News

POST TYPE

EDITORIAL

သတ်ကွင်းပြင်ထားသော စကားစစ်ထိုးပွဲနှင့် မိမိကိုယ်ကို ယုံကြည်မှု (Daily, Vol-5/No-130)
10-Sep-2017 tagged as

ယနေ့ ရခိုင်ပြည်နယ်တွင် ဖြစ်ပေါ်နေသော အခြေအနေ အရပ်ရပ်နှင့်ပတ်သက်၍ လန်ဒန်တွင်နေထိုင်ပြီး ရိုဟင်ဂျာ အမည်ခံ ဘင်္ဂလားဒေ့ရ်ှနိုင်ငံမှ ရခိုင်ဒေသတွင်း ရွှေ့ပြောင်းနေထိုင်သူများ အရေးကိစ္စကို လူမျိုးတုံးသတ်ဖြတ်မှု ရှုထောင့်မှ ရပ်ခံနေသူ ဒေါက်တာ မောင်ဇာနည်နှင့် ယခင်အဝေးရောက် အန်လ်အယ်လ်ဒီ အစိုးရ နိုင်ငံခြားရေး တာဝန်ခံဖြစ်ခဲ့သူ ဦးညိုအုန်းမြင့်တို့အကြား စကားစစ်ထိုးပွဲကို တူရကီရုပ်သံ မီဒီယာတစ်ခုတွင် ထုတ်လွှင့်သွားခဲ့ရာ ကြည့်ရှုဝေဖန်မှုများ မြင့်တက်သွားခဲ့သည်။

ရခိုင်ပြည်နယ်ရှိ လတ်တလော အကြမ်းဖက် လှုပ်ရှားမှုများကို အကြောင်းပြု၍ ပြုလုပ်သော စကားစစ်ထိုးပွဲ ဖြစ်သော်လည်း နိုင်ငံရေး အကျိုးအမြတ်အလို့ငှာ ရှေ့တန်း တင်လာသော ရိုဟင်ဂျာ ပြဿနာနှင့် လူမျိုးတုန်း သတ်ဖြတ်မှု စွဲချက်ကို ခေါင်းစဉ်ပေးထားခြင်း ဖြစ်သည့်အတွက် မူလကပင်မျှတသော စကားစစ်ထိုးပွဲ မဖြစ်နိုင်ကြောင်း ကြိုတင်ခန့်မှန်းမှုများ ရှိခဲ့သည်။ 

ယင်းသို့ ခန့်မှန်းသည့်အတိုင်းပင် တူရကီရုပ်သံမီဒီယာမှ မော်ဒရိတ်တာ ခေါ် စကားစစ်ထိုးပွဲ၏ သဘာပတိ တာဝန်ယူထားသူ၏ တစ်ဖက်စောင်းနင်း ဆန်သော၊ အပြစ်တင် စွပ်စွဲသံကဲလွန်းသော လိုရာဆွဲမေးခွန်းများက စကားစစ်ထိုးပွဲများ၏ ရသနှင့် အလှတရားကို ဖျက်ဆီး၊ အကျည်းတန် သွားစေခဲ့သည်။

ထို့အပြင် မန္တလေးမှ ဧည့်လမ်းညွှန်တစ်ဦး ဘဝမှသည် စစ်အစိုးရ ဆန့်ကျင်သူ၊ နာမည်ကျော် နိုင်ငံရေး လှုပ်ရှားတက်ကြွသူ တစ်ဦးဖြစ်ခဲ့ပြီး ယခင် တပ်မတော် ထောက်လှမ်းရေးက ခေါ်ယူတွေ့ဆုံပြီးနောက်၊ အငြင်းပွားဖွယ် ထောက်ပံ့ကြေးများဖြင့် ရိုဟင်ဂျာ နာမည်တပ်ထားသော ပြဿနာကို သုတေသနပြုခဲ့သူ၊ ဒေါ်အောင်ဆန်းစုကြည်ကို ပုဂ္ဂိုလ်ရေး တိုက်ခိုက်သူ ဒေါက်တာမောင်ဇာနည်၏ ငြင်းခုံဆွေးနွေးမှုများက ဘီလူးမျက်နှာကို အိုးမဲသုတ်လိုက်သကဲ့သို့ ဖြစ်သွားခဲ့သည်။   

နိုင်ငံတကာ မီဒီယာများတွင် ရခိုင်ပြည်နယ်၏ သမိုင်းကြောင်း၊ ရွှေ့ပြောင်းနေထိုင်ခြင်းဆိုင်ရာ သီအိုရီသဘောနှင့် ကမ္ဘာတစ်ဝန်းမှ အခြားသာဓက အဖြစ်အပျက်များ၊ နိုင်ငံရေး ပယောဂ မကင်းသော ဘာသာရေး၊ လူမျိုးရေး အဓိကရုဏ်း ဖန်တီးမှုများ၊ ရန်ပုံငွေ အထောက်အပံ့မျှော် ဒရာမာဆန်ဆန် ဇာတ်လမ်း၊ ဇာတ်ကွက်များနှင့် လက်တွေ့မြေပြင်မှ ပကတိ အရှိတရားများကို မျက်ကွယ်ပြုသည့် ဖန်တစ်ရာတေ အမြင်ရှုထောင့်များကို အထိုင်ပြုထားသော စွပ်စွဲမှုဆန်ဆန် မေးခွန်းများသာ ဖြစ်နေခဲ့သည်။

၁၉၈၈ အရေးတော်ပုံပြီးနောက် အာဏာသိမ်း စစ်အစိုးရကို ဆန့်ကျင်သူ၊ Free Burma Coalition (FBC) ကို တည်ထောင်သူ၊ စစ်အစိုးရ ဆန့်ကျင်ရေး နိုင်ငံရေး တက်ကြွလှုပ်ရှားသူအဖြစ် ပြည်ပ အသံလွှင့်ဌာန အချို့၏ စင်တင်ပေးမှုဖြင့် နာမည်ကျော်လာခဲ့သော ဒေါက်တာ မောင်ဇာနည်သည် ရခိုင်ပြည်နယ်ရှိ တစ်ဖက်နိုင်ငံမှ ရွှေ့ပြောင်း အခြေချ နေထိုင်သူများကို ဦးနုအစိုးရလက်ထက်က ပြုစုခဲ့သော မြန်မာ့စွယ်စုံကျမ်းတွင် ရိုဟင်ဂျာအဖြစ် သုံးနှုန်း အသိအမှတ်ပြုခဲ့ခြင်းကို သက်သေယူကာ ခုနစ်နှစ်ခန့် ၎င်းလေ့လာထားချက်အရ မြန်မာ့တပ်မတော်က လူမျိုးတုံး သတ်ဖြတ်မှု ကျူးလွန်ခဲ့ကြောင်း စွပ်စွဲပြောဆိုသွားခဲ့သည်။

ယင်းအချက်ကိုကြည့်လျှင်ပင် ဒေါက်တာမောင်ဇာနည်၏ လေ့လာမှုမှာ သမိုင်းအချက်အလက်၊ အထောက်အထား၊ ခိုင်မာ၊ ပြည့်စုံ၊ ကျယ်ပြန့်မှုမရှိဘဲ နှစ်အကန့်အသတ် တစ်ခုအတွင်းရှိ လူမျိုးတုံးသတ်ဖြတ်မှုခေါင်းစဉ်နှင့် ကိုက်ညီစေရန် လိုချင်သည့်အပိုင်းကိုသာ ကွက်ယူထားကြောင်း သိသာထင်ရှားလှသည်။  

ပြောရလျှင် ဒုတိယဝန်ကြီးချုပ်၏ မဟုတ်မမှန် အလိမ်အညာ သတင်းများကို အသုံးပြု၍ မြန်မာနိုင်ငံအပေါ် လုပ်ကြံအပုပ်ချထားကြောင်း လူသိရှင်ကြား ဝန်ခံထားသော နိုင်ငံရှိ နိုင်ငံတကာ မဆိုထားနှင့် သက်ဆိုင်ရာ ဒေသတွင်း၌ပင်လျှင် ဘာသာရေး၊ လူမျိုးရေးဘက်လိုက်မှုများကြောင့် တန်းမီ၊ စံမီမဟုတ်သည့် မထင်မရှား တူရကီရုပ်သံ မီဒီယာတစ်ခုတွင် ကြိုတင်ဇာတ်ကွက်ဆင်ထားသော မေးခွန်းများဖြင့် ဒီဘိတ်ခေါ် စကားစစ်ထိုးပွဲ ခေါင်းစဉ်ပေးထားခြင်းကပင် မမျှတသည့် စီစဉ်တင်ဆက်မှုဖြစ်ကြောင်း ပေါ်လွင် ထင်ရှားလှပေသည်။

အခြားတစ်ဖက်တွင်မူ ရိုဟင်ဂျာ နာမည်ခံ ဘင်္ဂါလီ အသိုင်းအဝိုင်းသည် နိုင်ငံတကာ သတင်းမီဒီယာများမှတစ်ဆင့် နိုင်ငံတကာတွင် အသုံးတွင် ကျယ်နေသော ဘာသာစကားဖြင့် နိုင်ငံတကာသို့ ဝါဒဖြန့်၊ ဩဇာလွှမ်း၊ ဆွဲဆောင်၊ စည်းရုံး၊ လှုံ့ဆော်၊ နားသွင်းနေချိန်တွင် မြန်မာနိုင်ငံဘက်မှ အဖြစ်မှန်၊ အခြေအနေမှန်ကို နိုင်ငံတကာ သိရှိစေရန် တုံ့ပြန်နိုင်စွမ်း များစွာ နိမ့်ပါးနေခြင်းကို အလျင်အမြန် စဉ်းစားပြင်ဆင်ရန် လိုအပ်နေပေသည်။ 

သံသယဖြစ်ဖွယ် တစ်ဖက်သတ် ဆန်သော နိုင်ငံတကာ ဖိအားနှင့် စွပ်စွဲမှုများကို လူမှုရေး ကွန်ရက်ပေါ်တွင် မြန်မာဘာသာဖြင့် ဒေါသသင့်သော၊ ပညာသား မပါသော၊ ချက်ကျ လက်ကျ မဟုတ်သော မယဉ်မကျေး စကားလုံးများဖြင့် ပရမ်းပတာ တုံ့ပြန်နေခြင်းကိုလည်း အမျိုးသားရေး စိတ်ဓာတ်၊ အစဉ်အလာအရ ယဉ်ကျေးသော လူ့အဖွဲ့အစည်း အသွင်သဏ္ဌာန်များအရ ထိန်းသိမ်းဆင်ခြင်သင့်ပေသည်။

အကြမ်းဖက်မှုဆန့်ကျင်ရေး ခေါင်းစဉ်ဖြင့် မိမိတို့အပေါ် ထောက်ခံအားပေးမည့် နိုင်ငံများ၏ ကိုယ်ချင်းစာနာမှု၊ လက်တွေ့ကူညီရိုင်းပင်းမှုတို့ ရရှိရန် သံတမန် နည်းဗျူဟာများ၊ နိုင်ငံသားအဖြစ် အသိအမှတ်ပြုမှုဆိုင်ရာ မျှတခိုင်မာအား ကောင်းသော ဥပဒေ၊ စည်းမျဉ်း၊ စည်းကမ်းများ၊ နိုင်ငံတကာရှိ အလားတူ အဖြစ်အပျက် သာဓကများ၊ လက်ရှိ ရခိုင်ဒေသ ပြဿနာအပေါ် ဥပဒေနှင့်အညီ ကိုင်တွယ်ဆောင်ရွက်မှုများဖြင့် စွပ်စွဲချက်မှန်သမျှကို ကျိုးကြောင်းညီညွတ်စွာ ယုံကြည်မှုရှိရှိ တုံ့ပြန်ချေပရန်လည်း ပြင်ဆင်ထားရပေမည်။ 

မည်သို့ပင်ဖြစ်စေ အမျိုးသား သစ္စာဖောက်အဖြစ် သတ်မှတ်ခံရတော့မည့်သူတစ်ဦးက သတ်ကွင်းကြိုပြင်ထားမှန်း သိပါလျက်နှင့် မြန်မာနိုင်ငံ၏ ဂုဏ်သိက္ခာအတွက် ရခိုင်ဒေသ၏ လတ်တလော အခြေအနေများကို အစိုးရနှင့် တပ်မတော်က လက်တွေ့ ကိုင်တွယ်ဖြေရှင်းနေသည့် အဖြစ်မှန်များကို နိုင်ငံတော်နှင့် နိုင်ငံသားများ ကိုယ်စား ခုခံချေပရှင်းလင်းခဲ့သော ဦးညိုအုန်းမြင့်ကဲ့သို့ ပုဂ္ဂိုလ်မျိုး၏ နိုင်ငံချစ်စိတ်နှင့် နိုင်ငံသား တာဝန်ကျေပွန်မှုကို အထူးတလည် အသိအမှတ်ပြုအပ်၊ ဂုဏ်ပြု မှတ်တမ်းတင်အပ်ပေသည်။

အယ်ဒီတာ (၁၀-၉-၂၀၁၇)

  • TAGS