News

POST TYPE

EDITOR PICK POST

အေးမြတ်သူနဲ့ တွေ့ဆုံခြင်း
24-Mar-2017 tagged as အနုပညာ

သရုပ်ဆောင် အေးမြတ်သူနဲ့ တွေ့ဆုံပြီး ငဘ ရုပ်ရှင်ဇာတ်ကားနဲ့ အမျိုးသမီး ဇာတ်ပို့ဆုရဖို့ ရေပန်းစားခဲ့ပေမယ့် ဆုနဲ့လွဲခဲ့တဲ့အပေါ် ခံစားမှု၊ အမျိုးသမီးဇာတ်ပို့ဆု မချီးမြှင့်ခဲ့တဲ့အပေါ် သူ့အမြင်နဲ့ အနုပညာခံယူချက် အပြည့်နဲ့ ဆက်လက်ကြိုးစားသွားမယ့် အကြောင်းတွေကို The Voice က မေးမြန်းဖော်ပြထားပါတယ်။ 

Voice : ဒီနှစ်မှာ အမျိုးသမီးဇာတ်ပို့ဆုရဖို့ ရေပန်းစားခဲ့ပေမယ့် ဆုနဲ့လွဲခဲ့တဲ့အပေါ် အေးမြတ်သူ ဘယ်လိုခံစားရလဲ။

AMT : ဆုမရခဲ့တဲ့အတွက် ညီမစိတ်ထဲမှာ ဘာမှတော့ မရှိခဲ့ပါဘူး။ ခမ်းခမ်းနားနားနဲ့ ကျင်းပခဲ့တဲ့ အကယ်ဒမီပေးပွဲကို တက်ရောက်ခွင့်ရခဲ့တဲ့အတွက် ပျော်တယ်။ ပွဲကြီးကလည်း တကယ်ကို ခမ်းနားတယ်။ အနုပညာလောကသားတွေ အားလုံးကလည်း တစ်သားတည်းဖြစ်ပြီး ပျော်ရွှင်ခဲ့ကြတယ်။ ဆုရခြင်း မရခြင်းအပေါ် ဝမ်းနည်းတာမျိုးလည်း မရှိခဲ့ပါဘူး။

Voice : ဒီပွဲမတိုင်ခင်မှာ ပရိသတ်တွေကလည်း အေးမြတ်သူ ဆုရမယ်လို့ ထင်ကြေးပေးကြတော့ ရင်တော့ ခုန်ခဲ့မှာပေါ့။

AMT : ညီမက ရင်ခုန်ရတာကို ပျော်ပါတယ်။ ငါဆုရပါ့မလား၊ ငါရမှာပါဆိုပြီး မမျှော်မှန်းထားတဲ့ အတွက် ဘာမှမဖြစ်ပါဘူး။ ကိုယ်က ဘာမှမမျှော်လင့်ထားတဲ့ အတွက် ဘာမှကို မဆုံးရှုံးခဲ့ပါဘူး။ အကယ်ဒမီပွဲ တက်ရောက်ခွင့်ရတဲ့အတွက် အရမ်းပျော်ပါတယ်။ ဒီပွဲသည် သမာသမတ်ကျတဲ့ ပွဲတစ်ခုပါပဲ။ ဒါက ညီမတို့ အနိုင်ကျင့်ခံရတာလည်း မဟုတ်ပါဘူး။ လူကြီးတွေက ဆုတကယ် မပေးသင့်လို့ မပေးတာပါ။

Voice : ဒီနှစ်မှာ အမျိုးသမီးဇာတ်ကို့ဆုကို ချန်လှပ်ခဲ့တဲ့အတွက် အကဲဖြတ်အဖွဲ့ဝင်တွေ အပေါ်ကိုရော ဘယ်လိုမြင်မိလဲ။

AMT : အကယ်ဒမီဆု ရွေးချယ်ပေးတဲ့ အသိပညာရှင်၊ အတတ်ပညာရှင်တွေရဲ့ ဆုံးဖြတ်ချက်က မမှားပါဘူး။ ညီမကတော့ အဲ့ဒီလိုပဲ မြင်ပါတယ်။ ညီမအတွက်ကတော့ ဒီနှစ်မှာ အကယ်ဒမီကို ရင်ခုန်ခွင့်ရတဲ့အပြင်ကို အမျိုးသမီး ဇာတ်ဆောင်ဆုအတွက် ဆန်ခါတင် လေးယောက်စာရင်းမှာ ဝင်ခဲ့တာကိုပဲ တအားကို ကျေနပ်နေပြီ။ ညီမရဲ့ အနုပညာသက်တမ်း ဆယ်နှစ်ကျော် အတွင်းမှာ ကိုယ့်ဇာတ်ကားက ဆန်ခါတင်စာရင်း ဝင်ပါတယ်ဆိုပြီး ကြေညာတာကို မကြည့်ဖူးဘူး။ အကယ်ဒမီပေးပွဲမှာ ကိုယ့်ကားကို ပြန်ကြည့်ခွင့်ရတဲ့အပေါ် အရမ်းကို ကြည်နူးပါတယ်။

Voice : ဒီနှစ်မှာ အကယ်ဒမီဆုနဲ့ လွဲသွားခဲ့တော့ ဘာတွေကို ပိုပြီး ကြိုးစားရမယ်လို့ ပြန်သုံးသပ်မိလဲ။

AMT : အဲ့ဒါကတော့ ဆုနဲ့လွဲသွားလို့ ပိုကြိုးစားမယ် ဆိုတာမျိုးတော့ မရှိပါဘူး။ ပရိသတ်ရဲ့ ကိုယ့်အပေါ်ထားတဲ့ မေတ္တာတွေနဲ့ ချစ်ခြင်းတရားတွေကြောင့် ပိုကြိုးစားရမှာပါ။ ကိုယ့်ရဲ့ သရုပ်ဆောင် ပိုပြီး ကောင်းအောင်၊ ပိုပြီး ပီပြင်အောင် ကြိုးစားရမယ်လို့ပဲ ခံစားမိတယ်။ ကိုယ့်မှာ ပရိသတ်ရဲ့ မေတ္တာတွေ အများကြီး ရနေပြီလေ။ ဆုနဲ့လွဲသွားလို့ ပိုကြိုးစားမယ် ဆိုတာမျိုး မဟုတ်ပါဘူး။ ပရိသတ်တွေ ကိုယ့်ကိုပေးထားတဲ့ ချစ်ခြင်းတရားတွေ၊ မေတ္တာတရားတွေနဲ့ တန်အောင် အမြဲတမ်း ကြိုးစားနေမှာပါ။ ဆုမရခဲ့တဲ့အတွက် စိတ်ဓာတ်ကျတာမျိုးလည်း မရှိပါဘူး။ နေရတာ သက်သောင့်သက်သာပါပဲ။

Voice : ကိုယ်မဟုတ်ရင်တောင်မှ  ဆုရဖို့ ထင်ကြေးပေးခံထားတဲ့ သူတွေထဲက တခြားတစ်ယောက်ယောက်ကရော အမျိုးသမီးဇာတ်ပို့ဆု ရသင့်တယ်လို့ မထင်ဘူးလား။ ဒါမှမဟုတ် အားလုံးက ဆုရဖို့ ထိုက်တန်တဲ့ အရည်အချင်း မရှိလို့လား။

AMT : အရည်အချင်းမရှိလို့ ဆုမရခဲ့ကြတာတော့ မဟုတ်ပါဘူး။ အကုန်လုံးက အရည်အချင်း ရှိပါတယ်။ အကယ်ဒမီ မရခဲ့ပေမယ့် အကုန်လုံးက အရည်အချင်းရှိရှိနဲ့ အလုပ်လုပ်ခဲ့ကြတာပါ။ ကိုယ်ရတဲ့ ဇာတ်ကောင်စရိုက်မှာ အကောင်းဆုံး ကြိုးစားခဲ့ကြတယ်။ ဆုရဖို့ ထိုက်တန်တဲ့သူ မရှိလို့လား ဆိုတော့ မဟုတ်ပါဘူး။ အကယ်ဒမီ ပေးရမယ့် စံချိန်စံညွှန်းတွေနဲ့ မဝင်လို့ မပေးတာလည်း ဖြစ်နိုင်ပါတယ်။ ဆုမရသင့်လို့ မပေးခဲ့တာလို့ မမြင်ဘူး။ သူတို့ဆုပေးဖို့ ထားထားတဲ့ စံတစ်ခုမမီလို့ မပေးခဲ့တာလို့ပဲ မြင်ပါတယ်။ ညီမတို့ သရုပ်ဆောင်တွေကို မတော်လို့၊ မကောင်းလို့ မပေးတာ မဟုတ်ပါဘူး။ ဆုရွေးချယ်တဲ့ စံချိန်စံညွှန်းနဲ့ မဝင်လို့ မပေးခဲ့တာ နေမှာပါ။

Voice : ကိုယ့်ကို အကယ်ဒမီဆု အရမ်းရစေချင်တဲ့ ပရိသတ်တွေကို အကြွေးတစ်ခု တင်သွားတယ်လို့ရော မခံစားရဘူးလား။

AMT : အကြွေးဆပ်ရမယ် ဆိုတော့ ညီမက ပရိသတ်ဆီက ယူထားတာ မဟုတ်ပါဘူး။ ပရိသတ်တွေကို အကြွေးပြန်ဆပ်ရမယ်လို့ မမှတ်ပါဘူး။ ပရိသတ်တွေက ချစ်ခြင်းတရားတွေ၊ မေတ္တာတရားတွေနဲ့ ညီမကို ဆုရဖို့ မျှော်မှန်းပေးကြတယ်။ ဒီမေတ္တာတရားတွေအတွက် ညီမ ရှေ့ဆက်ပြီး ပိုကြိုးစားမယ်။ ဆုမရခဲ့လို့ ကြိုးစားတာတော့ မဟုတ်ပါဘူး။ အရင်နှစ်တွေကထက် ဒီနှစ်မှာ ပရိသတ်ရဲ့ မေတ္တာကို ပိုပြီးရတယ်လို့ ခံစားရတယ်။ ကိုယ့်ကို ဆုရဖို့ ရင်ခုန်ပေးကြတဲ့အတွက် ပရိသတ်တွေရဲ့ မေတ္တာတွေကို ဘယ်တော့မှ မမေ့ပါဘူး။

Voice : အေးမြတ်သူအတွက် အကယ်ဒမီကို ရင်ခုန်လို့ ရနိုင်မယ့် ခေါက်ထီးလေး မလုံ့တလုံ ရုပ်ရှင်ကရော ဘယ်တော့လောက် ရုံတင်မလဲ။

AMT : ခေါက်ထီးလေး မလုံ့တလုံရုပ်ရှင်က ညီမ သေချာအားထည့်ပြီး ကြိုးစားထားတဲ့ ဇာတ်ကားပါ။ ဒီကားကို မေလဆန်းလောက်မှာ ရုံတင်မယ်လို့ ထုတ်လုပ်သူက ပြောပါတယ်။ ဒီကားနဲ့ ပတ်သက်ပြီး ရုံတင်ခါနီးကျရင် ညီမ အသေးစိတ် ပြန်ပြောပြပေးမှာပါ။ ဒီလထဲမှာတော့ ဒါရိုက်တာ ဦးမီးပွားနဲ့ ရုပ်ရှင်ကားကြီးတစ်ကား ရိုက်ဖို့ လက်ခံထားပါတယ်။ သရုပ်ဆောင်တွေကတော့ ဦးဇာဂနာ၊ ကိုနေတိုး၊ မကြီးစိုး (စိုးမြတ်သူဇာ) တို့လည်း ပါပါတယ်။

သန့်ဇင်ဦး

ABOUT AUTHOR

(သန့်ဇင်ဦး)