News

POST TYPE

AUTOMOBILE

မော်တော်ယာဉ် အချက်ပြမီးများအကြောင်း
19-Feb-2018
ကားတွေမှာ တစ်ခုခုချို့ယွင်းပြီဆိုတာနဲ့ ရှေ့ပြေးအနေနဲ့ အချက်ပြမီးတွေက ကြိုတင်ပြသတတ်ပါတယ်။ ဒီအချက်ပြမီးတွေကနေ ကိုယ့်ကားရဲ့ ပြုပြင်သင့်တာတွေကို ပြုပြင်ရပါတယ်။ အချက်ပြမီး (Warning Light) တွေ လင်းတတ်တဲ့အရာတွေကတော့ ဘက်ထရီ၊ စက်ဆီချောဆီ၊ အင်ဂျင်အပူချိန်၊ လောင်စာဆီနည်းနေမှု၊ ကားတံခါးပွင့်နေမှု၊ ခါးပတ်ပတ်ရန်၊ မတော်တဆမှုမှ ကာကွယ်ရန်၊ Parking ဘရိတ်၊ ရှေ့မီးကြီး၊ ရှေ့နဲ့နောက် နှင်းကွဲမီး၊ သွားလာမှုအချက်ပြ ကွန်ပျူတာ စတဲ့မီးတွေ လင်းတတ်ပါတယ်။ ဒီလို မီးတွေလင်းလာရင် ဘယ်လိုလုပ်ရမလဲဆိုတာကို ဖော်ပြပေးလိုက်ပါတယ်။ 



အင်ဂျင်ဝိုင်
အင်ဂျင်လည်ပတ်နေချိန် ဒါမှမဟုတ် ကားမောင်းနေချိန်အတွင်းမှာ ဒီလိုအချက်ပြမီး (ပုံတွင်ဖော်ပြထားသည့် အချက်ပြမီးပုံစံ) ကနေတစ်ဆင့် သတိပေးလာပြီဆိုတာနဲ့ တစ်ခုခုချို့ယွင်းနေဆိုတာ အသေအချာပဲဖြစ်ပါတယ်။ လုံခြုံစိတ်ချမှုရှိစေဖို့ ကားကို အမြန်ဆုံးရပ်ပြီး အင်ဂျင်ဝိုင် စစ်ဆေးသင့်ပါတယ်။

အင်ဂျင်အပူချိန်တိုင်း ကိရိယာ
ဒီအချက်ပြမီးကတော့ အင်ဂျင်ပူလာပြီဆိုတာနဲ့ အချက်ပြတတ်တဲ့မီး ဖြစ်ပါတယ်။ ဒီမီးပြပြီဆိုတာနဲ့ ကားကိုအတတ်နိုင်ဆုံး မြန်မြန်ရပ်ကာ စက်ကိုပါပိတ်ပြီး အင်ဂျင်အေးလာအောင် ဆောင်ရွက်ရပါမယ်။



ဘက်ထရီ
အင်ဂျင်လည်ပတ်နေချိန် ဒါမှမဟုတ် ကားမောင်းနေချိန်အတွင်းမှာ ဒီလိုအချက်ပြမီး (ပုံတွင်ဖော်ပြထားသည့် အချက်ပြမီးပုံစံ) ကနေတစ်ဆင့် သတိပေးလာပြီဆိုတာနဲ့ ကိုယ့်ကားရဲ့ဘက်ထရီမှာ တစ်ခုခုချို့ယွင်းနေပြီဆိုတာ သေချာနေပါပြီ။ မလိုအပ်တဲ့ လျှပ်စစ်သုံးစွဲမှုတွေအားလုံးကို ပိတ်လိုက်ပါ။ ကားကို ပြန်စစ်ဆေးဖို့လိုပါတယ်။ ကားကို Service မပြရသေးခင် အချိန်ထိ မသုံးစွဲသင့်သေးပါဘူး။ 



အင်ဂျင်ကို မကြာမီ Service ဝင်ရန်
အင်ဂျင်လည်ပတ်နေချိန် ဒါမှမဟုတ် ကားမောင်းနေချိန်အတွင်း ဒီလိုအချက်ပြမီး (ပုံတွင်ဖော်ပြထားသည့် အချက်ပြမီးပုံစံ) ကနေတစ်ဆင့် သတိပေးလာပြီဆိုတာနဲ့ ကိုယ့်ကားမှာ တစ်ခုခု ချို့ယွင်းချက်ရှိနေပြီဆိုတာ သေချာပါတယ်။  OBD-2 စနစ်နဲ့ပတ်သက်ပြီး စစ်ဆေးဖို့လိုအပ်လာပြီဆိုတာ အချက်ပြနေတာဖြစ်ပါတယ်။ ဒီလိုဖြစ်နေတဲ့အချိန်မှာ သင့်ရဲ့ကား ဆက်လက် မသုံးစွဲသင့်ပါဘူး။ အမြန်ဆုံး Service ကို သွားပြသင့်ပါတယ်။

လောင်စာဆီ နည်းနေခြင်း
ဒီအချက်ပြမီးပုံစံကတော့ ကိုယ့်ရဲ့ကားမှာ လောင်စာဆီ (ဓာတ်ဆီ၊ ဒီဇယ်) နည်းနေချိန်၊ မရှိသလောက် ဖြစ်နေတဲ့အချိန်တွေမှာ ပေါ်လာတတ်တဲ့ အချက်ပြမီးဖြစ်ပါတယ်။ လောင်စာဆီ အမြန်ဆုံးဖြည့်တင်းဖို့လို အပ်ပါတယ်။ ဒီအချက်ပြမီးလင်းနေချိန်မှာတော့ လက်ကျန်ဆီရှိသလောက်နဲ့ ဆက်လက် သုံးစွဲနိုင်ပါသေးတယ်။ ဒါပေမဲ့ ဘယ်အချိန် ဆီကုန်သွားမလဲ မခန့်မှန်းနိုင်တာကြောင့် နီးစပ်ရာဆီဆိုင်ဝင်ပြီး ဆီအမြန်ဆုံး ဖြည့်လိုက်သင့်ပါတယ်။

လောင်စာဆီ တိုင်ကီအဖုံး
ဒီအချက်ပြမီးပုံစံကတော့ ဆီတိုင်ကီအဖုံး အသေအချာမတပ်ဆင်ထားဘူးဆိုရင် လင်းလာတတ်တဲ့ အချက်ပြမီးပုံစံဖြစ်ပါတယ်။ ဒါကြောင့် ဆီတိုင်ကီအဖုံး လုံ မလုံ ပြန်စစ်ဆေးသင့်ပါတယ်။ ဒီမီးလင်းနေချိန်မှာတော့ ကားကို ဆက်လက်မောင်းနှင်လို့ရပေမယ့် ခေတ္တရပ်ပြီး စစ်ဆေးလိုက်တာ သင့်အတွက် အများကြီးအန္တရာယ်ကင်းစေမှာပါ။

လေအိတ်ပိတ်ထားခြင်း
ဒီအချက်ပြမီးပုံစံကတော့ ခရီးသည်အတွက် လေအိတ်ပိတ်ထားခြင်း ရှိ မရှိ ပြတဲ့မီးဖြစ်ပါတယ်။ ဒါကတော့ အသက်အန္တရာယ်နဲ့ ဆိုင်ပါတယ်။ မတော်တဆမှုဖြစ်ခဲ့ရင် ဒါကအကြီးအကျယ်ကို ဒုက္ခပေးနိုင်ပါတယ်။ ချက်ချင်းပြန်ဖွင့်သင့်တဲ့ အရာပါ။



ဦးတည်အချက်ပြမီး
သင့်ကားကို ဘယ်ကွေ့ရင်ဖြစ်စေ၊ ညာကွေ့ရင်ဖြစ်စေ အချက်ပြတဲ့ မီးဖြစ်ပါတယ်။

Anti-Lock Braking System 
ဒီအချက်ပြမီးပုံစံကတော့ အင်ဂျင်လည်ပတ်နေချိန် ဒါမှမဟုတ် ကားမောင်းနေချိန်အတွင်းမှာ ဒီအချက်ပြမီး လင်းလာပြီဆိုတာနဲ့ ဘရိတ်စနစ်အပိုင်းမှာ တစ်ခုခု ချို့ယွင်းနေပြီဆိုတာ သေချာပါတယ်။ ဒါကလည်း အရေးကြီးတဲ့ အစိတ်အပိုင်းတစ်ခုဖြစ်တဲ့အတွက် ကိုယ့်ကားကို ဆက်လက်မသုံးစွဲသင့်ပါဘူး။ Service ကို အမြန်ဆုံးသွားပြပြီးမှ အသုံးပြုသင့်ပါတယ်။ 

Stability Control
ဒီစနစ်က အီလက်ထရွန်နစ်နဲ့ ကားတစ်စီးလုံးကို ထိန်းချုပ်ပေးတဲ့စနစ်တစ်ခုဖြစ်ပြီး အဆင့်မြင့်ကားတွေ တော်တော်များများမှာ ထည့်သွင်းပေးပါတယ်။ ဒီအချက်ပြမီးပုံစံက အင်ဂျင်လည်ပတ်နေချိန် ဒါမှမဟုတ် ကားမောင်းနေချိန်အတွင်း ဒီမီးလင်းလာပြီဆိုရင် သင့်ကားမှာ တစ်ခုခုချို့ယွင်းနေပြီဆိုတာ သေချာပါတယ်။ ဒီစနစ်က ကားတစ်စီးလုံးကို ထိန်းချုပ်ပေးတာ ဖြစ်တဲ့အတွက် Service မပြင်ပြီးမချင်း ဆက်လက်မသုံးတာ အကောင်းဆုံးပါပဲ။

ဘရိတ်စနစ်
အင်ဂျင်လည်ပတ်နေချိန် ဒါမှမဟုတ် ကားမောင်းနေချိန်အတွင်း ဒီအချက်ပြမီးလင်းလာပြီဆိုတာနဲ့ သင့်ကားမှာ တစ်ခုခုချို့ယွင်းနေပြီဆိုတာ သေချာပါတယ်။ ဘရိတ်ဆီနည်းနေချိန်၊ ဘရိတ်စနစ်တစ်ခုခု ချို့ယွင်းနေချိန်တွေမှာ ဒီမီးလင်းတတ်ပါတယ်။ Service သွားပြပြီးမှ သင့်ကားကို ဆက်လက် အသုံးပြုစေချင်ပါတယ်။

တာယာပရက်ရှာ နည်းနေခြင်း
သင့်ကားရဲ့တာယာတွေ ပရက်ရှာနည်းနေပြီဆိုရင် ဒီမီးလင်းလာတတ်ပါတယ်။ ကားမောင်းနေချိန် ဒါမှမဟုတ် ကားမောင်းနေချိန်အတွင်း ဒီလိုအချက်ပြ မီးလင်းလာပြီဆိုရင် တစ်ခုခုချို့ယွင်းနေတာ သေချာပါတယ်။ ကားကို ဆက်လက်အသုံးပြုလို့ ရနိုင်ပါသေးတယ်ဆိုပေမယ့် နီးစပ်ရာတာယာဆိုင်မှာ လေပေါင်သွားစစ်တာ ဒါမှမဟုတ် လေထပ်ထိုးတာတွေ လုပ်သင့်ပါတယ်။

Message Indicator
ဒီစနစ်ကတော့ နောက်ဆုံးပေါ်ကားတွေမှာ ပါဝင်လေ့ရှိပါတယ်။ ဒီမီးလင်းလာပြီဆိုရင် ကားမောင်းသူဆီကို SMS တစ်ခုရောက်နေပါပြီ။

Cruise Control
ဒီစနစ်က ကားတိုင်းမှာ တော်တော်များများပါလေ့ ရှိပါတယ်။ ဟိုင်းဝေးမောင်းတဲ့အခါတွေမှာ သုံးတဲ့စနစ်တစ်ခု ဖြစ်ပါတယ်။ ဒီစနစ်ကိုဖွင့်ပြီး ကီလိုတစ်ရာပဲဖြစ်ဖြစ် ကိုယ့်စိတ်ကြိုက် ကီလိုတစ်ခု သတ်မှတ်လိုက်ပြီဆိုတာနဲ့ ဘယ်လောက်လီဗာနင်းနင်း ဒီကီလိုနှုန်းကနေ မတက်လာတော့ပါဘူး။ ဒီလိုစနစ်သုံးပြီး အရှိန်မြှင့်ကားမောင်းနေချိန်မှာ ဒီအချက်ပြမီးလင်းလာတတ်ပါတယ်။ သတိပြုပြီး ကီလိုပြန်ချတာတွေ အရှိန်လျှော့တာတွေလုပ်ပြီး ကားကို ဆက်မောင်းနေလို့ရပါတယ်။

Shift Indicator
ဒီအချက်ပြမီးလင်းလာရတဲ့ အကြောင်းကတော့ ကားမောင်းနေချိန်အတွင်း ဂီယာမြှင့်ဖို့ သတိပေးနေတာဖြစ်ပါတယ်။

ညစ်ညမ်းသော ဒီဇယ်
အရည်အသွေးမပြည့်တဲ့ဆီ ဒါမှမဟုတ် ညစ်ညမ်းတဲ့ဆီတွေ သင့်ကားထဲကို ထည့်သွင်းမိတဲ့အခါမျိုးမှာ လင်းလာတတ်တဲ့ အချက်ပြမီးပုံစံဖြစ်ပါတယ်။

ဆီထဲရေပါဝင်မှု 
အင်ဂျင်နှိုးထားချိန် ဆီထဲရေပါနေတဲ့ လက္ခဏာပြလာပြီဆိုရင်၊ ဒီလိုအချက်ပြ မီးလင်းလာပြီဆိုရင် အင်ဂျင်ကိုပိတ်ပြီး ကားကိုချက်ချင်း ရပ်လိုက်သင့်ပါတယ်။ ပြီးရင် ဆီနဲ့ရေကို သွန်လိုက်ပါ။

ဒါတွေကတော့ ကားတွေမှာ တစ်ခုခုချို့ယွင်းပြီဆိုတာနဲ့ ပြသတတ်တဲ့ အချက်ပြမီးတွေအကြောင်း ဖြစ်ပါတယ်။ စာဖတ်ပရိသတ်ကြီးအနေနဲ့ ဘယ်လိုပုံစံ မီးလင်းရင် ဘယ်လိုလုပ်သင့်ပုံနဲ့ ဒီလိုမီးတွေ လင်းလာပြီဆိုတာနဲ့ ဘာလုပ်ရမလဲဆိုတဲ့ ဆုံးဖြတ်ချက်တွေကို အလွယ်တကူချသွားနိုင်မှာ ဖြစ်ပါတယ်။

ဟိန်းမြတ်စိုး
Reference-Ford Myanmar




  • VIA