News

POST TYPE

ARTICLE

ဒူတာတေး၏ မူးယစ်စစ်ပွဲရလဒ်များ
28-Jun-2018

ဖလစ်ပိုင်နိုင်ငံတွင် မူးယစ်ဆေးဝါး သံသယရှိသူများကို ဖမ်းဆီးခြင်း၊ နှိမ်နင်းသတ်ဖြတ်ခြင်းတို့အတွက် ဆုကြေးအဖြစ် သတ်မှတ်ပေးသည့် အစီအစဉ်များရှိသည်။ သမ္မတဒူတာတေးတက်လာပြီးနောက် ဖိလစ်ပိုင်နိုင်ငံတွင် မူးယစ်ရာဇာများ၊ သုံးစွဲသူများ၊ ရောင်းဝယ်ဖောက်ကားသူများအားလုံးကို စစ်ကြေညာသည်။ သူ့အမိန့်ကရှင်းသည်၊ သံသယရှိသူအားလုံးကို ပစ်သတ်နိုင်သည်၊ အရေးယူခြင်းမရှိဖြစ်သည်။ ထို့ကြောင့် လက်တည့်စမ်းသူများကြားတွင် အပြစ်မဲ့ပြည်သူ ပေါင်းများစွာလည်းသေဆုံးကြရသည်။ ရဲတွေက ပစ်ခတ်နှိမ်နင်းတိုင်းလည်း သေဆုံးသူများဘက်က အမျိုးမျိုးသော အကြောင်းပြ ခုခံနေမှုများကြောင့် သူတို့သတိထား လုပ်ဆောင်နေကြရကြောင်း ဒူတာတေး၏ မူးယစ်စစ်ပွဲကို ကိုင်တွယ်နေကြသည့် အစိုးရရုံးမှ အရာရှိနှစ်ဦးကဆိုသည်။

ဒူတာတေး အာဏာရလာပြီးချိန်မှ ၂၀၁၇ ခုနှစ် ဇွန်လ ၃၀ ရက်နေ့အထိ မူးယစ်ဆေးကိစ္စနှင့် ပတ်သက်ပြီး သေဆုံးခဲ့ရသူပေါင်း ၉၀၀၀ ခန့်ရှိသွားပြီဖြစ်ကြောင်း အစိုးရက သတင်းထုတ်ပြန်သည်။ ထိုအထဲတွင် သုံးစွဲသူတွေ ရောင်းဝယ်သူတွေလည်းပါသည်။ သေဆုံးသူ သုံးပုံတစ်ပုံခန့်သာ ရဲတပ်ဖွဲ့ဝင်များက ပစ်ခတ်ခြင်းကြောင့် သေဆုံးကြရခြင်းဖြစ်ပြီး မိမိကိုယ်ကိုယ်ခုခံကာကွယ်ရင်း ပစ်ခတ်ခဲ့ခြင်းသာဖြစ်ကြောင်း ရဲတပ်ဖွဲ့က ဆိုသည်။ သို့သော် လူ့အခွင့်အရေး စောင့်ကြည့်ရေးအဖွဲ့များက သေဆုံးသူများ၏ သုံးပုံနှစ်ပုံခန့်မှာ ရဲနောက်ခံ ပေးထားသည့်သူများ၊ မူးယစ်တိုက်ဖျက်ရေး စေတနာ့ဝန်ထမ်းပြည်သူဟန်ဆောင်ထားသည့် ရဲတပ်ဖွဲ့ဝင်များ၏ စီရင်ခြင်းကြောင့် သေဆုံးရခြင်းဖြစ်ကြောင်း ပြောကြားသည်။ သို့သော် ထိုစွပ်စွဲပြောဆိုချက်ကို ရဲတပ်ဖွဲ့က ငြင်းဆိုထားသည်။

ရဲတပ်ဖွဲ့က အငြိမ်းစားယူခဲ့သည့် ထောက်လှမ်းရေးဌာနအရာရှိတစ်ဦးနှင့် ရဲမှူးအဖြစ်ထမ်းဆောင်ခဲ့သူ တစ်ဦးကလည်း သတ်ဖြတ်မှုအားလုံး၏ နောက်ကွယ်တွင် ရဲတပ်ဖွဲ့မှ တာဝန်ရှိသူများ၏ စနစ်တကျကြိုးကိုင်မှုများ ရှိနေကြောင်း ဝန်ခံကြသည်။ ရဲတပ်ဖွဲ့ဝင်များ ကိုယ်တိုင် အရပ်ဝတ်မူးယစ်နှိမ်နင်းသူများအဖြစ် ဟန်ဆောင်ကာ သတ်ဖြတ်ခဲ့ကြခြင်းဖြစ်ကြောင်း ပြောပြသည်။ အခွင့်အရေးနှင့် အာဏာကို အပ်နှင်းလိုက်ချိန်တွင် ဥပဒေကို လက်တစ်လုံးခြားဖြင့် ရှောင်လွှဲကာ သတ်ဖြတ်ခွင့်လိုင်စင်အပေါ် အခွင့်ကောင်းယူသွားခြင်းမှာ စဉ်းစားဆင်ခြင်စရာဖြစ်သည်။

အမည်မဖော်လိုသည့် အငြိမ်းစားထောက်လှမ်းရေး ရဲတပ်ဖွဲ့အရာရှိကြီးက -

“ဒီကိစ္စတွေကို ဖိလစ်ပိုင်နိုင်ငံရဲ့ ရဲတပ်ဖွဲ့ကြီးက လုပ်တာ။ လူသတ်လက်နက်ကိုလည်း မြေအောက်ခြောက်ပေလောက်မှာ မြှုပ်နှံလိုက်တာ” ဟု ဒေါသဖြင့်ပြောပြနေခြင်းဖြစ်သည်။ သူက တရားဥပဒေမဲ့ ပြုလုပ်ကာ လူသတ်နေခြင်းကို ရည်ညွှန်းကာပြောဆို ခြင်းဖြစ်သည်။ လူသတ်မှုများ နောက်ကွယ်တွင် အရပ်ဝတ်ရဲတွေရှိနေသည်ဆိုခြင်းကို သူကရည်ညွှန်း ပြောဆိုနေခြင်းဖြစ်သည်။ သို့သော် ရဲတပ်ဖွဲ့နှင့် အစိုးရဌာန တာဝန်ရှိသူများကလည်း ထိုပြောကြားချက်ကို တုံ့ပြန်ခြင်းမရှိ ငြိမ်နေကြသည်။

အငြိမ်းစား ရဲတပ်ဖွဲ့ထောက်လှမ်းရေးမှူးက သူ့ကိုယ်တွေ့ရေးသားထားချက် ၂၆ မျက်နှာ အစီရင်ခံစာကို ထုတ်ပြန်ခဲ့သည်။ ထိုအစီရင်ခံစာ၏ ခေါင်းစဉ်မှာ “ဖိလစ်ပိုင်နိုင်ငံ၏ နိုင်ငံတော်ကကြီးမှူးသော ဥပဒေမဲ့ သတ်ဖြတ်မှုများ” ဟူ၍ ခေါင်းစဉ်တပ်ထားသည်။ ထိုအစီရင်ခံစာတွင် တရားမဲ့နည်းလမ်းများဖြင့် မည်သို့ စီစဉ်ဆောင်ရွက်ခဲ့ကြောင်းများကို ထုတ်ဖော်ထားသည်။ ထိုအစီရင်ခံစာကို ကက်သလစ်ဘုရားကျောင်းတော်အဖွဲ့ အစည်းကတစ်ဆင့် ထုတ်ပြန်ခဲ့ပြီး လူ့အခွင့်အရေးအဖွဲ့က တစ်ဆင့်ဖြန့်ပေးခဲ့ခြင်းဖြစ်သည်။

ထိုအစီရင်ခံစာတွင် ရဲတပ်ဖွဲ့ဝင်များကို မူးယစ်ဆေးအကြောင်းပြကာ သတ်ဖြတ်ခြင်းမခံလိုပါက ပိုက်ဆံပေးရကြောင်း၊ ခေါင်းဆောင်တစ်ယောက်ကို လာဘ်ထိုးရသည့်ငွေမှာ ပီဆို ၁၀၀၀၀ (ဒေါ်လာ ၂၀၀) ခန့်ဖြစ်ကြောင်း၊ မုဒိမ်းကောင်၊ ခါးပိုက်နှိုက်၊ အလစ်သုတ်သမား၊ ဂိုဏ်းအဖွဲ့ဝင်များ၊ အရက်သမားများနှင့် အခြား ရပ်ကွက်အတွင်းရှိ ပြဿနာကောင်အားလုံးသည် မူးယစ်ဆေးအကြောင်းပြပြီး သေနတ်နှင့် ပစ်သတ်မခံရရေးအတွက် ရဲကို လာဘ်ထိုးနေရကြောင်း ဖော်ပြထားသည်။

အရပ်သားအဖွဲ့များကို သတ်ပိုင်ခွင့်အာဏာပေးထားသည့်အခါတွင် ဒါဗာအိုအသေခံတပ်ကဲ့သို့သော အမည်တွေခံပြီး အဖွဲ့အစည်းတွေပေါ်လာသည်။ မူးယစ်ဆေးနှိမ်နင်းရေးတပ်ဖွဲ့အသွင် ထူထောင်ထားကြသူများက ဒါဗာအိုမြို့တွင် ရာပေါင်းများစွာသော ပြည်သူများကို ပြောင်ပြောင်တင်းတင်း သတ်ဖြတ်မှုများ လုပ်ဆောင်ခဲ့ကြသည်။ ဒါဗာအိုသည် ယခင်က သမ္မတဒူတာတေးကိုယ်တိုင် မြို့တော်ဝန်အဖြစ် ကြမ်းရမ်းစွာ စီမံအုပ်ချုပ်ခဲ့သော မြို့ဖြစ်သည်။ မူးယစ်ဆေးဝါး ပပျောက်နှိမ်နင်းရေးကို ယခုတိုင် ဖိလစ်ပိုင်နိုင်ငံ၏ နေရာတိုင်းတွင် အလေးပေးဆောင်ရွက်နေကြသည် ဆိုစေပြည်သူများကတော့ လက်နက်ကိုင်အရပ်သားတွေကိုလည်း ကြောက်နေကြရသေးသည့်သဘောဖြစ်သည်။ သူတို့ဘဝတွေ၏ လုံခြုံမှုကို မည်သူကမှ အာမမခံနိုင်သေးသည့် အနေအထားတွင်ရောက်နေသည်။

ထိုအစီရင်ခံစာတွင် ဖမ်းမိသူများကို မည်သို့စီရင်ကြောင်း အတိအကျ ဖော်ပြထားခြင်းမရှိပေ။ သူ၏တင်ပြချက်များကလည်း ယခင်ရဲတပ်ဖွဲ့ဝင်ဟောင်း ၁၇ ဦးကို မေးမြန်းပြီး ရေးသားချက်များဖြစ်သည်။ ထိုအထဲတွင် ပါဝင်သည့် ရဲတပ်ဖွဲ့မှူးဟောင်းတစ်ဦးက မူးယစ်ဆေးသံသယရှိသူတစ်ဦးအပေါ် အစိုးရ၏ကိုင်တွယ်ပုံများမှာ စိတ်ပျက်စရာကောင်းလှကြောင်း ဖော်ထုတ်ထားသည်။ သူက “ဘာကြောင့်ထုတ်လုပ် ရောင်းချသူတွေကို မသတ်ကြသလဲ” ဟု မေးခွန်းထုတ်ထားသည်။ “အမှန်တော့ သေနေကြရတာတွေက ဆင်းရဲသားတွေပါဗျာ”ဟုလည်း ဆိုထားသည်။

ထိုအစီရင်ခံစာတွင် ဒူတာတေးသည် ဖိလစ်ပိုင်ကွန်မြူနစ်တွေနှင့် ဆက်စပ်နေကြောင်းလည်း ထုတ်ဖော်ပြောထားသည်။ စစ်တပ်နှင့် ရဲတပ်ဖွဲ့ဝင်များကလည်း ဒူတာတေးကိုယ်တိုင် လက်ဝဲယိမ်း ကွန်မြူနစ်စိတ်ဓာတ်ရှိသူဖြစ်ကြောင်း လက်ခံထားကြသည်။ သူသမ္မတအဖြစ် တာဝန်ယူပြီးကတည်းက ကွန်မြူနစ်သူပုန်များကို ထောင်များအတွင်းက ပြန်လွှတ်ပေးခြင်း၊ ကွန်မြူနစ်များနှင့် အပေးအယူလုပ်ကာ ညှိနှိုင်းဆွေးနွေးမှု လုပ်နေခြင်းများကို ထောက်ပြထားသည်။ ထိုအစီရင်ခံစာတွင် ဒူတာတေး၏ မူးယစ်စစ်ပွဲကို “လူမှုရေးရှင်းလင်းပွဲလုပ်ခြင်း” ဟုလည်း ဆိုထားသည်။ အဘယ်ကြောင့်ဆိုသော် တရုတ်နိုင်ငံတွင် ကွန်မြူနစ်ပါတီအကြီးအကဲ မော်စီတုံးအုပ်ချုပ်စဉ်က အမြစ်ဖြုတ်ရှင်းလင်းပွဲများနှင့် ပုံစံတူနေသောကြောင့် ဖြစ်သည်။ ဒူတာတေးကိုယ်တိုင်ကလည်း မူးယစ်ဆေးစွဲနေသူများကို ရှင်းထုတ်ပစ်ရေးကို ဦးတည်ထားသည်။ မော်စီတုံးကလည်း အမြစ်ဖြုတ်သုတ်သင်ရေးအဖြစ်သာ ဆောင်ရွက်ခဲ့သည်။

လူ့အခွင့်အရေးကော်မရှင်က ထိုအစီရင်ခံစာထဲတွင် ပါသည့်အတိုင်း ဟုတ်မဟုတ်ကို ဆက်လက်စုံစမ်းစစ်ဆေးသင့်ကြောင်း အကြံပြုထားသည်။ ကက်သလစ် ဂိုဏ်းချုပ်ကြီးကလည်း အစီရင်ခံစာကို တာဝန်ရှိသူများ ဖြေရှင်းသင့်ကြောင်း အကြံပြုထားသည်။ လူသတ်မှုတိုင်းကို ကြိုတင်ကြံစည်ထားကာ သတ်ဖြတ်ခြင်းဟုတ်မဟုတ်ကို စစ်ဆေးပေးရန် တောင်းဆိုထားသည်။ ဂိုဏ်းချုပ်ဆရာတော်ကိုယ်တိုင်က အကြမ်းဖက်သမား အာဏာရှင်၏ လုပ်ရပ်အဖြစ် စွပ်စွဲဝေဖန်ထားသည်။ မတရားမှုကို မခံစားနိုင်တာ့သည့် ပြည်သူများက လမ်းပေါ်ထွက်ပြီး ဆန္ဒပြပွဲများကိုပင် လုပ်ဆောင်ခဲ့ကြသည်။

ဒူတာတေး၏ ရဲတပ်ဖွဲ့အကြီးအကဲ ရော်နယ်ဒီလာရိုဆာကလည်း မူးယစ်ဆေးကိစ္စနှင့် ပတ်သက်ပြီး သတ်ဖြတ်မှုများသည် ရပ်ဆိုင်းလာပြီဖြစ်ကြောင်း၊ သတ်ဖြတ်မှုများ အနည်းငယ်ရှိနေသေးသော်လည်း အခြေအနေက တည်ငြိမ်သွားပြီဖြစ်ကြောင်း၊ ရဲတပ်ဖွဲ့အနေနှင့် မူးယစ်စစ်ပွဲအတွင်း လုပ်ဆောင်ခဲ့မှုများကို ပြန်လည်သုံးသပ်လျက်ရှိကြောင်း ယင်းကဆိုသည်။

ယခင်ရဲတပ်ဖွဲ့ဝင်ဟောင်း အာတူရို လာ့စ်ကာနာသည် ဖိလစ်ပိုင်လွှတ်တော်တွင် သူကိုယ်တိုင်ပါဝင်ခဲ့ရသည့် အရပ်သားအသွင် နှိမ်နင်းခဲ့ရမှုကို ထုတ်ဖော်ဝန်ခံခဲ့သည်။ ဒူတာတေးယခင်က မြို့တော်ဝန်လုပ်ခဲ့သည့် ဒါဗာအိုမြို့တွင် ဖွဲ့စည်းထားသော မူးယစ်နှိမ်နင်းရေး အရပ်သားတပ်ဖွဲ့သည် ဒူတာတေးနှင့် တိုက်ရိုက်ဆက်သွယ်မှု ရှိနေကြောင်းပြောကြားသော်လည်း ဒူတာတေးက မိမိအနေနှင့် မြို့တော်ဝန်တစ်ဦးအနေနှင့်လည်းကောင်း၊ သမ္မတတစ်ဦးအနေနှင့်လည်းကောင်း သူတို့အဖွဲ့တွေကို အမိန့်ပေးခြင်း မရှိခဲ့ကြောင်း ထုတ်ဖော်ပြောကြားသည်။

လာ့စ်ကာနာက သူသည် လွန်ခဲ့သော ၁၉၉၀ ပြည့်နှစ်ခန့်ကတည်းက မူးယစ်ဆေးဝါးအတွက် သံသယရှိသူများကိုဖမ်းဆီးထားခြင်းမှ ကယ်ထုတ်ပေးသည့်အတွက် ဒေါ်လာ ၆၀ မှ ၁၀၀ အတွင်းရရှိခဲ့ဖူးကြောင်း ဝန်ခံထားသည်။ ၂၀၀၀ ပြည့်နှစ်ခန့်တွင်လည်း သူသည် ရာဇဝတ်သားများကို ထုတ်ပေးခဲ့သည့်အတွက် အခကြေးငွေများ ယူခဲ့ကြောင်း၊ ထို့နောက် သူတိုင်းပြည်က ထွက်ပြေးခဲ့ကြောင်းဖြောင့်ချက်ပေးခဲ့သည်။

လွန်ခဲ့သည့်နှစ်အတွင်း စစ်ဆင်ရေးကာလတွင် သံသယကြောင့် ပစ်ခတ်သတ်ဖြတ်ခဲ့သူပေါင်း ၂၆၀၀ ခန့်ရှိကြောင်း ရဲတပ်ဖွဲ့က ထုတ်ပြန်ခဲ့သည်။ အချို့သော ပစ်ခတ်မှုများမှာ မူးယစ်ဆေးရောင်းဝယ်နေစဉ် ဖမ်းဆီးခြင်းကို ခုခံကာကွယ်သောကြောင့် ပစ်ခတ်ရခြင်းဖြစ်ကြောင်းလည်း တာဝန်ရှိသူများကပြောကြားသည်။

သို့သော် ရဲတပ်ဖွဲ့မှူးဟောင်း၏ ပြောကြားချက်မှာ မူးယစ်ဆေးရောင်းဝယ်ခြင်းဆိုသည်မှာ ကြိုတင်စီစဉ်ထားသည့် လုပ်ပွဲဖြစ်ပြီး ထိုသို့စီစဉ်ဆောင်ရွက်နေသည့် ရဲတပ်ဖွဲ့မှ တာဝန်ရှိသူများကို အရေးယူသင့်ကြောင်း၊ သူတို့သည် ဖမ်းဆီးအရေးယူမည့်နေရာများတွင် တပ်ဆင်ထားသည့် ကင်မရာများကို ဖြုတ်ထားခြင်းများကပင် ကြိုတင်စီစဉ်ထားမှုများဖြစ်ကြောင်း၊ အရေးယူဖမ်းဆီးမည့် အချိန်တွင် လမ်းမီးတိုင်များကိုပင် ပိတ်ပစ်လိုက်သည်ပင် ရှိခဲ့ကြောင်း ယင်းကဆိုသည်။

ရဲတပ်ဖွဲ့က ပစ်ခတ်ဖမ်းဆီးသည့်အမှု အများစုတွင် အပစ်ခတ်ခံရသူအများစုမှာ လက်နက်ကိုင်ဆောင်ထားသူများ မဟုတ်ကြပေ။ သို့သော် ရဲတပ်ဖွဲ့ဝင်တိုင်းတွင်တော့ ကိုယ့်ကိုယ်ကိုယ်ကာကွယ်ရန် လက်နက်တွေ ကိုယ်စီဖြစ်နေကြသည်။ အချို့သောကိစ္စများတွင် ဖမ်းဆီးရမိသူလက်ထဲ သေနတ်ကိုလာထည့်ပြီး သေနတ်နှင့်အတူ ဖမ်းဆီးမှုများပင်ရှိနေသည်။ လွန်ခဲ့သည့်နှစ်ကလည်း မူးယစ်သံသယရှိသူနှင့် အတန်ငယ်ဝေးသည့်နေရာတွင် သေနတ်ကိုရရှိကြောင်း သက်သေပြကြသည်။ မူးယစ်ဖမ်းဆီးမှုများတွင် အချို့သောနေရာများတွင် လူသစ်တန်းရဲများကို ထုတ်သုံးကြသည်။ သူတို့တွင်အတွေ့အကြုံလည်းမရှိသဖြင့် ရမ်းသမ်းပြီး အမိန့်ကြောင့် လုပ်ခဲ့ရသဖြင့် မှားယွင်းပစ်ခတ်မှုများလည်း ရှိကောင်းရှိနိုင်မည်ဖြစ်သည်။ သူတို့အဖို့ မူးယစ်ဆေး ရောင်းဝယ်ဖောက်ကားနေသူကို ပစ်ခတ်ဖမ်းဆီးရန်မှတစ်ပါး အခြားမရှိဟု သွန်သင်ခြင်းခံထားရသည်ကလည်း မကောင်းသည့်အယူအဆများဖြစ်သည်။

မူးယစ်ဆေးနှင့် ဆက်နွှယ်သူများကို သတင်းပေးလျှင် သို့မဟုတ် ပစ်ခတ်ဖမ်းဆီးလျှင် ဆုကြေးပေးမည်ဟု ထုတ်ပြန်ထားသည်။ ထိုအထဲတွင် လမ်းဘေး၌ သုံးစွဲနေသူများကို ဖမ်းဆီးလျှင်လည်း ဆုကြေးအဖြစ် ပီဆို ၂၀၀၀၀ (ဒေါ်လာ ၄၀၀)၊ မူးယစ်ဆေးသုံးစွဲသည့် အိမ်ကို သတင်းပေးလျှင် ပီဆို ၅၀၀၀၀၊ ဖြန့်ဖြူးရောင်းချသူများကို သတင်းပေးလျှင် ပီဆိုတစ်သန်း၊ မူးယစ်ရာဇာများကို သတင်းပေးလျှင်ပီဆို ငါးသန်းပေးမည်ဖြစ်ကြောင်းလည်း အစိုးရက ဆုကြေးများကို ထုတ်ပြန်ထားပြီးဖြစ်သည်။

ရဲတပ်ဖွဲ့၏ သတ်ဖြတ်နေသည့်ကိစ္စအများစုမှာ ငွေကြောင့်ဖြစ်ကြောင်း ရဲတပ်ဖွဲ့မှူးဟောင်းကပြောကြားသည်။ သူတို့ထံတွင် မူးယစ်ဆေးသံသယဖြင့် စောင့်ကြည့်နေသည့် စာရင်းဝင်များရှိနေကြောင်း၊ ထိုသူများမှသူတို့၏ ငွေတွင်းများဖြစ်နေပြီး သူတို့နှင့် မပူးပေါင်းလျှင် အပျောက်ရှင်းပစ်သည့် စနစ်ကို ကျင့်သုံးနေကြောင်းလည်း သိရသည်။

မူးယစ်စစ်ပွဲကို အစိုးရကအောင်မြင်သည်ဟု ပြောသည်။ ရဲတပ်ဖွဲ့တွင် သုံးစွဲသူများလာရောက် မှတ်ပုံတင်ခိုင်းသည်။ တစ်နည်းအားဖြင့် အားလုံးကို မှတ်တမ်းဝင်စေရန် လုပ်ဆောင်လိုက်ခြင်းဖြစ်သည်။ အစိုးရလုပ်ဆောင်နေပုံက ရှင်းသည်။ မပူးပေါင်းလျှင် အသက်ကို တာဝန်မခံဆိုသည့် သဘောဖြစ်သည်။ ရဲတပ်ဖွဲ့၏ အစီရင်ခံချက်တွင်လည်း ပစ်ခတ်ဖမ်းဆီးမှု၏ ၉၇ ရာခိုင်နှုန်းမှာ ပြန်လည်ခုခံသောကြောင့်ဟုဆိုထားသည်။ သို့သော် မှတ်တမ်းများအရ သတ်ဖြတ်ခံရသူများတွင် အပေါ်အင်္ကျီပင်မပါသူများဖြစ်နေသည်။

ဖိလစ်ပိုင် မူးယစ်စစ်ပွဲကား ပြဿနာပေါင်းများစွာဖြင့် ဆက်လက်ရှင်သန်နေစဲဖြစ်သည်။ သမ္မတ ဒူတာတေး လက်ထက်တွင် အပြစ်မဲ့သူမည်မျှ အသက်ပေးရမည်ကို မခန့်မှန်းနိုင်သလို၊ အပြစ်ရှိသူ မည်မျှလည်း လွတ်မြောက်နေဦးမည်မသိ။ ဆုကြေးငွေထုတ်ထားသော်လည်း နီးရာဓားကို ကြောက်နေရသည်ပြည်သူတို့ ဘဝမှ အမှန်ကို ဖွင့်ဟရဲမည်လား စိုးရိမ်စရာဖြစ်သည်။ ကိုယ်သတင်းသွားပေးရမည့်သူက မည်မျှစိတ်ချယုံကြည်ရမည်နည်းဆိုသည်မှာ ယနေ့ဖိလစ်ပိုင်၏ မူးယစ်စစ်ပွဲအရေးတစ်ခုဖြစ်သည်။

ကျော်ဗလ
(Ref: The Guradian, The Independent, Reuters)