News

POST TYPE

EDITORIAL

ဟိုင်းဝေးလမ်းပေါ်က အလွဲတစ်ခု၏ နောက်ကွယ် (Daily, Vol-5/No-186 )
14-Nov-2017 tagged as

ယခင် ရန်ကုန်-မန္တလေး အဝေးပြေးလမ်းဟောင်း အပါအဝင် နယ်မြို့များကို သွားသည့် အဝေးပြေးလမ်းမကြီးများပေါ်တွင် မောင်းနှင်နေသော မော်တော်ယာဉ်များ နှစ်ပေါင်း ကြာမြင့်စွာ အသုံးပြုနေသော အချက်ပြစနစ်ကို သက်ဆိုင်ရာ ယာဉ်စည်းကမ်းနှင့် လမ်းစည်းကမ်းထိန်းသိမ်းရေး အာဏာပိုင်များက အပြောင်းအလဲ လုပ်ရန် ကြိုးပမ်းလျက်ရှိပြီး ယင်းစနစ် ဆက်သုံးနေသည့် ကားများကိုလည်း ဓာတ်ပုံ သို့မဟုတ် ဗီဒီယိုရိုက်ကူး မှတ်တမ်းတင်ကာ အရေးယူ ဖမ်းဆီးရန်အထိ လုပ်ဆောင်လျက်ရှိသည်ဟု သိရပါသည်။ လွဲမှားနေသည့် အချက်ပြစနစ်ကို မှန်မှန်ကန်ကန် ဖြစ်လာစေရေးဟူသည့် ဦးတည်ချက်၊ ယာဉ်အန္တရာယ် ကင်းစင်ရေးဟူသည် ဦးတည်ချက်ဖြင့် အရေးယူရန် စတင် လှုပ်ရှားနေခြင်းဖြစ်သည်ဟုလည်း ယူဆမိပါသည်။ 

ဟိုင်းဝေးလမ်းမ အားလုံးနီးပါး၊ အထူးသဖြင့် နယ်မြို့များမှ ယာဉ်မောင်း အများစု နှစ်ကြာမြင့်စွာ ကျင့်သုံးခဲ့သည့် ယင်းစနစ်ကို လေ့လာကြည့်မည်ဆိုလျှင် အဝေးပြေးလမ်းမများ ကျဉ်းမြောင်းခြင်း (ယခု ရန်ကုန်-မန္တလေးလမ်းနှင့် ရန်ကုန်-ပဲခူးလမ်းတို့ကဲ့သို့ အလယ်တွင် ကျွန်းရှိသောလမ်းမျိုး မဟုတ်ခြင်း)၊ မော်တော်ယာဉ် အတော်များများမှာ ညာမောင်း ကားများသာဖြစ်ခြင်း စသည်တို့ကြောင့် ယာဉ်မောင်း တစ်ဦးနှင့်တစ်ဦး ကျဉ်းမြောင်းသော လမ်းတွင် ကျော်တက်ရာ၌ ကူညီပံ့ပိုးရာမှ ပေါ်ပေါက်လာခြင်းဖြစ်သည်။ ယခုလမ်းပန်းဆက်သွယ်ရေးတွင် အချိန်ကုန် သက်သာစေရုံ သာမက သတိဖြင့် မောင်းနှင်မည်ဆိုပါက လိုရာခရီးကို ဘေးကင်းစွာ ရောက်နိုင်သည့် ရန်ကုန်-မန္တလေး အဝေးပြေး လမ်းသစ်ကြီးတွင် အဆိုပါအချက်ပြ စနစ်ဟောင်းမျိုး အသုံးပြုရန် မလိုသလောက်ဖြစ်သည်ကို ယင်းလမ်းမပေါ် တက်မောင်းဖူးသည့် ယာဉ်မောင်းများ အားလုံး အသိပင် ဖြစ်ပါလိမ့်မည်။ အဓိက လမ်းကျဉ်းမြောင်းခြင်းနှင့် ညာမောင်းကား အများစုဖြစ်နေခြင်းတို့ကြောင့်၊ တစ်နည်းအားဖြင့် ယာဉ်မောင်းများအကြား စေတနာရှေ့ထားရာမှ လွဲမှားသွားခဲ့သော အဆိုပါ အချက်ပြစနစ်ဟောင်းကို ပြောင်းလဲမည့် ကာလတွင် နားလည်မှုများ မလွဲမှားစေရန် အထူး(အထူး)ပင် အရေးကြီးပါသည်။

အကြောင်းမှာ စနစ်ဟောင်းကို ဆက်မကျင့်သုံးရန် စတင်သည့်ကာလတွင် မှန်ကန်သည့် ပုံစံဖြင့် အချက်ပြသည်ကို အချက်ပြ ပုံစံဟောင်းဟု ထင်မှတ်ရာမှ ယာဉ်မတော်တဆမှုများ ဆိုးရွားစွာ ဖြစ်ပေါ်နိုင်သည့် အနေအထားတွင် ရှိနေခြင်းကြောင့် ဖြစ်ပေသည်။ အထူးသဖြင့် တောင်ပေါ်ဒေသ၊ အကွေ့ အကောက်နှင့် အတက် အဆင်း ရှည်လျားသော နေရာမျိုးတွင် ယာဉ်မောင်းများ နားလည်မှု လွဲမှားမည်ဆိုပါက မတွေးဝံ့စရာ အန္တရာယ်မျိုးနှင့် ရင်ဆိုင်ကြုံတွေ့နိုင်ခြေ များလွန်းသည်ကိုလည်း အထူး သတိပြုသင့်ပါသည်။ သို့အတွက်ကြောင့် အချက်ပြစနစ်ဆိုင်ရာ ပညာပေးသည့် လုပ်ငန်းကို ပေါ့ပေါ့တန်တန် သဘောမျိုး မထားဘဲ အထူး အလေးအနက် ထားကာ ကျယ်ကျယ်ပြန့်ပြန့် လုပ်ဆောင်ရမည်ဖြစ်သလို တစ်ဖက်တွင် လမ်းကျဉ်းနေသည့် ကိစ္စများကိုလည်း နည်းပါးသွားအောင် တဖြည်းဖြည်းချင်း လုပ်ယူသွားရမည်ဖြစ်သည်။ 

မည်သို့ပင်ဖြစ်စေ ယင်းအချက်ပြစနစ်ဟောင်း ပြောင်းလဲမည့်ကိစ္စသည် နှစ်ပေါင်းများစွာ အရိုးစွဲ၊ အမှတ်မှားနေခဲ့သော အရာတစ်ခုကို ကွယ်ပျောက်အောင်  လုပ်ဆောင်ရမည့်ကိစ္စ ဖြစ်နေပေရာ ယာဉ်စည်းကမ်းနှင့် လမ်းစည်းကမ်း ထိန်းသိမ်းရေး အာဏာပိုင်များအနေနှင့် အများပြည်သူနှင့် ဆိုင်သောမူဝါဒ (Public Policy) အကြောင်းကို ကောင်းစွာ နားလည်သဘောပေါက်ရမည်ဖြစ်သလို အကူးအပြောင်း ကာလတွင်း ယာဉ်အန္တရာယ်များ ကင်းဝေးစေရန် မော်တော်ယာဉ်နှင့် ပတ်သက်နေသူ အားလုံးက သတိကြီးစွာ ထားရှိရန် အထူး လိုအပ်ကြောင်း ဖော်ပြလိုရင်း ဖြစ်ပေသည်။ 

အယ်ဒီတာ (၁၄-၁၁-၂၀၁၇)

  • TAGS