News

POST TYPE

AUTOMOBILE

မော်တော်ယာဉ်သုံး CNG ဂက်စ်အကြောင်း
05-Feb-2018


ဓာတ်ငွေ့လို့ဆိုလိုက်တာနဲ့ မြန်မာနိုင်ငံက လူတွေ အများစုက CNG (Compressed Natural Gas) ကိုပဲ ပြေးမြင်တတ်ကြပါတယ်။ ဂက်စ်တွေမှာ အိမ်သုံး ဂက်စ်မီးဖိုတွေမှာ သုံးတာက LPG လို့ခေါ်တဲ့ Liquefied Petroleum Gas ၊ သဘာဝဓာတ်ငွေ့ရည်လို့ခေါ်တဲ့ LNG (Liquefied Natural Gas) တွေနဲ့ တခြားဓာတ်ငွေ့တွေလည်း ပါတယ်။ ဒါတွေကတော့ လူသုံးများတဲ့ ဓာတ်ငွေ့အမျိုးအစားတွေ ဖြစ်ပါတယ်။ ဒီအထဲကမှ မြန်မာပြည်သူတွေ အသိများတဲ့ CNG အကြောင်းကို ဖော်ပြမှာဖြစ်ပါတယ်။

CNG အကြောင်း
CNG ရဲ့ ဓာတုသင်္ကေတက CH5 ဖြစ်ပါတယ်။ သူ့ကို သန့်စင်တဲ့ သဘာဝဓာတ်ငွေ့မှတစ်ဆင့် ဖိသိပ်ခြင်းဖြင့် ထုတ်လုပ်ကြပြီး လုံခြုံခိုင်ခံ့တဲ့ စည်တွေထဲ ထည့်သွင်းသိမ်းဆည်းပြီး အသုံးပြုကြပါတယ်။ အခုတော့ ဒီသဘာဝဓာတ်ငွေ့ကို မြန်မာနိုင်ငံမှာဆိုရင် ခရီးသည်တင် ယာဉ်တွေ၊ အငှားယာဉ်တွေမှာ အစိုးရရဲ့ ခွင့်ပြုချက်နဲ့ တပ်ဆင်ကြပါတယ်။ မ.ထ.သ ခေတ်က ခရီးသည် ယာဉ်တွေမှာဆိုရင် CNG တပ်ဆင်ခွင့် လိုင်စင်တစ်စောင်ကို ကျပ်သိန်း ၅၀ အထိ ဈေးပေါက်ခဲ့ပါတယ်။ အခုနောက်ပိုင်းတော့ YBS တွေ ပေါ်လာပြီးနောက်ပိုင်း ဒီစနစ်ထဲကို ဝင်မဆွဲတဲ့ ယာဉ်တွေကိုပဲ CNG တပ်ဆင်ခွင့် ပိတ်ပင်ထားပြီး ဒီလိုင်စင် အရောင်းအဝယ်ကလည်း ပျောက်ကွယ်လုနီးပါး ဖြစ်နေပါပြီ။ တခြားနိုင်ငံတွေမှာတော့ ဒီကားတွေအပြင် ထရပ်ကားငယ်တွေနဲ့ ခရီးတိုအတွက်သုံး (အငှားယာဉ် အပါအဝင်၊ လုပ်ငန်းသုံးယာဉ်များ) တွေမှာလည်း တပ်ဆင်အသုံးပြုနေကြပါတယ်။ 

စီအန်ဂျီ လောင်စာစနစ်ကို အိန္ဒိယနဲ့ပါကစ္စတန် နိုင်ငံတွေက သယ်ယူပို့ဆောင်ရေး လုပ်ငန်းတွေမှာ အပြည့်အဝသုံးဖို့ အစိုးရက ထုတ်ပြန်ထားတာပါ။ အထူးသဖြင့် ကမ္ဘာပေါ်မှာ လေထုညစ်ညမ်းမှု အများဆုံးမြို့ဖြစ်တဲ့ အိန္ဒိယနိုင်ငံ မြို့တော်ဒေလီနဲ့ ပါကစ္စတန်နိုင်ငံ၊ ပန်ဂျပ်ပြည်နယ်ထဲက မြို့တွေမှာ အပြည့်အဝ သုံးစွဲနေကြပြီဖြစ်ပါတယ်။ ပါကစ္စတန်နိုင်ငံဟာ အပြည်ပြည်ဆိုင်ရာ သဘာဝဓာတ်ငွေ့သုံး ယာဉ်များအသင်းရဲ့ လေ့လာချက်အရ သဘာဝဓာတ်ငွေ့ လောင်စာစွမ်းအင်သုံး မော်တော်ယာဉ်စီးရေ တတိယအများဆုံး နိုင်ငံဖြစ်တယ်လို့ ဆိုပါတယ်။ CNG ကို ၁၉၇၀ နဲ့ ၁၉၈၀ ပြည့်နှစ်တွေက လောင်စာဆီ အခက်အခဲ ပေါ်ပေါက်စဉ်က နိုင်ငံအတော်များများတွင် CNG လောင်စာစွမ်းအင်ကို အသုံးပြုခဲ့ကြပေမယ့် လောင်စာဆီဈေးနှုန်းတွေ ပြန်လည်ကျဆင်းပြီးနောက် အသုံးပြုမှု ပြန်လျော့သွားခဲ့ပါတယ်။ အခုတော့ လောင်စာဆီအခက်အခဲကြောင့် ဓာတ်ငွေ့လောင်စာ အသုံးပြုမှုကို တိုင်းပြည်အများစုက ပြန်လည်အာရုံစိုက်လာပါပြီ။

CNG သုံးရခြင်းရဲ့ အဓိကအကြောင်းအရင်း
CNG ကို မော်တော်ကားတွေ ရွေ့လျားနိုင်ဖို့အတွက် လောင်စာဆီအဖြစ်နဲ့ အသုံးပြုကြပါတယ်။ ဓာတ်ဆီနဲ့ဒီဇယ်ဆီရဲ့ နေရာမှာ အစားထိုးအသုံးပြုကြတာ ဖြစ်ပါတယ်။ ဘာဖြစ်လို့ ဒီလိုသုံးရတာလဲဆိုရင် အဓိကကတော့ CNG တွေက ဈေးနှုန်းသက်သာတာ၊ လေထုညစ်ညမ်းမှု မဖြစ်တာ၊ လောင်စာဆီဈေးနှုန်း မြင့်တက်နေတာတွေကြောင့်အပြင် Air-Con သုံးရင်လည်း လောင်စာဆီတွေလို အရမ်းမကုန်တာကြောင့် သုံးကြတာပါ။ ကမ္ဘာ့နိုင်ငံကြီး အများစု လက်ခံအသုံးပြုကြတဲ့ အဓိကအချက်ကတော့ ပတ်ဝန်းကျင် လေထုညစ်ညမ်းမှုကို မဖြစ်ပေါ်စေတဲ့အတွက်ကြောင့် ဖြစ်ပါတယ်။ ပြီးတော့ CNG ကို အသုံးပြုခြင်းဟာ မြင့်တက်လာတဲ့ လောင်စာဆီဈေးနှုန်းကို တုံ့ပြန်ဖို့အတွက်လည်း ဖြစ်ပါတယ်။ တချို့နိုင်ငံတွေကတော့ CNG ဓာတ်ငွေ့ကို ဓာတ်ဆီနဲ့ နှိုင်းယှဉ်နိုင်ဖို့ Gasoline Gallon Equivalent (GGE) စနစ်နဲ့ တိုင်းတာရောင်းချကြပါတယ်။ ဥပမာအားဖြင့် ဩစတြေးလျနိုင်ငံဟာ အနာဂတ်မှာ CNG ဓာတ်ငွေ့သုံး ဘတ်စ်ကားတွေကိုပဲ ဝယ်ယူတင်သွင်းဖို့ ဆုံးဖြတ်ခဲ့ပါတယ်။ 

စီအန်ဂျီဓာတ်ငွေ့သုံး မော်တော်ယာဉ်တွေဟာ ကမ္ဘာတစ်ဝန်း အစီးရေ သန်းနဲ့ချီပြီးရှိပါတယ်။ ဒီယာဉ်တွေကို အာဂျင်တီးနားမှာ အများဆုံးအနေနဲ့ အစီးရေ လေးသိန်းကျော်အထိ ရှိနေပါတယ်။ ရုရှားမှာ သုံးသိန်းကျော်၊ အမေရိကန်ပြည်ထောင်စုမှာ တစ်သိန်းနီးပါး၊ ဗင်နီဇွဲလားမှာ ငါးသောင်းကျော်၊ နယူးဇီလန်မှာ ငါးသောင်းနီးပါး၊ ကနေဒါမှာ သုံးသောင်းခွဲခန့်၊ အီဂျစ်၊ ဂျာမနီ၊ အိန္ဒိယ၊ ဂျပန်၊ မလေးရှား၊ ပြင်သစ်နဲ့ ဗြိတိန်နိုင်ငံတို့မှာ အစီးရေ ထောင်ဂဏန်းခန့်အထိ အသုံးပြုနေကြပါတယ်။ အိန္ဒိယက လောင်စာဆီသုံးစွဲတဲ့နေရာမှာ ဒီဓာတ်ငွေ့ကို ၂၅ ရာခိုင်နှုန်းအထိသုံးဖို့ ကြေညာထားပါတယ်။ 

မလေးရှားနဲ့ ဂျပန်နိုင်ငံတွေကလည်း သဘာဝဓာတ်ငွေ့သုံး မော်တော်ယာဉ်တွေ အမြောက်အမြား သုံးစွဲကြမယ်လို့ ဆိုပါတယ်။ လတ်တလောမှာတော့ ဓာတ်ငွေ့ လောင်စာစွမ်းအင်သုံး ယာဉ်တွေဟာ မူလက လောင်စာဆီသုံးယာဉ်တွေ အသွင်ကနေ ပြောင်းလဲထားတဲ့ ယာဉ်တွေသာဖြစ်ပါတယ်။ မူလဓာတ်ငွေ့သုံး ယာဉ်အဖြစ်တော့ ဘယ်ကားစက်ရုံကမှ ထုတ်လုပ်လာခြင်း မရှိသေးပါဘူး။ ဒီလိုလောင်စာဆီရော ဓာတ်ငွေ့နဲ့ပါ အသုံးပြုလို့ရတဲ့ ကားတွေကို Bifuel (ဓာတ်ဆီ သို့မဟုတ် ဒီဇယ်လောင်စာနှင့် သဘာဝဓာတ်ငွေ့) ကားတွေလို့ ခေါ်နိုင်ပါတယ်။ လောင်စာအမျိုးအစား တစ်မျိုးကနေတစ်မျိုးကို ပြောင်းလဲနိုင်တဲ့အတွက် ဖြစ်ပါတယ်။ 

CNG ရဲ့အားနည်းချက်
CNG တွေကို သုံးမယ်ဆိုရင် ဖိနှိပ်ပြီးသိုလှောင်နိုင်တဲ့ ဆလင်ဒါအိုး ဒါမှမဟုတ် ကန်၊ ဓာတ်ငွေ့လောင် စာပိုက်တွေ၊ လောင်စာရောစပ်တဲ့ ကိရိယာနဲ့ အင်ဂျင်ကို ထိန်းညှိပေးတဲ့ ကိရိယာတွေကို ပြောင်းလဲဖို့လိုပါတယ်။ ဒီလိုပြောင်းလဲပေးဖို့အတွက် စရိတ်ထပ်မံကုန်ကျမှာပါ။ ဒါ့အပြင် မြန်မာနိုင်ငံအတွက်ဆိုရင် နယ်ဝေးတွေကို သွားနိုင်မှာ မဟုတ်ပါဘူး။ ရန်ကုန်တိုင်းအတွက်သာ အသုံးပြုနိုင်ပါတယ်။ ဘာဖြစ်လို့လဲဆိုတော့ CNG ဖြည့်ပေးရေး ရုံတွေက ရန်ကုန်မှာပဲရှိလို့ပါ။ ဒါကြောင့်လည်း ခရီးသည်တင်ယာဉ်တွေနဲ့ မြို့တွင်းသုံး အငှားယာဉ်တွေမှာသာ တပ်ဆင်အသုံးပြုကြတာ ဖြစ်ပါတယ်။ တချို့ အငှားယာဉ်တွေကတော့ ဒီအားနည်းချက်ကို မဖြစ်စေဖို့ အထက်ကဆိုခဲ့တဲ့ လောင်စာဆီရော CNG သုံးနိုင်မယ့် Bifuel စနစ်နဲ့ သုံးကြပါတယ်။ ဒီလိုနှစ်မျိုးသုံးရတာ ဘာမှမခက်ပါဘူး။ CNG ကို သုံးမယ်ဆို CNG လိုင်းကိုပိတ်ပြီး လောင်စာဆီလိုင်းကို ပိတ်လိုက်ရုံပါပဲ။ ဒီလိုပဲ ပြောင်းသုံးလို့ရပါတယ်။ ဒီလိုသုံးဖို့အတွက် အကျင့်တစ်ခုအနေနဲ့ တစ်ရက်ကို အနည်းဆုံး လောင်စာဆီနဲ့ စက်နှိုးပေးခြင်းကို ပြုလုပ်ပေးရပါတယ်။ ဒါမှလည်း ဆီကိုပြောင်းသုံးတဲ့နေရာမှာ အခက်အခဲ မဖြစ်စေမှာပါ။ ဒီမှာတော့ ဓာတ်ဆီအင်ဂျင်တွေမှာပဲ CNG တွေနဲ့ တွဲသုံးလို့ရနိုင်ပါတယ်။ ဒီဇယ်အင်ဂျင်နဲ့တော့ လောင်စာဆီကို နှစ်မျိုးသုံးလို့မရပါဘူး။ တကယ်လို့ ဒီဇယ်အင်ဂျင်သုံးသူတွေအနေနဲ့ နှစ်မျိုးလုံး သုံးချင်တယ်ဆိုရင်တော့ ဓာတ်ဆီအင်ဂျင်ကိုပြောင်းလဲ တပ်ဆင်ဖို့လိုပါတယ်။

အခြားလောင်စာဆီတွေနဲ့ နှိုင်းယှဉ်ချက်
လောင်စာဓာတ်ဆီနဲ့ နှိုင်းယှဉ်မယ်ဆိုရင် CNG က ဟိုက်ဒရိုကာဗွန်၊ ကာဗွန်ဒိုင်အောက်ဆိုက်နဲ့ တခြားဘေးထွက် ပစ္စည်းထုတ်လွှင့်မှု အလွန်နည်းပါတယ်။ Octane နဲ့ ဆိုရင်လည်း Octane က ဈေးမြင့်ပြီး သူ့ထက် စက်နှိုးရလွယ်ကူပါတယ်။ တခြားနိုင်ငံတွေမှာတော့ ဓာတ်ငွေ့ကို ကိုယ့်နေအိမ်မှာပဲ ဖြည့်တင်းနိုင်ပါတယ်။ ဒါပေမဲ့ သိုလှောင်နိုင်မှုပမာဏမှာတော့ အကန့်အသတ်တွေ ရှိနေပါတယ်။ ဒါပေမဲ့ ဓာတ်ငွေ့ရဲ့ သဘောသဘာဝကြောင့် စွမ်းအင်အနည်းငယ် နိမ့်ပါတယ်။ ပြီးတော့ ဓာတ်ငွေ့ရဲ့အခြေခံတည်ဆောက်မှုက ဓာတ်ဆီနဲ့ယှဉ်ရင် အားနည်းချက်တွေ ရှိနေပေမယ့် စရိတ်တော့ ပိုသက်သာပါတယ်။ 

ဟိန်းမြတ်စိုး



  • VIA