News

POST TYPE

ARTICLE

ခတ္တမန္ဒူက ဗုဒ္ဓဘား . . .
12-Sep-2019


ခတ္တမန္ဒူက ဒဏ္ဍာရီထဲက မြို့ဟောင်းတစ်ခုလို နန်းတော်ဟောင်းတွေ၊ ရှေးဘုရားကျောင်းတွေ၊ ဟိန္ဒူ နတ်ရုပ်တွေ၊ အုတ်နီရောင် တိုက်အိမ်တွေ၊ ဖုန်တထောင်းထောင်းထနေသော လမ်းတွေ၊ ရှုပ်ထွေးနေသော မော်တော်ယာဉ်တွေ၊ ဆိုင်ကယ်တွေ၊ လမ်း သလားနေသော လူတွေနှင့် အရောင်မွဲမွဲ မြို့ပြတစ်ခု ဖြစ်သည်။ မြန်မာနိုင်ငံလိုပဲ နီပေါနိုင်ငံဖြတ်သန်းလာခဲ့ရသော သမိုင်းက ရှုပ်ပီး ကြမ်းတမ်းသည်။ ယခုချိန်မှာ မြန်မာရော၊ နီပေါပါ နိုင်ငံရေးမုန်တိုင်း အရှိန်သေသွားပြီဟု ဆိုနိုင်သော်လည်း နီပေါက မြန်မာထက် အနည်းငယ် ပိုပြီးတည်ငြိမ်သည်ဟု ဆိုနိုင်သည်။ 

နီပေါမှာ ဘုရင့်အာဏာရှင်စနစ်ချုပ်ငြိမ်းသွားကတည်းက လစ်ဘရယ်ဒီမိုကရေစီလမ်းကြောင်းက တဖြည်းဖြည်းပီပြင်လာသည်။ ဖက်ဒရယ်ဒီမိုကရေစီ သမ္မတနိုင်ငံအဖြစ် ရွေ့နေပြီဟု ဆိုနိုင်သည်။ အထင် ရှားဆုံး ခြားနားချက်တစ်ခုက ယနေ့နီပေါတွင် လက်နက်ကိုင်တော်လှန်ရေးအုပ်စုတွေ လုံးဝမရှိ တော့ခြင်းပင်။ မြန်မာ့ဒီမိုကရေစီကတော့ အားလုံးသိကြသည့်အတိုင်းပင် အခြေခံဥပဒေအရ အပြည့် အဝမဖြစ်သေးသလို လက်နက်ကိုင်မျိုးကွဲအုပ်စုတွေ အများအပြားရှိနေဆဲဖြစ်သည်။ တစ်နည်းအားဖြင့် မြန်မာ့နိင်ငံရေးက တည်ငြိမ်မှုမရှိသေး။ 

တူညီတာတစ်ခုကတော့ ကြမ်းတမ်းသော အတိတ်ဆိုးတွေကို ဆက်လက်အမွေခံထားရတာ ဖြစ်သည်။ ဖွံ့ဖြိုးမှု နိမ့်ကျခြင်း..။ ယခုမှ ပြန်လည်တည်ဆောက်နေရသည်။ အုပ်ချုပ်ရေး အင်စတီကျူးရှင်းတွေ အသားမကျသေး။ ကုန်းတွင်းပိတ် နိုင်ငံတစ်ခုဖြစ်ခြင်း၊ စိုက်ပျိုးမြေနည်းပါးခြင်းတို့ကြောင့် ဆင်းရဲနွမ်းပါးသည်။ တစ်ဦးချင်းဝင်ငွေ မြန်မာလောက်မရှိ။ နီပေါနိုင်ငံသားအများစုက ပြည်ပထွက် အလုပ်လုပ်ပြီး ဝင်ငွေပြန်ပို့ စီးပွားရှာကြသည်။ လက်ရှိ အစိုးရက “ကမ္ဘာလှည့် ခရီးသွားလုပ်ငန်း” ကို အဓိက စီးပွားရေးပစ်မှတ်ထားလာသည်။ 

ယခင်က နိုင်ငံရေးမတည်ငြိမ်မှုကြောင့် ခရီးသည် အဝင်နည်းခဲ့သော နီပေါမှာ ယခုနှစ်ပိုင်းအတွင်း ခရီးသွား သိသိသာသာ တိုးတက်လာသည်။ လာမည့် ၂၀၂၀ ကို နီပေါခရီးသွားနှစ် (Visit Nepal Year 2020) ဟု သတ်မှတ်ကာ ခရီးသွားဧည့်သည် ၂ သန်း လာဖို့ မျှော်မှန်းထားသည်။ အဓိက ဆွဲဆောင်စရာအဖြစ် ဧဝရက်တောင်အပါအဝင် ကမ္ဘာ့အမြင့်ဆုံး တောင်ထွတ် (၈) ခုကို နီပေါက ပိုင်ဆိုင်ထားသည်။ ပြီးတော့ ဗုဒ္ဓဖွားမြင်ရာ လုမ္ဗိနီဥယျာဉ် ရှိသည်။ 

ခတ္တမန္ဒူ ရှန်ဂရီလာဟိုတယ်မှာ နောက်ဆုံး ညစာကို နီပေါခရီးသွားလုပ်ငန်းမြှင့်တင်ရေးအဖွဲ့က ဦးဆောင်ပြီး တည်ခင်းသည်။ ယခု နီပေါခရီးစဉ်ကို ကမကထပြုပေးခဲ့သည်မှာ နီပေါပရက်စ်ကောင်စီသာမက ခရီးသွားလုပ်ငန်းမြှင့်တင်ရေးလည်းပါသည်။ မိမိတို့နှင့် သီရိလင်္ကာပရက်စ်ကောင်စီတို့ကို ဖိတ်ကြားပြီး သူတို့နိုင်ငံကို လှည့်ပြခြင်းဖြစ်သည်။ တစ်နည်းအားဖြင့် ပရိုမိုးရှင်းလုပ်တာဖြစ်သည်။ နှုတ်ဆက်စကားတွေ အပြန်အလှန်ပြောကြသည်။ ကျေးဇူးတင်ကြောင်း ပြောကြသည်။ ညစာစားပွဲပြီးတော့ ည ၈ နာရီလောက်ပဲ ရှိသေးသည်။ စောနေသေးသဖြင့် အချိန်ရတုန်း ခတ္တမန္ဒူကို ကြည့်ချင်သေးသည်။ ခတ္တမန္ဒူမှာ ညဘက်စည်ကားပြီး ဈေးဝယ်လို့ကောင်းသော “ထမန်း” ဆိုသော အရပ်ရှိသည်။ ထိုနေရာကို သွားချင်သည်ဆိုတော့ စကားပြန် ရာဒေ့ဗ်က စီစဉ်ပေးသည်။ ဆရာထက်မြက်၊ ဆရာဇင်လင်း၊ ဆရာမ သင်းသင်းသာတို့နှင့်အတူ ထမန်းကို ထွက်ခဲ့ကြသည်။ 

ကျဉ်းမြောင်းသော လမ်းများကိုဖြတ်သန်းခဲ့ပြီး နောက် ခတ္တမန္ဒူ၏ စည်ကားသော ထမန်းကို ရောက်ကြသည်။ မီးရောင်တွေလင်းထိန်ပြီး ဈေးဆိုင်တွေပေါသော လမ်းမအတိုင်း လျှောက်ကြည့်ကြသည်။ တိုးတိုးကြိတ်ကြိတ်မဟုတ်သော်လည်း စည်စည်ကားကား ရှိသည်။ လမ်းသွယ်လေးများအားလုံး ဈေးဆိုင်တွေ၊ အထူးသဖြင့် နီပေါအမှတ်တရလက်မှုပစ္စည်းတွေ၊ ချည်ထည်တွေ၊ ပုတီးတွေ၊ တိဗက်ဟန်ဘုရားဆင်းတုများ၊ ပန်းချီကားများ စုံလှသည်။ စားသောက်ဆိုင်တွေ၊ ဘားတွေ၊ ဘီယာဆိုင်တွေကိုလည်း တွေ့ရသည်။ နိုင်ငံခြားသားတွေ အများဆုံးလာရောက်လည်ပတ်ကြသည့် ခတ္တမန္ဒူ၏ ညဈေးလည်းဖြစ်သည်။ 

ထမန်းက ကမ္ဘာလှည့်ခရီးသည်တို့အတွက် နေရာဖြစ်သည်။ ကျဉ်းမြောင်းသော လမ်းသွယ်လေးထဲမှာ ဈေးဆိုင်တွေ ပြွတ်သိပ်နေသည်။ မီးရောင်စုံ ပြိုးပျက် မှောင်တစ်ဝက် လင်းတစ်ဝက် လမ်းကလေးပေါ်မှာ တိဗက်ရိုးရာ ပန်းချီကားတွေ၊ မဟာယာနဟန် ဗုဒ္ဓဆင်းတုတော်တွေ၊ ကြေးရုပ်တွေ၊ ပုတီးတွေ စုံလို့နေသည်။ နီပေါထွက်ချည်ထည်လေးတွေ၊ ခြုံစောင်တွေ ရောင်းသော ဖက်ရှင်ဆိုင်လေးတွေ ရှိသလို မိုဘိုင်းလ်ဖုန်းဆိုင်၊ ငွေလဲဆိုင်တွေလည်း ရှိသည်။ 

ည ၉ နာရီကျော်ပြီမို့ လူနည်းနည်းပါးသွားပြီ။ သည်လမ်းကြားလေးထဲမှာ စားသောက်ဆိုင်တွေ၊ ဘားဆိုင်တွေလည်း တွေ့ရသည်။ နီပေါနိုင်ငံမှာ ဘီယာ၊ အရက် ယမကာ သောက်သုံးမှုရှိသော်လည်း မြန်မာနိုင်ငံလိုတော့ လမ်းမကြီးတွေပေါ်မှာ ဘီယာဆိုင်တွေ မရှိ။ လမ်းကျဉ်းကလေးပေါ် လျှောက်သွားကြရင်း တစ်နေရာမှာ Buddha Bar ဆိုသော ဆိုင်းဘုတ်နှင့် ဘားဆိုင်တစ်ဆိုင်တွေ့တော့ စိတ်ဝင်စားပြီး ရာဒေ့ဗ်ကို ဦးဆောင်စေကာ ဆိုင်ထဲဝင်ခဲ့ကြသည်။ 

ကျဉ်းမြောင်းမှောင်မည်းသော လှေကားလေးအတိုင်း တက်သွားတော့ မီးရောင်မှိန်ဖျော့ အခန်းကျဉ်းတစ်ခုထဲ ရောက်သွားသည်။ ဒီဂျေသံတွေ ဆူညံနေပြီး ဘားကောင်တာပေါ်မှာ အရက်ပုလင်းမျိုးစုံနှင့် ထိုင်နေသူအချို့တွေ့သည်။ ထိုင်ခုံ မရှိ။ နီပေါ ရိုးရာဓလေ့အတိုင်း ကြမ်းပြင်ပေါ်ခင်းထားသော ဆိုဖာအခင်းပေါ် တင်ပျဉ်ခွေ ထိုင်ရသည်။ 

မီးရောင်မှိန်ဖျော့ အခန်းထောင့်တစ်နေရာ မှာတော့ ဗုဒ္ဓဆင်းတုကြီးတစ်ဆူ တွေ့ရသည်။ ဘီယာ ဘားနှင့် ဗုဒ္ဓဆင်းတုက (ထေရဝါဒ ဗုဒ္ဓဘာသာဝင် တစ်ဦးအနေနှင့်) ဘယ်လိုမှ မသင့်လျော်၊ မလိုက်ဘက်ဟု ခံစားရသည်။ နီပေါက ဗုဒ္ဓဘာသာ ကိုးကွယ်မှုရှိသော်လည်း မဟာယာန ဖြစ်သည်။ ထေရဝါဒ မဟုတ်။ ထေရဝါဒကိုးကွယ်သူ အနည်းငယ်နှင့် ရဟန်းအချို့သာရှိပြီး ကွန်မြူနစ် နီပေါအစိုးရကလည်း ဘာသာရေးကို သိပ်အားမပေး။ အဓိက ကိုးကွယ်သည့်ဘာသာမှာ “ဟိန္ဒူဘာသာ” ဖြစ်ပြီး ဟိန္ဒူဘာသာကို နိုင်ငံတော်ဘာသာအဖြစ် သတ်မှတ်ဖို့ ကြိုးပမ်းမှုတွေပင်ရှိသည်။ 

ကံအားလျော်စွာ ဂေါတမဗုဒ္ဓ ပွင့်တော်မူရာ လုမ္ဗိနီမှာ နီပေါနိုင်ငံနယ်နိမိတ်ထဲတွင် တည်ရှိသော်လည်း နီပေါကား ဗုဒ္ဓဘာသာကို အပေါ်ယံဆည်းကပ်မှုသာ ရှိသောနိုင်ငံ ဖြစ်သည်။

ထို့ကြောင့် Buddha Bar စားသောက်ဆိုင်ထဲမှာ ဗုဒ္ဓဆင်းတုတစ်ဆူ အလှထားပြီး စားသောက် အပန်းဖြေနေကြခြင်းမှာ မဆန်းတော့ပါ။ (မြန်မာနိုင်ငံမှာတော့ ထိုဓလေ့မျိုး လက်မခံပါ။ ပြီးခဲ့သည့် သုံး၊ လေးနှစ်က ရန်ကုန်မှာ ဗုဒ္ဓဘားလာဖွင့်သော နိုင်ငံခြားသားတစ်ဦး ဖမ်းဆီးတရားစွဲဆိုခံခဲ့ရဖူးသည်။ 

ဗုဒ္ဓဘားမှာ ဘီယာတစ်ယောက် တစ်ခွက်သောက်ပြီးတော့ ပြန်ထွက်လာကြသည်။ ဘာပဲဖြစ်ဖြစ် ခတ္တမန္ဒူ ထမန်းညဈေးကလေးကတော့ ထူးခြား ဆန်းပြားတာတွေကိုမှ ခုံမင်သည့် ကမ္ဘာလှည့် ခရီးသွားတွေကို ဆွဲဆောင်နေပါသည်။ အားကျမိသည်ကတော့ ခတ္တမန္ဒူလို ဖွံ့ဖြိုးတိုးတက်မှုမရှိသေးသည့် မြို့ကြီးတစ်မြို့မှာပင် ကမ္ဘာလှည့်ခရီးသည်တွေ၏ အိတ်ထောင်ထဲက ငွေတွေကို နှိုက်ယူနိုင်ဖို့၊ ခရီးသွားတွေဆီက နိုင်ငံဝင်ငွေရဖို့ ညပိုင်းအပန်းဖြေစရာနေရာ (nightlife) တစ်ခု ရှိနေခြင်းပင်။

ချစ်ဝင်းမောင် (၁၁ - ၉-၂၀၁၉)