News

POST TYPE

EDITORIAL

ရွှေတိဂုံကိုမြင်လျှင် (Weekly, Vol-12/No-25)
17-Jul-2016

မြန်မာနိုင်ငံတွင် အထင်ရှားဆုံး၊ အကျော်ကြားဆုံး၊ လူသိအများဆုံး၊ နေ့စဉ်လာရောက်သည့် ပရိသတ်အများဆုံး၊ လှူဒါန်းသည့် ဝင်ငွေရရှိမှု အများဆုံး၊ နိုင်ငံ၏ အထိမ်းအမှတ် သင်္ကေတ အဖြစ်ဆုံးကို ပြပါဆိုလျှင် ရွှေတိဂုံစေတီတော်ကို ညွှန်ပြရမည် ဖြစ်သည်။

ထို့အပြင် ရွှေတိဂုံစေတီတော်တွင် ကပ်လှူပူဇော်ထားသော ရွှေပြား၊ ရွှေသင်္ကန်းများ၏ စုစုပေါင်း အလေးချိန်မှာ ၂၇ မက်ထရစ်တန်အထိ ရှိနေရာ ကမ္ဘာပေါ်တွင် ရွှေအများဆုံး စုဝေးနေသော စေတီတော်ဟုလည်း သတ်မှတ်နိုင်သည်။

ရှေးယခင် ခေတ်အဆက်ဆက်ကမူ ရွှေတိဂုံစေတီတော်ကြီး၏ ကိစ္စအဝဝကို ပြည်သူအများက ကြည်ညိုလေးစားသည့်၊ သိက္ခာသမာဓိနှင့် ပြည့်စုံသော မြို့မိ၊ မြို့ဖ လူကြီးများ ပါဝင်သည့် ဂေါပကအဖွဲ့က စီမံခန့်ခွဲခဲ့ကြသည်။

၁၉၉၀ ပြည့်လွန်နှစ် နောက်ပိုင်းတွင်မူ ဂေါပကအဖွဲ့ကို တပ်မတော်အငြိမ်းစား အရာရှိကြီးများ အစားထိုး ဝင်ရောက်လာပြီးနောက် အာဏာပိုင်တို့၏ စွက်ဖက်မှုဖြင့် ‘အနိစ္စ’ ကို အခြေခံသော ဗုဒ္ဓ၏ ဓမ္မနှင့် ချိန်စက်ကြည့်လျှင် မဆီလျော်သည့် ရွှေတိဂုံစေတီတော် ‘ထာဝရ’ ဘက်စုံပြုပြင်မွမ်းမံရေး ခေါင်းစဉ်တပ်ကာ ရှေးဟောင်းအနုလက်ရာများကို တစ်ခုချင်း ဖြုတ်ချလှဲလှယ်မှု လုပ်ငန်းများ စတင်လုပ်ဆောင်ခဲ့သည်။

ရွှေတိဂုံစေတီတော်ရှိ သမိုင်းဝင်တန်စောင်းများ၊ အာရုံခံဇရပ်များ၊ အတက်လှေခါး စောင်းတန်းများရှိ တန်ဖိုးမဖြတ်နိုင်သော၊ မတုပနိုင်သော သစ်သားရုပ်လုံးကြွ ပန်းပုလက်ရာများ၊ ခြူးပန်း၊ ခြူးနွယ်၊ ကနုတ်များ၊ စုလစ်မွန်းချွန်များ ပါဝင်သည့် ရှေးဟောင်းသစ်သားလက်ရာမွန်များ၊ ဗိသုကာလက်ရာများ ပျောက်ကွယ်သွားခဲ့ပြီး ယင်းနေရာများတွင် မည်သည့်သံဖြူတန်းတွင်မဆို မည်သည့်အချိန်တွင်မဆို ထုတ်လုပ်နိုင်သည့် အရောင်တဝင်းဝင်း တောက်နေသည့် သံဖြူ၊ ရွှေရောင်ကနုတ်၊ စုလစ်မွန်းချွန်များ အစားထိုး ဝင်ရောက်နေပေသည်။

ရွှေတိဂုံစေတီတော်ကို တက်ရောက်နိုင်သော စောင်းတန်းလေးသွယ်သည် တည်ဆောက်စဉ်ကပင် ဘုရားဖူးများနှင့် ဈေးသည်များ လေဝင်လေထွက် ကောင်းကောင်း၊ အလင်းရောင် လုံလုံလောက်လောက် ရရှိစေရန် မြင့်မားခန့်ညားသည့် ဗိသုကာ လက်ရာမွန်ဖြင့် တည်ဆောက်ထားခဲ့ခြင်း ဖြစ်သည့်အတွက် နေ့ခင်းအချိန်များတွင် လျှပ်စစ်မီး ထွန်းစရာ မလိုပေ။

တောင်ဘက်မုခ်အတက် စောင်းတန်းကို အသစ်ပြန်လည် တည်ဆောက် ပြုပြင်လိုက်သောအခါ မူလအမြင့်ပေထက် နိမ့်သွားသည့်အပြင် စောင်းတန်းအဝင်ထိပ်တွင် မုခ်ဦးတစ်ခု ပိတ်၍ ဆောက်လိုက်သည့်အတွက် လက်ရှိမြင်ရသည့်အတိုင်း နေ့ခင်း လျှပ်စစ်မီး ပျက်သွားပါက အလင်းရောင် လုံလောက်စွာ မရရှိတော့သည့်အပြင် လေဝင်လေထွက် မကောင်းခြင်းကြောင့် ယင်းစောင်းတန်းမှ တက်သည့်အခါ အသက်ရှု မဝသကဲ့သို့ ခံစားရပေသည်။

အနီးစပ်ဆုံးအားဖြင့် ပါလီမန် ဒီမိုကရေစီခေတ် မတိုင်မီက သိမ်ကြီးဈေးမှ ဈေးသူ၊ ဈေးသားများ နေ့စဉ် နှစ်ပြားစီ စုဆောင်း၍ ဆောက်လုပ်လှူဒါန်းထားသော ဂန္ထဝင်ဆန်စွာ မြင့်မားခန့်ထည်လှသည့် နှစ်ပြားတန်စောင်းခေါ် အနောက်ဘက် လှေခါးစောင်းတန်း၊ မုခ်ဦး၊ ခြင်္သေ့ကြီး နှစ်ကောင်တို့၏ လက်ရာမွန်နှင့် တောင်ဘက်မုခ်၊ စောင်းတန်းတို့ နှိုင်းယှဉ်ကြည့်နိုင်ပေသည်။

ရွှေတိဂုံသည် စင်စစ်အားဖြင့် မြတ်ဗုဒ္ဓ၏ အဆုံးအမကို လေးနက်စွာ ခံယူကျင့်သုံးသော မြန်မာတို့၏ မြတ်စွာဘုရားအပေါ် မည်မျှ ကြည်ညိုကြောင်း၊ သဒ္ဒါတရား ထက်သန်ကြောင်း ပြသနေသည့် လက်တွေ့သာဓကတစ်ရပ် ဖြစ်ပြီး မြတ်ဗုဒ္ဓကို ရည်ညွှန်း၍ ရွှေတိဂုံစေတီတော်တွင် လှူဒါန်းမှု အစုစုသည် လှူဒါန်းသူများ၏ မျက်မှောက်၊ အနာဂတ်နှင့် သံသရာ ခရီးအတွက် အထောက်အပံ့ကောင်းများ ဖြစ်သည်။

သို့သော် လတ်တလောအားဖြင့် ဆင်းရဲနုံချာလှသော ပြည်သူအများစု ရှိနေသော နိုင်ငံတစ်ခုအတွက် ရွှေကျောင်းပြောင်ပြောင် ဝမ်းခေါင်ခေါင် သဘောမျိုး ဖြစ်မသွားစေရေးအတွက် ရွှေတိဂုံ ဖောင်ဒေးရှင်းကဲ့သို့ အဖွဲ့အစည်းမျိုး ထူထောင်ကာ ဘာသာရေးအပြင်၊ ပညာရေး၊ ကျန်းမာရေး ပါဝင်သော လူမှုရေး နယ်ပယ်များကိုလည်း စွန့်ကြဲလှူဒါန်းခြင်းဖြင့် နိုင်ငံတည်ဆောက်ရေးတွင် ဗုဒ္ဓအလိုကျ အလှူဒါနဖြင့် ပါဝင်ကူညီနိုင်ကြောင်း မေတ္တာဖြင့် အကြံပြု တိုက်တွန်းအပ်ပေသည်။

အယ်ဒီတာ (၁၃-၇-၂၀၁၆)