News

POST TYPE

EDITORIAL

အယူဝါဒကြီးများ၏ ကောင်းကွက်များကိုရှာပါ မြန်မာ (Daily, Vol-5/No-184)
12-Nov-2017 tagged as

ယနေ့သည် ပြည်ထောင်စုသမ္မတ မြန်မာနိုင်ငံ၏ ၉၇ ကြိမ်မြောက် အမျိုးသားနေ့ အထိမ်းအမှတ်နေ့ဖြစ်ရာ နိုင်ငံနှင့် နိုင်ငံသား အားလုံးအတွက် ထူးခြားမွန်မြတ်သည့် နေ့တစ်နေ့ဟုပင် ဆိုရပါမည်။ Nation State ခေါ် အမျိုးသားနိုင်ငံများ စတင်ထူထောင်နိုင်မှုအဖြစ် သတ်မှတ်လေ့ရှိသည့် အမျိုးသားနေ့ကို မည်သည့်နိုင်ငံတွင်မဆို တခမ်းတနား ကျင်းပပြုလုပ်လေ့ရှိပြီး ယင်းနိုင်ငံများ ထူထောင်ရာတွင် အသက်၊ သွေး၊ ချွေးနှင့် အသိဉာဏ်များ ရင်းနှီးစိုက်ထုတ်ပေးခဲ့သူများကို အမှတ်ရ အောက်မေ့သည့်အနေနှင့် ဂုဏ်ပြုမှု အမျိုးမျိုးလည်း လုပ်လေ့ရှိကြပေသည်။ 

အထူးသဖြင့် နည်းပညာများ၊ သမုဒ္ဒရာဖြတ်ကျော် ကုန်သွယ်ရေး သဘောတူညီချက်များနှင့် လူမှုကွန်ရက် အသီးသီးတို့၏ ဦးဆောင်မှုဖြင့် ပေါ်ပေါက်လာရသည့် ကမ္ဘာပြုမှုဖြစ်စဉ်ခေါ် ဂလိုဘယ်လိုက်ဇေးရှင်းကြောင့် ယဉ်ကျေးမှုများ ပက်ပင်းတိုးလာသည့် ကာလတွင် နိုင်ငံအတော်များများက အမျိုးသားနေ့ ကိစ္စကို ယခင်ကထက် အလေးအနက် ထားလာကြသည်ကို တွေ့ရပါသည်။ ဥပမာ - ပိုလန်နှင့် ဩစတြီးယား အပါအဝင် ဥရောပနိုင်ငံ အချို့တွင် အမျိုးသားနေ့ တစ်ခုတည်း သာမက အမျိုးသားရေးကိစ္စကို ပြင်းပြင်းထန်ထန် လုပ်ကိုင်လျက်ရှိခြင်းပင်။ 

ကမ္ဘာ့နိုင်ငံများ ကျင့်သုံးနေကြသည့် မည်သည့် နိုင်ငံရေးစနစ်မဆို၊ မည်သို့သော ကမ္ဘာ့အာဂျင်ဒါ (Agenda)မျိုးမဆို အသိဉာဏ်ကြီးသူတို့၊ တစ်နည်းအားဖြင့် မိမိနိုင်ငံနှင့် လူမျိုးများ အသာစီး ရရှိရေးအတွက် ကွက်ကျော်မြင်သူများကသာ ဦးဆောင် ဖော်ထုတ်သွားကြသည်သာဖြစ်ရာ အဆိုပါစနစ်များက မည်သူမည်ဝါနှင့် မည်သည့်နိုင်ငံများကိုသာ အကျိုးဖြစ်ထွန်းစေသည် ဟူသောအချက်မှာ အချိန်ကာလ ကြာမြင့်ပါမှ မှန်းဆနိုင်ပေသည်။ သို့အတွက်ကြောင့် အမျိုးသားရေးဝါဒ အားကောင်းလာသော ဥရောပနိုင်ငံကြီး အချို့တွင် လစ်ဘရယ် ဒီမိုကရက်များကို Cultural Marxist များအဖြစ် သံသယ ဝင်သည်အထိ ဖြစ်လာသည်ကို တွေ့ရပါသည်။ 

ဥရောပ အမျိုးသားရေး စံတန်ဖိုးများ၊ ယဉ်ကျေးမှုများနှင့် ဥစ္စာဓနများကို လက်ဝဲ၊ တစ်နည်းအားဖြင့် မာ့ခ်စ်ဝါဒီ ကွန်မြူနစ်များက လစ်ဘရယ်စံချိန် စံနှုန်းများ ချပြကာ လစ်ဘရယ် အသွင်ဆောင်ပြီး ဖျက်ဆီးပစ်ရန် အကွက်ကျကျ ကြိုးပမ်းခြင်းဖြစ်သည်ဟူသော သဘောမျိုးကို ဥရောပမျိုးချစ်များက သံသယ ဝင်ကြခြင်းဖြစ်ပေသည်။ တစ်မျိုးပြောပါက လူမှုရေး သိပ္ပံဘာသာရပ်ထဲတွင် မာ့ခ်စ်ဝါဒကို နည်းနည်းချင်းစီ ထည့်သွင်းစေခြင်းဖြင့် မျိုးချစ်အယူဝါဒ (Patriotism) နှင့် အချုပ်အခြာ အာဏာပိုင် လွတ်လပ်မှုကိစ္စကို လူမှုရေးသိပ္ပံ လေ့လာသူများ ခါးသီးလာစေရန် ရည်ရွယ်ချက်ရှိရှိ လုပ်ဆောင်ခဲ့ခြင်းမျိုးကို ဆိုလိုပေသည်။ ဤသည်ကိုပင် လက်ယာယိမ်း ဥရောပနိုင်ငံရေးသမားများနှင့် မျိုးချစ်ဝါဒီများက လစ်ဘရယ်ယောင်ဆောင်သော လက်ဝဲများဟု ထောက်ပြလျက် ရှိပေသည်။ ပို၍ရှင်းအောင် ထပ်ပြောရမည်ဆိုပါက လက်ဝဲနှင့် လက်ယာအားစမ်းပွဲတွင် လက်ယာတို့ အထိနာစေရန် ပညာတတ်လက်ဝဲများ မွေးထုတ်ပေးလိုက်ခြင်းပင် ဖြစ်ပေသည်။ 

လွတ်လပ်သော အချုပ်အခြာ အာဏာပိုင်မှုနှင့် ထူးခြားသော ယဉ်ကျေးမှုအပြင် အမျိုးသားရေး စရိုက်လက္ခဏာ မြောက်မြားစွာ ပိုင်ဆိုင်ထားသည့် မြန်မာနိုင်ငံသားများအနေနှင့်မူ KFC နှင့် ရော့ခ်အန်ရိုးဂီကို လွတ်လပ်စွာ ခုံမင်နိုင်သော်လည်း သီချင်းကြီး၊ ပတ်ပျိုး၊ မြန်မာသံစဉ်နှင့် မြန်မာ့မုန့်ဟင်းခါး (မုန့်တီ) စသည်တို့ကို ကွယ်ပျောက် မသွားရလေအောင် ကာကွယ်ကြရမည်ဖြစ်သည်။ Coldplay ကို နားထောင်ရမည်ဖြစ်သလို ဗိုလ်အောင်ဒင်ကိုလည်း အလှည့်ကျ ဖွင့်ကြည့်ပေးရမည့် သဘောဖြစ်သည်။ အရပ်ဘက် လူ့အဖွဲ့အစည်း လှုပ်ရှားမှုများကို မြေတောင်မြှောက်ရမည်ဖြစ်သလို အမျိုးသားရေး လှုပ်ရှားမှုများကိုလည်း အားကောင်းအောင် လုပ်ဆောင်ရမည်ဖြစ်သည်။ 

ဆိုလိုသည်မှာ လက်ဝဲ အယူဝါဒဖြစ်စေ၊ လက်ယာ အယူအဆဖြစ်စေ ကောင်းကွက်နှင့် ဆိုးကွက်ဟူသည် ဒွန်တွဲနေစမြဲဖြစ်ရာ အသိဉာဏ် အမြော်အမြင် ကြီးမားသည့် လက်ရှိ ခေါင်းဆောင်များနှင့် နောင်အခါ ခေါင်းဆောင် ဖြစ်လာမည့်သူများအနေနှင့် မြန်မာဟူသည့် Nation State တစ်ခုအနေနှင့် ကမ္ဘာတွင် ပေါ်ပေါက်လာစရာရှိသည့် အယူဝါဒ မုန်တိုင်းကြီးများကြား၌ ကြံ့ကြံ့ခံနိုင်ရေးအတွက် အယူဝါဒများ၏ ကောင်းကွက်များကို မြန်မာ့နည်း မြန်မာ့ဟန်ဖြင့် လေ့လာတွက်ဆ ထားကြရမည်ဖြစ်ကြောင်း ဖော်ပြလိုရင်း ဖြစ်ပေသည်။ 

အယ်ဒီတာ (၁၂-၁၁-၂၀၁၇)

  • TAGS