News

POST TYPE

ARTICLE

ကျေးဇူး မဆပ်နိုင်တော့သူ
အဘိုးနှင့် အဘွားကို ကောင်းကောင်းမွန်မွန် ကျွေးမွေးစောင့်ရှောက်နိုင်ရန် ကြိုးပမ်းရုန်းကန်နေသည့် မဇင်မာဦး၏အဖြစ်က ဆိုးဝါးလွန်းလှသည်။

အိုမင်းမစွမ်း ဖြစ်နေသည့် အဘိုးနှင့်အဘွားကို ကျေးဇူးဆပ်ရန် မဇင်မာဦး နေရပ်ကို စွန့်ခွာကာ စင်ကာပူနိုင်ငံသို့ အရဲစွန့်၍ ထွက်ခွာလာခဲ့သည်။ 

စင်ကာပူတွင် အိမ်အကူအဖြစ် လုပ်ကိုင်ပြီး ရှစ်လကျော်အကြာတွင် မဇင်မာဦး ကွန်ဒို ၁၉ ထပ်ပေါ်မှ ခုန်ဆင်းကာ အဆုံးစီရင်သွားခဲ့သည်။ ယင်းဖြစ်ရပ် ရုပ်သံမှတ်တမ်းများမှာ Facebook စာမျက်နှာများတွင် ပျံ့နှံ့ခဲ့ပြီး မြန်မာ့လူ့အသိုင်းအဝိုင်းအတွက် အထိတ်တလန့် ဖြစ်စေခဲ့သည်။ 

ရခိုင်ပြည်နယ် မြောက်ဦးမြို့နယ် ဂူတစ်လုံးကျေးရွာသူ မဇင်မာဦးမှာ ကံကို ဆိုးလွန်းသည်ဟု ဆိုရမည်။ အသက်ငါးနှစ် အရွယ်တွင် မိခင်သေဆုံးပြီး ဖခင်ဖြစ်သူမှာလည်း နောက်အိမ်ထောင်ပြုသွားသဖြင့် အဘိုးနှင့် အဘွားတို့နှင့် နေခဲ့ရသည်။ အဘိုးနှင့်အဘွားတို့၏ ကျေးဇူးကြောင့် နဝမတန်းအထိ ကျောင်းနေခဲ့ရသည်။ 

စင်ကာပူတွင် အလုပ်သွားလုပ်မည်ဟု ဆိုစဉ်က မိသားစုဝင်များက သဘောမတူ။ တားမြစ်ခဲ့ကြသော်လည်း တား၍မရခဲ့ကြောင်း မဇင်မာဦး၏ အဒေါ်ဖြစ်သူ ဒေါ်မဆန်းရီက ပြန်လည်ပြောကြားသည်။ ရွာတွင်နေစဉ်က ကျောင်းဆရာမအဖြစ် ၂ နှစ်ခန့် လုပ်ကိုင်ခဲ့သည်။ အစိုးရခန့်မဟုတ်။ ရပ်ရွာက စပါးပေးဖြင့် ငှားရမ်းသည့် ကျောင်းဆရာမ ဖြစ်သည်။ 

“အဘိုးနဲ့အဘွားကို ကျေးဇူးဆပ်ဖို့ သူဒီမှာ တော်တော်ရုန်းကန်ခဲ့တယ်။ ဒီမှာ လုပ်စားရင် အဘိုးနဲ့အဘွားကို ကောင်းကောင်းမွန်မွန် လုပ်ကျွေးနိုင်မယ် မထင်လို့ သူ့သဘောနဲ့သူ ထွက်သွားတာ” ဟု ၎င်းက ပြောဆိုသည်။ 

မဇင်မာဦးကဲ့သို့  စင်ကာပူနိုင်ငံတွင် အိမ်အကူအဖြစ် သွားရောက်လုပ်ကိုင်သည့် မြန်မာအချို့ တိုက်ပေါ်မှ ခုန်ဆင်းထွက်ပြေးခြင်း၊ အဆုံးစီရင်ခြင်း ဖြစ်ရပ်အများအပြား ရှိခဲ့သည်။ မြန်မာအိမ်အကူများ မည်မျှအထိ စတေးခံနေရဦးမည်နည်း။

မြန်မာအစိုးရက အိမ်အကူများကို ပြည်ပသို့ စေလွှတ်ခွင့် ပိတ်ထားသော်လည်း စင်ကာပူတွင် မြန်မာအိမ်အကူ လေးသောင်းကျော် ရောက်ရှိနေပြီ ဖြစ်သည်။ တရားဝင် စေလွှတ်ထားခြင်း မဟုတ်သဖြင့် မြန်မာအစိုးရ၏ ကာကွယ်စောင့်ရှောက်မှုကိုလည်း မရကြပေ။

“ဒီဘက်မှာ တရားဝင် ဘယ်လောက်ပဲဖြစ်ဖြစ် မြန်မာဘက်က တရားမဝင်ဘူးဆိုတာ ဒီဘက်က သိနေတယ်။ လုပ်စားလို့ ကောင်းတာပေါ့” ဟု ရွှေ့ပြောင်းအလုပ်သမားများအရေး ဆောင်ရွက်ပေးနေသည့် စင်ကာပူနိုင်ငံ အခြေစိုက် Humanitarian Organization for Migration Economics (HOME) တွင် စေတနာ့ဝန်ထမ်း လုပ်ကိုင်နေသူ ဒေါ်ခင်လေးက ပြောဆိုသည်။

ပွဲစားများဖြင့် ချိတ်ဆက်ကာ လေကြောင်းဖြင့် စင်ကာပူသို့ သွားရောက်ကာ အိမ်အကူလုပ်ကြပြီး ပွဲစားများမှာ တာဝန်ယူမှု အားနည်းကြောင်း စင်ကာပူရောက် မြန်မာအိမ်အကူများအရေးကို ဆောင်ရွက်သူများထံမှ သိရသည်။

မဇင်မာဦးမှာလည်း  ယင်းနည်းအတိုင်း သွားခဲ့ခြင်း ဖြစ်သည်။ ရွာခံပွဲစား ချိတ်ဆက်ပေးမှုဖြင့် ရန်ကုန်သို့ လာရောက်ခဲ့ပြီး လပိုင်းခန့်အကြာတွင် စင်ကာပူသို့ ထွက်ခွာခဲ့သည်။ ရွာက ထွက်ခွာသွားချိန်တွင် ငွေလေးသောင်းကျပ်သာ ပါသွားကြောင်း ၎င်း၏ ဦးလေးဖြစ်သူ ဦးသာဇံက ပြောဆိုသည်။

မဇင်မာဦးသည် စင်ကာပူနိုင်ငံသား အိန္ဒိယလူမျိုး နေအိမ်တွင် အိမ်အကူအဖြစ် လုပ်ကိုင်နေသူ ဖြစ်သည်။ ဇွန်လ ၁၂ ရက်နေ့ ညနေ ၅ နာရီကျော်တွင် အဝတ်လှန်းခိုင်းရာမှ တစ်ဆင့် ဝရန်တာ အပြင်ဘက် အစွန်းပေါ်ထွက်ပြီး ခုန်ချရန် ကြိုးပမ်းခဲ့ကြောင်း မြန်မာသံရုံးမှ တာဝန်ခံ ဒေါ်ဆန်းစန္ဒာဝင်းက ပြောကြားသည်။

ရဲတပ်ဖွဲ့နှင့် ကယ်ဆယ်ရေးအဖွဲ့များ ညှိနှိုင်းချိန် တစ်နာရီခွဲခန့်ရခဲ့ပြီး မြန်မာစကားပြန် ခေါ်ပေးမည် ဆိုသော်လည်း မဇင်မာဦးက ငြင်းဆန်ခဲ့ကာ သူငယ်ချင်းဖြစ်သူ အင်ဒိုနီးရှား အိမ်အကူနှင့်သာ စကားပြောဆိုခွင့် တောင်းဆိုခဲ့ကြောင်း ၎င်းက ပြောဆိုသည်။ 

သို့သော်လည်း မကယ်တင်နိုင်ခဲ့ပေ။ ခုန်မဆင်းရန် ဖျောင်းဖျခဲ့ကြသော်လည်း ၇ နာရီ ဝန်းကျင်ခန့်တွင် မဇင်မာဦး ဝရန်တာ အစွန်းကို ခြေစုံကန်ကာ ခုန်ဆင်းသွားလေသည်။ 

ယခုတစ်ကြိမ်တွင်လည်း ကံမကောင်းခဲ့သေးပေ။ ၎င်းကို ကယ်တင်ရန် ရေမြှုပ်မွေ့ယာများ ခင်းထားသော်လည်း ယင်းနေရာသို့ မကျ။ တိုက်၏ ပထမထပ် အမိုးအစွန်းတွင် ကျခဲ့သည်။ ကွန်ဒို၏ ဒီဇိုင်းမှာ အံစာတုံးကဲ့သို့ ဖြစ်နေသဖြင့် ကယ်တင်ရန် ခက်ခဲ့ကြောင်း မြန်မာသံရုံးမှ သိရသည်။

မြန်မာသံရုံး အနေနှင့် စင်ကာပူ ရဲတပ်ဖွဲ့နှင့် ပူးပေါင်းဆောင်ရွက်နေသော်လည်း ခုန်ဆင်းခဲ့သည့် အကြောင်းအရင်းကို မသိရသေးကြောင်း ဒေါ်ဆန်းစန္ဒာဝင်းက ပြောဆိုသည်။

“အရမ်းကို ဝမ်းနည်းပြီးတော့ စိတ်ခံစားမှု ပြင်းနေတယ်။ သူ့အမေကို သတိရတယ်။ သူ့အမေနောက် လိုက်ချင်တယ် ဆိုတာပဲ သိထားတယ်။ ဘာကြောင့်လဲဆိုတာ မသိရသေးဘူး” ဟု အိမ်ရှင်ဖြစ်သူ၏ ပြောဆိုချက်ကို အခြေခံကာ ၎င်းက ဇွန်လ ၁၅ ရက်နေ့တွင် ပြောဆိုသည်။

အနီးကပ် စကားပြောခွင့်ရခဲ့သည့် အင်ဒိုနီးရှား အိမ်အကူကိုလည်း ရဲတပ်ဖွဲ့က အဓိကသက်သေအဖြစ် ခေါ်ထားသဖြင့် မြန်မာသံရုံးတာဝန်ရှိသူများ တွေ့ခွင့်မရကြောင်း ၎င်းက ပြောကြားသည်။

မဇင်မာဦး ရေးထားသည့်စာကို အင်ဒိုနီးရှား အမျိုးသမီးတစ်ဦး Facebook တွင် ဖော်ပြခဲ့သည်။ ယင်းစာတွင် အစားအသောက်များ အချိန်မှန် မစားရမှု၊ ဝဝလင်လင် မစားရမှုတို့ကို ရေးသားထားသည်။ ယင်းစာမှန် မမှန် The Voice က သီးခြားအတည်မပြုနိုင်ခဲ့ပါ။

မိမိကိုယ်ကိုယ် သတ်သေသူများနှင့် အထပ်မြင့်တိုက်ပေါ်မှာ ခုန်ဆင်းထွက်ပြေးသူများအနက် အသက်  ၁၈ နှစ် မပြည့်သူများ ပိုမိုများပြားကြောင်း စင်ကာပူရောက် မြန်မာအလုပ်သမားအရေးကို ဆောင်ရွက်နေသည့် Helping Hands For Migrant Workers အဖွဲ့မှ ဒေါ်အေးမာမာက ပြောကြားသည်။

စိတ်ပိုင်းဆိုင်ရာ ဖိအားများကို မခံစားနိုင်ကြခြင်း၊  အိမ်အကူ အလုပ်အကိုင်မှာလည်း နေအိမ်တွင် တစ်ဦး လုပ်ကိုင်ရပြီး အလုပ်ပင်ပန်းမှု၊ အိမ်ရှင်၏ ဖိအားများလာပါက အဆိုပါ အသက်အရွယ်များမှာ ဖိအားဒဏ်မခံနိုင်သဖြင့် အဆုံးအစွန်အထိ လုပ်တတ်ကြကြောင်း တိုက်ပေါ်မှ ခုန်ဆင်းထွက်ပြေးသူများကို ကူညီခဲ့သူ ၎င်းက ပြောဆိုသည်။

(ပုံစာ - မဇင်မာဦး နေထိုင်ခဲ့သည့် နေအိမ်ဖြစ်ပြီး လက်ရှိတွင် ၎င်းင်း၏ အဘိုးနှင့်အဘွား နေထိုင်လျက်ရှိသည်)

စင်ကာပူအစိုးရ သတ်မှတ်ချက်အရ အသက် ၂၃ နှစ် ပြည့်သူများသာ အိမ်အကူလုပ်ခွင့် ရှိသော်လည်း မြန်မာအိမ်အကူများမှာ အသက်ကို လိမ်လည်ကာ လာရောက်လုပ်ကိုင်နေကြကြောင်း ၎င်းက ဆိုသည်။

“Passport တွေကို ဘယ်လိုထုတ်ပေးနေကြတာလဲ” ဟု HOME အပြင် Myanmar Club ၏ အမှုဆောင် လည်းဖြစ်သူ ဒေါ်ခင်လေးက အသက်မှားယွင်း လျှောက်ထားသူများကို နိုင်ငံကူးလက်မှတ် ထုတ်ပေးမှုအပေါ် မွေးခွန်းထုတ်သည်။

အသက်အရွယ်ကို လိမ်ထားသည့်အပြင် အတန်းပညာရပ်များကိုလည်း လိမ်လည်ကာ လာရောက်ကြကြောင်း ၎င်းက ပြောဆိုသည်။

“သုံးတန်းမအောင်တဲ့ သူကလည်း ပထမနှစ်ဖြစ်လိုဖြစ်။ ဒီကတော့ အထင်ကြီးတာပေါ့။ တကယ့်အိမ်ရှင်နဲ့ ဆက်ဆံဖို့ အဆင်မပြေတော့ဘူး။  မြန်မာပြည်ဘက်က ထိထိရောက်ရောက် လုပ်သင့်ပြီ။ နောက်တောင်ကျနေပြီ” ဟု ၎င်းက ပြောဆိုသည်။

မဇင်မာဦးမှာလည်း ယင်းနည်းအတိုင်းပင်။ အဒေါ်ဖြစ်သူ ပြောဆိုချက်အရ မဇင်မာဦးသည် အသက် ၂၁ နှစ်ရှိပြီ ဖြစ်ပြီး မြန်မာနိုင်ငံကူးလက်မှတ်တွင်မူ အသက် ၂၅ နှစ်ဟု ဖော်ပြထားသည်။  

အယ်ဂျာဇီးယား သတင်းဌာန၏ ယမန်နှစ်က သတင်းဖော်ပြချက်အရလည်း မြန်မာအမျိုးသမီးများကို အသက်လိမ်ပြီး အိမ်ဖော်အဖြစ် စင်ကာပူသို့ ပို့ဆောင်သူများ ရှိနေခဲ့သည်။ 

ယင်းအပြင် မြန်မာအစိုးရက အိမ်အကူကို တရားဝင် စေလွှတ်ခွင့် ပိတ်ထားသဖြင့် အိမ်အကူအဖြစ် လုပ်ကိုင်လိုသူများမှာ ပွဲစားများကိုသာ အားကိုးရသည်။ ပွဲစားများသည် အိမ်အကူနှင့် ပတ်သက်သည့် အတတ်ပညာများ၊ ဘာသာစကားများကို စနစ်တကျ မသင်ဘဲ စေလွှတ်နေကြသည်။ 

မြန်မာအိမ်အကူ အများစုမှာ ဘာသာစကား မကျွမ်းကျင်သဖြင့် အိမ်ရှင်နှင့် ဆက်ဆံရာတွင် အဆင်မပြေဖြစ်ပြီး အိမ်တွင်းမှု အတတ်များကို ကျွမ်းကျင်ခြင်း မရှိသဖြင့် အလုပ်လုပ်ရာတွင် အဆင်မပြေကြ၍ ဖိအားပိုများကြောင်း ဒေါ်အေးမာမာက ပြောဆိုသည်။ 

အသက်ငယ်ရွယ်သူများကို လုံးဝမလွှတ်သင့်ကြောင်း အိမ်အကူအရေး လုပ်ဆောင်သူများက ပြောဆိုကြသည်။

မြန်မာအိမ်အကူများမှာ အကြွေးပိသည့် ဒဏ်လည်း ခံရသေးသည်။ စင်ကာပူ ဥပဒေအရ အလုပ်သမားထံမှ ဝန်ဆောင်ခ နှစ်လစာသာ ယူခွင့်ရှိသော်လည်း ပွဲစားများက မြန်မာအိမ်အကူများထံမှ ခုနစ်လအထိ လုပ်အားခများကို ဖြတ်တောက်ကြသည်။ ယင်းအပြင် အလုပ်အဆင်မပြေ၍ အလုပ်ပြောင်းခိုင်းလျှင် နှစ်လစာ ထပ်ယူသဖြင့် မြန်မာအိမ်အကူများ ပွဲစားကြေးဆပ်ရင်း သံသရာလည်နေကြောင်း အိမ်အကူအရေး ဆောင်ရွက်သူများက ပြောဆိုကြသည်။
“ငွေတော့ ယူတတ်ကြပြီး တာဝန်မယူတတ်ကြတာက အေးဂျင့်တွေပါ” ဟု ဒေါ်အေးမာမာက ပြောဆိုသည်။

စင်ကာပူတွင် အိမ်အကူအဖြစ် လာရောက်လုပ်ကိုင်မည်ဆိုလျှင် အလုပ်လုပ်ရသည် အခြေအနေကို သေသေချာချာ စုံးစမ်းပြီး စိတ်နှင့် ရုပ်ပိုင်းဆိုင်ရာတို့ကို သေသေချာချာ ပြင်ဆင်ကာ ဖိအားဒဏ်များကို ခံနိုင်မည်ဟု ယုံကြည်ပြီးမှသာ လာသင့်ကြောင်း ဒေါ်အေးမာမာက ပြောဆိုသည်။

မြန်မာသံရုံးသို့ အကူအညီ လာတောင်းသူများထဲတွင်လည်း အလုပ်ဆက် မလုပ်နိုင်သဖြင့် အိမ်ပြန်ခွင့်ရအောင် ကူညီပေးရန် တောင်းဆိုသူ ပိုများကြောင်း မြန်မာသံရုံး တာဝန်ခံ ဒေါ်ဆန်းစန္ဒာဝင်းက ပြောဆိုသည်။ 
“မိန်းကလေးတွေက ရောက်တာ ရက်ပိုင်းပဲ ရှိသေးတယ်။ တစ်လ နှစ်လပဲ ရှိသေးတယ်။ အလုပ်မလုပ်နိုင်တော့လို့၊ အိမ်ကိုလွမ်းလို့၊ မပျော်လို့ မြန်မာပြည် ပြန်ချင်တယ်ဆိုပြီး အကူအညီတောင်းတာ ပိုများလာတယ်” ဟု ၎င်းက ဆိုသည်။

အိမ်ရှင်ဆိုးများနှင့် တွေ့လျှင် မြန်မာအိမ်အကူများ ကံကြမ္မာဆိုးနှင့် ကြုံရနိုင်သည်။ လုပ်အားခမရ၊ နားရက်မရ၊ အပြင်မထွက်ရ။ မိသားစု အပါအဝင် မည်သူနှင့်မျှ အဆက်အသွယ်မရ။ အလုပ်များကို ပင်ပင်ပန်းပန်းလုပ်ရ၊ ယင်းအပြင် နှိပ်စက်ခံရမှုများပါ ကြုံနိုင်သေးသည်။ 

ယင်းသို့ နဖူးတွေ့ဒူးတွေ့ ကြုံခဲ့သူမှာ မကြူကြူဝင်း ဖြစ်သည်။ အဘွားအိုတစ်ဦးကို ပြုစုရမည်ဖြစ်ပြီး တစ်လလျှင် တစ်ရက် နားရမည် သဘောတူညီချက်ဖြင့် ၂၀၁၄ ခုနှစ်က သွားရောက်လုပ်ကိုင်ခဲ့သည်။ 

သို့သော်လည်း သက်ကြီးရွယ်အို နှစ်ဦး အပါအ၀င် လူငါးဦး၊ ခွေးသုံးကောင်အတွက် အလုပ်လုပ်ရပြီး နားရက်လည်း မရသည့် အပြင် ဖုန်းလည်းပြောခွင့်ပါ မရကာ အပြင်လည်းထွက်ခွင့် မရကြောင်း၊ ယင်းအပြင် နေအိမ်ရှိ အမျိုးသားနှစ်ဦးနှင့် ဖောက်ပြန်ရန် ကြိုးပမ်းသည်ဟုလည်း စွပ်စွဲခံရကြောင်း ၎င်းက ဆိုသည်။

ယင်းအချိန်တွင် စိတ်ဖိစီးမှု မခံနိုင်သဖြင့် ကြွေပြားဆေးသည့် အရည်ကို သောက်ခဲ့သဖြင့် အော့အန်ခဲ့သော်လည်း အသက်မသေခဲ့ကြောင်း၊ ယင်းဖြစ်စဉ် ဖြစ်ပြီးနောက် တစ်လအကြာ (လုပ်သက် ၁၀ လအကြာ) တွင် စွပ်စွဲချက်အသစ် တစ်ခုဖြင့် မြန်မာနိုင်ငံသို့ ပြန်ပို့ခံခဲ့ရကြောင်း ၎င်းက ဆိုသည်။ 
“သေတဲ့သတင်းကြားတော့ အရမ်းဝမ်းနည်းတယ်။ ထပ်တူလည်း ခံစားရတယ်။ တိုက်ပေါ်က ခုန်ချရတဲ့အထိဆိုတော့ ဘယ်လောက်အထိ “ ဟု မကြူကြူဝင်းက ၁၉ ထပ်ပေါ်မှ ခုန်ချခဲ့သည့် အိမ်အကူအတွက် ကိုယ်ချင်းစာစကား ဆိုသည်။ 

မြန်မာနိုင်ငံသည် အိမ်အကူများကို စေလွှတ်ခွင့် လုံးဝမပြုခဲ့သည့် နိုင်ငံတော့ မဟုတ်။ ၂၁၀၃ ခုနှစ်မှ စတင်ကာ စင်ကာပူသို့ အိမ်အကူ တစ်ရာကျော် စေလွှတ်ခဲ့ပြီး ၂၀၁၄ခုနှစ်မှ စတင်ကာ ဟောင်ကောင်သို့ အိမ်အကူ တစ်ရာကျော် ထပ်မံစေလွှတ်ခဲ့သေးသည်။ ပြဿနာ ကြီးကြီးမားမား မဖြစ်ခဲ့သော်လည်း ယင်းသို့ စေလွှတ်မှုအပေါ် ကန့်ကွက်မှုများ ရှိသည်ဟုဆိုကာ ၂၀၁၄ နှစ်ကုန်ပိုင်းတွင် ရပ်ဆိုင်းခဲ့သည်။

အိမ်အကူများကို တရားဝင်ခွင့်ပြုရန် တောင်းဆိုနေသူများရှိပြီး တစ်ဖက်တွင်လည်း ကန့်ကွက်နေသဖြင့် ယင်းကိစ္စအတွက် ဆုံးဖြတ်ရခက်နေကြောင်း၊ အိမ်အကူများကို တရားဝင်ခွင့်ပြုရန် ရှိမရှိကိုလည်း မပြောနိုင်သေးကြာင်း အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာနမှ အမြဲတမ်းအတွင်းဝန် ဦးမျိုးအောင်က ပြောကြားသည်။

အိမ်အကူအဖြစ် သွားလုပ်သူများကို တားဆီရန်လည်း သက်ဆိုင်ရာ ဌာနဆိုင်ရာများ ညှိနှိုင်းရဦးမည်ဟု ၎င်းက ဆိုသည်။

အစိုးရက တရားဝင်စေလွှတ်ရန် ရှိမရှိ မသေချာသေးသော်လည်း မဇင်မာဦးကဲ့သို့ မြန်မာအိမ်အကူများမှာ မြန်မာနိုင်ငံကို စွန့်ခွာနေကြဆဲဖြစ်သည်။ မဇင်မာဦး ကွန်ဒိုပေါ်မှ ခုန်ချသည့် သတင်းမှာ ချက်ချင်းပင် ဇာတိမြေသို့ ရောက်ရှိခဲ့သည်။ 

“Facebook မှာ ကြည့်ရတယ်” ဟု ၎င်း၏ ဦးလေးဖြစ်သူ ဦးသာဇံက ပြောဆိုသည်။ 

“သူက စိတ်ဓာတ်မာတယ်။ သူ့ကို ကြည့်ရတာ အရမ်းစိတ်ဒုက္ခရောက် ရောက်နေခဲ့ပုံရတယ်။ မိသားစုနဲ့လည်း အဆက်အသွယ်မရ။ သူတော်တော့်ကို အခက်အခဲ ခံစားနေရပုံ ပေါ်တယ်။ ခန္ဓာလည်း ပိန်သွားတယ်” ဟု တိုက်ပေါ်မှ ခုန်ချသည့် ရုပ်သံမှတ်တမ်းအပေါ် ၎င်းက မှတ်ချက်ပေးသည်။

အသက် ၈၅ နှစ်အရွယ် အဘိုးနှင့် အသက် ၇၅ နှစ်အရွယ် အဘွားကို ကျေးဇူးဆပ်ချင်သည့် မဇင်မာဦးတစ်ယောက် ကျေးဇူးဆပ်ခွင့် မသာခဲ့တော့ပါ။ အသက်ဆုံးရှုံးသွားချိန်အထိ အဘိုးနှင့် အဘွား အတွက်လည်း ငွေကြေးတစ်ကျပ်မျှ မပို့ပေးနိုင်ခဲ့သေးပေ။ 

အောင်မြင့်ထွန်း