News

POST TYPE

ARTICLE

သက်သတ်လွတ်သမားတို့ ကျန်းမာရေးနဲ့ လျော်ညီအောင်စားသောက်ခြင်း
20-Oct-2019


သက်သက်လွတ်သမားတစ်ယောက်အတွက် ကျန်းမာတဲ့ အာဟာရ စားသောက်ဖို့က ခက်ခဲတယ်လို့ ထင်ရပါတယ်။ ဒါပေမဲ့ သေသေချာချာ ဂရုစိုက်စားသောက်မယ်ဆိုရင် သက်သတ်လွတ်သမား မဟုတ်သူတွေထက် ပိုပြီးတောင် အာဟာရပြည့်ဝတဲ့ စားသောက်နေထိုင်ပုံကို ရရှိစေမှာဖြစ်ပါတယ်။ သက်သတ်လွတ်ဖြစ်ရင် ပြီးရော ထမင်းလေး ဆီဆမ်းဆားနယ်ပြီး စားနေရင်တော့ လိုအပ်တဲ့ အာဟာရတန်ဖိုးတွေ မရဘဲ ရှူနာရှိုက်ကုန်း သက်သတ်လွတ်သမားဖြစ်သွားမှာပေါ့။ ဒါကြောင့် သက်သတ်လွတ်သမားတွေ ကျန်းမာစိုပြည်ဖျတ်လတ် သန်မာစေမယ့် စားသောက်ပုံတွေကို စုစည်းဖော်ပြပေးလိုက်ပါတယ်။

ဗီတာမင် B12 မချို့တဲ့ပါစေနဲ့

အသားတွေမှာ ပါတတ်တဲ့ B12 ကို သက်သတ်လွတ်သမားတွေ ချို့တဲ့တတ်ပါတယ်။ ဒါကြောင့် ဖြည့်စွက်ဗီတာမင် B12 ကို သောက်သုံးပေးသင့်ပါတယ်။ B12 အားဆေးဟာ ဈေးကြီးတဲ့ ဆေးမျိုး မဟုတ်ပါဘူး။ ဒါကြောင့် သက်သတ်လွတ်ကာလရှည်စားမယ်ဆိုရင် B12 သောက်ပေးသင့်တယ်လို့ ဆရာဝန်တွေက အကြံပြုကြပါတယ်။ ဖြည့်စွက်အာဟာရတွေကလည်း ဈေးကွက်ထဲမှာရှိပါတယ်။ B12 ထည့်သွင်းထားတဲ့ မနက်စာ ကွေကာဆီရီယယ်၊ ပဲနို့၊ ဆန်နို့ စတာတွေ ရှိပါတယ်။

သံဓာတ်ပါတဲ့ အာဟာရ၊ သွပ်ဓာတ်ပါတဲ့ အာဟာရတွေ အရေးကြီးတယ်

သံဓာတ်ဟာ ကျန်းမာတဲ့ အောက်ဆီဂျင် လည်ပတ်မှုစနစ်ကို အကူအညီပေးပါတယ်။ သံဓာတ်ဟာ အနီရောင်အသားနဲ့ ငါးတွေမှာ ကြွယ်ဝစွာ ပါရှိ တယ်ဆိုပေမယ့် သံဓာတ်ကြွယ်ဝတဲ့ သက်သတ်လွတ် အာဟာရတွေလည်း ရှိပါတယ်။ သံဓာတ်သက်သတ်လွတ် အာဟာရတွေကတော့ တို့ဟူး၊ ပဲပြား၊ အာလူး၊ ချောကလက်အနက် စတာတွေ ဖြစ်ပါတယ်။ သစ်သီးခြောက်များ၊ ပဲတောင့်ရှည်များ၊ အစေ့အဆန်များ၊ အစိမ်းရောင်အရွက်များတို့မှာ သံဓာတ်တွေ ကြွယ်ဝစွာပါဝင်ပါတယ်။ သံဓာတ် အစားအစာတွေ စားမယ်ဆိုရင် ဗီတာမင်စီ အစားအစာတွေနဲ့ ရောစားသင့်ပါတယ်။ သံဓာတ်ကို စုပ်ယူမှု ပိုမိုအားကောင်းလာစေလို့ ဖြစ်ပါတယ်။ သွပ်ဓာတ်ကလည်း အသားမှာမှ ရှိတာ မဟုတ်ပါဘူး။ မြေပဲ၊ သီဟိုဋ်စေ့၊ အယ်မွန်စေ့တို့မှာ သွပ်ဓာတ်တွေ ပါဝင်ပါတယ်။ စားပေးပါ။ 

ပရိုတင်းများများစားပါ

ပရိုတင်းဟာ ကြွက်သားကြီးထွားဖို့၊ ဆံပင်၊ လက်သည်းခြေသည်း စတဲ့ ခန္ဓာကိုယ်ကနေ အရေးပါတဲ့စနစ်တွေ ထွားကျိုင်းဖို့အတွက် စနစ်တစ်ခု ဖြစ်ပါတယ်။ အရွယ်ရောက်ပြီးသား လူတစ်ဦးဟာ ကျန်းမာဖို့အတွက် ပရိုတင်း ၄၆ ဂရမ်ကနေ ၅၆ ဂရမ်အထိ လိုအပ်ပါတယ်။ သက်သတ်လွတ် ပရိုတင်းရင်းမြစ်တွေ များစွာရှိပါတယ်။ ဘာတွေ စားသင့်သလဲ ဆိုရင်တော့ ပဲမျိုးစုံလို့ ဖြေရမှာပါပဲ။ ပဲကြီး၊ ပဲကျား၊ စားတော်ပဲ၊ ကုလားပဲ၊ ပဲစင်းငုံ၊ ပဲပိစပ်တို့ဟာ ပရိုတင်းပမာဏ များစွာပါဝင်ပါတယ်။ ဖရုံသီး၊ ခရမ်းသီးစတာတွေကလည်း ပရိုတင်းကြွယ်ဝတဲ့ စားသောက် ဖွယ်တွေပါပဲလေ။

ကယ်ဆီယမ်ဓာတ်ရပါစေ

အရိုးတွေ၊ သွားတွေ ခိုင်မာဖို့အတွက် အရေးပါတဲ့ ကယ်ဆီယမ်ဓာတ်က နွားနို့ထွက်ပစ္စည်းတွေမှာ ပါတတ်ပါတယ်။ သက်သတ်လွတ် ဗီဂန်သမားတွေက နို့ကိုပါ ရှောင်တတ်တာမို့ အစားထိုး ကယ်ဆီယမ်လုံလောက်စွာ စားသင့်ပါတယ်။ လူတစ်ယောက်ဟာ နေ့စဉ် ကယ်ဆီယမ် တစ်ထောင်မီလီဂရမ် ရရှိသင့်ပါတယ်။ အယ်မွန်စေ့၊ ကွေကာအုတ်၊ ပဲနို့၊ ပေါင်မုန့် တို့မှာ ကယ်ဆီယမ်ဓာတ်ကြွယ်ဝပါတယ်။ လိမ္မော်သီး၊ ရှောက်သီးတို့မှာ ကယ်ဆီယမ်ဓာတ် ပါဝင်ပါတယ်။ 

အိုမီဂါသရီး

ငါးမစားတဲ့အတွက် အိုမီဂါသရီး ဖက်တီး အက်စစ်ကြွယ်ဝတဲ့ ဆီထွက် အစေ့အဆန်တွေ စားရပါမယ်။ နှမ်းဆီ၊ ပဲဆီ စစ်စစ်တွေဟာ အိုမီဂါသရီး ပါဝင်ပါတယ်။ ကြယ်ပဲဆီလို အန်တီအောက်ဆီဒန့် ကြွယ်ဝတဲ့အာဟာရပါရှိတဲ့ ဆီမျိုး စားသုံးပေးခြင်းအားဖြင့် အိုမီဂါသရီးရရှိမှုကို မြင့်တက်စေပါတယ်။ 

အိုင်အိုဒင်းဓာတ်ရဖို့ ရေညှိစားကြစို့

သိုင်းရွိုက်လုပ်ငန်းဆောင်တာတွေ ကောင်းမွန်စေဖို့ရာ အိုင်အိုဒင်းဓာတ်လိုပါတယ်။ ပင်လယ်စာတွေမှာ ပေါများစွာရှိတဲ့ အိုင်အိုဒင်းဓာတ်ကို သက်သတ် လွတ်သမားက ပင်လယ်စာ ဟင်းသီးဟင်းရွက်တွေမှာ ရှာရပါမယ်။ ကျောက်ကျောမျှင်များ၊ ပင်လယ် ရေညှိတို့မှာ အိုင်အိုဒင်းဓာတ်တွေ ပါရှိပါတယ်။ အိုင်အိုဒင်း ချို့တဲ့မယ်ဆိုရင် သိုင်းရွိုက်လုပ်ငန်းဆောင်တာတွေ မကောင်းဘဲ ကျန်းမာရေးကို ထိခိုက်နိုင်ပါတယ်။

ကျန်းမာသော သက်သတ်လွတ်သမားတွေ ဖြစ်ကြပါစေ။

ဆရာဆေး