News

POST TYPE

EDITORIAL

ဆန်းစစ်ကြည့်ရမည့် ယာဉ်မောင်းများ၏ စိတ်နေသဘောထား (Daily, Vol-5/No-79)
12-Jul-2017 tagged as

ပြည်ပမှ ဝယ်ယူ တင်သွင်းထားသော ဘတ်စ်ကားသစ်များ မောင်းနှင်မည့် ယာဉ်မောင်းများကို ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့ (YRTA)က စိတ်ပိုင်းဆိုင်ရာ လေ့ကျင့်မှုများ ပါဝင်သည့် အထူးသင်တန်းများ ပေးသွားရန် စီစဉ်လျက်ရှိသည်ဟု သိရပါသည်။ ပြီးခဲ့သည့် သီတင်းပတ်အတွင်း မင်္ဂလာဒုံမြို့နယ်တွင် YBS ခရီးသည်တင် ဘတ်စ်ကား တိုက်မှုကြီးကြောင့် လူပေါင်း ၁၀ ဦး သေဆုံးခဲ့ရပြီးနောက် ခရီးသည်တင်ကား မောင်းနှင်သူများ၏ ယာဉ်စည်းကမ်း လိုက်နာစောင့်ထိန်းမှု ကိစ္စသာမက ၎င်းတို့၏ စိတ်နေသဘောထား၊ တစ်နည်းအားဖြင့် မိမိအလုပ် အပေါ်ထားရှိသည့် ခံယူချက်ကိစ္စသည်ပါ အရေးတကြီး ဆွေးနွေးရမည့်အရာ ဖြစ်လာပါသည်။ ဒီမိုကရေစီ အစိုးရသစ်လက်ထက် ရန်ကုန်မြို့၏ သယ်ယူပို့ဆောင်ရေး အခန်းကဏ္ဍအတွက် မ.ထ.သ မှ YBS သို့ အပြောင်းအလဲကြီးတစ်ရပ် လုပ်ဆောင်ခဲ့ရာတွင် ယင်း YBS ၏ ဝန်ဆောင်မှုပိုင်းနှင့် ပတ်သက်၍ ခရီးသွားပြည်သူများ အများစုအကြား တူညီသည့်မှတ်ချက်မှာ YBS ယာဉ်မောင်းများနှင့် ယာဉ်နောက်လိုက်များ၏ အကျင့်စရိုက် ပြောင်းလဲသွားမှု မရှိခြင်းပင်ဖြစ်ခဲ့ပါသည်။

YBS နှင့်ပတ်သက်၍ ဝေဖန်မှုမျိုးစုံ ထွက်ပေါ်ခဲ့သည့်အနက် ခရီးသွား ပြည်သူများ အနေနှင့် အဓိက ပြောစရာ ဖြစ်နေသည်မှာ ပြောင်းလဲသွားသော ခရီးစဉ်လမ်းကြောင်းများနှင့် ယာဉ်မောင်း၊ ယာဉ်နောက်လိုက်များ၏ မပြောင်းလဲသေးသော အကျင့်စရိုက်ပိုင်း ဖြစ်ပေသည်။ YRTA ၏ စည်းကမ်းပိုင်း ကြပ်မတ်မှုဆိုင်ရာ အားနည်းနေသေး၍လော၊ သို့မဟုတ် ယာဉ်ထိန်းရဲများ၏ အရေးယူမှု ထိထိရောက်ရောက် မရှိသေး၍လောဟူသည်ကို မသိနိုင်သေးသော်လည်း ယနေ့ ရန်ကုန်မြို့လမ်းမပေါ်များတွင် ဘတ်စ်ကားများသည် ယာဉ်စည်းကမ်းကို ပြောင်ပြောင်တင်းတင်း ချိုးဖောက်ရဲသူများအဖြစ် သတ်မှတ်ခံထားရသည်မှာ အခြားယာဉ်မောင်းသူများ အပါအဝင် ရန်ကုန်နေ ပြည်သူများ အားလုံးအသိပင်ဖြစ်သည်။ CCTV ကင်မရာများ၊ Surprise Check ဟုခေါ်သည့် ရုတ်တရက် ယာဉ်စည်းကမ်းကြီးကြပ်သည့် အဖွဲ့များဖြင့် မည်သို့ပင် ဖမ်းဆီး အရေးယူစေကာမူ ဘတ်စ်ကား အများစု၏ စည်းကမ်းဖောက်မှုမှာ မည်သို့မျှ လျော့ကျသွားခြင်း မရှိသည်ကို တွေ့ရပါလိမ့်မည်။ 

လက်ရှိဖြစ်နေသည့် ခရီးသည်တင် ယာဉ်မောင်းများ၏ စည်းကမ်းကိစ္စကို ကြည့်မည်ဆိုလျှင် အောက်ပါနှစ်ချက်တို့ကို ဦးစွာ မဖြစ်မနေ ပြုပြင်ပစ်မှသာ    ပြဿနာများကို လုံးဝ လျှော့ချပစ်နိုင်ပြီး ခရီးသည်များလည်း ဘေးအန္တရာယ်ဆိုးများမှ ကင်းဝေးမည်ဖြစ်ပေသည်။ ပထမတစ်ခုမှာ ကားဖိုက်သည်ဟုဆိုသော ယာဉ်လိုင်းနံပါတ်တူသော ဘတ်စ်ကား အချင်းချင်း၊ သို့မဟုတ် ခရီးစဉ်တူသည့် ယာဉ်လိုင်း အချင်းချင်း ယှဉ်ပြိုင် မောင်းနှင်ကာ ခရီးသည်လုတင်သည့်ပြဿနာ ဖြစ်ပြီး ဒုတိယတစ်ချက်မှာ ယာဉ်နောက်လိုက် ထားရှိမှုပင်ဖြစ်သည်။ ဖြစ်စဉ်များကိုကြည့်လျှင် ယာဉ်နောက်လိုက်များ၏ ဖိအားပေးမှုများကြောင့် ယာဉ်မောင်းများ ယာဉ်စည်းကမ်း ပိုမိုချိုးဖောက်စေသည်ကို တွေ့ရပေရာ ယာဉ်နောက်လိုက်များ ဆက်လက် ထားရှိရန် သင့်၊ မသင့်ကို အလေးအနက် စဉ်းစားရန်လိုပေသည်။ ယခု YRTA ကပေးမည့် စိတ်ပိုင်းဆိုင်ရာ သင်တန်းတွင် Psycho Test များသာမက ခရီးသွားပြည်သူများအပေါ်ထားရှိသည့် ယာဉ်မောင်းများ၏ ခံယူချက်သဘောထားနှင့် အပြုအမူ(အကျင့်စရိုက်)ပိုင်းကိုပါ ကောင်းမွန်လာအောင် သင်ကြားပေးနိုင်လိမ့်မည်ဟု မျှော်လင့်မိသည်။ မြန်မာ့စိတ်ရင်း ကူညီရိုင်းပင်းခြင်းဟူသည့် အဆိုအတိုင်း ခရီးသည်များအပေါ် အမှန်တကယ် ကူညီရိုင်းပင်းတတ်ပြီး ယာဉ်စည်းကမ်း လိုက်နာတတ်သည့် ယာဉ်လုပ်သားကောင်းများ ပေါ်ထွန်းနိုင်ရေးသည် ဝေဖန်မှုများကြားမှ အပြောင်းအလဲကြီး တစ်ရပ်ကို လုပ်ဆောင်ခဲ့သော YRTA အာဏာပိုင်အဖွဲ့ပေါ်တွင် လုံးဝ တာဝန်ရှိနေပြီဖြစ်ကြောင်းသာ ပြောလိုပါသည်။
 
အယ်ဒီတာ (၁၂ -၇-၂၀၁၇)

  • TAGS