News

POST TYPE

ARTICLE

ကက်ရှ်မီးယားမှာ ဘာတွေဖြစ်နေလဲ
25-Aug-2019


(၁)
ကက်ရှ်မီးယားပြည်နယ်၏ အကြီးဆုံးမြို့တော် ရှရီနာဂါ (Srinagar) မြို့တွင် လုံခြုံရေးတပ်ဖွဲ့များက မြို့တော်၏နေရာအနှံ့ သေနတ်ကို အသင့်ကိုင်ကာစောင့်ကျပ်နေကြသည်။ မြို့နေလူထုက အပြင်ကို မထွက်ရဲကြဘဲ သူတို့၏ ပြတင်းပေါက်များကသာ အပြင်ကိုကြည့်နေကြရသည်။ အချို့မှာ အစာပြတ်လပ်၍ ဆာလောင်မွတ်သိပ်နေကြသည်။

မြို့တော်ပတ်ဝန်းကျင်တစ်ခုလုံး တိတ်ဆိတ်နေပြီး ယမန်နေ့က ဆန္ဒပြခဲ့ကြသော အရှိန်က မသေသေး။ ထိုစဉ်က မြို့လူထုနှင့် အိန္ဒိယစစ်တပ်တို့ ထိပ်တိုက်တွေ့ဆုံခဲ့ကြရသည်။

ဈေးဆိုင်များကိုလည်း ပိတ်ထားရပြီး ပိုက်ဆံထုတ်သော  (ATM-Automated Teller Machine) စက်များမှာလည်း ပိုက်ဆံမရှိတော့။ အင်တာနက်၊ မိုဘိုင်းလ်ဖုန်း၊ တယ်လီဖုန်းအားလုံးမှာ ပြတ်တောက်နေပြီး သန်းပေါင်းများစွာသော လူများမှာ ပြင်ပကမ္ဘာနှင့် အဆက်အသွယ်မရှိ ဖြစ်နေပါသည်။

(၂)

ပထမဆုံးသတင်းထောက်တစ်ဦး ရောက်ရှိသွားရာမှ ရှုပ်ထွေးပြီး ကြောက်ရွံ့နေကြသော ပြည်သူများကို တွေ့ကြရပါသည်။ တစ်ပတ်လုံး တွေ့ကြုံခဲ့ရသော အတွေ့အကြုံများကြောင့် အများစုမှာ စိတ်ညစ်ညူးနေကြပါသည်။ တချို့တလေ အပြင်ကို ထွက်လာကြကာ အိန္ဒိယစစ်သားများကိုတောင်းပန်၍ သူတို့အတွက် လိုအပ်သောပစ္စည်းများကို ဝယ်ကြခြမ်းကြရပါသည်။ အကာအကွယ်ရရန် ချထားသော သဲအိတ်များ၊ ကျိုးပဲ့ပျက်စီးနေသော ကားများအကြားမှ သွားကြရပါသည်။ အချို့မှာ အိန္ဒိယစစ်သားများ၏ ရိုက်နှက်နှိပ်စက်ခြင်းကို ခံကြရပါသည်။

အိန္ဒိယအစိုးရက ကက်ရှ်မီးယား၏ လွတ်လပ်သော အခြေအနေ (Status) ကို ပယ်ဖျက်လိုက်ပါသည်။ ၎င်း၏ရန်သူ ပါကစ္စတန်နိုင်ငံကို အတိုက်အခံပြုကာ ပြုလုပ်လိုက်ခြင်းဖြစ်ပါသည်။ ဤကိစ္စကို ပါကစ္စတန်က ကြိုက်စရာအကြောင်းမရှိပါ။ အိန္ဒိယအစိုးရ၏လုပ်ရပ်ကြောင့် နယ်မြေတစ်လျှောက် ဆွဲလှုပ်လိုက်သလိုဖြစ်နေပါသည်။ ပါကစ္စတန်ကလည်း ကက်ရှ်မီးယား၏ဒေသအချို့ကို ပိုင်ဆိုင်နေသေးရာ အခြေအနေမှာ တင်းမာနေပါသည်။

သောကြာနေ့ (ဩဂုတ်လ ၉ ရက်နေ့) ကရှရီနာဂါမြို့မှထောင်ပေါင်း များစွာသော လူအုပ်သည် ကက်ရှ်မီးယားနိုင်ငံတော်အလံကိုဝှေ့ယမ်းကာ လွတ်လပ်ရေးကြွေးကြော်သံများကို ကြွေးကြော်ခဲ့ကြသည်။ အိန္ဒိယစစ်တပ်က လူအုပ်တွင်းသို့ သေနတ်နှင့်ပစ်ဖောက်ကာ လူစုခွဲခဲ့ပါသည်။

အိန္ဒိယရဲတပ်ဖွဲ့က ဂျမူးနှင့်ကက်ရှ်မီးယား လူငယ်ကွန်ရက်မှ ခေါင်းဆောင်များကို စနေနေ့က ဖမ်းဆီးထိန်းသိမ်းခဲ့ပါသည်။ ကြီးမားသော လူအုပ်ကြီးမှာ ပစ်ခတ်မှုကြောင့် အံ့အားသင့်ပြီး လူစုကွဲသွားကြပါသည်။ လူ ၈ ဦးမှာ ထိခိုက်ဒဏ်ရာရပြီး ဆေးရုံရောက် ဆေးကုသမှုခံယူနေကြသည်။ လူအုပ်မှာ အဆက်မပြတ်ပစ်ခတ်နေသော အော်တိုမက်တစ်သေနတ်သံ များကို ကြားခဲ့ကြရပါသည်။

လူဦးရေရှစ်သန်းခန့်ရှိသော ကက်ရှ်မီးယားပြည်နယ်ကို လွတ်လပ်သော  (Autonomous Region) အဖြစ် သတ်မှတ်ထားသောနယ်ဖြစ်သည်။ ဟိန္ဒူလူမျိုးရေးဝါဒ ပြင်းပြနေသော အိန္ဒိယအစိုးရ ဝန်ကြီးချုပ်မိုဒီက မွတ်စလင်အများစု နေထိုင်သော ဤဒေသကို နှစ်ပေါင်းများစွာကြာအောင် ပြင်ဆင်လေ့လာပြီးမှ လုပ်ဆောင်ခဲ့ခြင်းဖြစ်ပါသည်။ အိန္ဒိယတွင် ဟိန္ဒူ လူမျိုးများက အများစုဖြစ်ပြီး ကြီးစိုးနေသည်။ ကက်ရှ်မီးယားတွင် မွတ်စလင်အများစုနေထိုင်ပြီး အကြမ်းဖက်သမားများကလည်း ခွဲထွက် ရေးကို စကားပြောနေကြရာ ဤပြဿနာသည် မနေ့တစ်နေ့ကမှ ဖြစ်ခဲ့သောပြဿနာတော့မဟုတ်ပေ။ လွန်ခဲ့သောအနှစ် ၃၀ ကာလပတ်လုံး တောတောင်ထူထပ်သော ကက်ရှ်မီးယားတောင်ကြားသည် အိန္ဒိယအုပ်ချုပ်သည့်အပိုင်းတွင် ခွဲထွက်ရေးသမားများနှင့် ပြည့်နှက်နေခဲ့ပါသည်။ ၁၉၉၀ ခုနှစ်များတွင် ပါကစ္စတန်က အစ္စလာမ် (Jihadis) များကို လွှတ်ပေးပြီး ပြဿနာကို အစဖော်ခဲ့ပါသည်။

ကက်ရှ်မီးယားတွင်နေထိုင်သူတို့အဖို့မှာမှု အိန္ဒိယသည် နိုင်ငံရပ်ခြားမှ လွှမ်းမိုးသူဖြစ်သည်။ ၁၉၄၇ ခုနှစ်မှစ၍ နှစ်ပေါင်းတာရှည်အပြောင်းအလဲ လုပ်ခဲ့သမျှသည် သူတို့၏ ကိုယ်ပိုင်အုပ်ချုပ်ရေးကို ဝေးသထက်ဝေးအောင် ပြုလုပ်ခြင်းများသာဖြစ်သည်။ အင်္ဂလိပ်ထံမှ လွတ်လပ်ရေးရခဲ့စဉ်က ကက်ရှ်မီးယားကို အုပ်ချုပ်သော မဟာရာဂျာကြီးများသည် အိန္ဒိယနိုင်ငံနှင့် ပူးပေါင်းရန် သဘောတူညီခဲ့ကြပါသည်။ အိန္ဒိယနှင့် ပူးပေါင်းလျှင် တစ်ချိန်တွင် ကိုယ်ပိုင်အုပ်ချုပ်ရေး ရရှိလိမ့်မည်ဟူ၍ဖြစ်သည်။ 

ကက်ရှ်မီးယားသည် အပြောင်းအလဲကို လိုလားနေသည်။ ပြောင်းဖို့လည်း လိုအပ်နေသည်။ လူထောင်ပေါင်း မြောက်မြားစွာ သေဆုံးခဲ့ကြပြီး စီးပွားရေးမှာလည်း ချွတ်ခြုံကျလျက်ရှိသည်။

၁၅ ရက်နေ့က ပြောကြားသော မိန့်ခွန်းတစ်ခုတွင် မစ္စတာမိုဒီက ကက်ရှ်မီးယား၏အခြေအနေအသစ်သည် နိုင်ငံကို ပိုမို အေးချမ်းပြီး ပိုမိုချမ်းသာ ကြွယ်ဝစေပါလိမ့်မည်ဟု ပြောသည်။ သူ့မိန့်ခွန်းကို ကက်ရှ်မီးယားနိုင်ငံသားများ ကြည့်ရှုကြရမည်မဟုတ်ပေ။ အဘယ့်ကြောင့် ဆိုသော် တယ်လီဗေးရှင်းအပါအဝင် ဆက်သွယ်ရေးကိရိယာအားလုံး အဖြတ်အတောက်ခံထားရသောကြောင့် ဖြစ်ပါသည်။

သတင်းထောက်က အင်တာဗျူးရနိုင်သမျှ လူ ၅၀ ခန့်ကမူ အိန္ဒိယ၏ အပြုအမူသည် ပို၍နိုင်ငံခြားဆန်ပြီး အုံကြွဆူပူရန် အထောက်အကူ ဖြစ်စေမည်ဟုဆိုပါသည်။ ရပ်ကွက်အတွင်းမှ လူငယ်များမှာ အိမ်များမှ ထွက်ခွာရန်ပြင်ဆင်နေကြပြီး သူတို့သည် သူပုန်တို့နှင့် ပူးပေါင်းကြမည် ဖြစ်သည်။ အိန္ဒိယဖွဲ့စည်းပုံ ဥပဒေတွင် အာတီကယ် (Article ၃၇၀) မှာ ကက်ရှ်မီးယားလွတ်လပ်ရေးနှင့်ဆိုင်သည်။ ထိုအာတီကယ်က ကက်ရှ်မီးယားသည် အိန္ဒိယနှင့် ပူးပေါင်းသည်မှန်စေ၊ လွတ်လပ်မှုက ရရှိပြီးဖြစ်သည်။

အိန္ဒိယအစိုးရအရာရှိများကမူ ဈေးရောင်းချနေသူများ လူသွားလူလာရှုပ်ထွေးနေသောလူများကိုကြည့်ကာ ကက်ရှ်မီးယားတွင် မူလ အခြေအနေသို့ ပြန်လည်ရောက်ရှိနေပြီဟု ပြောနေကြသည်။ သို့သော် ကက်ရှ်မီးယားရှိ လုံခြုံရေးတပ်များကမှု ဆူပူအုံကြွမှုသည် ဟိုတစ်စ သည်တစ်စ ရှိနေတုန်းပင်ဖြစ်သည်။ လူတစ်ဒါဇင် နှစ်ဒါဇင်မျှသော လူထုသည် မိန်းမသားများအပါအဝင် လုံခြုံရေးတပ်သားများကို ကျောက်ခဲများ၊ ရရှိနိုင်သောပစ္စည်းများနှင့် ပစ်ပေါက်နေကြဆဲပင်ဖြစ်သည်ဟု ဆိုသည်။ 

“လူတွေဟာ သိပ်ကို စိတ်တိုနေကြပါတယ်၊ ကြောက်လည်း မကြောက်ဘူး၊ အလျှော့လည်းပေးမယ့်သဘောမရှိဘူး”ဟု ပြောနေကြ သည်။

အိန္ဒိယစစ်တပ်နှင့် ကက်ရှ်မီးယားရှိ လုံခြုံရေး တပ်ဖွဲ့ဝင်များ ပူးပေါင်း၍ နေရာအနှံ့ ချထားသည်။ အချို့နေရာများဆိုလျှင် အိမ်တိုင်းလိုလို အိမ်အပေါက်ဝများတွင် လုံခြုံရေးတပ်သားများကို တွေ့နိုင်ကြပါသည်။ 

အစိုးရရုံးတွင် လူ ၄၀၀ ခန့်က တယ်လီဖုန်းတစ်လုံးကို တန်းစီပြီး ပြင်ပရှိဆွေမျိုးများရှိရာသို့ အဆက်အသွယ်ရရှိစေရန် စောင့်ဆိုင်းနေ ကြရသည်။ ကျောင်းများကို ပိတ်ထားရပြီး၊ ဥယျာဉ်များတွင်လူမရှိ။ အစာရေစာကလည်း ပြတ်လပ်နေပြီး ဆေးရုံဆေးခန်းသွားရန် ကာဖြူး (Pass) သွားခွင့်လက်မှတ်များ လိုအပ်ပါသည်။ ကက်ရှ်မီးယားပြည်သူတို့က ဤကဲ့သို့ကျပ်တည်းမှုမျိုးကို ယခင်က ကြုံတွေ့ခဲ့ကြဖူးသော်လည်း ယခုတစ်ကြိမ်ကတော့ အဆိုးဝါးဆုံးဖြစ်သည်ဟု ဆိုသည်။

၁၉၉၀ ပြည့်နှစ်ကစပြီး သူပုန်ထခဲ့ကြသော ကက်ရှ်မီးယားရာပေါင်း အနည်းငယ်မျှသောသူပုန်များသည် ကက်ရှ်မီးယား တောင်ကြားတွင် ရှိနေကြသည်။ အိန္ဒိယစစ်တပ်နှင့် နှိုင်းယှဉ်သော် အင်အားက သေးလွန်းသည်။ တစ်ထောင်နှင့် တစ်ယောက်မျှ နှိုင်းယှဉ်နေရသည်။ သို့သော်လည်း အိန္ဒိယစစ်တပ်က အမြစ်ပြတ်သွားအောင် မရှင်းနိုင်ပါ။

ကက်ရှ်မီးယား လွတ်လပ်ခွင့်ကို ရုပ်သိမ်းခြင်းနှင့်ပတ်သက်၍ အစိုးရသည် ကက်ရှ်မီးယားခေါင်းဆောင် တစ်ဦးတစ်ယောက်ကိုမျှ ဆွေးနွေးခဲ့ခြင်းမရှိမှုအပေါ် ဥပဒေနှင့်မညီဘူးဟု အိန္ဒိယဥပဒေဆိုင်ရာ ကျွမ်းကျင်သူများကဆိုသည်။ လွတ်လပ်ရေးရစဉ်က သဘောတူညီခဲ့ကြ သည်မှာ မည်သည့်ပြောင်းလဲမှုပင်လုပ်လုပ် ကက်ရှ်မီးယားခေါင်းဆောင်များနှင့် ဆွေးနွေးတိုင်ပင်ရမည်ဟု ဆိုထားသည်။

(၃)

ကက်ရှ်မီးယားနည်းတူ အာသံပြည်နယ်တွင်လည်း အိန္ဒိယနိုင်ငံသား ဟုတ်၊ မဟုတ် စိစစ်နေသည်။ လူဦးရေ ၃၃ သန်းနေထိုင်သော ပြည်နယ်တွင် အစိုးရ၏ ဦးတည်ချက်မှာ မွတ်စလင်များဖြစ်သည်။ မွတ်စလင်လေးသန်းခန့် မှာအစိုးရက နိုင်ငံသားမဟုတ်ကြောင်း ကြေညာခံရရန် ရှိနေသည်။ ထိန်းသိမ်းရေးဌာနများ အကျဉ်းထောင်များကိုပြင်ဆင်ပြီး စိစစ်နေသည်။ ၁၉၇၀ ပြည့်နှစ်ဆီက ရသမျှ စာရွက်စာတမ်းများကို ကိုင်ကာ လူအများက အိန္ဒိယနိုင်ငံသားဖြစ်ကြောင်း သက်သေပြနေရသည်။

အစိုးရက ပါလီမန်တွင် ခရစ်ယာန်များ၊ ဗုဒ္ဓဘာသာဝင်များ၊ ဟိန္ဒူများကို ကင်းလွတ်ခွင့်ပြုသည့်ဥပဒေကို တင်သွင်းနေသည်။

အတိုက်အခံတို့ကမူ ကက်ရှ်မီးယားနှင့် အာသံနယ်တို့မှ အဖြစ်အပျက်များကို Exhibit A နှင့် Exhibit B ဟူ၍ ပြောဆိုနေကြပြီး ဟိန္ဒူ လူမျိူးကြီးဝါဒသည် ခေတ်နှင့်မလျှော်ညီတော့ကြောင်း ပြောဆိုနေကြသည်။ 

Ref: Adragnet to find who is and who isn't Indian, by J. Gettleman, New York Times August 19 2019

F-04