News

POST TYPE

EDITORIAL

ဂုဏ်သိက္ခာရှိသည့် နိုင်ငံရေးပြိုင်ဘက် ( Daily, Vol-5/No-204 )
06-Dec-2017 tagged as

ယခင် အမျိုး၊ ဘာသာ၊ သာသနာ စောင့်ရှောက်ရေးအဖွဲ့ (မ.ဘ.သ) ၏ ခေါင်းဆောင်ပိုင်း လူပုဂ္ဂိုလ်များ ဦးဆောင် ဖွဲ့စည်းထားသည့် နိုင်ငံရေးပါတီတစ်ခု ပါတီထူထောင်ခွင့် လျှောက်ထားရာ၌ ပယ်ချခံရမှုအပေါ် အဆိုပါပုဂ္ဂိုလ်များ မကျေမနပ်ဖြစ်လျက်ရှိပြီး ရွေးကောက်ပွဲ ကော်မရှင်ထံသို့ ယင်းသို့ငြင်းပယ်ရသည့် အကြောင်းအရင်းကို တောင်းခံရန် စီစဉ်နေသည်ဟု သိရပါသည်။ NLD ပါတီဦးဆောင်သော ဒီမိုကရေစီအစိုးရ မပေါ်ပေါက်မီ ကာလကတည်းက မြန်မာ့နိုင်ငံရေး အင်အားစုများအကြား၊ အထူးသဖြင့် မြန်မာပြည်သူ အများစု ထောက်ခံကြသည့် NLD ပါတီကို အမျိုးသားရေး ရှုထောင့်၊ ဘာသာသာသနာ ကာကွယ်ရေး ရှုထောင့်မှရပ်ကာ ထိုးနှက်မှုများ ပြုလုပ်သည်ဟု ပုံဖော်ခံခဲ့ရပြီး နိုင်ငံရေးအရ အငြင်းပွားစရာများကို ဖြစ်ပေါ်စေခဲ့သည့် မ.ဘ.သ အဖွဲ့နှင့်ပတ်သက်၍ The Voice Daily တွင် “ဗုဒ္ဓဘာသာနှင့် နိုင်ငံတော်အာဏာ”ဟူသော သုတေသန အစီရင်ခံစာတစ်ရပ်ကို အခန်းဆက် ဘာသာပြန်ဖော်ပြခဲ့ပြီးဖြစ်ရာ ယင်းအဖွဲ့အကြောင်း ထွေထွေထူးထူး ရှင်းပြရန်လိုမည် မဟုတ်ပေ။ 

သို့သော် သေချာသည့်အချက် တစ်ခုကို ပြောပါဟုဆိုလျှင် မ.ဘ.သ ဆိုသည်နှင့် မြန်မာတို့၏ စိတ်ထဲတွင် လူမျိုးခြား အကျိုးစီးပွားကို မလိုလားသည့် အဖွဲ့အစည်းအဖြစ်သော်လည်းကောင်း၊ နိုင်ငံတော်အတိုင်ပင်ခံပုဂ္ဂိုလ် ဦးဆောင်သော အစိုးရကို တစ်မျိုးတစ်ဖုံ ဆန့်ကျင်နေသည့်အဖွဲ့အဖြစ်လည်းကောင်း ယေဘုယျ ရှုမြင်လေ့ရှိသည်ဟု ယူဆမိပါသည်။ ပို၍ ပွင့်ပွင့်လင်းလင်း ပြောရလျှင် နှစ်များစွာ နိုင်ငံရေး ခရီးကြမ်းကြီးကို ခဲရာခဲဆစ် လျှောက်လှမ်းခဲ့သည့် ဒီမိုကရေစီ အင်အားစုများအား အမျိုးသားရေး လက်နက်ဖြင့် ထိုးနှက်မည့် မျိုးချစ်အင်အားစုအဖြစ် ပုံဖော်ခံထားရသောအဖွဲ့ဟု ဆိုလျှင်မှားမည် မဟုတ်ပေ။ 

အဆိုပါ မ.ဘ.သ အဖွဲ့ ပါတီထောင်ခွင့်ရရေး၊ မရရေးမှာ နိုင်ငံရေးပါတီ မှတ်ပုံတင်ခြင်းကို လက်ခံဆောင်ရွက်သည့် ကော်မရှင်မှ သက်ဆိုင်ရာ တာဝန်ရှိသူများနှင့် မ.ဘ.သ အဖွဲ့မှ လူပုဂ္ဂိုလ်များ ဆက်လက် ညှိနှိုင်းရမည့်ကိစ္စဖြစ်သောကြောင့် မည်သူမှားသည်၊ မည်သူမှန်သည်ကို အကျယ်တဝင့် မပြောလိုပေ။ ဂျာမန်ပြည်သူ အများစုသာမက တစ်ကမ္ဘာလုံးက မုန်းတီးသည့် နာဇီပါတီသည်ပင် ယနေ့အချိန်တွင် ဂျာမန်အမျိုးသား ဒီမိုကရက်တစ်ပါတီ ဟူသောအမည်ဖြင့် ပါတီတစ်ခုအဖြစ် ဂျာမနီတွင် ရှိနေသေးသည်မှာ ကွဲပြားခြားနားမှုကို အလေးပေးသည့် ဒီမိုကရေစီစနစ်၏ အမြင့်ဆုံး စံနှုန်းတစ်ရပ်ဖြစ်ရာ မ.ဘ.သ လို အဖွဲ့မျိုးမှ လူပုဂ္ဂိုလ်တို့အနေနှင့် ပါတီထူထောင်ခွင့် မရနိုင်စရာ အကြောင်းမရှိပေ။ သို့သော် ဒီမိုကရေစီစနစ်အောက်မှ နိုင်ငံရေးဟူသည် နောက်လိုက် မည်မျှရှိ၊ မရှိဟူသောကိစ္စက အဓိက အခရာကျနေပေရာ တစ်ချိန်တစ်ခါက ဟုန်းဟုန်းတောက်ခဲ့သော နာဇီပါတီမှာ ပါတီရုံးခန်းနှင့် လက်ယာစွန်းမျိုးချစ်  အနည်းငယ်တို့၏ နိုင်ငံရေး အဖွဲ့အစည်းမျှသာ ဖြစ်နေပေသည်။ 

မည်သည့်နိုင်ငံ၊ မည်သည့်လူ့အဖွဲ့အစည်းတွင်မဆို နိုင်ငံနှင့် လူမျိုးတို့ ကောင်းစားရေး၊ နိုင်ငံနှင့် လူမျိုးတို့ အလေးပေး တန်ဖိုးထားသော အရာများ မပျောက်ပျက်ရေးကို လိုလားကြသည့် နိုင်ငံရေး ခေါင်းဆောင်များနှင့် ပါတီအဖွဲ့အစည်းများ ရှိကြစမြဲဖြစ်ပါသည်။ နိုင်ငံနှင့် လူမျိုး (နိုင်ငံသားများ) အပေါ် ချစ်ကြသည့် စိတ်တူညီသော်လည်း လုပ်နည်းလုပ်ဟန်နှင့် လက်ကိုင်ကျင့်သုံးသည့် မူဝါဒများအပေါ် မူတည်ပြီး နောက်လိုက် အနည်း အများ ကွာခြားနေခြင်း ဖြစ်ပါသည်။ တစ်မျိုး ထပ်ပြောရလျှင် ပြည်သူအများစု၏ အသည်းနှလုံးထဲက ယုံကြည်မှုကိုရသူတို့သာ လုပ်ပိုင်ခွင့်အာဏာ ရရှိကြခြင်းဖြစ်ပေသည်။ သို့အတွက်ကြောင့် အစွန်းရောက်မှု၏ ခြိမ်းခြောက်မှု ခံနေရပြီး အစွန်းရောက် ဝါဒီတို့ လွှမ်းမိုးလာမည်ကို အထူး စိုးရိမ်နေရသော ယနေ့ကမ္ဘာကြီးတွင် အစွန်းရောက်သည့် မူဝါဒများကို ရှောင်ရှားပြီး နိုင်ငံနှင့် ပြည်သူတို့၏ အကျိုးအတွက် နည်းမှန် လမ်းမှန်ဖြင့် ရိုးသားစွာ လုပ်ဆောင်ပေးနိုင်သည်ဆိုပါက မည်သည့် နိုင်ငံရေးပါတီမဆို ထောက်ခံမှုများ မလွဲမသွေ ရရှိမည်သာဖြစ်ကြောင်း ဖော်ပြလိုရင်း ဖြစ်ပေသည်။ 

အယ်ဒီတာ (၅-၁၂-၂၀၁၇)

  • TAGS