News

POST TYPE

AUTOMOBILE

လမ်းဘေးဈေးသည်များ ဖယ်ရှားအပြီး ရန်ကုန်မြို့လယ် ယာဉ်ကြောအခြေအနေ
19-Dec-2016 tagged as ကား

ရန်ကုန်တိုင်းဒေသကြီး အစိုးရက မြို့လယ် အဓိက လမ်းမကြီးများဘေးမှ လမ်းဘေးဈေးသည်များကို ဖယ်ရှားပြီး ကမ်းနားလမ်း၌ ညဈေးတန်း ဖွင့်ပေးလိုက်ခြင်းကြောင့် ယာဉ်ကြောသွားလာမှု အခြေအနေအပေါ် အမြင်အချို့ကို စုစည်းဖော်ပြအပ်ပါသည်။

“တရုတ်တန်းဆို သိသိသာသာ ပြောင်းလဲလာတယ်”
ဦးငါးမန်း (ခရီးသည်တင် ယာဉ်မောင်း)

လမ်းဘေးဈေးသည်တွေ မရှိတော့တဲ့အတွက် ကားမောင်းရတာ အတော်လေးတော့ အဆင်ပြေလာပါတယ်။ တရုတ်တန်းဆို သိသိသာသာ ပြောင်းလဲလာတယ်။ အတော်လေး ရှင်းသွားတယ်ပေါ့နော်။ ဒါပေမဲ့ တစ်ခုတော့ ရှိတာပေါ့နော်။ လက်ရှိမှာ အရင်ကထက်စာရင် မြန်ဆန်မှုလည်း ပိုရှိလာတယ်။ အန္တရာယ်လည်း ပိုကင်းလာတယ်ပေါ့နော်။ အရင်က ကားလမ်းပေါ်မှာ ဈေးပိတ်ရောင်းနေတဲ့အတွက် လမ်းသွားလမ်းလာတွေက လမ်းမပေါ် တက်လျှောက်တော့ ကားမောင်းတဲ့အခါ သတိထားရတယ်။ အန္တရာယ် များတယ်ပေါ့နော်။ လမ်းလျှောက်တဲ့ သူတွေလည်း သူ့နေရာလေးနဲ့သူ လမ်းလေးလျှောက်လို့ ရတော့ သူတို့အတွက်လည်း ကောင်းတာပေါ့နော်။ အရင်က ကားမောင်းတဲ့အခါ လမ်းကြောင်းတစ်ခုကို တစ်ခါပတ်ရင် သုံးနာရီလောက် ကြာတာကနေ အခုဆို နှစ်နာရီခွဲလောက်ပဲ ကြာတော့တယ်။ ဒါပေမဲ့ ယာဉ်လမ်းကြောတွေ ချောင်စေချင်တယ် ဆိုရင် တစ်နေရာတည်းကွက်ပြီး အရေးယူတာမျိုးထက် တစ်မြို့လုံးက ယာဉ်လမ်းကြောမှာ ရှိနေတဲ့ ဈေးနားတစ်ဝိုက်က လမ်းဘေးဈေးသည်တွေကို အရေးယူသင့်ပါတယ်။ ဒါက သူတို့ကို တရားဝင် ရောင်းချခွင့် ပေးထားတာ မဟုတ်တဲ့အတွက် အစိုးရကဖယ်ဆို ဖယ်ကို ဖယ်ပေးရမှာပါ။ နောက် သူတို့ကိုဖယ်ပြီး လုပ်စားကိုင်စား မရအောင် လုပ်လိုက်တာမျိုး မဟုတ်ဘဲ တစ်နေရာတည်းမှာ တစုတစည်းတည်း ထားပေးထားတဲ့အပေါ်မှာ မကျေနပ်တာကတော့ ကျွန်တော်လည်း နားမလည်ဘူး။ မပြေလည်ဘူးဆိုတာ မှန်တယ်။ ဒါပေမဲ့ ဘယ်အလုပ်မဆို အစပိုင်းမှာတော့ သူ့အခက်အခဲလေးတွေနဲ့ သူတော့ ရှိတတ်တာပဲလေ။    
                                 
“ဥပဒေတစ်ခု၊ စည်းကမ်းတစ်ခု၊ ပြောင်းလဲမှုတစ်ခုကို တိတိကျကျ ဖော်ဆောင်စေချင်ပါတယ်”
မဟေသီကျော် (ခရီးသည်)

အခုအထိတော့ လမ်းတွေမချောင်ဘူး။ မချောင်ဘူးဆိုတာက လမ်းဘေးဈေးသည်တွေ နေရာရွှေ့တယ်ဆိုတာ နေရာတစ်ခုတည်းကို ကွက်ရွှေ့တာကြောင့်လည်း ပါမယ်။ ပြီးတော့ လမ်းဘေးဈေးသည်တွေကို နေရာပြောင်းရွှေ့တာ လုပ်သင့်တယ်။ လုပ်ရမယ်လို့လည်း လိုအပ်ပါတယ်။ ဒါပေမဲ့ လိုင်းကားအရေအတွက်ကို လျှော့ချသင့်တယ်။ မလိုအပ်တဲ့ လိုင်းကားနံပါတ်တွေ မြို့ထဲကို ပြေးဆွဲနေတဲ့ လိုင်းကားအမျိုးအစားကို လျှော့ချပြီး ကားအစီးရေ ပြန်တိုးတာမျိုးပဲ လုပ်သင့်တယ်။ ပြီးတော့ အမှိုက်ကန်တို့၊ အမှိုက်ကားတို့ကိုလည်း Bus Stop မှာ ထားတာမျိုး လုံးဝမဖြစ်သင့်ပါဘူး။ အစိုးရ အနေနဲ့ ယာဉ်လမ်းကြောင်းပိတ်တာနဲ့ ပတ်သက်ပြီး ဥပဒေတစ်ခု၊ စည်းကမ်းတစ်ခု၊ ပြောင်းလဲမှုတစ်ခုကို တိတိကျကျ ဖော်ဆောင်စေချင်ပါတယ်။ ကွန်တိန်နာ ကားကိစ္စလို ကျွန်တော်တို့ ပြန်စီစဉ်ပါမယ်လို့ ရှုံ့ချီ နှပ်ချီ မလုပ်သင့်ပါဘူး။ ဥပဒေတစ်ခုကို တင်းတင်းကျပ်ကျပ် ချမှတ်ပြီး ကိုင်တွယ်သင့်တယ်။ မဟုတ်ရင် မြို့ထဲတစ်နေရာတည်း ကွက်ချောင်ပြီး ကျန်တဲ့နေရာတွေ ကားပိတ်တာ ညီမတို့အတွက် အသုံးမဝင်ပါဘူး။ အထောက်အပံ့မဖြစ်ဘူး။ တင်းတင်းကျပ်ကျပ် ကိုင်တွယ်ရမယ်။ ဥပဒေ ဖော်ဆောင်မယ့် ဝန်ထမ်းတွေ အနေနဲ့လည်း သမာသမတ်ကျကျ ထမ်းဆောင်မယ်ဆို အောင်မြင်မှာပါ။ တစ်ခုပါပဲ။ အရေးယူမယ်ပြောတဲ့ ဥပဒေကို ကန့်ကွက်ကြရင်လည်း အမျိုးအမျိုး မဖြစ်သင့်ပါဘူး။

“အခုဆို လသာကနေ ဆူးလေအထိက အတော်လေးကို အဆင်ပြေသွားတယ်”
ဦးတင်မောင်မြင့် (အငှားယာဉ်မောင်း)

အရင်ကထက်စာရင် ကားမောင်းရတာ ပိုကောင်းလာတယ်။ တရုတ်တန်းဆို အရင်ကထက် အများကြီး ပိုကောင်းလာတယ်။ အရင်တုန်းက သုံးနာရီ၊ လေးနာရီလောက်ဆို မဟာဗန္ဓုလလမ်းပေါ်ကို လုံးဝတက်မရဘူး။ တက်မရဘူးဆိုတာ တော်တော်ကျပ်တာပေါ့။ အခုကျ သွားလို့လာလို့ အတော်အဆင်ပြေသွားတယ်။ တစ်နေ့ကတောင် သူများတွေ ပြောနေတာ ကြားလိုက်သေးတယ်။ အရင်တုန်းကဆို အရေးပေါ်လူနာသာ ဒီလမ်းက ဖြတ်ရမယ်ဆို မျှော်လင့်ချက် မရှိနိုင်ဘူးပေါ့နော်။ အခုတော့ မျှော်လင့်ချက်လေးထားလို့ ရတယ်ဆိုပြီး ပြောနေတာ ကြားလိုက်ရသေးတယ်။ အရင်ထက်စာရင် အများကြီး ပိုကောင်းလာတယ်။ အခုဆို လသာကနေ ဆူးလေအထိက အတော်လေးကို အဆင်ပြေသွားတယ်။ အရင်က အဲဒီလမ်းတွေက အကျပ်ဆုံးလေ။ ဒီဘက်အတက်ဘက်ကတော့ ပိတ်နေတုန်းပဲ။ အဲဒါကျ ကားတွေကြောင့် ပိတ်တာပါ။ ဈေးသည်တွေတော့ မရှိတော့ဘူး။ အရင်ကဆို လမ်းဘေး ကားယာယီရပ်ဖို့ ပေးထားတဲ့ နေရာတွေမှာ လမ်းဘေးဈေးသည်တွေက ပိတ်ရောင်းနေတဲ့အတွက် ကားရပ်ချင်ရင် လမ်းမပေါ်မှာပဲ ရပ်ရတော့ လမ်းတစ်လမ်းက အလိုလိုပိတ်သွားပြီး ယာဉ်ကြောတွေ ကျပ်လာတာပေါ့နော်။ ခုတော့ အတော်လေးကို အဆင်ပြေလာတယ်လို့ ပြောချင်ပါတယ်။                 

ခိုင်ချယ်ရီထွန်း

ABOUT AUTHOR

ခိုင်ချယ်ရီထွန်း (ခိုင်ချယ်ရီထွန်း)