News

POST TYPE

EDITORIAL

စိတ်ထားကောင်း အရေးကြီးပါတယ် (Daily, Vol-5/No-81)
15-Jul-2017 tagged as

ဗုဒ္ဓဘာသာဝင် မြန်မာလူမျိုးတွေ အတော်များများ သိကြတဲ့ မဟာဂန္ဓာရုံ ဆရာတော်ကြီးက သူ့ရဲ့စာသင်တိုက်အတွင်း “ဤကျောင်းတွင် စိတ်ကောင်းရှိဖို့က ပထမ”ဆိုပြီး စာသင်သား ရဟန်းတော်များ လိုက်နာရမယ့် စည်းကမ်း ၁၀ ချက်အနက် စိတ်ကောင်းရှိရမယ့်ကိစ္စကို ပထမနေရာမှာထားပြီး သတိပေးထားတာကို အားလုံး သိကြမှာပါ။

အသိပညာတွေ၊ အတတ်ပညာတွေ ဘယ်လိုပဲ တတ်မြောက်ထားပါစေ၊ ပရိယတ္တိစာတွေကို ဘယ်လိုပဲ ခဲရာခဲဆစ် သင်ယူနိုင်ပါစေ စိတ်ထားကောင်း မရှိဘူးဆိုရင် မိမိကောင်းကျိုးရော၊ လောကကောင်းကျိုးရော သယ်ပိုးနိုင်မှာမဟုတ် ဘူးဆိုတာကို သတိပေးခဲ့တာပါ။

နောက်ပြီး စိတ်ကောင်းဆိုတဲ့ကိစ္စမှာ ဗုဒ္ဓဘာသာဝင်ဖြစ်စေ၊ အခြားဘာသာ တစ်ခုခုကို ယုံကြည်သက်ဝင်သူဖြစ်စေ ဘယ်သူပဲဖြစ်ဖြစ် ထားလို့ရတဲ့ကိစ္စဆိုလည်း မမှားပါဘူး။ တခြားဘာသာရေး အဆုံးအမတွေကို ကြည့်မယ်ဆိုရင်လည်း လောကကောင်းကျိုး သယ်ပိုးနိုင်ဖို့၊ တစ်မျိုးပြောရရင် စိတ်ကောင်း ရှိထားဖို့ ဆုံးမကြတာချည်းပဲ ဆိုတာကို တွေ့ရပါလိမ့်မယ်။ 

အဲဒီတော့ စိတ်ကောင်းထားရမယ့်ကိစ္စဟာ ဘယ်လို အသားအရောင်ပဲရှိရှိ၊ ဘယ်လို ဘာသာတရားပဲကိုးကွယ် ကိုးကွယ် လူတိုင်းနဲ့ သက်ဆိုင်တယ်လို့ပဲ ဆိုရတော့မှာပါပဲ။ ကိုယ်ချင်းစာနာစိတ်၊ သနားညှာတာစိတ်၊ မေတ္တာစိတ် စတာတွေဟာ ဘာသာတရားဆိုတဲ့ သတ်မှတ်ချက်နဲ့ မဆိုင်ပါဘူး။ ကောင်းတဲ့ စိတ်ထားရှိ၊ မရှိနဲ့ဘဲ သက်ဆိုင်တာပါ။
 
ဟုတ်တယ်လေ။ ကမ္ဘာ့သမိုင်းကို ကြည့်မယ်ဆိုရင်လည်း ဘယ်လောက် ထူးချွန်တဲ့ခေါင်းဆောင်ပဲဖြစ်ဖြစ် စိတ်ထားက မကောင်းဘူးဆိုရင် လူတွေကို ထောင်နဲ့၊ သောင်းနဲ့ သန်းနဲ့ချီပြီး သတ်ဖြတ်ပစ်ကြတဲ့အထိ ရှိခဲ့ကြတယ်မဟုတ်လား။ အဲဒီတော့ ဒီမိုကရေစီ ချန်ပီယံကြီးပဲဖြစ်ဖြစ်၊ မျိုးချစ် အာဏာရှင်ကြီးပဲဖြစ်ဖြစ် စိတ်ထားကောင်းရှိပါမှ သမိုင်းကြောင်း လှမယ်ဆိုတာကိုလည်း သိထားရပါမယ်။

နောက်ပြီး စိတ်ထားကောင်းရှိတယ်ဆိုတဲ့ သဘောတရားဟာ မိမိ တစ်ကိုယ်ရေ ကောင်းကျိုးတစ်ခုတည်းကို သာမက မိမိပတ်ဝန်းကျင်မှာရှိတဲ့ မိသားစု၊ မိတ်ဆွေ အပေါင်းအသင်း၊ လုပ်ဖော်ကိုင်ဖက်တွေနဲ့ မိမိနဲ့ ထိစပ်ပတ်သက်နေတဲ့ လူ့အဖွဲ့အစည်းတစ်ခုလုံးရဲ့ ကောင်းကျိုးကို လိုလားတဲ့စိတ်ကိုလည်း ရည်ညွှန်းတာ ဖြစ်ပါတယ်။

အရာရာဟာ စိတ်ကဆောင်တယ်ဆိုတာ အားလုံး သိကြပါတယ်။ လူတစ်ယောက်ရဲ့ အပြုအမူ အပြောအဆိုနဲ့ လုပ်ရပ်တွေကို ကြည့်မယ်ဆိုရင် အဲဒါတွေ အားလုံးရဲ့ ဆရာသခင်ဟာ သူ့စိတ်ပဲဆိုတာ အထူးပြောစရာတောင် မလိုဘူး ထင်ပါတယ်။ အဲဒါကြောင့် အနောက်နိုင်ငံသားတွေက Beware of your mind and thoughts ဆိုပြီး သတိပေးလေ့ ရှိကြတာပါ။

စိတ်ဖိစီးမှုတွေနဲ့ စိန်ခေါ်မှုတွေ သိပ်ကိုများလွန်းတဲ့ သည်ကနေ့ခေတ်ကြီးမှာ စိတ်ထားကောင်းလေးတွေ မွေးထားနိုင်ပါမှ တစ်ဦးနဲ့တစ်ဦး ဆဲဆိုတာကအစ လူသတ်မှုကြီး ကျူးလွန်ကြတဲ့အဆုံးထိ ဖြစ်ရပ်မျိုးတွေကို ရှောင်ထားနိုင်မှာပါ။ မော်တော်ကား မောင်းရာမှာလည်း ကားတစ်စီးနဲ့တစ်စီး စာနာစိတ်ထားပြီး နေရာလေးဖယ်ပေး၊ လမ်းဖယ်ပေးတာကအစ ကိုယ့်ရဲ့ စိတ်စေတနာ ကောင်းလေးတွေကို ပြလို့ရနိုင်တာပဲ မဟုတ်လား။ ကိုယ်က ဘာရမလဲဆိုတာထက် ကိုယ်က ဘာပေးနိုင်မလဲလို့ အမြဲ တွေးနေတတ်တာမျိုးဟာလည်း စိတ်ထားကောင်းရှိခြင်းရဲ့ လက္ခဏာကောင်း တစ်ခုပါပဲ။

တစ်ခုတော့ရှိတာပေါ့။ စိတ်ထားကောင်းဆိုတာ လေ့ကျင့်မွေးမြူထားတတ်မှ ကိုယ့်ဆီမှာ ကပ်တွယ်နေတတ်တဲ့အရာပါ။ သတိလေးထားပြီး သူ မသေသွားအောင် အရိပ်တကြည့်ကြည့်နဲ့ ကြည့်နေမှ ရှင်သန်နိုင်တာပါ။ လူဆိုတာဟာ စိတ်ထားကောင်းသူတွေ (သဘောကောင်းသူတွေ)နဲ့ တွေ့ဆုံချင်ကြတဲ့သူ တွေချည်းပါပဲ။ လူကြီး မိဘတွေတောင် သူတော်ကောင်း သူမြတ်လောင်းနဲ့ ဆုံတွေ့နိုင်ပါစေလို့ ဆုပေးကြတတ်တယ် မဟုတ်လား။ အဲဒီနေရာမှာ လေးလေးနက်နက် စဉ်းစားသင့်တာက စိတ်ထားကောင်းသူတွေနဲ့ တွေ့ဆုံနိုင်ရေးထက် မိမိ ကိုယ်တိုင် စိတ်ထားကောင်းသူဖြစ်၊ မဖြစ် ကိုယ့်စိတ်ကိုယ် ပထမဆုံး ဆန်းစစ် ကြည့်သင့်တယ်ဆိုတာပါပဲ။

အယ်ဒီတာ (၁၅-၇-၂၀၁၇)

  • TAGS