲ့ပါ အမြင်နှစ်မျိုးစလုံး အလုံးစုံမမှန်သလို အကုန်အစင်လည်း မမှားဟု ဆိုနိုင်သည်။ ကဲ့ရဲ့ပြစ်တင်သော ရှုထောင့်မှ ပြောဆိုမှုများတွင်လည်း အလွန်အကြူး ချဲ့ကားခြင်းများရှိပြီး ခုခံချေပမှုများတွင်လည်း ဟာကွက်များ ရှိနေပေသည်။

ဖော်ပြပါ မင်္ဂလာပွဲသည် ယခင်စစ်အာဏာရှင်လက်ထက်က စစ်ဗိုလ်ချုပ်ကြီး များနှင့် ခရိုနီသူဌေးကြီးတို့၏ သား၊ သမီး မင်္ဂလာပွဲများနှင့် နှိုင်းယှဉ်ကြည့်ပါက ကြီးကျယ်ခမ်းနားသည်ဟု ပြောရန် ခက်လှသည်။

အခြားတစ်ဖက်တွင်လည်း လတ်တလော နိုင်ငံ၏ စီးပွားရေး အခြေအနေ ကျဆင်းနေစဉ်၊ ပြည်သူလူထုအများ စားဝတ်နေရေး ကျပ်တည်းနေစဉ် ပြည်သူလူထုအား ခြိုးခြံချွေတာကြရန် အစိုးရကိုယ်တိုင် ဆော်ဩနေစဉ် ဤမျှခမ်းနားသော မင်္ဂလာပွဲကြီး ခြိမ့်ခြိမ့်သဲ ကျင်းပခြင်းက အမြင်မတင့်လှကြောင်း ဝေဖန်သုံးသပ်မှုများလည်း ရှိနေပြန်သည်။

လက်ဆောင်ပစ္စည်း လက်ခံမှုမှအစ တန်ဖိုး အကန့်အသတ်ဖြင့် လက်ခံရန် တရားဝင် အမိန့်ကြော်ငြာစာထုတ်ကာ ဝန်ကြီးဌာနများ ပေါင်းခြင်း၊ ဒုတိယဝန်ကြီး များလျှော့ချခြင်းတို့ဖြင့် ကိုယ်တိုင်လည်း ခြိုးခြံချွေတာနေကြောင်း ပြသရန် ကြိုးစားခဲ့သည့် အာဏာရပါတီမှ ထိပ်သီးခေါင်းဆောင်တစ်ဦး၏ သားမင်္ဂလာပွဲကို ဤမျှခမ်းနားစွာ ကျင်းပခြင်းမှာ ကာယကံရှင်များ တတ်နိုင်သည့်တိုင် နိုင်ငံရေးအရ ထိုးနှက်စရာ၊ အထူး ထောက်ပြဝေဖန်စရာ ဖြစ်သွားခဲ့သည်။

အထူးသဖြင့် အာဏာရပါတီနှင့် အစိုးရတစ်ရပ်လုံးအပေါ် အထူးဩဇာကြီးသူအဖြစ် နာမည်ကျော်ပြီး မည်သည့်အရေးကိစ္စမဆို တည့်တိုးကျ၊ ပြင်းထန်လှသော ဝေဖန်မှတ်ချက်စကားများကြောင့် ဆန့်ကျင်ဘက် နိုင်ငံရေး အင်အားစုများ၏ အမြင်မကြည်လင်မှု၊ မီဒီယာများ၏ အထူးအာရုံစိုက်မှုကိုခံရသူ ဦးဝင်းထိန်၏သား မင်္ဂလာပွဲဖြစ်နေခြင်းက နိုင်ငံရေးအရ အားနည်းချက် သဘောဆောင်သွားခဲ့သည်။

မည်သို့ပင်ဖြစ်စေ အာဏာနိုင်ငံရေး နယ်ပယ်အတွင်းသို့ ရောက်ရှိလာသည်နှင့် လူပုဂ္ဂိုလ်တစ်ဦးချင်းဖြစ်စေ၊ အဖွဲ့အစည်းဖြစ်စေ လုပ်ကိုင်ဆောင်ရွက်သမျှ ကိစ္စတိုင်းသည် နိုင်ငံရေးနှင့် မဖြစ်မနေ ပတ်သက်နေမည် ဖြစ်သောကြောင့် စကားကို အကုန်မပြောရန်၊ ပြောပြီးပါကလည်း ပြောသည့်အတိုင်း စံပြလုပ်ပြရန်၊ အများပြည်သူ၏ အဝေဖန်ခံနိုင်ရန် အထူး အရေးကြီးလှကြောင်း သိစေလိုရင်း ဖြစ်သည်။

အယ်ဒီတာ (၉-၁-၂၀၁၈)