News

POST TYPE

EDITORIAL

ကြိုဆိုရမည့် နိုင်ငံ့ဝန်ထမ်းဆိုင်ရာ စီမံချက်သစ် (Daily, Vol-5/No-77)
10-Jul-2017 tagged as

ဒီမိုကရေစီအစိုးရသစ်လက်ထက် အပေါင်းလက္ခဏာ ဆောင်စေမည့် ပြုပြင်ပြောင်းလဲရေး ခြေလှမ်းများကို အားလုံးက စောင့်မျှော်နေချိန်တွင် မြန်မာနိုင်ငံ၏ နိုင်ငံ့ဝန်ထမ်းများ ပြုပြင်ပြောင်းလဲမှုဆိုင်ရာ မဟာဗျူဟာ စီမံချက် တစ်ရပ်ထွက်ပေါ်လာခြင်းသည် နှစ်ကာလ ကြာမြင့်စွာ ချို့ယွင်း အားနည်းချက်များ ပြည့်နှက်နေခဲ့သည့် အုပ်ချုပ်ရေး ယန္တရားကြီးတစ်ခုလုံး နိုင်ငံနှင့် ပြည်သူ့တာဝန်များကို ကောင်းစွာ ထောက်ပံ့ပေးနိုင်ရေးအတွက် ပဏာမအဆင့်တစ်ခု ဖြစ်ပေရာ ဝမ်းမြောက်ဝမ်းသာ ကြိုဆိုရမည့် အစီအစဉ်ဟု ဆိုရပေမည်။ ပြည်သူထဲမှ ပေါက်ဖွားလာပြီး ပြည်သူလူထုကို အလုပ်အကျွေးပြုရသော နိုင်ငံ့ဝန်ထမ်းများနှင့် ၎င်းတို့ ဦးဆောင် တာဝန်ယူ လုပ်ကိုင်လျက်ရှိသော နိုင်ငံ့ရေးရာနှင့် ပြည်သူ့ရေးရာ လုပ်ငန်းများဟူသည် နိုင်ငံတစ်နိုင်ငံ ဖွံ့ဖြိုးရေးအတွက် မည်မျှအတိုင်းအတာအထိ အရေးပါသည်ကို ထုတ်ဖော်ပြောရန် အထူးပင်လိုမည် မဟုတ်ပေ။ ပခုံးအထက်မှ ကြယ်ပွင့်များ၊ တစ်နည်းအားဖြင့် မိမိစရိုက်နှင့် မကိုက်ညီ၊ မိမိ မကျွမ်းကျင်သည့် နယ်ပယ်သို့ခုန်ကူးခဲ့ကြသော မိုးကျရွှေကိုယ် တတ်ယောင် ကားများ၊ အစိုးရဌာနအသီးသီးကို နှစ်ကာလကြာမြင့်စွာ စိတ်ကြိုက်မင်းမူခဲ့သည့် ခေတ်ကာလများကို ကြည့်မည်ဆိုပါက တိုင်းပြည်တွင် ထူးချွန်ထက်မြက်သည့် နိုင်ငံဝန်ထမ်းကောင်း အတော်များများ လက်လွတ် ဆုံးရှုံးခဲ့ရသလို အကျင့်ပျက်ခြစားမှုဟူသည် ဉာဉ်ဆိုးကြီး ကုရာနတ္ထိ ဆေးမရှိသည့် ရောဂါဆိုးသဖွယ် အမြစ်တွယ်ခဲ့သည်မှာ အားလုံးအသိပင် ဖြစ်ပေသည်။ ပွင့်ပွင့်လင်းလင်း ထုတ်ပြန်သည့် သုတေသန စစ်တမ်းများ မတွေ့ရသေးသော်ငြား အခိုင်အမာ ကောက်ချက်ဆွဲကာ ထုတ်ပြောနိုင်သည့်အချက်မှာ အစိုးရဌာန အများစု၊ အထူးသဖြင့် လာဘ်ပေးလာဘ်ယူမှု များစွာဖန်တီးနိုင်သည့် ဌာနများသည် နိုင်ငံနှင့် ပြည်သူအကျိုးကို ထမ်းဆောင်လိုသူများ ရိုးသားမှုနှင့် ကိုယ်စွမ်းကိုယ်စ ထုတ်ဖော်ပြသခွင့် ရှိသည့်နေရာအဖြစ် ရှုမြင်ခြင်းမခံရဘဲ ဖြတ်လမ်းနည်းဖြင့် ကြီးပွားတိုးတက်လိုသည့် အခွင့်အရေးနှင့် အချောင်သမားများ ပျော်စံရာ နေရာများအဖြစ် ရှုမြင်ခံခဲ့ရသည်မှာ အထူးပင် ဝမ်းနည်းစရာဖြစ်ပါသည်။

ထို့ပြင် အကြောက်တရားများ၊ ခြိမ်းခြောက်မှုများ အလွန်အမင်း ကြီးထွားခဲ့သည့် ကာလကို ဝန်ထမ်းများ အားလုံး ဖြတ်သန်းခဲ့ရသည်ဖြစ်ရာ နိုင်ငံနှင့် ပြည်သူအတွက် ကိုယ်စွမ်းကိုယ်စ သို့မဟုတ် စိတ်စေတနာကောင်းများ ဖော်ထုတ်လိုလျက်နှင့် ဖော်ထုတ်ခွင့် မရရှိခဲ့ဘဲ နောက်ဆုံးတွင် “မလုပ်၊ မရှုပ်၊ မပြုတ်”ဟူသည့် လွဲမှားသော ခံယူချက်များ နိုင်ငံ့ဝန်ထမ်းများအကြား ဆောင်ပုဒ်တစ်ခု သဖွယ်ဖြစ်ခဲ့သည် ဟူသောအချက်က ယနေ့ မြန်မာနိုင်ငံ၏ ဖွံ့ဖြိုးမှုအဆင့်အတန်းကို ဖော်ညွှန်းလျက် ရှိပေသည်။ ထိုက်တန်သည့် အကျိုးခံစားခွင့်မရရှိခြင်းကြောင့် အဂတိတရားများ ကြီးထွားရပါသည်ဟူသော ဆင်ခြေကို ဝန်ထမ်းဖြစ်သူရော၊ ဝန်ထမ်း မဖြစ်သူများကပါ ဝိုင်းဝန်း လက်ခံနားလည်ပေးခဲ့ကြရသည်ဖြစ်ရာ ယခုစမည့် စီမံချက်တွင် ထိုက်တန်သည့် အကျိုးခံစားခွင့် သာမက ဆုပေး၊ ဒဏ်ပေး အစီအစဉ်ပါ ပါဝင်သင့်ပေသည်။ ဌာနပြင်ပမှ ပုဂ္ဂိုလ်များနှင့် လုပ်ငန်းအဖွဲ့အစည်းများထံမှ လာဘ်စားသည့် ကိစ္စသာမက ဌာန အချင်းချင်း လာဘ်ပေး၊ လာဘ်ယူမှုများကိုပါ ဟန့်တားနိုင်မည့် နည်းလမ်းများ၊ တစ်နည်းအားဖြင့် အဂတိလိုက်စားမှု ဖြစ်ပေါ်နိုင်ခြေရှိသည့် နေရာနှင့် အနေအထား အားလုံးကို ထိန်းချုပ်နိုင်သည့် စနစ်မျိုးပါဝင်မည်ဆိုပါက အတိုင်းထက် အလွန်ပင်ဖြစ်ပေမည်။

ထို့ပြင် တစ်ဖက်တွင် ရေသာခို အချောင်လိုက်သူများနှင့် အကျင့်ဆိုးများ မပြုပြင်နိုင်သူများကို လေ့လာစောင့်ကြည့်သည့် လူ့စွမ်းအားရင်းမြစ် ဖွံ့ဖြိုးရေး အဖွဲ့များ ဌာနတိုင်းတွင် ဖွဲ့စည်းထားသင့်သလို ရိုးသားမှုရှိပြီး ထူးချွန်ထက်မြက် သူဝန်ထမ်းများအား ချီးမြှင့်မြှောက်စားရုံမျှမက ပြည်ပနိုင်ငံများသို့ စေလွှတ်ကာ ခေတ်မီသည့် ပညာရပ်များနှင့် နည်းပညာများ သင်ယူခွင့်ရမည့် အစီအစဉ်များ အဆိုပါ စီမံချက်တွင် ပါဝင်လိမ့်မည်ဟု မျှော်လင့်မိပါသည်။ ဆိုရလျှင် ယခု နိုင်ငံ့ဝန်ထမ်းများ ပြုပြင်ပြောင်းလဲမှုဆိုင်ရာ မဟာဗျူဟာစီမံချက်သည် ပထမ အဆင့်တွင်သာ ရှိသေးပြီး စိန်ခေါ်မှုပေါင်း မြောက်မြားစွာနှင့် ရင်ဆိုင်ရပြီးမှ တဖြည်းဖြည်းချင်း ရုပ်လုံးပေါ်လာမည့်သဘောတွင် ရှိပါသည်။ အကြောင်းမှာ လွဲမှားသည့် ခေတ်ကာလကြီး၏ ဆိုးမွေများ ဌာနအသီးသီးတွင် အမြစ်တွယ် ကျန်ရှိနေသေးသလို ပြုပြင်ပြောင်းလဲမှုကောင်းများကို လက်သင့်မခံနိုင်သူများ၏ ပညာပြမှု အမျိုးမျိုးနှင့် ရင်ဆိုင်ကြုံတွေ့ရနိုင်သောကြောင့် ဖြစ်ပေသည်။ သို့အတွက်ကြောင့် နိုင်ငံကောင်းမှ ဝန်ထမ်းကောင်းမည်ဖြစ်စေ၊ ဝန်ထမ်းကောင်းမှ နိုင်ငံကောင်းမည်ဖြစ်စေ နိုင်ငံနှင့် ပြည်သူ၏အကျိုးကို အမှန်တကယ် ရှေးရှုမည့် သားကောင်းများ မွေးထုတ်ပေးနိုင်မည့် စနစ်ကောင်းတစ်ရပ် အခိုင်အမာသန္ဓေ တည်နိုင်ရန် ဦးစွာ အရေးကြီးသည်ဖြစ်ရာ အားလုံးက တာဝန်သိစွာဖြင့် ကူညီပံ့ပိုးကြရမည့်အကြောင်း ဖော်ပြလိုရင်း ဖြစ်ပေသည်။ 

အယ်ဒီတာ  (၁၀-၇-၂၀၁၇)

  • TAGS