News

POST TYPE

EDITORIAL

ကလေးတွေကိုချစ်လျှင် စာအုပ်တွေကိုလည်းချစ်ပါ (Daily, Vol-5/No-154)
08-Oct-2017 tagged as

မြန်မာနိုင်ငံဖွံ့ ဖြိုးရေး၊ တစ်နည်းအားဖြင့် မြန်မာ့လူ့အဖွဲ့အစည်းတွင် အသိဉာဏ်မြင့်မားသူ နိုင်ငံသားဦးရေ တိုးတက်များပြားလာရေးအတွက် စာဖတ်နာသူ သို့မဟုတ် စာအုပ်စာပေတွင် မွေ့လျော်သူများ မွေးထုတ်နိုင်ရေးသည်လည်း ပညာရေးကဏ္ဍ အဆင့်မြှင့်တင်ရေးနှင့်ဆတူ အရေးကြီးကြောင်း The Voice က မကြာခဏ ဆိုသလို အကြံပြုဖော်ပြခဲ့သည်ကို စာဖတ်သူများ မှတ်မိပါလိမ့်မည်။ အကြောင်းမှာ နိုင်ငံတစ်နိုင်ငံတွင် စာအုပ်စာပေများအပေါ် မွေ့လျော်သူများ နည်းပါးလာမည်ဆိုပါက တိုင်းပြည်ဖွံ့ဖြိုးရေး တစ်ခုတည်း သက်သက်သာမက အမျိုးသား လုံခြုံရေးကိစ္စထိပါ ဂယက်ရိုက်ခတ်နိုင်သည့် အခြေအနေ ရှိသောကြောင့် စာအုပ်စာပေ (Facebook မဟုတ်ပါ)တွင် မွေ့လျော်သူ နိုင်ငံသားများ တိုးပွားရန် သက်ဆိုင်သူများက ဝိုင်းဝန်းကြရမည့်အကြောင်း အကြံပြုခဲ့ခြင်းပင် ဖြစ်ပါသည်။ 

တိကျသော စစ်တမ်းများ ကောက်ယူထားခြင်း မရှိသည့်တိုင် မြန်မာနိုင်ငံတွင် စာအုပ်စာပေတွင် မွေ့လျော်သူများထက် လူမှုကွန်ရက်များပေါ်တွင် အချိန်များစွာ ကုန်ဆုံးလေ့ရှိပြီး စာအုပ်နှင့် မျက်နှာခွာမရ ဖြစ်ရမည့်အစား မိုဘိုင်းလ်ဖုန်းစကရင်နှင့် မျက်နှာခွာမရသူဦးရေ များပြားလာသည်ကို တစ်နေ့တခြား တွေ့မြင်လာရသည်မှာ စိတ်မကောင်းစရာပင် ဖြစ်ပါသည်။ လူမှုကွန်ရက်များက အသိဉာဏ် ဗဟုသုတ လုံးဝ မပေးစွမ်းနိုင်ဟု ဆိုလိုခြင်း မဟုတ်သော်လည်း တာဝန်ယူမှု မရှိသည့်ပို့စ်များ၊ ပုဂ္ဂိုလ်ရေး တိုက်ခိုက်သည့် အတင်းအဖျင်းများ၊ အပျော်သာမက အပျက်သဘောထိပါ သက်ရောက်စေနိုင်သော လူဗြိန်းကြိုက်ပို့စ်များကို စိတ်ဝင်တစားသူ များပြားနေသည်ကို တွေ့ရပေရာ အသိဉာဏ် ဗဟုသုတကောင်း ရရှိရေးဟူသည့် လာရင်းကိစ္စမှာ ကွယ်ပျောက်ရစမြဲဟုသာ ဆိုချင်ပေသည်။ ဆိုလိုသည်မှာ လူမှုကွန်ရက်ဟူသည် သတင်း အချက်အလက် စီးဆင်းမှု မြန်ဆန်ရေးအတွက် လွန်စွာ အကျိုးသက်ရောက်မှု ရှိသည်မှာ ၁၀ဝ ရာခိုင်နှုန်း မှန်သော်လည်း စာအုပ်စာပေလောက် လူ့ဦးနှောက်၏ ဆင်ခြင် စဉ်းစားတွေးခေါ်မှုပိုင်းကို အားပေးအားမြှောက်ပြုနိုင်ခြင်း မရှိဟူသော သဘောပင် ဖြစ်ပေသည်။ 

သို့အတွက်ကြောင့် စာအုပ်စာပေ၌ မွေ့လျော်သူဦးရေ တိုးပွားအောင် မည်သို့ လုပ်ကြမည်နည်းဟု မေးစရာဖြစ်လာပါသည်။ The Voice အနေနှင့် ကလေးစာပေကိစ္စက စတင်ရတော့မည်ဟုသာ ဖြေချင်ပါသည်။ အကြောင်းမှာ မြန်မာနိုင်ငံ၌ အသက် ၅၀ နှင့်အထက် မျိုးဆက် အတော်များများနှင့် အသက် ၃၀ မှ ၄၅ ဝန်းကျင် မျိုးဆက် အနည်းငယ်သာ စာအုပ်စာပေတွင် မွေ့လျော်လေ့ရှိပြီး အသက် ၁၈ မှ ၃၀ ကြား မျိုးဆက်မှာ စာအုပ်စာပေတွင် မမွေ့လျော်သလောက် ရှိသည်ဟု ယူဆမိ၍ဖြစ်သည်။ (ဤကိန်းဂဏန်းမှာ Hypotheisis မျှသာ ဖြစ်သည်) ယင်းသို့ဖြစ်နေရခြင်းကို ကြည့်မည်ဆိုလျှင် ကလေးစာပေ ဖွံ့ဖြိုးမှုမှာ နှစ် ၃၀ ခန့်ကာလအတွင်း ဆိုးဆိုးရွားရွား ကျဆင်းခဲ့ခြင်းကြောင့် ဖြစ်ပေသည်။ ယနေ့ ကလေးစာပေ ဈေးကွက်ကို ကြည့်မည်ဆိုလျှင် စာအုပ်ဆိုင်များပေါ်၌ နေရာ အနည်းငယ်သာ ရရှိထားသည်ကို တွေ့ရသည်။ ကလေးမိဘ အများစုမှာလည်း ကလေးစာအုပ် ဟူသည် မိမိတို့ ရင်သွေးငယ်များအတွက် ဝယ်ပေးသင့်သည့် အရာဟူသည်ကို သိရှိမှုနည်းပါးလာရာ ကလေးစာပေ ဈေးကွက်မှာ အသက်ဆက်ရန်ပင် ခက်ခဲလာသလိုဖြစ်ခဲ့ရပေသည်။ စာသင်ကျောင်းများကိုကြည့်မည်ဆိုပြန်လျင်လည်း ကလေးများ ပျော်မွေ့စေနိုင်မည့် အဝန်းအဝိုင်းမျိုး မဖြစ်ရုံမျှမက အခါအားလျော်စွာ သော့ခတ်ထားကြသည်က များပါသည်။ ဆိုခဲ့ပါ အနေအထားမျိုးနှင့် အသက်မနည်း ဆက်နေရသည့် ဈေးကွက်ကြောင့် မြန်မာ့ကလေး စာအုပ်များမှာ နိုင်ငံတကာမှ ကလေးစာအုပ်များ၏ အရည်အသွေးကို မည်သို့မျှ မယှဉ်နိုင်ဖြစ်နေရခြင်းပင်။ 

သို့သော် လက်ရှိအစိုးရ တာဝန်ယူလာပြီးနောက်ပိုင်း ကလေးစာပေ ဖွံ့ဖြိုးရေးအတွက် ကလေးစာအုပ်ပွဲတော်များ ပြုလုပ်ပေးပြီး စာအုပ်၌ မွေ့လျော်သူ မျိုးဆက်သစ်လေးများ ပေါ်ထွန်းရေးအတွက် ကြိုးပမ်းလာသည်မှာ အားတက်စရာဟုပင် ဆိုရပေမည်။ မြန်မာနိုင်ငံသမ္မတ ဦးထင်ကျော်မှာ ၎င်းကိုယ်တိုင် နိုင်ငံကျော် စာရေးဆရာနှင့် ကဗျာဆရာကြီး မင်းသုဝဏ် (ကွယ်လွန်) ၏ သားဖြစ်ပေရာ ယမန်နှစ်က နေပြည်တော်၌ ကျင်းပသော ကလေးစာပေ ပွဲတော်၌ ၎င်းတို့မျိုးဆက်ငယ်စဉ်က ကြားနာ ရွတ်ဆိုခဲ့ဖူးသော အမေမျှော်တေးနှင့် သားချော့တေး စသည်တို့သည် ကလေးစာပေသမိုင်း၏ တစ်စိတ်တစ်ပိုင်း ဖြစ်သည်ဟု ပြောကြားပြီး ကလေးစာပေကဏ္ဍ ဖွံ့ဖြိုးရေးအတွက် တိုက်တွန်းခဲ့သည်ကို တွေ့ရသောကြောင့်ဖြစ်သည်။ သို့သော် သူ(သမ္မတ)တစ်ဦးတစ်ယောက် တည်းစွမ်းဆောင်၍မရဘဲ ပညာရေးနှင့် စာပေနယ်ပယ်မှ သက်ဆိုင်သူများ သာမက ကလေးမိဘ အားလုံးက ဝိုင်းဝန်းဖေးမမှသာ ခရီးပေါက်မည် ဖြစ်ပေသည်။ 

မိဘများအနေနှင့်လည်း သားသမီးနှင့် မိဘအကြား နှောင်ဖွဲ့မှုကို ပိုမိုခိုင်မြဲစေသလို မိမိရင်သွေးငယ်များအတွက် စိတ်ကူးယဉ်ကမ္ဘာ သို့မဟုတ် စိတ်လှုပ်ရှားစရာ စွန့်စားခန်းများ၏ နှစ်သက်စရာ ခံစားချက်များ ရရှိစေရန် ကလေးစာပေကသာ ဆောင်ကြဉ်းပေးနိုင်မည်ကို သတိပြုသင့်ပေသည်။ ကလေးငယ်များ စာအုပ်စာပေအပေါ် မွေ့လျော်တတ်လာစေရုံမျှမက တွေးခေါ်မျှော်မြင်မှု စွမ်းရည်နှင့် စိတ်ကူးဉာဏ် ထက်မြက်ကွန့်မြူးလာစေသလို စကားလုံးဝေါဟာရကြွယ်ဝလာစေရေး၊ မြန်မာစာသာမက အင်္ဂလိပ်စာ (နိုင်ငံတကာ ဘာသာစကား) ဝါကျအထားအသို ကျွမ်းကျင်လာစေရေး စသည်တို့အတွက် ကလေးများစာဖတ်ချင်စိတ်ဖြစ်လာ အောင် ဖန်တီးပေးရမည့် အထူးတာဝန်ရှိပေသည်။ အရေးအကြီးဆုံးမှာ အနာဂတ်  ကာလတွင် မိမိယဉ်ကျေးမှု သာမက တစ်ပါးသူ ယဉ်ကျေးမှုအကြောင်း၊ သဘာဝ ပတ်ဝန်းကျင်အကြောင်း၊ မြန်မာနှင့် ကမ္ဘာ့သမိုင်းကြောင်း စသည်တို့ကို ကောင်းစွာ သိရှိနားလည်သော မျိုးဆက်သစ်များ ပေါ်ပေါက်လာရေးအတွက် ကလေးစာပေကို ပုခက်တွင်းမှ နိုင်ငံတကာတွင်ပါ လူစဉ်မီသည့် အခြေအနေသို့ရောက်အောင် ဖေးမကူညီကြရမည့်အကြောင်း ဖော်ပြလိုရင်း ဖြစ်ပေသည်။ 

အယ်ဒီတာ (၈-၁၀-၂၀၁၇)

  • TAGS