News

POST TYPE

EDITORIAL

အနှစ်မပြည့်သေးသော စပါးနှံများ အထူးသတိထား (Daily, Vol-5/No-78)
11-Jul-2017 tagged as

မကြာသေးခင်က တရားစီရင်ရေးနှင့် ဥပဒေရေးရာ ကော်မတီက အစီရင်ခံစာတစ်စောင် ထုတ်ပြန်ရာတွင် တရားသူကြီးများသည် အမှုသည်များအပေါ် မောက်မာစွာ ဆက်ဆံလျက် ရှိဆဲပင်ဖြစ်ပြီး သိသာထင်ရှားသည့် အပြောင်းအလဲ မဖြစ်သေးကြောင်း၊ တရားစီရင်ရာတွင်လည်း အနိုင်ပေးလိုသော အမှုသည်၏ သက်သေကိုသာ အသားပေး သုံးသပ်ပြီး တစ်ဖက်သတ် အမိန့််ချမှတ်လျက် ရှိသည်ကိုတွေ့ရကြောင်း ဖော်ပြလာသည်ကို တွေ့ရပါသည်။ နိုင်ငံအတွက် လွန်စွာ အရေးပါသည့် မဏ္ဍိုင်တစ်ခုဖြစ်သော တရားစီရင်ရေး အခန်းကဏ္ဍတွင် တရားမျှတမှုများ ဖော်ထုတ်ပေးရန် ယုံကြည်အပ်နှင်းခြင်း ခံရသည့် ပုဂ္ဂိုလ်များ၊ တစ်နည်းအားဖြင့် နိုင်ငံနှင့် လူ့အဖွဲ့အစည်းအတွင်း တရားမျှတမှု ပေါ်ပေါက်စေရန် တာဝန်ပေးခံရသူများက လိုတစ်မျိုး၊ မလိုတစ်မျိုး ပုံစံဖြင့် ယခင်ခေတ်ကာလက အကျင့် စရိုက်မျိုး ရှိနေသေးသည်ဟူသောကိစ္စမှာ များစွာ ဝမ်းနည်းဖွယ် ကောင်းသလို မကြာသေးခင် လပိုင်းခန့်ကလည်း တရားရုံးတစ်ရုံးတွင် အမှုစစ်ဆေးနေစဉ် ရှေ့နေဖြစ်သူက တရားသူကြီးကို ဖိနပ်ဖြင့် ပစ်ပေါက်ခဲ့သည့် ကိစ္စတစ်ရပ် ပေါ်ပေါက်ခဲ့ရာ တရားရေးလောက တစ်ခုလုံး ပွက်လောရိုက်သွားခဲ့ရုံမျှမက တရားစီရင်ရေး မဏ္ဍိုင်တွင်ဖြစ်ပေါ်နေသည့် လွဲမှားမှုများကို မီးမောင်းထိုးပြလိုက်ရာရောက် သွားပေသည်။ တရားခွင်ကဲ့သို့ နေရာမျိုး၌ တရားသူကြီးကို ဖိနပ်ဖြင့်ပေါက်မှုတွင် ရှေ့နေဖြစ်သူကို ရိုင်းစိုင်းသော ပုဂ္ဂိုလ်အဖြစ် မလွဲမသွေ ရှုမြင်ကြရမည်သာ ဖြစ်သော်လည်း လူမှုကွန်ရက်ပေါ်တွင် အဆိုပါရှေ့နေအား မတရားမှုများကို ရင်ဆိုင်တိုက်ပွဲဝင်သည့် ပုဂ္ဂိုလ်အဖြစ် သာမက သူရဲကောင်းတစ်ဦးသဖွယ် ချီးမွမ်းပြောဆိုသူ အမြောက်အမြား ထွက်ပေါ်လာသည်ကို ကြည့်မည်ဆိုလျှင် တရားရေးမဏ္ဍိုင်၏ ကြံ့ခိုင်မှုနှင့်ပတ်သက်၍ မေးခွန်းထုတ်စရာ များစွာကို ဖြစ်ပေါ်စေခဲ့ပါသည်။ တရားစီရင်ရေး အခန်းကဏ္ဍတွင်ဖြစ်ပေါ်နေသော ပြစ်တင်၊ ဝေဖန်စရာများနှင့် အားနည်းချက်များကို ပြုပြင်ပြင်ဆင်ရာတွင် “မမှားသော ရှေ့နေ၊ မသေသော ဆေးသမား ဟူ၍မရှိ”ဆိုသည့် သတိပေး ဆိုရိုးစကား အတိုင်းပင် အမှားများနှင့် အမှားဖြစ်စေသော အကြောင်းအရင်းများကို လေ့လာဆန်းစစ်ကာ ထိထိရောက်ရောက် ဆောင်ရွက်ရမည်ဟုသာ ဆိုရပါမည်။ ပြီးခဲ့သည့် ဇွန်လအတွင်းက ကျင်းပသွားသော အာဏာရ NLD ပါတီ ဗဟိုကော်မတီ အစည်းအဝေးပွဲ တစ်ရပ်တွင် သဘာပတိအဖြစ် တာဝန်ယူ ဆောင်ရွက်သူ ဦးအောင်ကြည်ညွန့်က ၎င်းတို့ပါတီအနေနှင့် “ဘေး”ကြီး သုံးခုနှင့် ရင်ဆိုင်ကြုံတွေ့ရနိုင်ကြောင်း ပြောဆိုသွားခဲ့သည်။ ပထမဘေးမှာ မွေးစားခံရသည့်ဘေးဖြစ်ပြီး ဒုတိယဘေးမှာ မွေးစား၍မရပါက ခုတုံးလုပ်ခံ ရမည့်ဘေးဖြစ်သည်။ ထို့နောက် ကြောက်စရာ အကောင်းဆုံးဘေးမှာ ပါတီတွင်းမှလာနိုင်သော မောက်မာထောင်လွှားခြင်း ဟူသည့်ဘေးပင်ဖြစ်သည်ဟု သတိပေးခဲ့ခြင်းဖြစ်သည်။ ၎င်းက ပါတီဝင်များ အနေနှင့် ပြည်သူများကပေးသော အာဏာအပ်နှင်းခြင်း ခံရမှုအပေါ် မောက်မာထောင်လွှားမှု မရှိကြရန်နှင့် အကယ်၍ မောက်မာထောင်လွှားနေမည်ဆိုပါက ၎င်းတို့၏ ပါတီမှာ နောက်ဆုံးတွင် ပျက်ကိန်းဆိုက်နိုင်ကြောင်း အထူး သတိပေးသွားခြင်းလည်း ဖြစ်ပေသည်။

 

ဦးအောင်ကြည်ညွှန့်က NLD ပါတီဝင်များကို ပါတီ၏ ရှေ့ရေးအတွက် သတိပေးသည်ဆိုသော်လည်း ယင်းသတိပေးချက်မှာ NLD ပါတီဝင်များ သာမက ပြည်သူလူထုနှင့် ထိတွေ့ဆက်ဆံနေရသော အာဏာပိုင် အဖွဲ့အစည်း အားလုံး သတိပြုရမည့်ကိစ္စဖြစ်သည်။ မကြာသေးခင် ရက်သတ္တတစ်ပတ်ကလည်း နေ့စဉ်ထုတ် သတင်းစာတစ်စောင်တွင် ဆရာဝန်ဆိုသူ တစ်ဦးက ဆရာဝန်များသည် စာတတ်၊ ပေတတ်သူများထက် အိုင်ကျူမြင့်၍သာ ဆေးကျောင်းတက်ပြီး ဆေးပညာဘွဲ့ကို ရယူနိုင်ခဲ့ခြင်းဖြစ်ကြောင်း၊ ဘာမဟုတ်သည့် ဘွဲ့နှင့် ကျောင်းပြီးခဲ့သူများက ဆရာဝန်ထက် လစာများသည့် ခေတ်ဖြစ်သည့်အတွက်ကြောင့် စိတ်ပျက်လျက်ရှိကြောင်း ဆောင်းပါးတစ်ပုဒ် ရေးသားပြီး ဆရာဝန် မဟုတ်သူများ အားလုံးကို အပေါ်စီးမှ မောက်မာစွာ နှိမ်ချအကဲဖြတ်ခဲ့သေးသည်။ မြန်မာနိုင်ငံတွင် အဆိုပါ ပုဂ္ဂိုလ်ကဲ့သို့ မောက်မာသော ဆရာဝန်ဦးရေ မည်မျှအထိ ရှိနေသည်ကို မသိနိုင်သော်လည်း ယင်းဆောင်းပါးသည် ဆရာဝန် အားလုံးကို ကိုယ်စားမပြုသော ဆောင်းပါးအဖြစ်သာ မှတ်ယူရန်ရှိတော့သည်။ ထို့အတူတစ်ဖက်တွင် နိုင်ငံခြားသားများနှင့် ထိတွေ့ဆက်ဆံရေး၌ ရိုးသား ပွင့်လင်းသူ၊ မောက်မာမှုမရှိဘဲ ကူညီရိုင်းပင်းတတ်သူများအဖြစ် သတ်မှတ်ခံရလေ့ရှိသော မြန်မာနိုင်ငံသားများသည် ကျန်တစ်ဖက်တွင် မိမိနိုင်ငံသား အချင်းချင်း ကိစ္စပေါ်လာပါက အဘယ့်ကြောင့် မောက်မာရသနည်းဟူသော အချက်မှာလည်း စဉ်းစားစရာ ကောင်းလှပေသည်။ အဓိကဆိုလိုသည်မှာ တရားသူကြီး လုပ်သည်ဖြစ်စေ၊ ရှေ့နေလုပ်သည်ဖြစ်စေ၊ ဆရာဝန် လုပ်သည် ဖြစ်စေ၊ အင်ဂျင်နီယာ လုပ်သည်ဖြစ်စေ၊ လွှတ်တော်ကိုယ်စားလှယ် လုပ်သည်ဖြစ်စေ၊ စစ်သားလုပ်သည်ဖြစ်စေ၊ ရဲအမှုထမ်း လုပ်သည်ဖြစ်စေ ဖြည့်ဆည်းသင့် ဖြည့်ဆည်းအပ်သော အသိပညာများကို အမှန်တကယ် ပြည့်ဝအောင် ဖြည့်ဆည်း ထားနိုင်ခဲ့ခြင်းမရှိပါက အနှစ်မပြည့်သေးသည့် စပါးနှံများကဲ့သို့ ထောင်လွှားနေနိုင်သည့် သဘောတွင်ရှိကြောင်း သတိပြုစေလိုရင်း ဖြစ်ပေသည်။

 

အယ်ဒီတာ (၁၁-၇-၂၀၁၇)


  • TAGS