News

POST TYPE

EDITORIAL

OK ဒီမိုကရေစီထက် APPLY ဒီမိုကရေစီ ဖြစ်ရန်လိုသည် (Daily, Vol-5/No-82)
16-Jul-2017 tagged as

နိုင်ငံတစ်နိုင်ငံ ဖွံ့ဖြိုးတိုးတက်ရေးအတွက် လိုအပ်သည့်အရာများထဲတွင် “မူ”ဟုဆိုနိုင်သည့် စနစ်ကောင်းတစ်ရပ် ပေါ်ထွန်းရေးသည် ထိပ်ဆုံးမှ ပါဝင်နေသည်ကို ဖွံ့ဖြိုးမှု လွန်စွာ နိမ့်ကျနေသည့် နိုင်ငံကို ပြန်လည် တည်ဆောက်ယူလိုသူတိုင်း လက်ခံနားလည်ထားပြီး ဖြစ်ပေသည်။ ကိုလိုနီနယ်ချဲ့ အလိုမရှိဟု ကြွေးကြော်ခဲ့ရသော မြန်မာနိုင်ငံကို တစ်ချိန်က သိမ်းပိုက်ရယူထားခဲ့သည့် ဗြိတိသျှတို့သည် ဤနိုင်ငံသို့ အုပ်ချုပ်မည့်သူ အနည်းငယ်သာ စေလွှတ်ပြီး နှစ်အတန်ကြာ သိမ်းပိုက်ရယူထားခဲ့သည်မှာလည်း လက်နက်အင်အား သာလွန်သည့်အကြောင်း တစ်ခုတည်းကြောင့်တော့ မဟုတ်ပေ။ အားကောင်း မောင်းသန်ရှိလှသည့် စနစ်တစ်ရပ်ကို ဖန်တီးထားနိုင်ခဲ့ခြင်းကြောင့်သာ ဖြစ်သည်ဟုပင် ဆိုရပေမည်။ ကိုလိုနီနယ်ချဲ့စနစ်ဟူသည် မည်သို့မျှ ထောက်ခံစရာ မရှိသော်လည်း ကမ္ဘာ့မြေပုံတွင် အလွန်တရာမျှ သေးငယ်လွန်းလှသည့် ဗြိတိန်နိုင်ငံက မိုင်းပေါင်း ထောင်ချီဝေးကွာသော နေရာတွင်ရှိသည့် မြန်မာနိုင်ငံနှင့် သူ့ထက် အဆပေါင်း များစွာကြီးမားသော အိန္ဒိယနိုင်ငံတို့မှ လူပေါင်း များစွာကို အချိန် အတော်ကြာကြာ အုပ်ချုပ်ခဲ့သည်မှာ တစ်မျိုး စဉ်းစားမည်ဆိုပါက အံ့အားသင့်စရာ ကောင်းလှသည့် စနစ်တစ်ရပ်ရှိနေသည်ကို တွေ့မြင်ရပေမည်။ 

ဗြိတိသျှတို့ အုပ်စိုးမှု အဆုံးသတ်ကာ ပါလီမန် ဒီမိုကရေစီခေတ်ကာလ နောက်ပိုင်း နိုင်ငံတော် အာဏာသိမ်းယူခဲ့သည့် တော်လှန်ရေးကောင်စီ အစိုးရ လက်ထက်မှစ၍ ယနေ့အချိန်ကာလအထိ အခြားနိုင်ငံများထက် အဆပေါင်း များစွာ နောက်ကောက်ကျကျန်ရစ်ခဲ့သည့် အနေအထားကို ကြည့်မည်ဆိုလျှင် “မူ” သို့မဟုတ် စနစ်ကောင်း တစ်ရပ်ဖြင့် အုပ်ချုပ်ခြင်းထက် နိုင်ငံတော် အကြီးအကဲ သို့မဟုတ် လူက အသေးအဖွဲကိစ္စမှသည် ဧရာမ စီမံကိန်းကြီးများအဆုံး ဝင်ရောက် ဆုံးဖြတ်နေခဲ့ခြင်းကြောင့်သာ ယခုလို ပုံစံပေါက်လာရခြင်းဟုပင် ဆိုရပေမည်။ တစ်နည်းအားဖြင့် အုပ်ချုပ်မှု ယန္တရား၏ လုပ်ပိုင်ခွင့် အားလုံးကို ခေါင်းဆောင် အပါအဝင် ၎င်းနှင့် အနီးကပ် ဆက်နွှယ်သူ လူနည်းစုကသာ ဆုပ်ကိုင်ထားခြင်းကို ဆိုလိုပေသည်။ ရာစုနှစ်ဝက်ကျော်ကြာမျှ “မူ” ထက် “လူ”ကို အသားပေးပြီး ဆန့်ကျင်ဘက် နိုင်ငံရေး အင်အားစုများ မဆိုထားနှင့် မိမိလက်အောက်မှ ပုဂ္ဂိုလ်အသီးသီး၏ ဝေဖန်ထောက်ပြမှုမျိုးကိုပင် သည်းမခံခဲ့သော ခေတ်ကာလတွင်း (အနောက်နိုင်ငံများ မြန်မာအပေါ် ဒဏ်ခတ် အရေးယူမှု မပြုလုပ်သည့် ကာလများ အပါအဝင်) ပညာရေး၊ စီးပွားရေး၊ ကျန်းမာရေး စသည့် နယ်ပယ် အသီးသီး၌ အခြားနိုင်ငံများထက် အဆမတန် နိမ့်ကျခဲ့ရသည်ကို ယနေ့ အာဏာရပါတီမှ ခေါင်းဆောင်များနှင့် ပြည်သူတစ်ရပ်လုံး အသိပင်ဖြစ်ပါသည်။

“မူ” ထက် “လူ”က ဆုံးဖြတ်သော ခေတ်ကာလကို ကျော်ဖြတ်ခဲ့ပြီးနောက် ယနေ့ ဒီမိုကရေစီ အသွင်ကူးပြောင်းနိုင်ရေးအတွက် ကြိုးပမ်းနေချိန်တွင် ယခင်ကလို အခြေအနေမျိုးထဲသို့ ပြန်မတိုးမိရေးမှာ ဒီမိုကရေစီဖော်ဆောင်မည်ဟု သံန္နိဋ္ဌာန်ချထားသူများအားလုံး သတိပြုရမည်ဟု ယုံကြည်ပါသည်။ တစ်မျိုး  ပြောရလျှင် အာဏာရှင်စနစ်ကို ရွံရှာမုန်းတီးသူ တစ်ဦးအနေနှင့် အာဏာရှင် ဆန်သော အပြုအမူမျိုးနှင့် ဆုံးဖြတ်ချက်မျိုးကို မိမိသန္တာန်၌ သာမက မိမိအဖွဲ့အစည်းတွင်း၌ပါ မကျင့်သုံးမိစေရန် အရေးကြီးသည်ကို ဆိုလိုပေသည်။ ထိုသို့ ကျင့်ဆောင်နိုင်ခြင်း မရှိပါက မိမိရော မိမိအဖွဲ့အစည်းပါ အာဏာရှင်စနစ်နှင့်အတူ ထိုင်ခုံ တစ်ခုံတည်းတွင် ကျောချင်းကပ် ထိုင်နေသူများ (ဦးတည်ချက် မတူသော်လည်း မူဝါဒ သဘောထားတူသူများ)အဖြစ် မလွဲမသွေ ရှုမြင်ခံရမည်သာဖြစ်ပေသည်။ ကွန်ပျူတာတစ်လုံး၏ Application အစီအစဉ် ဥပမာဖြင့်ဆိုပါက မိမိရွေးချယ်ထားသော စနစ်ကို Cancel ခလုတ်မနှိပ်ဘဲ Ok နှိပ်လိုက်သော်လည်း Apply ခလုတ်မနှိပ်ဘဲထားခြင်းမျိုးဟု ဆိုရပါမည်။
 
လက်ရှိ ဒီမိုကရေစီ အသွင်ကူးပြောင်းမှုတွင်လည်း ထိုနည်းအတိုင်းပင် ဖြစ်ရပါမည်။ အာဏာရထားသူများနှင့် နောက်လိုက်များ အပါအဝင် ဒီမိုကရေစီကို လိုလိုလားလား ရှိကြသူ ပြည်သူများအနေနှင့် Ok တစ်ခုတည်းကိုနှိပ်ပြရုံမျှဖြင့် ယခင်စနစ်ဟောင်းကို မနှစ်သက်ကြောင်း ပြသနိုင်မည်ဖြစ်သော်လည်း Apply ခလုတ်ကို မဖြစ်မနေ နှိပ်မိပါမှ ယင်းစနစ်ဟောင်းထဲက “မူ” ထက် “လူ”ကို အသားပေးသည့် အာဏာရှင်ပုံစံမျိုးကို အမှန်တကယ် Uninstall လုပ်ကာ ဖြုတ်ပစ်နိုင်မည် ဖြစ်သည်ဟူသောအချက်ကို အထူးသတိပြုရပေမည်။

ယနေ့အချိန်ကာလသည် အုပ်စုတစ်စုနှင့်တစ်စု ရန်ဖြစ်နေရမည့်အချိန် မဟုတ်တော့ဘဲ နိုင်ငံတည်ဆောက်ရေးဘက်သို့ မဖြစ်မနေ ဦးတည်ရမည့်အချိန် ဖြစ်ပေရာ သက်ဆိုင်သူများ အားလုံး မိမိသည် Ok ဒီမိုကရေစီသမား (ဒီမိုကရေစီကိုလက်ခံသော်လည်း ဒီမိုကရေစီစံနှုန်းများအတိုင်း ကျင့်ကြံနေထိုင်မှုမပြုသူ) လား၊ သို့မဟုတ် Apply ဒီမိုကရေစီသမား (ဒီမိုကရေစီ စံချိန်စံနှုန်းများအတိုင်း ကျင့်ကြံနေထိုင်သူ) လား ဟူသည်ကို ဆန်းစစ်ကြရမည့်အကြောင်း ဖော်ပြလိုရင်း ဖြစ်ပေသည်။ 

အယ်ဒီတာ (၁၆-၇-၂၀၁၇) 

  • TAGS