News

POST TYPE

AUTOMOBILE

အငှားယာဉ်များနှင့် ယာဉ်ရပ်ရန်နေရာ ရှားပါးခြင်း
04-Dec-2017

အငှားယာဉ်များနှင့်   ယာဉ်ရပ်ရန်နေရာ  ရှားပါးခြင်း

“လက်ရှိမှာ တက္ကစီစတန်းတွေ သတ်သတ်မှတ်မှတ် မရှိသေးပါဘူး”
ဒုတိယရဲမှူး ဆန်းလွင်(အမှတ်၂ ယာဉ်ထိန်း ရဲတပ်ဖွဲ့ရုံး) 

တက္ကစီ စတန်းတွေနဲ့ပတ်သက်ပြီး ဘယ်မြို့နယ်တွေမှာ စတန်းတွေ ဘယ်နှခု ချထားပေးတယ်ဆိုတာ သေချာတော့ မသိပါဘူး။  ဒါတွေက စည်ပင်က လုပ်ပိုင်ခွင့် ပိုရှိတဲ့အတွက် သူတို့က အတိအကျ သိတယ်။ လက်ရှိမှာ တက္ကစီ စတန်းတွေ သတ်သတ်မှတ်မှတ် မရှိသေးပါဘူး။ တက္ကစီ စတန်းမှာ မရပ်တဲ့ယာဉ်တွေကို ဖမ်းရမယ်ဆိုတဲ့ ဥပဒေလည်း မရှိသေးတဲ့အတွက် ဖမ်းတာပြုတာတော့ မရှိပါဘူး။ ပညာပေးအဆင့်လောက်ပဲ ရှိနေသေးတယ်။ တက္ကစီ စတန်း မရှိသေးတဲ့အတွက် ဘာတွေဆိုးကျိုးရှိလဲဆို ယာဉ်ကြောပိတ်ဆို့မှုတွေတော့ ရှိနေသေးပါတယ်။ လက်ရှိမှာ ကျွန်တော်တို့အနေနဲ့ ဘယ်နေရာတွေမှာ စတန်းတွေ ချထားပေးရမယ်ဆိုတာ သေချာ မသိရသေးပေမယ့် လုပ်တာကတော့ လုပ်နေပါတယ်။ ဒီကိစ္စက စည်ပင်နဲ့ ပူးပေါင်း လုပ်ရတဲ့အတွက် အတိအကျ သေသေချာချာ မသိရတဲ့သဘောပါ။

“တက္ကစီ စတန်းထားပေးရင်တော့ တက္ကစီတွေက သတ်မှတ်ထားတဲ့နေရာမှာပဲ ရပ်ကျရင် ယာဉ်လမ်းကြောတွေလည်း ရှင်းသွားမယ်”
ဦးနန္ဒသူ (အငှားယာဉ်မောင်း)

တက္ကစီ စတန်းတွေက အစိုးရဘက်က လုပ်ပေးနိုင်ရင်တော့ အကောင်းဆုံးပေါ့နော်။ ရန်ကုန် တစ်မြို့လုံးမှာလည်း စတန်းတွေက လုံလုံလောက်လောက် မရှိတဲ့အတွက် ကျွန်တော်တို့အတွက် အခက်အခဲတွေတော့ ရှိတယ်။ ဖြူနီကျားမှာ ရပ်မိရင် အဖမ်းခံရမယ်။ နောက်ဘတ်စ်ကား မှတ်တိုင်လို့ သတ်မှတ်ထားတဲ့ နေရာတွေမှာလည်း ဘတ်စ်ကားတွေက ရပ်ချင်တဲ့နေရာတွေ ရပ်နေတဲ့အတွက် ကျွန်တော်တို့က အဲလိုနေရာတွေမှာ ရပ်မယ်ဆိုရင် ရဲတွေမှာ သူတို့ ဖမ်းပိုင်ခွင့်ရှိတဲ့အတွက် ဖမ်းခံရတဲ့အခါ ကျွန်တော်တို့က အဖမ်းခံရမယ်ဆိုတဲ့ အခက်အခဲတွေရှိတယ်။ တက္ကစီ စတန်းထားပေးရင်တော့ တက္ကစီတွေက သတ်မှတ်ထားတဲ့ နေရာမှာပဲ ရပ်ကျရင် ယာဉ်လမ်းကြောတွေလည်း ရှင်းသွားမယ်။ အခုလက်ရှိမှာတော့ တက္ကစီ စတန်းတွေစုပြီး ထောင်ထားတဲ့ ကိုယ်ထူ ကိုယ်ထ တက္ကစီ စတန်းတွေပဲ ရှိပါသေးတယ်။

“သူ့အလှည့်လေးနဲ့ သူ ထွက်တော့ ခရီးသည်အတွက်ရော ကားသမားအတွက်ရော အဆင်ပြေတယ်”
ဦးဝင်းမြင့် (တက္ကစီယာဉ်မောင်း)

တက္ကစီ စတန်းတွေနဲ့ပတ်သက်ပြီး လက်ရှိမှာ တက္ကစီတွေက အရမ်း များနေတယ်။ တရားဝင်လိုင်စင်ရှိတဲ့ တက္ကစီရှိသလို တရားမဝင် တက္ကစီတွေလည်း ရှိတယ်။ အဲလိုတွေ ကားတွေက အရမ်းများလာတဲ့အတွက် ကားရပ်စရာ နေရာတွေက အရမ်း ရှားလာတယ်။ ရပ်ဖို့နေရာ မရှိဘူးလို့မြင်တယ်။ အစိုးရအနေနဲ့လည်း တက္ကစီ စတန်းတွေ သတ်သတ်မှတ်မှတ် ထားပေးစေချင်တယ်။ ဥပမာ-လေဆိပ်၊ ကားကြီးကွင်းဂိတ်တို့လို နေရာမျိုးတွေမှာ ထားပေးသင့်တယ်လို့မြင်တယ်။ အခုဟာက တက္ကစီ စတန်း မရှိတဲ့အတွက် လေဆိပ်တို့၊ ကားဂိတ်တို့ မှာဆို ခရီးသည်တွေကို လူလေးငါးယောက် ပေါင်းပြီး တင်တာမျိုးတွေ ရှိတယ်။ စတန်းတွေ လုပ်ပေးရင်တော့ ခုလိုတွေဖြစ်စရာ မလိုဘူးပေါ့။ သူ့အလှည့်လေးနဲ့သူ ထွက်တော့ ခရီးသည်အတွက်ရော ကားသမားအတွက်ရော အဆင်ပြေတယ်။ အခုက ပျံကျတွေပဲ။ ကြုံတဲ့နေရာထိုး၊ ကြုံတဲ့နေရာ ဆွဲသလိုမျိုးတွေ ဖြစ်နေတာပေါ့။ လက်ရှိမှာ စတန်းမရှိတဲ့အတွက် ကိုယ့်လမ်းဂိတ်လေးတွေမှာ ကိုယ်အဆင်ပြေသလို ထိုးနေရတာပေါ့။ လမ်းမမှာ သွားထိုးရင်လည်း ယာဉ်နှစ်ထပ် ရပ်တဲ့အတွက် အဖမ်းခံရမယ်။ အဲအတွက် လူစည်ကားတဲ့နေရာတွေမှာ တက္ကစီစတန်းတွေ လုပ်ပေးသင့်တယ်။ လမ်းမတော်တို့၊ ပလာဇာတို့၊ ကုန်တိုက်လို့ နေရာမျိုးတွေ ပန်းဆိုးတန်းဆိပ်ကမ်းဘက်လို ညဈေးဘက်လို သံဈေးလို နေရာမျိုးတွေမှာ ထားပေးသင့်ပါတယ်။

ခိုင်ချယ်ရီထွန်း