News

POST TYPE

ARTICLE

ဖေ့စ်ဘွတ်ခ် အရေးနိမ့်နေသော အမုန်းစကားတိုက်ပွဲ
21-Aug-2018



မြန်မာနိုင်ငံတွင် ဖေ့စ်ဘွတ်ခ်လူမှုကွန်ရက်ပေါ် ပျံ့နှံ့နေသော အမုန်းစကားများ ထိန်းချုပ်ရေးတွင် ဖေ့စ်ဘွတ်ခ်ကုမ္ပဏီကိုယ်တိုင် ရုန်းကန်နေရပြီး နိုင်ငံတွင် အများပြည်သူအပေါ် လူမှုကွန်ရက်၏ ဩဇာလွှမ်းမိုးမှု အတိုင်းအတာကိုပါ ထည့်တွက်လျှင် အထူးတလည် စိုးရိမ်စရာကောင်းနေပေသည်။

ပြီးခဲ့သော ဩဂုတ်လက ရခိုင်ပြည်နယ်တွင်း မငြိမ်သက်မှုများ ဖြစ်ပေါ်ချိန်၌ လူမှုကွန်ရက်ပေါ်တွင် ဘင်္ဂါလီမုန်းတီးရေး အမုန်းစကားများ ပျံ့နှံ့မှုက တင်းမာမှုကို မီးထိုးပေးခဲ့ရာ အမေရိကန်နည်းပညာ ကုမ္ပဏီကြီး ဖေ့စ်ဘွတ်ခ်သည် ယင်းသို့သော ပို့စ်များကို စောင့်ကြည့်ပြီး ပိတ်ပင်ရေးအားထုတ်မှုများ လုပ်ဆောင်ခဲ့သည်။

“၂၀၁၈ ဒုတိယသုံးလပတ်မှာ ကျွန်တော်တို့ အနေနဲ့ မြန်မာနိုင်ငံမှာ အမုန်းစကားပါ အကြောင်းအရာ ၅၂ ရာခိုင်နှုန်းကို တင်ကြိုဖော်ထုတ်နိုင်ခဲ့ပါတယ်” ဟု ဖေ့စ်ဘွတ်ခ်ကုမ္ပဏီက ထုတ်ပြန်ခဲ့ပြီး ၂၀၁၇ နောက်ဆုံးသုံးလပတ်တွင် ၁၃ ရာခိုင်နှုန်းသာ ဖော်ထုတ်နိုင်ခဲ့ခြင်းနှင့်ယှဉ်လျှင် သိသိသာသာ တိုးတက်လာခြင်းဖြစ်သည်။

သို့သော်လည်း လူမှုကွန်ရက်ပေါ်မှ အမုန်းစကားများက လျော့ကျမသွားခဲ့။ အမျိုးသားရေး အစွန်းရောက်ဖေ့စ်ဘွတ်ခ်ပေ့ခ်ျများတွင် မီးလောင်ရာလေပင့်ပေးနိုင်သော ပို့စ်အများအပြားရှိနေဆဲဖြစ်သည်ဟု Nikkei Aisan Review တွင် ဖော်ပြထားသည်။

“မြန်မာနိုင်ငံမှ လူမျိုးရေးအကြမ်းဖက်မှုများမှာ ကြောက်မက်ဖွယ်ဖြစ်ပြီး ဖေ့စ်ဘွတ်ခ်ပေါ်မှ သတင်းမှားနှင့် အမုန်းစကားများ ဟန့်တားရေးတွင် မိမိတို့ဘက်က နှေးကွေးလွန်းခဲ့သည်” ဟု ပြီးခဲ့သည့် ဗုဒ္ဓဟူးနေ့က ထုတ်ပြန်သော ဖေ့စ်ဘွတ်ခ်၏ ကြေညာချက်တွင် ဖော်ပြထားသည်။ ဖေ့စ်ဘွတ်ခ်ကို လူအများ အကြောင်းအရာမျိုးစုံ မျှဝေရန် တံခါးဖွင့်ပေး ထားသော စင်မြင့်တစ်ရပ်အဖြစ် ရည်ရွယ်ဖန်တီးထားခြင်းမှာ အကြောင်းပြချက်တစ်ရပ်ဖြစ်သည်။ ဆူပူအုံကြွမှုများသို့မဟုတ် အခြားသူများကို ထိခိုက်စေနိုင်သည့် အမုန်းစကားများက ထိန်းမနိုင်သိမ်းမရဖြစ်နေသည်။ သို့သော်လည်း ဘယ်စာသားက စည်းကျော်ဘောင်ကျော်သည်ဆိုခြင်းကို ဆုံးဖြတ်ရသည်က ခက်ခဲနေသည်။ ပရိုဂရမ်းမင်းဖြင့် ထိုကိစ္စကို ကိုင်တွယ်ဆောင်ရွက်ခြင်းကြောင့် ပိုရှုပ်ထွေးသွားစေသည်။ 

ထို့ပြင် ဘာသာစကား အတားအဆီးက ရှိနေရာ အင်္ဂလိပ်ဘာသာဖြင့် ရေးသားထားခြင်းမဟုတ်သည့် အမုန်းစကားများကို စိစစ်ဖော်ထုတ်ရန်ပို အချိန်ယူရသည်။ ဖေ့စ်ဘွတ်ခ်ကတော့ ပြည်တွင်းဘာသာစကား (မြန်မာစကား) ပြောဆိုသုံးစွဲနိုင်သူများ ပိုမိုခန့်ထားသွားမည်ဖြစ်ပြီး ပြင်ပအဖွဲ့အစည်းများနှင့်ပါ ပူးပေါင်းဆောင်ရွက်သွားမည်ဟု ကြေညာထားသည်။ 

အသိဉာဏ်တုနည်းပညာသည် ပြဿနာဖြစ်စေနိုင်သော ပို့စ်များကို တဖြည်းဖြည်းနှင့် အမိဖမ်းနိုင်သွားမည်ဟု ကုမ္ပဏီက ခန့်မှန်းထားသည်။ သို့သော်လည်း ခိုင်မာအားကောင်းသော အစီအမံများ ချမှတ်ထားသည်ကို ယခုထိမတွေ့ရသေး။

မိုဘိုင်းလ်ဖုန်းများသည် ဈေးကွက်၏ ၉၀ ရာခိုင်နှုန်းအထိ ပျံ့နှံ့ဝင်ရောက်နိုင်ပြီး မီဒီယာလုပ်ငန်း နယ်ပယ်ဖွံ့ဖြိုးမှုအားနည်းသော မြန်မာနိုင်ငံတွင် လူအများစုအတွက် သတင်းအချက်အလက်ရင်းမြစ်မှာ ဖေ့စ်ဘွတ်ခ်ပင် ဖြစ်နေသည်။

စီအီးအိုမာ့ခ်ဇက်ကာဘာ့ဂ်ကတော့ ဖေ့စ်ဘွတ်ခ်သည် နည်းပညာစီးပွားရေးလုပ်ငန်းသာဖြစ်ပြီး မီဒီယာတစ်ခုမဟုတ်ဆိုသော ရပ်တည်ချက်ကို ကိုင်စွဲထားသည်။ သို့သော်လည်း ဖေ့စ်ဘွတ်ခ်သည် လူအများ၏ အပြုအမူအပေါ် ကြီးစွာသော ဩဇာ လွှမ်းမိုးမှုရှိနေခြင်းမှာ ငြင်းမရနိုင်။

ဖေ့စ်ဘွတ်ခ်ပေါ်မှာ အမုန်းစကားများကြောင့် သီရိလင်္ကာနှင့် အိန္ဒိယတွင်လည်း ပဋိပက္ခများ ဖြစ်ပွားခဲ့သည်ဟု သုံးသပ်မှုများရှိနေပြီး ထိုနိုင်ငံများတွင်လည်း မြန်မာနိုင်ငံနည်းတူ ချဉ်းကပ်ပုံဖြင့် ကိုင်တွယ်ရန် စီစဉ်ထားသည်။

ဖေ့စ်ဘွတ်ခ်အနေနှင့် ဖွံ့ဖြိုးဆဲ အာရှတိုက်အပါအဝင် တစ်ကမ္ဘာလုံးဖြန့်ကြက်ရောက်ရှိမှုနှင့် လျော်ညီစွာ ပိုမိုတာဝန်ယူမှုရှိစွာ ပြုမူဆောင်ရွက်ရန် ကြိုးစားလာချိန်တွင် နှစ်နှစ်ကျော်ကာလအတွင်း ၎င်း၏ လုပ်ငန်းလည်ပတ်မှု အကျိုးအမြတ်ပမာဏ လျော့ကျမည်ဟုလည်း မျှော်လင့်ထားသည်။

ဇေဝင်းနောင်ဘာသာပြန်သည်