News

POST TYPE

EDITORIAL

အရည်မရ၊ အဖတ်မရ မြန်မာ့အကျင့်စရိုက်တစ်ခု (Daily, Vol-5/No-132)
12-Sep-2017 tagged as မြန်မာ

မြန်မာတို့၏ ဓလေ့အမျိုးမျိုးနှင့် ယဉ်ကျေးမှု အမျိုးမျိုးရှိရာတွင် ယဉ်ကျေးမှု စရိုက်လက္ခဏာ တစ်ရပ်သဖွယ်ဖြစ်နေသော တမြုံ့မြုံ့ဝါးကာ တဗျစ်ဗျစ် အဆက်မပြတ် ထွေးကြရသည့် အလုပ်တစ်ခုမှာ နိုင်ငံတကာမှ မိတ်ဆွေ၊ လုပ်ဖော်ကိုင်ဖက်များနှင့် ထိတွေ့ဆက်ဆံရာတွင်လည်းကောင်း၊ မြန်မာပြည်ရှိ မြို့ကြီး၊ မြို့ငယ် အသီးသီးကို လှပသန့်ရှင်းအောင် ဖန်တီးရာတွင်လည်းကောင်း ကြီးမားသည့် အဟန့်အတားသဖွယ် ဖြစ်နေပါသည်။ ယင်းမှာ ကွမ်းယာစားသည့် အကျင့်ပင်ဖြစ်သည်။ ယခုဆိုလျှင် အရည်မရ၊ အဖတ်မရ ထွေးထုတ်ရသည့် အကျင့်စရိုက်က နှစ်စဉ် မြန်မာနိုင်ငံသား ခြောက်သောင်းလောက်၏ အသက် ဇိဝိန်ကို ခြွေချလျက်ရှိသည်ဟု ကျန်းမာရေးနှင့် အားကစားဝန်ကြီးဌာနက အစီရင်ခံစာ ထုတ်ပြန်လိုက်ပြီဖြစ်ရာ မြန်မာ့အကျင့်စရိုက်တစ်ခုက မြန်မာနိုင်ငံသားများကို ဆိုးဆိုးရွားရွား ဒုက္ခပေးနေသည်မှာ ရှင်းသွားပြီဖြစ်ပါသည်။ 

သို့အတွက်ကြောင့် “တံတားဦးက ကွမ်းနုဝါ၊ ငန်းမြာကဆေး၊ ကွမ်းသီး တောင်ငူနှင့် ကိုင်းထုံးဖြူ၊ ပြည်ရှား၊ သာဝါးလို့ထွေး”စသည်ဖြင့် ရှေးရာဇဝင်နှင့်အတူ ရောထွေး ပေါ်ပေါက်လာသော ကွမ်းစားသည့်ဓလေ့ကို ဖော်ကျူးသည့် ကဗျာသည်ပင် နှစ်စဉ် မြန်မာနိုင်ငံသား ခြောက်သောင်းခန့် သေဆုံးအောင် တွန်းအားပေးခဲ့သည့် အကြောင်းအရင်းတစ်ခု ဖြစ်နေသလောဟု စဉ်းစားရမလို ဖြစ်လာပါသည်။ ရှေးယခင်က မိရိုးဖလာ နည်းလမ်းအတိုင်း ယွန်းကွမ်းအစ်အတွင်းမှ ကွမ်းရွက်နှင့် ကွမ်းသီးလောက်ကိုသာ အဓိက ဝါးခဲ့ကြစဉ်က ကျန်းမာရေးကို ဆိုးဆိုးရွားရွား ထိခိုက်မှု မရှိနိုင်ခဲ့သော်လည်း နောက်ပိုင်းတွင် အိမ်နီးချင်းနိုင်ငံများမှ အလွယ်တကူ တင်သွင်းနေသည့် ဆေးအမျိုးမျိုးနှင့် တွဲဖက်ကာ ဝါးမိကြချိန်၌ နောက်ဆက်တွဲ ရောဂါဆိုးကြီးများ ပေါ်ပေါက်လာခြင်းဖြစ်ဟန်ရှိပါသည်။ စစ်တမ်းအရ မြန်မာနိုင်ငံ၌ အသက် ၁၅ နှစ်အထက် အရွယ်ရောက်သူ စုစုပေါင်း ၃၀ ရာခိုင်နှုန်းမှာ ကင်ဆာအစရှိသည့် ရောဂါများ ဖြစ်ပွားစေနိုင်သော ဆေးရွက်ကြီးငုံကာ ကွမ်းဝါးမှုများ ပြုလုပ်လျက် ရှိသည်ဟု သိရပြန်ရာ မိမိ၏ မိသားစု၊ ပတ်ဝန်းကျင်နှင့် နိုင်ငံအတွက် အလုပ်ကောင်းစွာ အာရုံစိုက် အလုပ်လုပ်နိုင်သည့်အရွယ်တွင် ရောဂါဆိုးကြီးများ ဖြစ်ပေါ်ခံစားရမည့်အရေးအတွက် ရတက်မအေး ဖြစ်မိပါသည်။ 

တစ်ဖက်တွင် မြန်မာရှိလျှင် ကွမ်းတံတွေး ရှိရမည်ဟူသော သဘောမျိုးကို မြန်မာနိုင်ငံသား အများစု သွားရောက် အလုပ်လုပ်ကိုင်ကြသော ပြည်ပနိုင်ငံများက အာဏာပိုင်များက ပျက်ရယ်ပြုသလို၊ နှိမ်ချသလို ပြောလေ့ရှိသည်ကို မကြာခဏ ကြားသိနေရသည်မှာ ကွမ်းဝါးသည့် အကျင့်စရိုက်သည် တစ်မျိုးသားလုံး၏ ဂုဏ်သိက္ခာ လွန်စွာ ညှိုးနွမ်းစေသည် ဟူသောအချက်ကို လေးလေးနက်နက် စဉ်းစားဆင်ခြင်ကြည့်သင့်ပေသည်။ ရန်ကုန်ဆေးရုံကြီး၏ အရေးပေါ်ဌာနကဲ့သို့လိုနေရာမျိုးတွင်ပင် ကွမ်းမစားရဟု ရေးထားသည့် သတိပေး ဆိုင်းဘုတ်ရှေ့က အမှိုက်ပုံးထဲသို့ ကွမ်းတဗျစ်ဗျစ်ထွေးထည့်နေသူ မြောက်မြားစွာ ရှိနေသည့်ကိစ္စကို ကြည့်မည်ဆိုလျှင် တစ်တိုင်းပြည်လုံးကို ရုပ်ဆိုး အကျည်းတန်အောင် ကွမ်းတံတွေးထွေးသူ မည်မျှအထိရှိမည်ကို ဆဝါးကြည့်နိုင်ပေသည်။ ရိုးရာအစဉ်အလာဖြစ်စေ၊ ဓလေ့စရိုက်ဖြစ်စေ မိမိနှင့် မိမိပတ်ဝန်းကျင်ကို ထိခိုက်စေနိုင်သည့် အပြုအမူ သို့မဟုတ် အလေ့အထ ဖြစ်ပါက မည်သို့မျှ လက်သင့်မခံတော့ဘဲ စွန့်လွှတ်နိုင်ခြင်းသည် အသိဉာဏ်ရှိသူတို့၏ လမ်းစဉ်ဖြစ်ပေရာ မြန်မာနိုင်ငံသားများအနေနှင့် အရည်မရ၊ အဖတ်မရသည့် ကွမ်းဝါးသောအကျင့်ကို မြန်မာ့စရိုက်လက္ခဏာအဖြစ် ဆက်လက် သတ်မှတ် သင့်၊ မသင့် ကိုယ်ကိုယ်တိုင် စဉ်းစားဆုံးဖြတ်ကြရမည့်အကြောင်း ဖော်ပြလိုရင်း ဖြစ်ပေသည်။ 

အယ်ဒီတာ (၁၂-၉-၂၀၁၇)