News

POST TYPE

ARTICLE

၂၀၁၈ အောင်မြင်သော လူငယ်စွန့်ဦးလုပ်ငန်းရှင်လေးများ
08-Sep-2018


ဒဲရီးရပ်စ် ကွားစ် (Derrius Quarles)

သူ့ကို မွေးစားမိဘတွေက ကြီးပြင်းအောင် မွေးခဲ့သည်။ ထို့ကြောင့် အစစအရာရာ မျက်နှာငယ်ရသည်။ သူနားထဲတွင် အမြဲကြားနေရသည့်စကားမှာ “NO” ဆိုသည့် စကားလုံးသာ ဖြစ်သည်။ ဘာဖြစ်ဖြစ်မရဘူး၊ မရှိဘူး၊ မပေးဘူး၊ မသိဘူးဆိုသည့် ငြင်းပယ်ခြင်းများနှင့် သူကြီးပြင်းခဲ့ရသည်။ 

ကွားစ်သည် ယခုတော့ အသက် ၂၇ နှစ် ရှိပြီဖြစ်သည်။ သူတို့ဆီတွင် အသားအရောင်ခွဲခြားမှုတွေ ရှိနေသောကြောင့် သူ့အပေါ်ဆက်ဆံမှုများအပေါ် ခါးသီးခဲ့ရသော်လည်း သူကြိုးစားသည်။ သူက အတ္တလန္တာရှိ Morehouse တွင် လူမှုဗေဒဘာသာရပ်ကို တက်ရောက်သင်ကြားနိုင်ခဲ့သည်။

၂၀၁၃ ခုနှစ်တွင် သူဘွဲ့ရသည်။ သူငယ်ချင်းများဖြစ်သည့် ရာ့စ်အာဆန်နှင့် ဘရိန်းဝီလျှံတို့ ပူးပေါင်းပြီး သူတို့ လုပ်ငန်းတစ်ခု ထူထောင်ရန် စဉ်းစားကြသည်။ ၂၀၁၆ ခုနှစ်တွင် သုံးယောက်ပေါင်း ဒေါ်လာ ၅၀၀ ဖြင့် လုပ်ငန်းတစ်ခုကို စတင်သည်။ သူတို့ လုပ်ငန်းနာမည်ကို Breuax Capital ဟု အမည်ပေးသည်။ သူတို့လုပ်ငန်းက အွန်လိုင်းကတစ်ဆင့် ငွေကြေးဝန်ဆောင်မှုပေးခြင်းဖြစ်သည်။ သူတို့က ထိုသို့ ဝန်ဆောင်မှုပေးနိုင်ရန် မိုဘိုင်းလ်ဆော့ဖ်ဝဲတစ်ခုကိုလည်း တီထွင်ထားသည်။

Breuax Capital သည် ဘဏ်တစ်ခုနှင့် ချိတ်ဆက်ထားသည်။ သူတို့လုပ်ငန်းက လူငယ်တွေကို လူငယ်အချင်းချင်း ကူညီစောင့်ရှောက်ရန်ဖြစ်သည်။ ငယ်စဉ်ကတည်းက ငွေသွားချေးတိုင်း အငြင်းခံရလွန်းသဖြင့် သူတို့လို လူငယ်အချင်းချင်းအား ကိုယ်ချင်းစာပြီး ငွေကြေးအခက်အခဲဖြစ်နေလျှင် အွန်လိုင်းက လှမ်းပြီး အကူအညီတောင်းနိုင်ရန် စီစဉ်ပေးသည်။ 

သူတို့က ငွေချေးသည်၊ အတိုးယူသည်၊ ငွေလာစုလည်း လက်ခံသည်။ သူတို့ Breuax Capital အဖွဲ့ဝင်တွေကို ငွေချေးသည်ဆိုသဖြင့် သူတို့ထံ အဖွဲ့ဝင်ကြသည်။ အဖွဲ့ဝင်ကြေးကိုလည်း ၉ ဒေါ်လာမှ ၁၉ ဒေါ်လာအထိ ကောက်ခံသည်။ သူတို့လုပ်ငန်းက အောင်မြင်လာသည်။ ယခုဆိုလျှင် ကွားစ်သည် Breuax Capital လုပ်ငန်း၏ CEO အဖြစ် တာဝန်ယူထားရသူတစ်ဦးပင်ဖြစ်လာသည်။ 

ယမန်နှစ်ကအထိ သူတို့ကုမ္ပဏီကို ဝင်ရောက်လာသူပေါင်း ၁၀၀၀ ကျော်ရှိသည်။ သူတို့အဖွဲ့ဝင်တွေအပေါ် အဆင့်အမျိုးမျိုး သတ်မှတ်ထားသည်။ ယုံကြည်ရသည့်အဆင့် အဖွဲ့ဝင်တွေဆိုလျှင် ၃၄၉ ဒေါ်လာမှ ဒေါ်လာ ၅၀၀ အထိ ထည့်ဝင်ကြရသည်။ ထိုသူများအနေနှင့် သူတို့ထံက ငွေကြေးဆိုင်ရာဝန်ဆောင်မှုကို ပိုပြီးရယူပိုင်ခွင့်ရှိသည်။ သူတို့အဖွဲ့ဝင်တွေ နှစ်စဉ် အတ္တလန္တာတွင် ဆုံတွေ့ကြသည်။ ငွေကြေးထည့်ဝင်ထားမှုနှင့် ရင်းနှီးမြှုပ်နှံထားမှုများအတွက် တွေ့ဆုံရှင်းလင်းကြသည်။ 

သူတို့အဖွဲ့ဝင်တွေများသောအားဖြင့် တွေ့ဆုံကြသည်မှာ အွန်လိုင်းပေါ်တွင်သာဖြစ်သည်။ ငွေကြေးကိစ္စ စီမံခန့်ခွဲမှုတွေကိုလည်း အွန်လိုင်းပေါ်မှာသာ ပြုလုပ်ကြသည်။ အသိပေးကြသည်။ ငွေတွေကို စုဆောင်းရင်းက Breuax Capital ၏ ဓနအင်အားကလည်း တောင့်တင်းလာသည်။ 

Latino ကောလိပ်မှ ကျောင်းသား၊ ကျောင်းသူများ ထူထောင်ထားသည့် TechGroove အဖွဲ့ကလည်း Breuax Capital နှင့် ပူးပေါင်းပြီး ငွေကြေးရင်းနှီးမြှုပ်နှံမှုများကို လာလုပ်သည်။ သူတို့က ငွေလာစုပြီး လုပ်ငန်းတစ်ခုလုပ်လိုလျှင် အကြောင်းပြရသည်။ ရင်းနှီးမြှုပ်နှံရန် ငွေကိုလိုအပ်လျှင် Breuax Capital က ထုတ်ပေးသည်။ ဤသို့ဖြင့် လုပ်ငန်းတွေ ဆက်လက်လုပ်ကိုင်နိုင်သဖြင့် အကျိုးရှိသည်။ အဖွဲ့ဝင်အများစုဖြစ်သည့် လူမည်း ကျောင်းသားလူငယ်လေးတွေအဖို့ ကျောင်းပြီးသော်လည်း မျက်နှာမငယ်ရစေရန် သူတို့ ကြံဆောင်ပေးနေကြခြင်း ဖြစ်သည်။ 

စေတနာအကျိုးပေးသည်ဟု ဆိုရမည်။ ၂၀၁၇ ခုနှစ်တွင် လုပ်ငန်းစတင်ခဲ့သည်ဆိုသော်လည်း ဒေါ်လာ ၅၀၀ နှင့် စတင်ခဲ့သည့် လုပ်ငန်းက ဒေါ်လာ ၁၈,၀၀၀ အထိ ဖြစ်ထွန်းလာခဲ့သည်။ ယခု ၂၀၁၈ ခုနှစ်ကုန်တွင် ဒေါ်လာ ၁၂၀,၀၀၀ ကျော်ဖြစ်လာမည်ဟု သူတို့ခန့်မှန်းထားသည်။ သူတို့ တီထွင်ထားသည့် မိုဘိုင်းလ်ဆော့ဖ်ဝဲကို အသုံးပြုပြီး လူငယ်တွေ ငွေစု၊ ငွေချေးလုပ်ငန်းများကို လုပ်လာသည်။ ဘဏ်တွေကို ဝင်ပြီး မျက်နှာငယ်ကြရသည့် အဖြစ်တွေကို သူတို့ ရှောင်ရှားနိုင်ကြပြီဖြစ်သည်။ ဘဏ်နှင့်ဆက်သွယ်ပြီး လုပ်ရကိုင်ရအခက်အခဲများထက် လူငယ်တွေက သူတို့နည်း သူတို့ဟန်ဖြင့် အလွယ်ထုတ်ယူသုံးစွဲနိုင်သည့် ငွေကြေးစနစ်များကို ဖန်တီးရာ အောင်မြင်လာခဲ့သည်ဟု ဆိုရမည်။

၂၀၀၉ ခုနှစ်က Mint ဆိုသည့် ကုမ္ပဏီတစ်ခုက ထိုသဘောတရားများ ငွေပေါင်ထားပြီး ငွေချေးသည့်လုပ်ငန်းကို လုပ်ဆောင်ခဲ့ဖူးသည်။ အဖွဲ့ဝင် သန်း ၂၀ ကျော်အထိ ရခဲ့ဖူးသည်။ သို့သော် ကွားစ်က သူတို့ လူမည်းလူငယ်တွေအတွက် သီးခြားအကူအညီတစ်ခုဖြစ်စေရန် လုပ်ငန်းကို ထူထောင်နေခြင်းဖြစ်သည်။ လူမည်းတွေအတွက် နေရာတိုင်းတွင် လုပ်ငန်းကိစ္စ၊ ငွေကြေးကိစ္စအခက်အခဲတွေ ရှိနေသည်။ ထိုအခက်အခဲများကို ဖြေရှင်းနိုင်ရန် သူတို့က သူတို့ရင်ဆိုင်ခံစားခဲ့ရသော ဘဝနှင့်ယှဉ်ပြီး လူမည်းများအတွက် လုပ်ငန်းတစ်ခုအနေနှင့် Breuax Capital ကို ထူထောင်ခဲ့ခြင်းဖြစ်သည်။ 

သူတို့လုပ်ငန်းသည် ကြိုးတန်းပေါ် လျှောက်နေရသလိုဖြစ်သောကြောင့် အရဲမစွန့်ရန် သတိပေးသူတွေက ပေးကြသည်။ ငွေကြေးဆိုင်ရာကိစ္စများတွင် လိမ်လည်မှုများနှင့် ကြုံတွေ့နိုင်သောကြောင့် ဖြစ်သည်။ သို့သော် ကွားစ်က -

“ကျွန်တော်ကတော့ မစိုးရိမ်ဘူး။ တစ်ဦးနဲ့တစ်ဦး လွတ်လပ်ပွင့်လင်းပြီး ထင်သာမြင်သာရှိအောင် ဆက်ဆံလုပ်ကိုင်နိုင်ခြင်းက အကျိုးဖြစ်စေပါတယ်။ ကျွန်တော်နဲ့ ဆက်ဆံတဲ့သူတွေနဲ့ ကျွန်တော့်ကြားမှာ ကြီးမားတဲ့ ကွာဟချက်တွေမရှိခြင်းက ကျွန်တော့်လုပ်ငန်းကို ပိုပြီး အဆင်ပြေစေပါတယ်” ဟု ဆိုသည်။


ဒန်ကလိုင်းနှင့် ပက်ထရစ်တင်းနော့စ် (Dan Klein and Patrick Tannous)

လက်ဖက်ရည် ကြိုက်သူများအတွက် လက်ဖက်ရည်အနံ့နှင့် အရသာက စွဲမက်လောက်စရာဖြစ်မည်။ ကော်ဖီ ကြိုက်သူတွေလည်း ထိုနည်းအတိုင်းပင်။ အနံ့အရသာကို ခံစားတတ်ကြသည်။ အမေရိက ဈေးကွက်ထဲသို့ ထူးဆန်းသည့် လက်ဖက်ခြောက် သံဘူးတွေ ဝင်လာသည်။ အမည်တွေကလည်း “Thin Mint Trim”၊ “Chinese Gunpowder”၊ “Momma's PB&J” အစရှိသည်ဖြင့် ထူးဆန်းစွာ ပေးထားသည်။ ထိုလက်ဖက်ခြောက်သံဘူးတွေကို Tiesta Tea ကုမ္ပဏီက ထုတ်လုပ်ခြင်းဖြစ်ပြီး အောင်မြင်နေသည့် လုပ်ငန်းတစ်ခု ဖြစ်လာသည်။

ထိုလုပ်ငန်းကို တည်ထောင်သူတွေက ဒန်ကိုင်းနှင့် ပက်ထရစ်တင်းနော့စ်ဆိုသည့် လူငယ်လေးနှစ်ဦး ဖြစ်သည်။ ယခုအခါ သူတို့သည် Tiesta Tea ကုမ္ပဏီကို ထူထောင်ထားနိုင်ရုံမက အမေရိက လက်ဖက်ရည်သောက်သုံးမှု ၂၃ ရာခိုင်နှုန်းခန့်အထိ ဈေးကွက်ကို သိမ်းပိုက်ထားနိုင်ပြီဖြစ်သည်။ သူတို့ ကုမ္ပဏီတန်ဖိုးကပင် ဒေါ်လာ ၁၂ ဒသမ ၅ ဘီလီယံခန့် တန်ကြေးတက်သွားသည်။ 

ချီကာဂိုအခြေစိုက် ကုမ္ပဏီတစ်ခုဖြစ်သည့် Tiesta Tea သည် ၂၀၁၀ ပြည့်နှစ်တွင် စတင်ထူထောင်ခဲ့ခြင်းဖြစ်သည်။ သူတို့စတင်ရင်းနှီးလည်ပတ်ခဲ့ရသည်က ဒေါ်လာ ၅ သန်းဟု ဆိုသည်။ ယမန်နှစ်ကအထိ ရောင်းချရမှုမှာ ဒေါ်လာ ၄ သန်းကျော်ဖိုးရှိသည်။ ယခုနှစ်ကုန်တွင် ဒေါ်လာ ၈ သန်းကျော် ရောင်းချရမည်ဟု ခန့်မှန်းထားသည်။

လုပ်ငန်းကို စတင်ထူထောင်သူတို့ ရင်ဆိုင်ကြရသည့် ပြဿနာမှာ အရှိန်နှင့် အချိတ်အဆက်ဖြစ်သည်။ ထိုသဘောတရားများကို သူတို့နိုင်ငံတွင် ကျောင်းနေစဉ်ကတည်းက အစပျိုးအရှိန်ယူခဲ့ကြသည်။ သူတို့နှစ်ဦးစလုံး ချီကာဂိုအလယ်တန်း ကျောင်းတွင် တက်ခဲ့ကြသည်။ ကောလိပ်တက်တော့လည်း တစ်ကျောင်းတည်းဖြစ်သည်။ သူတို့ ဥရောပဘက်ထွက်ပြီး ပညာတွေဆက်သင်သည်။ ဥရောပတွင် သူတို့ ပညာသင်နေစဉ် ပါရာဂွေးနိုင်ငံကို ရောက်ခဲ့သည်။ ထိုနိုင်ငံတွင် လက်ဖက်ရည်ကို ထုပ်ပိုးရောင်းချခြင်းအပေါ် သူတို့စိတ်ဝင်စားခဲ့ကြသည်။

“ကျွန်တော်တို့နှစ်ယောက်စလုံးက လက်ဖက်ရည်သမားတွေ။ တစ်နေ့တော့ လက်ဖက်ရည်ဘူးကို သောက်မိတယ်။ ကြိုက်သွားတယ်။ အားလုံး အပြင်က လက်ဖက်ရည်တွေနဲ့ ထပ်တူပဲ”

သူတို့ ဇာတိမြေကို ပြန်ရောက်လာသည့်အခါ လက်ဖက်ခြောက်ကို အခြောက်ခံနည်းများကို ထပ်မံ လေ့လာသည်။ စနေနေ့တိုင်း မနက် ၁ နာရီခွဲတွင် အိပ်ရာကထပြီး သူတို့ကိုယ်တိုင် ဖျော်ထားသည့် လက်ဖက်ရည်ကို လယ်သမားများဈေးသို့ သွားရောင်းကြည့်သည်။ 

၂၀၁၆ ခုနှစ်တွင် သူတို့လုပ်ငန်းလေးကို စတင်လိုက်ရာ အောင်မြင်သွားပြီး ယခုအခါ အမေရိက စတိုးဆိုင်ကြီး ပေါင်း ၆၅၀၀ တွင် သူတို့လက်ဖက်ခြောက်ဘူးတွေကို တင်ရောင်းနေကြသည့် အနေအထားသို့ရောက်လာပြီဖြစ်သည်။

Amazon အွန်လိုင်းအရောင်းတွင် သူတို့၏ စံပယ်နံ့သင်းသည့် တရုတ်လက်ဖက်ခြောက်သည် ဂန္ထဝင်လက်ဖက်ခြောက်ဖြစ်သည်။ တစ်အောင်စပါ သံဘူးတစ်ဘူးလျှင် ၂ ဒသမ ၄၄ ဒေါ်လာပေး သောက်ရသည်။ သူတို့ ထုတ်ကုန်တွေကို အရောင်းစတိုးဆိုင်ကြီးတွေသို့ ရောက်အောင်လုပ်ဆောင်ရသည့် အလုပ်မှာ အခက်ခဲဆုံးဖြစ်သည်။ ပထမဆုံး ထုတ်လုပ်ကတည်းက ဆိုင်များတွင် စားသုံးသူမရှိဆိုပါက တပ်လန်သွားတတ်သည်။ ပထမဆုံး တင်လိုက်ချိန်ကတည်းက ပေါက်သွားလျှင် နောက်ပိုင်း ထုတ်လုပ်အားက လိုက်လာမှ ဆက်ပြီး လည်ပတ်နိုင်မည်ဖြစ်သည်။

လူတွေက လက်ဖက်ခြောက်နှင့် ရေနွေးကြမ်းလို သောက်သည်ဆိုသော်လည်း တစ်ခါသုံး အိတ်လေးများနှင့် ရေနွေးပူပူထဲစိမ်ပြီး သောက်ကြသည်က များသည်။ သို့သော် Tiesta Tea က ထုတ်သည့် လက်ဖက်ခြောက်တွေက ရနံ့အမျိုးမျိုးနှင့် စားသုံးသူကို ထိန်းထားနိုင်စွမ်းရှိသည်။ 

ထို့ပြင် Tiesta Tea က စိတ်ကို အပန်းပြေစေသည့် လက်ဖက်ခြောက် Relaxer နှင့် ပိန်စေသည့် Slenderrizer ဆိုသည့် လက်ဖက်ခြောက်များကိုလည်း တီထွင်ထုတ်သည်။ အနံ့အရသာ၏ စွဲမက်စရာကောင်းလောက်အောင် ဆွဲဆောင်မှုက Tiesta Tea လက်ဖက်ခြောက်များကို လူကြိုက် ပိုပြီးများလာစေခဲ့သည်။ 

လူငယ်လေးနှစ်ဦး၏ အောင်မြင်မှုသည် သူတို့၏ ရပ်တည်ချက်နှင့် လုပ်ဆောင်မှုများအပေါ်တွင်လည်း မူတည်နေသည်။ သူတို့နှစ်ယောက်စလုံး အလုပ်လည်း ကြိုးစားသည်။ ရလာသမျှကိုလည်း NGO အဖွဲ့အစည်းတွေကို လှူဒါန်းသည်။ အေးသည့် ဆောင်းကာလများတွင် အိုးမဲ့အိမ်မဲ့များကို လိုက်ပြီး ကူညီစောင့်ရှောက်သော လုပ်ငန်းများကို လုပ်ဆောင်နေသည့် အဖွဲ့အစည်းတွေကိုလည်း သူတို့က ထောက်ပံ့ကူညီပေးနေသဖြင့် နာမည်ရလာသည်။

ထို့ပြင် နိုင်ဂျီးရီးယားနိုင်ငံ ကာနိုမြို့အနီးရှိ ကျေးရွာတစ်ရွာတွင် ရေတွင်းတစ်တွင်းသွားလှူသည်။ သူတို့ လှူဒါန်းနေခြင်းနှင့် ပတ်သက်ပြီး - 

“ကျွန်တော်တို့ Tiesta Tea ကုမ္ပဏီက တစ်ကိုယ်တည်း အပျိုကြီး၊ လူပျိုကြီးတွေကို ၂၀၁၇ ခုနှစ်က စပြီးတော့ အပိုဆုကြေးတွေပေးတယ်။ ကျွန်တော်တို့ကလွဲပြီးတော့ပေါ့” ဟု သူတို့က ဆိုသည်။ 

သူတို့သူငယ်ချင်းနှစ်ယောက် တီထွင်မှုလည်းလုပ်၊ ဈေးကွက်လည်းဖောက်၊ လှူဒါန်းပြီး ကောင်းကျိုးလုပ်နေသည်မှာ ယခုဆိုလျှင် ဝန်ထမ်း ၁၇ ဦးအထိ ခန့်ထားနိုင်ပြီး ယခုနှစ် ဝင်ငွေမှာ ဒေါ်လာ ၅ သန်းခန့်အထိ ရှိလာလိမ့်မည်ဟု ခန့်မှန်းထားသည်။

E-01

(Ref : Fortune)