News

POST TYPE

BUSINESS

ရန်ကုန်တိုင်း ရွှေလုပ်ငန်းရှင်များအသင်းမှ တာဝန်ရှိသူတစ်ဦးကို ဒေါ်လာဈေးကစားမှုဖြင့်ဖမ်းဆီး
16-Oct-2018
ရန်ကုန်၊ အောက်တိုဘာ ၁၆

ဒေါ်လာဈေးကစားနေသူများကို စိစစ်ဖော်ထုတ် အရေးယူနေသည့် အထူးစုံစမ်းစစ်ဆေးရေး ဦးစီးဌာန (စသုံးလုံး)က အောက်တိုဘာလ ၁၆ ရက်နေ့တွင် ရန်ကုန်တိုင်း ရွှေလုပ်ငန်းရှင်များအသင်းရဲ့ တွဲဘက်စာရင်းစစ် ဦးညီညီဦး (ခ) လှလေးစိန်ကိုဖမ်းဆီး၍ ပန်းဘဲတန်း မြို့မရဲစခန်း၌ အမှုဖွင့် အရေးယူခဲ့သည်။

“နိုင်ငံခြားသုံးငွေ စီမံခန့်ခွဲမှု ဥပဒေပုဒ်မ ၄၂ နဲ့ အမှုဖွင့် အရေးယူထားတာ မှန်ပါတယ်။ ဒီနေ့ပဲ ပန်းဘဲတန်း ရဲစခန်းမှာ အမှုဖွင့်ပြီး တရားရုံးမှာ ချုပ်ရမန်ယူခဲ့တယ်။”ဟု အထူးစုံစမ်းစစ်ဆေးရေး ဦးစီးဌာန (စသုံးလုံး) မှ ညွှန်ကြားရေးမှူး ဦးမျိုးအောင်က ပြောသည်။

အမှုဖွင့် အရေးယူခံရသူ ဦးညီညီဦး (ခ) လှလေးစိန်မှာ နိုင်ငံခြားသုံးငွေ စီမံခန့်ခွဲမှု ဥပဒေပုဒ်မ ၃၉ ကို ဖောက်ဖျက်ကျူးလွန်ခဲ့ကြောင်း စစ်ဆေးပေါ်ပေါက်ခဲ့ပြီး ဒေါ်လာဈေးကစားမှုနှင့် ပတ်သက်၍ စသုံးလုံးက တရားလိုပြု အမှုဖွင့် အရေးယူခဲ့ခြင်းဖြစ်ပြီး ၎င်းအပါအဝင် ခြောက်ဦးကို ၂၀၁၂ ခုနှစ် နိုင်ငံခြား သုံးငွေစီမံခန့်ခွဲမှု ဥပဒေပုဒ်မများဖြင့် ပန်းဘဲတန်း၊ ကျောက်တံတားနှင့် ပုဇွန်တောင်မြို့မ ရဲစခန်းများတွင် အမှုဖွင့်အရေးယူထားကြောင်း စသုံးလုံးထံမှ သိရသည်။

“ရွှေနဲ့ ဒေါ်လာဈေးကစားနေမှုအပေါ်မှာ စစ်ဆေးနေတယ် ဆိုပေမယ့် လက်ရှိ အမှုဖွင့် အရေးယူထားတာတွေက ဒေါ်လာနဲ့ ပတ်သက်နေတဲ့အမှုတွေ။ ရွှေနဲ့ပတ်သက်လို့ အမှုဖွင့်ထားတာမျိုး မရှိသေးပါဘူး။ ဖမ်းဆီးအရေးယူခံရသူတွေထဲမှာ လက်ကြီးသမားတွေ ပါ မပါဆိုတာက ဈေးကွက်အခြေအနေအပေါ်မှာပဲ မူတည်နေတယ်။ ဒီဘက်မှာကလည်း အမှုက စစ်ဆေးနေဆဲဆိုတော့ အသေးစိတ်ကို ပြောပြလို့မရသေးဘူး”ဟု စသုံးလုံးမှ ညွှန်ကြားရေးမှူး ဦးမျိုးအောင်က ရှင်းပြသည်။ 

ရန်ကုန်မြို့လယ်ခေါင်ရှိ မြို့နယ်သုံးခု၌ ရှိသော ရဲစခန်းများတွင် ဒေါ်လာဈေးကစားမှုဖြင့် အမှုဖွင့်ခံထားရသူ ခြောက်ဦးတွင် ရွှေလုပ်ငန်းရှင်များအသင်းမှ အမှုဆောင်တစ်ဦးလည်း ပါဝင်နေသည်။

နိုင်ငံခြားသုံးငွေ စီမံခန့်ခွဲမှု ဥပဒေပုဒ်မ ၄၃ ဖြင့် အရေးယူခံရသူများမှာ ဗဟိုဘဏ်က ထုတ်ပေးထားသည့် လိုင်စင်ဖြင့် Money Changer လုပ်ငန်းများကို လုပ်ကိုင်နေကြသူများဖြစ်ပြီး
ဗဟိုဘဏ်မှထုတ်ပြန်ထားသည့် နိုင်ငံခြားသုံးငွေ စီမံခန့်ခွဲမှု စည်းမျဉ်းကို လိုက်နာခြင်း မရှိသောကြောင့် ဖမ်းဆီးအရေးယူခံရခြင်းဖြစ်ကြောင်း ရဲတပ်ဖွဲ့ထံမှ သိရသည်။ 

ယင်းအပြင် နိုင်ငံခြားသုံးငွေ စီမံခန့်ခွဲမှု ဥပဒေ ပုဒ်မ ၄၂ ဖြင့် အရေးယူခံရသူများမှာ ဗဟိုဘဏ်မှ ထုတ်ပေးထားသည့် ငွေလဲခွင့် လိုင်စင်မရှိဘဲ နိုင်ငံခြားသုံးငွေများကို တရားမဝင် လဲလှယ်လုပ်ကိုင်နေကြောင်း စိစစ်ပေါ်ပေါက်ချက်အရ အရေးယူခံရခြင်းဖြစ်ကြောင်း စသုံးလုံးမှ ရဲအရာရှိက ရှင်းပြသည်။

S-03