News

POST TYPE

EDITORIAL

လူမှန်နေရာမှန် ဖြစ်စေမည့် ပညာရေးစနစ် (Daily, Vol-5/No-179)
07-Nov-2017 tagged as

၁၀ တန်း (တက္ကသိုလ်ဝင်တန်း) ကို ဂုဏ်ထူးများများ၊ အမှတ်များများဖြင့် အောင်မြင်သည့် သားသမီးများကို မိဘအများစု သာမက ဆရာသမားနှင့် ဆွေမျိုးသားချင်း အများစုကပါ တက်ရောက်စေလိုသည့် ဆေးတက္ကသိုလ် ဝင်ခွင့်ကိစ္စတွင် ၁၀ တန်းအမှတ် တစ်ခုတည်း မဟုတ်တော့ဘဲ လူတွေ့ စစ်ဆေးမေးမြန်းပြီးပါမှ တက်ရောက်ခွင့်ကို အဆုံးအဖြတ်ပြုမည့် စနစ်သစ်တစ်ခု ပြောင်းလဲကျင်သုံးနိုင်ရန် သက်ဆိုင်ရာ တာဝန်ရှိသူများ စီစဉ်လျက်ရှိပြီး ယင်းစနစ်သည် ဆေးပညာကို အမှန်တကယ် လေ့လာ သင်ယူလိုကာ အဆိုပါပညာဖြင့် အမှန်တကယ် အသက်မွေးဝမ်းကျောင်းပြုလိုသူများ ပိုမိုထွက်ပေါ်လာစေရန် ဦးတည်ခြင်းဖြစ်သည်ဟု သိရပါသည်။ 

မြန်မာ့လူ့အဖွဲ့အစည်း၌ လူရိုသေ ရှင်ရိုသေရှိသည့် အသက်မွေးဝမ်းကျောင်း အလုပ်များအနက် ထိပ်ဆုံးနေရာတွင်ရှိဆဲဖြစ်သည့် ဆရာဝန်များ မွေးထုတ်မည့်ကိစ္စကို ယခုလို ၁၀ တန်း အမှတ်ဟူသည့် Criteria တစ်ခုတည်း သာမက ဆရာဝန် ဟူသည့်အလုပ်အပေါ် မည်မျှ အတိုင်းအတာအထိ ဝါသနာပါသနည်း ဟူသည့်အချက်ကိုပါ အလေးအနက်ထား ထည့်သွင်းစဉ်းစားပြီးမှ ပညာသင်ယူခွင့်ပြုမည်ဟု ကြားရသဖြင့် ကြိုဆိုထိုက်သည့် အစီအစဉ်ဖြစ်ကြောင်း ဦးစွာ ပြောလိုပေသည်။ အကြောင်းမှာ ခေတ်အဆက်ဆက် လူသားတို့၏ အသက်ကို ကယ်တင်လိုသောစိတ်ဖြင့် ဆရာဝန် ဖြစ်လိုခဲ့သော်လည်း သတ်မှတ်ထားသည့် အမှတ်နှင့် အနည်းငယ် ကွာခြားခဲ့ခြင်းကြောင့် ဆရာဝန် အိပ်မက်နှင့် လုံးလုံးလျားလျား လွဲချော်ခဲ့ရသူ မြောက်မြားစွာ ရှိသလို လူကြီးမိဘ၊ ဆွေမျိုးသားချင်းနှင့် ဆရာသမားတို့၏ ဖိအားပေးမှုကြောင့် ဆရာဝန်အလုပ်ကို ဝါသနာမပါဘဲ ဆေးတက္ကသိုလ်ကို ကြိတ်မှိတ်တက်ကာ M.B.B.S ဘွဲ့ ရယူခဲ့ရသူများလည်း ဒုနှင့်ဒေးရှိခဲ့သောကြောင့် ဖြစ်ပေသည်။ 

ဘဝတစ်ဆစ်ချိုး အပြောင်းအလဲကြီးများအနက် တစ်ခုဖြစ်သော တက္ကသိုလ် ဝင်တန်းအောင်မြင်သူများအနေနှင့် ဆေးတက္ကသိုလ်တွင် လူရိုသေ ရှင်ရိုသေ ခံရရေးဟူသည်ထက် ဝါသနာ၊ စေတနာ၊ အနစ်နာဟူသည့် စိတ်ခံဖြင့် ပညာသင်ယူခွင့်ရရှိရေး၊ တစ်နည်းအားဖြင့် လူမှန် နေရာမှန်ဖြစ်ရေးအတွက် ယခုအစီအစဉ်က များစွာ အထောက်အကူပြုလိမ့်မည်ဟု ယူဆရပေသည်။ ပွင့်ပွင့်လင်းလင်း ပြောရလျှင် မြန်မာ့လူ့အဖွဲ့အစည်းတွင် အားနည်းချက် များစွာရှိသည့် ပညာရေး စနစ်ကြောင့် ပညာရေးနှင့် ပတ်သက်လာလျှင် ပညာသင်ယူလိုသည့် ကာယကံရှင် ကျောင်းသား၊ ကျောင်းသူ အများစုမှာ မိမိဝါသနာပါရာ၊ မိမိ အထူး စိတ်ဝင်စားရာ ဘာသာရပ်ကို ရွေးချယ်နိုင်သည့် အနေအထားမျိုး လွန်စွာ နည်းပါးခဲ့ပါသည်။ တစ်ဖက်ကိုကြည့်မည်ဆိုလျှင် ထိုသို့ဖြစ်ရခြင်းမှာလည်း ဆရာဝန်အလုပ်၊ စစ်ဗိုလ် အလုပ်၊ အင်ဂျင်နီယာ အလုပ်တို့နှင့် ပတ်သက်သည့် ပညာရပ်တို့ကသာ အနာဂတ်တွင် အာမခံချက်ရှိသည့် အနေအထားမျိုးဖြစ်ခဲ့ပြီး အခြားပညာရပ်တို့မှာမူ အသက်မွေးဝမ်းကျောင်းပြု ရပ်တည်နိုင်မည့်နယ်ပယ်နှင့် ပတ်ဝန်းကျင် မရှိသလောက် နည်းပါးခဲ့ခြင်းကြောင့်ဖြစ်ပေသည်။ သို့အတွက်ကြောင့် ဆရာဝန်ဖြစ်ရေး၊ အင်ဂျင်နီယာဖြစ်ရေးနှင့် စစ်ဗိုလ်ဖြစ်ရေးတို့သည်သာ တက္ကသိုလ်ဝင်တန်းဖြေသူများရော၊ ၎င်းတို့၏ လူကြီးမိဘများပါ အကြီးမားဆုံး ပန်းတိုင်တစ်ခုသဖွယ် ဖြစ်ခဲ့ကြခြင်းပင်။

၂၀ဝ၀ ပြည့်နှစ်နောက်ပိုင်း၊ နည်းပညာနှင့် အခြား ပညာရပ်အချို့အတွက် အသက်မွေးဝမ်းကျောင်းပြုနိုင်မည့် လုပ်ငန်းများ ကြီးထွားလာပြီး ၂၀၁၀ နောက်ပိုင်း နိုင်ငံရေးနှင့် စီးပွားရေး အပြောင်းအလဲကြောင့် ပိုမိုတံခါးပွင့်လာချိန်ရောက်မှသာ အခြားဝိဇ္ဇာနှင့် သိပ္ပံဘာသာရပ်များကို ထူးချွန်စွာ တတ်မြောက်ထားလျှင်လည်း ဆရာဝန်၊ အင်ဂျင်နီယာနှင့် စစ်ဗိုလ်တို့ကဲ့သို့ပင် ဘဝအာမခံချက်ရှိရုံမက လူရိုသေ ရှင်ရိုသေ ဖြစ်နိုင်သည်ဟူသောအချက်ကို လူငယ်များနှင့် ၎င်းတို့၏ လူကြီး မိဘများပါ ပိုမိုနားလည်လာကြခြင်း ဖြစ်ပေသည်။ ဆိုရလျှင် ဆရာဝန်ဖြစ်စေ၊ အင်ဂျင်နီယာဖြစ်စေ၊ စစ်ဗိုလ်ဖြစ်စေ၊ သမိုင်းပညာရှင်ဖြစ်စေ၊ ပထဝီပညာရှင် ဖြစ်စေ၊ ဓာတုဗေဒ ပညာရှင်ဖြစ်စေ မိမိထူးချွန်တတ်မြောက်ထားသည့်ပညာဖြင့် မိမိ၏ မိသားစု၊ နိုင်ငံနှင့် လူ့အဖွဲ့အစည်းကို ထိရောက်စွာ အကျိုးပြုနိုင်သည် ဆိုပါက လူရိုသေ ရှင်ရိုသေ ခံရရုံမျှမက တန်ဖိုးဟူသည်မှာလည်း ရှိနေမည်ဖြစ်ကြောင်းနှင့် ထိုသို့ ပညာရပ် အသီးသီးကို မိမိဝါသနာအလိုက် လူမှန်နေရာမှန်ပုံစံမျိုးဖြင့် တန်ဖိုးထား လေ့လာဆည်းပူးသူများ ပေါ်ထွက်ရေးအတွက်မူ သက်ဆိုင်ရာ ပညာရှင်များက တာဝန်သိစွာ မြေတောင် မြှောက်ပေးကြရမည်ဖြစ်ကြောင်း ဖော်ပြလိုရင်းဖြစ်ပေသည်။ 

အယ်ဒီတာ (၆-၁၁-၂၀၁၇)

  • TAGS