News

POST TYPE

CRIME & ACCIDENT

အောင်ရဲထွေး အသတ်ခံရမှု အမှုရုပ်သိမ်းမှု ပြင်ဆင်ချက် ဩဂုတ်လ ၂၉ ရက် ကြားနာမည်
09-Aug-2018

ရန်ကုန်၊ ဩဂုတ် ၉

ဟာသ သရုပ်ဆောင် အောင်ရဲထွေး အသတ်ခံရမှု အမှုရုပ်သိမ်းထားခြင်းနှင့်ပတ်သက်၍ အတည်ပြုသင့်၊ မသင့်ကို ဩဂုတ်လ ၂၉ ရက်နေ့တွင် နှစ်ဖက် လျှောက်လဲချက် ကြားနာမည်ဖြစ်ကြောင်း ရန်ကုန်တိုင်းဒေသကြီး တရားလွှတ်တော် တရားစီရင်ရေးဌာနခွဲမှ ၎င်းတို့ ဖေ့စ်ဘွတ်ခ် စာမျက်နှာတွင် ထုတ်ပြန်ကြေညာခဲ့သည်။

“ဩဂုတ်လ ၂၉ ရက်နေ့ကျမှ ဘယ်တရားခွင်မှာ ဘယ်တရားသူကြီးက ကြားနာမယ်ဆိုတာကို သိရနိုင်မယ်”ဟု ရန်ကုန်တိုင်းဒေသကြီး တရားလွှတ်တော်မှ တာဝန်ရှိသူတစ်ဦးက ပြောသည်။

ရာဇဝတ်ကျင့်ထုံး ဥပဒေ ပုဒ်မ ၄၉၄ (က) အရ အောင်ရဲထွေး အသတ်ခံရမှုတွင် တရားစွဲဆို စစ်ဆေးနေသော သန်းထွဋ်အောင် (ခ) သားကြီး အပါအဝင် သုံးဦးကို အရှေ့ပိုင်းခရိုင် တရားရုံးမှ ဒုခရိုင်တရားသူကြီး ဦးအောင်ကြည်က အမှုရုပ်သိမ်းပြန်လွှတ်ပေးခဲ့ခြင်းနှင့်ပတ်သက်၍ တရားစီရင်ရေးအပေါ် ဝေဖန်မှုများ မြင့်တက်လာသဖြင့် ရန်ကုန်တိုင်းဒေသကြီး ဥပဒေချုပ်ရုံးက အမှုရုပ်သိမ်းခြင်းနှင့်ပတ်သက်၍ ရန်ကုန်တိုင်းဒေသကြီး တရားလွှတ်တော်ထံ ပြင်ဆင်ချက်လျှောက်ထားခဲ့သည်။

ယင်းပြင်ဆင်ချက်ကို တိုင်းတရားလွှတ်တော်မှ ရာဇဝတ်ပြင်ဆင်မှု အမှတ် ၂၉၆(ခ)/၂၀၁၈ ဖြင့်လက်ခံ၍ အမှုမှလွတ်မြောက်ခဲ့သည့် သန်းထွဋ်အောင် (ခ) သားကြီး၊ ပြည့်ဖြိုးအောင်(ခ) အောင်လေးနှင့် ကျော်ဇော(ခ) ကျော်ဇောဟန်တို့၏ နေအိမ်များထံ သမ္မန်စာများ ပေးပို့ခဲ့သဖြင့် ဩဂုတ်လ ၇ ရက်နေ့က ၎င်းတို့သုံးဦးမှာ ရုံးတော်ထံ လာရောက်သတင်းပေးပို့ခဲ့သည်။

S-03