News

POST TYPE

EDITORIAL

အနိမ့်ဆုံး လုပ်အားခ ကိစ္စအတွက် နိုင်ငံစီးပွားရေးမတ်အောင် ဦးစွာလုပ်ပါ (Daily, Vol-5/No-178)
05-Nov-2017 tagged as

ပြည်တွင်းရှိ အလုပ်ရှင်နှင့် အလုပ်သမားများအကြား အနိမ့်ဆုံး လုပ်ခနှုန်းထားသစ် သတ်မှတ်နိုင်ရေးကိစ္စသည် မြန်မာဒီမိုကရေစီ အစိုးရအတွက် စိန်ခေါ်မှုတစ်ရပ်ဖြစ်သည်ဟု သက်ဆိုင်ရာ အနိမ့်ဆုံး လုပ်အားခ သတ်မှတ်ရေးဆိုင်ရာ ကော်မတီက ထုတ်ဖော် အသိပေးထားကြောင်း သိရပါသည်။ အမှန်တွင် အဆိုပါ အနိမ့်ဆုံး လုပ်အားခကိစ္စမှာ မြန်မာအစိုးရတစ်ရပ်တည်းအတွက် သာမကပါ၊ ကမ္ဘာပေါ်ရှိ အစိုးရတိုင်းနှင့် အလုပ်သမား သမဂ္ဂများအတွက် ခေတ်ကာလ အဆက်ဆက် အမြဲတစေပင် စိန်ခေါ်မှုများနှင့် အငြင်းအခုံ များစွာကို ဖြစ်ပေါ်စေခဲ့သလို ယနေ့ထက်တိုင်လည်း ဖြစ်ပေါ်နေဆဲဟု ဆိုရပေမည်။ 

အနိမ့်ဆုံး လုပ်အားခကိစ္စကို ဆန်းစစ်ကြည့်လိုက်တိုင်း လုပ်အားခ အမြင့်ဆုံး တိုးမြှင့်ပေးလိုသည့်ဘက်နှင့် ထိုသို့တိုးမြှင့်ပေးမှုကို ဆန့်ကျင်သည့်ဘက်ဟူ၍ ဘက်နှစ်ဖက် ယေဘုယျအားဖြင့် ရှိနေပြီး နှစ်ဖက်စလုံး၏ တူညီသောအမြင်မှာ ဆင်းရဲနွမ်းပါးမှု တိုက်ဖျက်ရေး(ဆင်းရဲနွမ်းပါးမှု လျှော့ချရေး)ပင် ဖြစ်သည်။ ဘက်အားဖြင့် ကြည့်မည်ဆိုလျှင် တိုးမြှင့်ပေးလိုသည့်ဘက်တွင် အလုပ်သမားများကို ကိုယ်စားပြုသူများသာ ရှိမည်ဟု ထင်ရမည်ဖြစ်သော်လည်း တိုးမြှင့်ပေးမှု ဆန့်ကျင်သည့်ဘက်တွင်လည်း ကော်လာပြာများ ရှေ့ရေး ထိခိုက်နစ်နာမည်ကို စိုးရိမ်သူများ ပါဝင်နေစမြဲ ဖြစ်သည်ကို သတိပြုရပါမည်။ အမြဲတမ်းလိုလို နားလည်ရ ခက်လှသည့် အဆိုပါ ပြဿနာကို အကျဉ်းချုံးအားဖြင့် ပြောရမည်ဆိုပါက တိုးမြှင့်ပေးလိုသည့်ဘက်၏ အဓိက အကြောင်းပြချက်မှာ မြင့်တက်လာသည့် လုပ်အားခနှင့်အတူ အလုပ်သမားများ၏ ငွေကြေး သုံးစွဲနိုင်မှု မြင့်တက်လာပြီး အလုပ်အပေါ်တွင်လည်း သစ္စာစောင့်သိမှုနှင့် တာဝန်ကျေပွန်မှု မြင့်တက်လာကာ အလုပ်ရှင်ရော၊ အလုပ်သမားအတွက်ပါ အကျိုး ဖြစ်ထွန်းမည်၊ နောက်ဆုံးတွင် ဆင်းရဲနွမ်းပါးမှုကိုပါ တိုက်ဖျက်နိုင်မည်ဟူသော အဆိုပင် ဖြစ်ပါသည်။ သဘောမှာ အလုပ်သမားများ ငွေကြေးသုံးစွဲမှု မြင့်တက်လာခြင်းကြောင့် ကုမ္ပဏီများလည်း အရောင်းအဝယ် ကိစ္စတွင် အကျိုးအမြတ် ပိုရကာ အလုပ်သမားနှင့် ဝန်ထမ်းများ ပိုမို ငှားရမ်းလာနိုင်မည်၊ သို့အတွက်ကြောင့် အလုပ်လက်မဲ့ဖြစ်သူများ နည်းလာသလို ရာဇဝတ်မှု ကျူးလွန်မှုနှုန်းထားလည်း ကျဆင်းလာမည်၊ အစိုးရအနေနှင့်လည်း လူမှုဖူလုံရေး ကိစ္စ အပါအဝင် အခြား ထောက်ပံ့မှုများကို လျှော့ချပစ်နိုင်မည်ဖြစ်ရာ ဘတ်ဂျက်ပိုငွေပြမည် စသည်တို့ကြောင့် တိုးမြှင့်မှုကို ထောက်ခံခြင်း ဖြစ်ပေသည်။ ဤနည်းဖြင့် အခြေခံ လူတန်းစား အလုပ်သမားများကို ဆင်းရဲနွမ်းပါးမှု စည်းမျဉ်းအထက်သို့ ရောက်အောင် ဆွဲတင်နိုင်ပြီး နိုင်ငံတွင်း မငြိမ်မသက်ဖြစ်မှုများ၊ ဆင်းရဲချမ်းသာ ကွာဟမှုများကိုပါ လျှော့ချလာနိုင်မည် ဆိုသည့်သဘောပင်ဖြစ်ပါသည်။

အနိမ့်ဆုံး လုပ်အားခ တိုးမြှင့်မှုကို ဆန့်ကျင်သည့်ဘက်ကမူ အကယ်၍ တိုးမြှင့်ပေးလိုက်မည်ဆိုပါက လုပ်ငန်းများအနေနှင့် အလုပ်သမားနှင့် ဝန်ထမ်းခေါ်ယူရန် ဝန်လေးလာနိုင်ရုံမျှမက ရှိထားသည့် အလုပ်သမား ဦးရေကိုပါ လျှော့ချပစ်သည်အထိ ဖြစ်လာနိုင်ရာ နောက်ဆုံးတွင် အလုပ်လက်မဲ့ ဖြစ်သူဦးရေ များပြားလာပြီး ရာဇဝတ်မှုများလည်း မြင့်တက်လာနိုင်သည်ဟု ယူဆလေ့ ရှိကြပါသည်။ ထို့ပြင် အလုပ်သမားတစ်ဦး၏ အခြေခံလုပ်အားခ မြှင့်တင်ပေးလိုက်ရသည့်အတွက် လုပ်ငန်းများအနေနှင့် ထုတ်ကုန်နှင့် ဝန်ဆောင်မှု ဈေးနှုန်းများကိုပါ လိုက်လံတိုးမြှင့်ရမည့် အခြေအနေ ဆိုက်ရောက်လာပေရာ နောက်ဆုံးတွင် ကုန်ဈေးနှုန်းများပါ မြင့်တက်လာနိုင်ခြေ ရှိသည်ကို ထည့်တွက်ခြင်းဖြစ်သည်။ 

မြန်မာနိုင်ငံတွင် ပြည်နယ်နှင့် တိုင်းဒေသကြီးများအလိုက် အခြေခံ ကုန်ဈေးနှုန်းနှင့် နေထိုင်မှု စရိတ်စက မတူညီကြသလို အနိမ့်ဆုံး လုပ်အားခ တိုးမြှင့်သတ်မှတ်ပေးရန် သက်ဆိုင်ရာ အလုပ်သမား ကိုယ်စားလှယ်အဖွဲ့များက တောင်းဆိုထားသည့် နှုန်းထားများ မတူညီကြသည်ကို တွေ့ပါသည်။ မြန်မာနိုင်ငံ၏ လက်ရှိ စီးပွားရေး တိုးတက်မှုနှုန်းထား၊ အထူးသဖြင့် ပြည်တွင်း စီးပွားရေးလုပ်ငန်းများ၏ ဖွံ့ဖြိုးမှု အနေအထားအရ အနိမ့်ဆုံး လုပ်အားခ တိုးမြှင့်ရန် သင့်၊ မသင့်မှာ သက်ဆိုင်ရာ ပုဂ္ဂိုလ်နှင့် အဖွဲ့အစည်း အသီးသီးတို့က အလေးအနက်ထား စဉ်းစားရမည်ဖြစ်ပေသည်။ မည်သည့်လုပ်သားမဆို အနိမ့်ဆုံး လုပ်အားခ တိုးမြှင့်ရယူလိုကြသည်မှာ ဓမ္မတာပင် ဖြစ်သော်လည်း ဖြစ်သင့်သည်မှာ တိုင်းပြည် စီးပွားရေး အလုံးစုံ တိုးတက်ဖြစ်ထွန်းစေမည့် အခြေအနေတစ်ရပ် ဦးစွာဖန်တီးပေးရန်လိုအပ်ရာ စီးပွားရေး လုပ်ငန်းတိုးချဲ့ လုပ်ကိုင်လိုသူများနှင့် ရင်းနှီးမြှုပ်နှံလိုသူများအပေါ် အခွန်နှုန်းထားနှင့် ထိန်းချုပ်မှုများ ပိုမိုဖြေလျှော့ပေးခြင်းဖြင့် စတင်မှသာ အလုပ်အကိုင် အခွင့်အလမ်းများနှင့် လုပ်အားခများလည်း တိုးမြင့်လာပြီး ဆင်းရဲနွမ်းပါးမှုကိုပါ တစ်ပါတည်း လျှော့ချနိုင်မည်ဖြစ်သည်ဟု ယူဆမိကြောင်း ဖော်ပြလိုရင်းဖြစ်ပေသည်။ 

အယ်ဒီတာ (၅-၁၁-၂၀၁၇)

  • TAGS