News

POST TYPE

EDITORIAL

မြန်မာတွေ ဘာလုပ်တတ်သလဲ (Daily, Vol-5/No-181)
08-Nov-2017

ယခုရက်ပိုင်း နိုင်ငံကျော် လက်ဝှေ့သမား အောင်လအန်ဆန်း ဟဲဗီးဝိတ်တန်း ကစားသမားကို အနိုင်ရလိုက်ခြင်း၊ မုံရွာမှ လူငယ်တစ်ဦး လေယာဉ်ငယ်တစ်စင်း မိမိဘာသာ တပ်ဆင်ထုတ်လုပ်ခြင်း စသည့်သတင်းများကို စာဖတ်သူများ ကြားသိပြီးဖြစ်ပါလိမ့်မည်။ မြန်မာတို့၏အစွမ်းအစ တစ်စုံတစ်ရာကို ဖော်ကျူးပြပြီး မြန်မာတို့ကို အတိုင်းအတာ တစ်ခုအထိ အားရကျေနပ်မှု ပေးစေသည့် သတင်းများဟု ဆိုလျှင်လည်း ရမည်ထင်ပါသည်။ 

ဤသတင်းတို့နှင့်အတူ “မြန်မာတွေ ဘာလုပ်တတ်သလဲ”ဆိုသည့် မေးခွန်းကိုလည်း မြန်မာနိုင်ငံသားများ အလေးအနက်ထား ဆက်စပ် စဉ်းစားကာ ဖြေကြည့်သင့်ပေသည်။ ယင်းမေးခွန်း၏ အဓိက လိုရင်းမှာ မြန်မာတွေအနေနှင့် ဟိုတောက်တောက်၊ ဒီတောက်တောက်၊ ဟိုဟာ ကောင်းနိုးနိုး၊ ဒီဟာ ကောင်းနိုးနိုး လျှောက်လုပ်နေခြင်းထက် ပညာရပ်တစ်ခု၊ ဘာသာရပ်တစ်ခု၊ အလုပ်တစ်ခုခုတွင် အခြားနိုင်ငံမှ ပုဂ္ဂိုလ်များ မည်သို့မျှ လိုက်မမီနိုင်အောင် ပိုင်နိုင်တတ်ကျွမ်းသည့် အလုပ်မျိုးကို ဆိုလိုခြင်းဖြစ်ပေသည်။ 

ကမ္ဘာ့နိုင်ငံများကိုကြည့်လျှင် ဆပ်ပြာနှင့် ရေမွှေးကအစ မော်တော်ကား၊ မီးရထားနှင့် လေယာဉ်ပျံအဆုံး ပစ္စည်းအမျိုးမျိုး ထုတ်လုပ်ကြရာ၌ မိမိ၏ ထူးခြားမှု၊ ပိုင်နိုင်ကျွမ်းကျင်မှုအလိုက် တစ်နိုင်ငံနှင့်တစ်နိုင်ငံ မတူညီကြသည်ကို တွေ့နိုင်ပေသည်။ ဥပမာ- နာရီဆိုလျှင် ဆွစ်ဇာလန်လုပ် နာရီများမှာ Analog နာရီလောကတွင် မည်သည့်နိုင်ငံကမျှ လိုက်မမီသလို၊ ကော့ညက်အရက် ထုတ်လုပ်မှုတွင် ပြင်သစ်နိုင်ငံ ကော့ညက်(Cognac) မြို့ကို အခြားမည်သည့် အရက်ကုမ္ပဏီမှ လိုက်၍မမီသလိုမျိုး ဖြစ်ပေသည်။ စိတ်မကြည်မလင်ဖြစ်တိုင်း ရှူလေ့၊ ဆွတ်လေ့ရှိသည့် အောက်ဒီကလုန်း (Eau de Cologne) ရေမွှေးနှင့် ပတ်သက်လာပါက ဂျာမနီက ကိုလုံးမြို့ကို ရေမွှေးထုတ်လုပ်မှုတွင် ဘုရင်တစ်ဆူဖြစ်သည့် ပြင်သစ်နိုင်ငံပင် လိုက်မမီသလိုမျိုးကို ဆိုလိုပေသည်။ 

မိမိနိုင်ငံ၏ရိုးရာ အစဉ်အလာ၊ မိမိလူမျိုးတို့ တတ်ကျွမ်းသည့်ပညာဖြင့် ပြုလုပ်သော ဒေသထွက် ကုန်ပစ္စည်းများနှင့် အစားအသောက်များနှင့် ပတ်သက်လာပါက အခြားနိုင်ငံများယှဉ်၍ မရနိုင်အောင် ပိုင်နိုင်တတ်ကျွမ်းမှုရှိသည့် အချက်ကိုပြောလိုခြင်း ဖြစ်ပါသည်။ သို့အတွက်ကြောင့်လည်း “မြန်မာတွေ ဘာလုပ်တတ်သလဲ”၊ “အခြားသူများ လိုက်မမီအောင် ပိုင်နိုင်တတ်ကျွမ်းထားသည့် ဘာအတတ်ပညာ ရှိသလဲ”ဆိုသည့် မေးခွန်းကို အလေးအနက်ထား စဉ်းစားသင့်သလို ယင်းမေးခွန်းနှင့်အတူ အိုးပုတ်၊ ချိုးရုပ်၊ ဆန်အရက်နှင့် မီးတောက်အရက် အပါအဝင် ဇယန်းနှပ် လက်ဖက်ကအစ မြန်မာတို့၏ ဒေသထွက်ကုန်ပစ္စည်းနှင့် အစားအစာများ ကမ္ဘာ့ဈေးကွက်တွင် အခြားနိုင်ငံထုတ် ပစ္စည်းများ မယှဉ်နိုင်သည့် အခြေအနေ ရောက်အောင် မည်သို့မည်ပုံ လုပ်ကြမည်နည်း ဟူသည်ကိုလည်း ဦးနှောက်စားကြရမည် ဖြစ်ပါသည်။ 

အခါရှိတိုင်း ဒီမိုကရေစီ မရသေး၍၊ ပြည်တွင်းစစ်ဖြစ်နေ၍၊ နှစ် ၅၀ လောက် ဖိနှိပ်ခံခဲ့ရ၍ စသည့် အကြောင်းပြချက်တို့ဖြင့် နောက်ကောက်ကျနေခြင်း ဖြစ်သည်ဟူသောအချက်ကို ထပ်ခါ တလဲလဲ ပြောနေ၍ အခြားနိုင်ငံများ၊ နိုင်ငံခြားသား၏ စာနာသနားမှုနှင့် အထင်အမြင်သေးမှုတို့သာ ဦးစွာ ရဖို့များပေသည်။ သေချာသည်မှာ မြန်မာတွေ ဘာလုပ်တတ်သလဲ ဆိုသည့်မေးခွန်းကို ကောင်းစွာ ဖြေဆိုနိုင်ရေးအတွက် မည်သည့်အလုပ်ကိုမဆို အလုပ်ကို အလုပ်နှင့်တူအောင် စည်းစနစ်တကျ လုပ်ကြပြီး အရည်အချင်းရှိသူ၊ ဇရှိသူ၊ ထူးချွန်ထက်မြက်သူများကို ကောင်းစွာ မြေတောင် မြှောက်ပေးရတော့မည်ဖြစ်ကြောင်း ဖော်ပြလိုရင်း ဖြစ်ပေသည်။ 

အယ်ဒီတာ (၈-၁၁-၂၀၁၇)

  • VIA