News

POST TYPE

EDITORIAL

ပရိသတ်အကြိုက် လုပ်သူနှင့် ပရိသတ်အကျိုးကို စဉ်းစားသူ (Daily, Vol-5/No-202)
04-Dec-2017 tagged as

အိုင်တီနည်းပညာနှင့် စမတ်ဖုန်းများ အထူး အသုံးဝင်လာသည့် ယနေ့ခေတ်တွင် နည်းပညာ ကုမ္ပဏီများလည်း စားသုံးသူများ၏ အာရုံကို ဖမ်းစားနိုင်ရေးအတွက် နည်းမျိုးစုံဖြင့် ကြော်ငြာနိုင်ရန် ကြိုးပမ်းကြသလို ဈေးကွက်နေရာ ရရှိရန်လည်း သမားရိုးကျ မီဒီယာများ သာမက လူမှုကွန်ရက် မီဒီယာ ပလက်ဖောင်း အမျိုးမျိုးကို အသုံးပြုလျက်ရှိသည်ကို တွေ့ရပါသည်။ ထို့အတူ အခြား မော်တော်ကား၊ တီဗီ၊ ရေခဲသေတ္တာ အပါအဝင် လူသားတို့ အသုံးပြုမည့် ကုန်ပစ္စည်းများ ထုတ်လုပ်သည့် ကုမ္ပဏီများလည်း အလားတူပင် မိမိ၏ ဈေးကွက် ကျယ်ပြန့်သည့်ထက် ကျယ်ပြန့်လာအောင်၊ စားသုံးသူများ၏ ယုံကြည်စိတ်ချမှု ရရှိလာအောင် အထက်ပါအတိုင်းပင် ရုန်းကန်ကြိုးစားလျက် ရှိကြသည်ကို တွေ့ရပါမည်။ 

မည်သို့ပင် စားသုံးသူ၊ တစ်နည်းအားဖြင့် မိမိ၏ ပရိသတ်တိုးပွားရေးအတွက် နပန်းလုံးကြသည်ဖြစ်စေ ၎င်းတို့၏ ထုတ်ကုန်များ၏ မတူညီသော အရည်အသွေး၊ စားသုံးသူအပေါ် ထားရှိသည့် သဘောထားတို့ကြောင့် ပရိသတ် အနည်း၊ အများဟူသည် အမြဲပင်တစေ ကွာခြားလျက် ရှိနေပေသည်။ ထို့အတူ အဆိုပါ ထုတ်ကုန် အရည်အသွေးနှင့် သဘောထားတို့ကြောင့်ပင် ကုန်ပစ္စည်း အမှတ်တံဆိပ်တို့၏ ဩဇာမှာလည်း အလားတူ ကွာခြားလျက် ရှိစမြဲဖြစ်ပါသည်။ 

မျက်မှောက်ခေတ် စမတ်ဖုန်း လောကတစ်ခုတည်းကို ကြည့်မည်ဆိုလျှင် စမတ်ဖုန်း ထုတ်လုပ်သည့် ကုမ္ပဏီအချို့က လူသိများအောင် မိတ်ဆက်ပွဲ အမျိုးမျိုး၊ ပရိုမိုးရှင်းပွဲ အဖုံဖုံ ပြုလုပ်ကာ မီဒီယာများကို တကူးတက ဖိတ်ခေါ်နေရချိန်တွင် အချို့သော စမတ်ဖုန်း ကုမ္ပဏီမှာ မည်သည့် ပရိုမိုးရှင်းမျှ တကူးတက လုပ်နေစရာပင် မလိုဘဲ မီဒီယာများ ကိုယ်တိုင်ကပင် ၎င်းတို့ ဝက်ဘ်ဆိုက်ကသာ ထုတ်ပြန်သည့် စမတ်ဖုန်း အသစ်အကြောင်းကို တခုတ်တရ စောင့်ကြည့်ကာ ပရိသတ်သိအောင် မိတ်ဆက် ရေးသားပေးကြရသည်။ ကြော်ငြာသည့်သဘော ဖြစ်မည်စိုးသောကြောင့် အရှင်းဆုံး ဥပမာတစ်ခုကိုသာ တိုတိုနှင့် လိုရင်းပြောရလျှင် Android နှင့် iOS ဖြစ်ပေသည်။ 

ကုန်ပစ္စည်းချင်း တူသော်လည်း ဩဇာချင်း မတူညီကြရသည့် အကြောင်းရင်းများစွာ ရှိကောင်း ရှိပါမည်။ သို့သော် စားသုံးသူဟူသည့် ပရိသတ်အပေါ် ထားရှိသည့် စေတနာကိုလိုက်၍ ဩဇာ လွှမ်းမိုးမှုများ အလွန်အမင်း ကွာခြားသွားကြခြင်းပင်ဖြစ်သည်။ အဆိုပါ စေတနာကသာလျှင် ထုတ်ကုန်၏ အရည်အသွေးကိုသော်လည်းကောင်း၊ တန်ဖိုးကိုသော်လည်းကောင်း မြှင့်တင်ပေးနိုင်သလို တစ်ဖက်တွင် ပရိသတ်၏ ယုံကြည်စိတ်ချမှု ရရှိအောင်ပါ တစ်ပါတည်း ဖန်တီးပေးနိုင်ခြင်းဖြစ်သည်။ အမှန်တွင် မည်သူမဆို၊ မည်သည့် ကုန်ပစ္စည်း ထုတ်လုပ်သည့် ကုမ္ပဏီလုပ်ငန်းကြီးမဆို မိမိထုတ်လုပ်သည့် ပစ္စည်းအောင်မြင် ကျော်ကြားသည်ကို မြင်လိုတွေ့လိုသည့် ဆန္ဒရှိကြသည်ချည်းသာပင် ဖြစ်သော်လည်း ပရိသတ်ဟူသည့် စားသုံးသူ အကြိုက်လိုက်သူနှင့် စားသုံးသူတို့အတွက် အမှန်တကယ် အဆင်ပြေမည့်ကိစ္စကို ဦးစားပေးသူ ဟူ၍ နှစ်မျိုးနှစ်စား ကွဲပြားသွားခြင်းကြောင့်သာ ဩဇာနှင့် တန်ဖိုးတို့ ကွာသွားခြင်းသာဖြစ်ပေသည်။ 

ဤအချက်မှာ စမတ်ဖုန်းနှင့် အခြားကုန်ပစ္စည်း ထုတ်လုပ်သူများ သာမက နေ့စဉ်နှင့် အပတ်စဉ်ထုတ် သတင်းစာများ အပါအဝင် နိုင်ငံရေး၊ စီးပွားရေးနယ်ပယ်တွင် ရှိသူအားလုံးတို့ အလေးအနက် စဉ်းစားရမည့်အချက်ပင် ဖြစ်ပေသည်။ သာမန်လူတို့သည် လူတို့အကြိုက် လုပ်လို၊ ပြောလို၊ ဖန်တီးပေးလိုသည်မှာ သဘာဝပင်ဖြစ်ပေသည်။ အသိဉာဏ်ကြီးရင့်သူတို့ကား ပရိသတ်အကြိုက်ကို ပြောချင်မှ ပြောသလို လုပ်ပြချင်မှလည်း လုပ်ပြတတ်ပေသည်။ သို့သော် အသိဉာဏ် ကြီးရင့်သူတို့သည် နောက်လိုက် ပရိသတ်တို့၏ စစ်မှန်သော အကျိုးကိုသာ အစဉ် ရှေးရှုလေ့ရှိပြီး ယင်းပရိသတ်၏ အကျိုးစီးပွားကို ငွေကြေးအမြတ်အစွန်းထက် ပို၍တန်ဖိုးထားသူများဖြစ်သည်ကို ဖော်ပြလိုရင်း ဖြစ်ပေသည်။ 

အယ်ဒီတာ (၃-၁၂-၂၀၁၇)

  • TAGS