News

POST TYPE

EDITORIAL

မြန်မာ့ရှားလော့ဟုမ်းနှင့် ဆားပုလင်းနှင်းမောင်များ (Daily, Vol-5/No-230)
05-Jan-2018 tagged as



မြန်မာနိုင်ငံ၏ ပထမဆုံး အလွတ်စုံထောက်လုပ်ငန်းအဖွဲ့ချုပ်က အမှုအခင်းများ စုံစမ်းထောက်လှမ်းပေးရန် စိတ်ပါဝင်စားသူ လူငယ်များကို စတင်ခေါ်ယူပြီး စုံထောက်တစ်ယောက်၏ ရှိသင့်ရှိထိုက်သော အရည်အချင်းများ ရှိလာစေရေးအတွက် သင်တန်းများပေးရန် စီစဉ်လျက်ရှိကြောင်း သိရပါသည်။ စုံစမ်းထောက်လှမ်းသည်၊ နောက်ယောင်ခံလိုက်သည်၊ သတင်းပေးသည် သို့မဟုတ် ရဲထောက်လှမ်းရေး၊ ရဲသတင်းပေး၊ စစ်ထောက်လှမ်းရေးဟုကြားလျှင် အစိုးရအာဏာပိုင် အဖွဲ့အစည်းနှင့်သာ လုံးလုံးလျားလျား သက်ဆိုင်သည်ဟု ရှုမြင်ခဲ့ကြသည့် မြန်မာ့လူ့အဖွဲ့အစည်းအတွက် အလွတ်စုံထောက် ဟူသည့်ကိစ္စမှာ အတော်ပင် ထူးဆန်းသလို ဖြစ်နေမည်မှာ သေချာပါသည်။

စုံထောက်ဟု ဆိုလိုက်သည်နှင့် မြန်မာတို့စိတ်ထဲတွင် စွဲစွဲထင်ထင် ရှိနေသည်မှာ ဆေးတံတစ်ချောင်းကို အမြဲခဲထားလေ့ရှိသည့် ရှားလော့ဟုမ်းလိုဆားပုလင်း နှင်းမောင်လိုနာမည်ကျော်ဝတ္ထုဇာတ်ကောင်များသာဖြစ်ခဲ့ကြရာ ယခုလိုဝတ္ထုထဲက ရှားလော့ဟုမ်းနှင့် ဆားပုလင်းနှင်းမောင်ကဲ့သို့တကယ့်အလွတ်စုံထောက်များ စနစ်တကျမွေးထုတ်တော့မည့်ကိစ္စမှာလည်း ထူးထူးခြားခြားပင်ဖြစ်သည်ဟု ဆိုရပေမည်။

Private Investigator သို့မဟုတ် Private Detective ဟုခေါ်သည့် အစိုးရအာဏာပိုင်မဟုတ်သူများ မိမိကိုယ်ရေးကိုယ်တာ သို့မဟုတ်မိမိလုပ်ငန်း အတွက်အလွတ်သဘောငှားရမ်းနိုင်သည့်စုံထောက်လုပ်ငန်းမှာ အခြားနိုင်ငံများတွင်မူ လွန်စွာ လူသုံးများသည့် ဧရာမဝန်ဆောင်မှုလုပ်ငန်းကြီးသဖွယ်လည်းဖြစ်ပေသည်။ ကမ္ဘာ့ပထမဆုံး အလွတ်စုံထောက်အေဂျင်စီမှာ ပြင်သစ်လူမျိုး စစ်မှုထမ်းတစ်ဦးက စတင် ထူထောင်ခဲ့ပြီး ယခုမြန်မာ့ပထမဆုံး အလွတ်စုံထောက်အဖွဲ့မှာမူ ရဲအရာရှိဟောင်း၊ စစ်ထောက်လှမ်းရေး အရာရှိဟောင်းများဖြင့် ဦးဆောင် ဖွဲ့စည်းခဲ့ခြင်းဖြစ်သည်ဟု သိရပေသည်။

အိမ်ထောင်ရေး ဖောက်ပြန်မှုကအစ စီးပွားရေးလုပ်ငန်း မသမာမှုများ အပါအဝင် ဥပဒေရေးရာ ပြဿနာကြီးများအထိ စုံစမ်းထောက်လှမ်းမှုများ ပြုလုပ်ပေးမည့် အဆိုပါ မြန်မာ့ပထမဆုံး စုံထောက်အဖွဲ့အနေနှင့် အထူးသတိပြုရမည့်အချက်မှာ အလွတ်စုံထောက် တစ်ဦးချင်းစီ၏ အသက်အန္တရာယ်နှင့် လုံခြုံရေးကိစ္စပင်ဖြစ်မည်ဟု ထင်ပါသည်။ အခြားနိုင်ငံများတွင်မူ စုံထောက်အေဂျင်စီများသည် တရားဝင်လိုင်စင်ဖြင့် လုပ်ကိုင်ကြပြီး ယင်းနိုင်ငံတို့၏ ဥပဒေများအရ လက်နက်ကိုင်ဆောင်ခွင့်ရှိသည့် အလွတ်စုံထောက်များရှိသလို ကိုင်ဆောင်ခွင့် မရရှိသူများလည်း ရှိကြပါသည်။ ယခု မြန်မာ့ပထမဆုံး စုံထောက်အဖွဲ့မှာမူ ပြည်ထဲရေးဝန်ကြီးဌာနက တရားဝင်ခွင့်ပြုချက် သို့မဟုတ် လိုင်စင်မပေးထားသော်လည်း လုပ်ငန်းလည်ပတ်မှု တစ်နှစ်နီးပါးပင် ရှိနေသည်မှာ ထူးထူးခြားခြားပင်ဖြစ်သည်။ ယနေ့ခေတ်သည် အိုင်တီနှင့် အခြားဆက်စပ် နည်းပညာများ မြင့်မားလာသည့် ခေတ်ကာလတစ်ခုဖြစ်ရာ အလွတ်စုံထောက်များအနေနှင့် ဝတ္ထုဇာတ်ကောင် ရှားလော့ဟုမ်းနှင့် ဆားပုလင်းနှင်းမောင်တို့ ခေတ်ကာလက ကြုံတွေ့ရသည့် ဆက်သွယ်ရေး အခက်အခဲများကိုတော့ ကောင်းစွာ ကျော်လွှားနိုင်လိမ့်မည်ဟု ယူဆမိပေသည်။

“လူတစ်ခုပူမှုရယ်ကဆယ်ကုဋေ”၊ “အသက်တစ်ရာ မနေရပေမယ့် ပြဿနာ တစ်ရာမကကြုံရ”ဟူသည့် ဆိုရိုးစကားအတိုင်းသာ ဆိုပါက လူတိုင်း၊ စီးပွားရေး လုပ်ငန်းတိုင်း၊ အဖွဲ့အစည်းတိုင်းတွင် ပြဿနာများ အမြဲရှိနေမည်ဖြစ်ရာ အလွတ်စုံထောက်များအနေနှင့် ပြဿနာ ရှင်းပေးရန် အလုပ်အပ်လာသူများကို မည်မျှအတိုင်း အတာအထိ ထိထိရောက်ရောက် ဖြေရှင်းပေးနိုင်မည်မှာလည်း အထူးပင် စိတ်ဝင်စားစရာပင်ဖြစ်ပေသည်။ ထို့ထက်ပို၍ စိတ်ဝင်စားစရာလည်း ကောင်းသလို အရေးကြီးသည်ဟု ယူဆမိသည်မှာ တည်ဆဲဥပဒေများနှင့် ကန့်သတ်တားမြစ်မှုများကို ချိုးဖောက်မှုမရှိစေဘဲ ကြီးမားရှုပ်ထွေးသည့် Case များကို မည်မျှအတိုင်းအတာအထိ စုံစမ်းထောက်လှမ်းနိုင်မည်နည်းဟူသည်ပင်။ အကြောင်းမှာ မြန်မာ့ပထမဆုံး အလွတ်စုံထောက်များအနေနှင့် ရှားလော့ဟုမ်းနှင့် ဆားပုလင်းနှင်းမောင်ဝတ္ထုများထဲကလို စိတ်ကူးယဉ်မဟုတ်ဘဲ အမှန်တကယ် ဇာတ်အိမ်နက်လှသည့်ပြဿနာ ကြီးများနှင့်လည်း မလွဲမသွေ ရင်ဆိုင်ကြုံတွေ့ရမည်ဖြစ်သည်ကို အထူးသတိပြုစေလိုသောကြောင့်ပင် ဖြစ်ပေသည်။

အယ်ဒီတာ (၄-၁-၂၀၁၇)

  • TAGS