News

POST TYPE

ARTICLE

မြောက်ကိုရီးယားအကြောင်း ကောင်းတာတွေရေးတဲ့ မြန်မာသတင်းစာ
27-Jun-2018 tagged as


မြောက်ကိုရီးယားတွင် လူထုကိုဖိနှိပ်ခြင်းမရှိကြောင်း ယမန်နှစ်က အထီးကျန် ကွန်မြူနစ်နိုင်ငံသို့ သွားရောက်ခဲ့သော မြန်မာစာစောင် ထုတ်ဝေသူတစ်ဦးကဆိုသည်။

မြောက်ကိုရီးယားဟုဆိုလိုက်လျှင် တိုင်းသူပြည်သားများအပေါ် ရက်စက်သည့် ကွန်မြူနစ်နိုင်ငံ၊ လူ့အခွင့်အရေး ချိုးဖောက်မှုများ ရှိသည့်နိုင်ငံ၊ ရန်လိုသည့်စစ်ရေး လှုပ်ရှားမှုများကြောင့် အထီးကျန်ဆန်သည့်နိုင်ငံအဖြစ် သတင်းဌာနအများစုက ပုံဖော်ကြသော်လည်း ရန်ကုန်အခြေစိုက် “ခေတ်သစ်သတင်းစာ”ကမူ ထိုသို့မဟုတ်ဘဲ ကောင်းသတင်းများသာ ရေးသားသည်။

သက်တမ်းငါးနှစ်ရှိပြီဖြစ်သည့် အဆိုပါ ပုဂ္ဂလိကသတင်းစာသည် မြောက်ကိုရီးယားနိုင်ငံ သတင်းများ၊ အထူးသဖြင့် မြောက်ကိုရီးယားအစိုးရက ထုတ်ပြန်သည့်သတင်းများကို မြန်မာဘာသာသို့ ပုံမှန်ပြန်ဆို ဖော်ပြလေ့ရှိသည်။ အချို့သောသတင်းများကို မူရင်း အင်္ဂလိပ်ဘာသာအတိုင်း ဖော်ပြခြင်းမျိုးလည်းရှိသည်။ တစ်နှစ်လျှင် အကြိမ် ၂၀ ခန့် ထုတ်ဝေသည်ဟု သိရသည်။

စာမျက်နှာ ၂၀ ပါ “ခေတ်သစ်”သတင်းစာ၏ စာစောင်တိုင်းတွင် မြောက်ကိုရီးယားနိုင်ငံအကြောင်းကို စာမျက်နှာ အတော်များများပေးကာ ဖော်ပြလေ့ရှိသည်။

၂၀၁၅၊ ဖေဖော်ဝါရီ ၅ နေ့စွဲဖြင့် ထုတ်ဝေသည့် အတွဲ ၃၊ အမှတ် ၂ တွင် ကွယ်လွန်သူ ခေါင်းဆောင်ကြီး ကင်ဂျုံအီ၏မွေးနေ့အထိမ်းအမှတ်အဖြစ် ၎င်း၏အကြောင်းအရာများကို ဝေဝေဆာဆာ ထည့်သွင်းဖော်ပြထားသည်။

၂၀၁၈ မတ်လထုတ် အတွဲ ၇၊ အမှတ် ၁၀ တွင် စာစောင်၏ သုံးပုံတစ်ပုံခန့်သည်လည်း အဆိုပါ ကွန်မြူနစ်နိုင်ငံ၏ ခမ်းနားထည်ဝါမှုအကြောင်း အကျယ်တဝင့် ရေးသားထားပြီး ရှေ့မျက်နှာဖုံးတွင် မြန်မာ့တပ်မတော်၏ တပ်မတော်နေ့ စစ်ရေးပြအခမ်းအနား၊ ကျောဖုံးတွင် မြောက်ကိုရီးယား တပ်မတော်၏ စစ်ရေးပြပုံများ ရိုက်နှိပ်ထားသည်၊ ပြည်တွင်းနှင့် နိုင်ငံတကာ သတင်းများကို စာမျက်နှာ ငါးမျက်နှာခန့် ဖော်ပြထားသည်။

“ခေတ်သစ်သတင်းစာ” ထုတ်ဝေသူနှင့် အယ်ဒီတာချုပ် ဒေါက်တာတင်ထွန်းက သူ၏စာစောင်ကို သူ၏ကိုယ်ပိုင်ငွေကြေးဖြင့် ထုတ်ဝေနေခြင်းဖြစ်ကြောင်း Myanmar Now ကိုပြောပြီး ပြုံယမ်းအစိုးရ၏ အထောက်အပံ့ဖြင့် လည်ပတ်နေသည်ဆိုသည့် စွပ်စွဲချက်များကို ငြင်းဆိုသည်။

သို့ရာတွင် မြောက်ကိုရီးယားသံရုံးက ၎င်းတို့၏ အာဘော်ဆောင်းပါးများကို ကြော်ငြာသဘောမျိုးဖြင့် တစ်ပုဒ်လျှင် ကျပ်တစ်သိန်းပေးကာ ထည့်သွင်းစေကြောင်း၊ အင်္ဂလိပ်ဘာသာမှ မြန်မာဘာသာသို့ ဘာသာပြန်ဆိုခလည်းပေးကြောင်း ဒေါက်တာတင်ထွန်းက ပြောသည်။

မြန်မာစာဖတ်ပရိသတ်ထံ မြောက်ကိုရီးယားနှင့်ပတ်သက်သည့် သတင်းစကားများ ဖြန့်ဝေရခြင်းမှာ မြန်မာလူထု၏ မြောက်ကိုရီးယားအပေါ် ရှိနေသည့် အဆိုးမြင် သတင်းအချက်အလက်များ မှားယွင်းနေကြောင်း ပြသချင်သောကြောင့်ဖြစ်သည်ဟု ၎င်းကဆိုသည်။

“မြောက်ကိုရီးယားဟာ လူတွေထင်နေသလို သိပ်ကို ချွတ်ခြုံကျနေတဲ့နိုင်ငံ မဟုတ်ဘူး။ သူတို့ မြို့ငါးမြို့ကို ကျွန်တော်ရောက်ခဲ့တယ်၊ သိပ်ကိုစည်ကားတာ။ သူတို့အစိုးရဆိုတာ ပြည်သူကိုဖိနှိပ်နေတဲ့ အစိုးရမဟုတ်ဘူး။ ချွေးတပ်စခန်းတွေ ရှိတယ်ဆိုတာ လုံးဝ မဟုတ်ဘူး”ဟု ယမန်နှစ်က မြောက်ကိုရီးယားနိုင်ငံသို့ ရောက်ခဲ့သည့် ဒေါက်တာတင်ထွန်းက ပြောသည်။

“ခေတ်သစ်သတင်းစာ”သည် မြောက်ကိုရီးယား သံရုံးအထောက်အပံ့ဖြင့် ထုတ်ဝေနေသည်ဟု ထင်မြင်ကြခြင်းမှာ မြောက်ကိုရီးယားက မြန်မာ့သတင်းစာလောကထဲမှ မိမိတစ်ဦးတည်းကိုသာ အလည်အပတ် ခေါ်ခဲ့ခြင်းအပေါ် အမြင်စောင်းနေကြခြင်းကြောင့်ဖြစ်ကြောင်း သူကပြောသည်။

“သထုံတင်ထွန်း”ဆိုသည့် ကလောင်အမည်ဖြင့် စာအုပ်တချို့ ရေးသားခဲ့သော “ခေတ်သစ်သတင်းစာ”၏ ပဲ့ကိုင်ရှင် ဒေါက်တာတင်ထွန်းကိုယ်တိုင်က မြန်မာနိုင်ငံ သတင်းမီဒီယာကောင်စီ၏ အဖွဲ့ဝင်လည်း ဖြစ်သည်။

အမည်မဖော်လိုသည့် ကောင်စီအဖွဲ့ဝင်တချို့၏အဆိုအရ ရန်ကုန်ရှိ မြောက်ကိုရီးယားသံရုံးသည် ဒေါက်တာတင်ထွန်းကို ပြုံယမ်းခရီးစဉ် အလည်အပတ်ခေါ်ရန် ကောင်စီထံ ဦးစွာချဉ်းကပ်ခဲ့သည်ဟုဆိုသည်။

ကောင်စီဝင်များက မြောက်ကိုရီးယားနှင့် ဆက်ဆံရေး ထူထောင်ရန် အချိန်မကျသေးဟု ဆုံးဖြတ်ခဲ့ပြီးနောက် အဆိုပါခရီးစဉ်ကို ကောင်စီဝင်တစ်ဦးအနေဖြင့် သွားခွင့်ကို ပယ်ချခဲ့ကြသည်ဟုဆိုသည်။

ထို့နောက် “ခေတ်သစ်သတင်းစာ”၏ ထုတ်ဝေသူသည် ကောင်စီကိုယ်စားပြု မဟုတ်ဘဲ သီးသန့် အစီအစဉ်ဖြင့် သွားခြင်းဖြစ်နိုင်ကြောင်း အမည်မဖော်လိုသည့် ကောင်စီဝင်တချို့က Myanmar Now ကို ပြောသည်။

ခေတ်သစ်သတင်းစာကောက်ကြောင်း

သက်တမ်းနှစ် ၆၀ နီးပါးရှိပြီဖြစ်သော်လည်း “ခေတ်သစ်သတင်းစာ”သည် မြန်မာနိုင်ငံတွင် ထင်ရှားသည့် သတင်းစာတစ်စောင်တော့မဟုတ်။ ၁၉၆၀ ခုနှစ် ဇန်နဝါရီတွင် စတင်တည်ထောင်ခဲ့ပြီး ၁၉၆၁ မှ ၁၉၆၅ ခုနှစ်အထိ ထုတ်ဝေခဲ့သည်။

၁၉၈၈ ခုနှစ် ဒီမိုကရေစီအရေး လူထုလှုပ်ရှားမှု ကာလအတွင်း သတင်းစာများ ပေါ်ပေါက်လာရာ ၎င်းသတင်းစာကို ပြန်လည်ထုတ်ဝေခဲ့ပြီး ထိုနှစ် စက်တင်ဘာ ၁၈ ရက်နေ့တွင် ပြန်လည် ရပ်ဆိုင်းခဲ့ရကြောင်း သိရသည်။

သမ္မတဦးသိန်းစိန်အစိုးရလက်ထက်၂၀၁၃ ခုနှစ် ဧပြီလတွင် ပုဂ္ဂလိက သတင်းစာများ ထုတ်ဝေခွင့်ပြုလိုက်ရာ အဆိုပါသတင်းစာကို ပြန်လည်ထုတ်ဝေခဲ့ပြီး စောင်ရေ ၂၀,၀၀၀ ဝန်းကျင်ရှိခဲ့ကြောင်း ဒေါက်တာ တင်ထွန်းက ပြောသည်။

သတင်းစာဟုဆိုသော်လည်း လစဉ်၊ အပတ်စဉ်၊ နေ့စဉ် စသဖြင့် သတ်မှတ်ပြီးထုတ်ဝေခြင်း မဟုတ်ဘဲ ငွေကြေး အဆင်ပြေမှုအလိုက် ထုတ်ဝေကြောင်း၊ တစ်နှစ်လျှင် ၁၇ ကြိမ်မှ ၁၈ ကြိမ်အထိ (သီတင်းသုံးပတ်လျှင် တစ်ကြိမ်နှုန်း) ထုတ်ဝေနေကြောင်း ၎င်းက ပြောသည်။

သတင်းစာ၏ ဖွဲ့စည်းပုံတွင် အယ်ဒီတာချုပ်နှင့် ထုတ်ဝေသူအဖြစ် ဦးတင်ထွန်းအပြင် အမှုဆောင် အယ်ဒီတာတစ်ဦး၊ သတင်းအဖွဲ့တွင် ခုနစ်ဦးတို့ကို ဖော်ပြထားသည်။

သတင်းအဖွဲ့ထဲမှနှစ်ဦးသည် အမေရိကန်ပြည်ထောင်စု နယူးယောက်မြို့နှင့် ထိုင်းနိုင်ငံ ချင်းမိုင်မြို့တို့တွင်နေထိုင်သည့် အထူး သတင်းထောက်များဟုလည်း ဖော်ပြထားသည်။

ခေတ်သစ်သတင်းစာကို စာနယ်ဇင်း အရောင်းဆိုင်များတွင် ရနိုင်မည်မဟုတ်ပေ။ သတင်းသမားများ တက်ရောက်တတ်သည့် ရန်ကုန်မြို့ ဆွေးနွေးပွဲတချို့တွင် အခမဲ့ ဝေငှသည်ကို တွေ့ရသည်။

မြောက်ကိုရီးယားနှင့်ပတ်သက်သည့် သတင်းများကို ပုံမှန်ဖော်ပြခြင်းအတွက် သံရုံး၏ငွေကြေးကိုယူသည့် အဆိုပါ “ခေတ်သစ်သတင်းစာ”သည် စာနယ်ဇင်းသဘောတရားအရ ဝါဒဖြန့်ချိသော နေရာတစ်ခုကဲ့သို့ဖြစ်နေကြောင်း မြန်မာစာနယ်ဇင်းသမားတချို့က ဝေဖန်ကြသည်။

ထုတ်ဝေခဲ့သည့် ဖော်ပြချက်များသည် မြောက်ကိုရီးယားနိုင်ငံ၏ ဝါဒဖြန့်ချိရေးသက်သက်သာ ဖြစ်နေသည်ကို တွေ့ရကြောင်း မြန်မာသတင်းပညာသိပ္ပံ သင်တန်းညွှန်ကြားရေးမှူး ဦးစိန်ဝင်းက ပြောသည်။

“အဲ့ဒီသတင်းစာအနေနဲ့ မြောက်ကိုရီးယားရဲ့ ငွေကြေး အထောက်အပံ့ကို နည်းတစ်မျိုးမျိုးနဲ့ ဘယ်လိုယူယူ ဒါဟာ ဥပဒေနဲ့မညီဘူးလို့တော့ ပြောလို့မရဘူး။ စာနယ်ဇင်း သဘောတရားအရတော့ ဒါဟာ ဝါဒဖြန့်ချိတဲ့ဟာလို ဖြစ်နေတာ”ဟု ရန်ကုန်မြို့တွင် နေထိုင်သည့် ဦးစိန်ဝင်းကဆိုသည်။

မြန်မာအစိုးရအရာရှိများကတော့ မြောက်ကိုရီးယားနှင့် “ခေတ်သစ်”သတင်းစာ ပတ်သက်မှုကို ထိန်းထိန်းသိမ်းသိမ်း မှတ်ချက်ပေးကြသည်။

နိုင်ငံခြားရေးနှင့် ပြန်ကြားရေး ဝန်ကြီးဌာနများမှ အရာရှိများက မှတ်ချက်ပေးရာတွင် ၎င်းတို့၏ ပုဂ္ဂလိကအမြင်အဖြစ် ထည့်သွင်းဖော်ပြပေးရန်လည်း တောင်းဆိုခဲ့ကြသည်။

“ဒီပုဂ္ဂလိကသတင်းစာနဲ့ မြောက်ကိုရီးယား သံရုံးတို့ကြားမှာ ဘယ်လိုဆက်သွယ်မှုဆိုတာ မသိပေမယ့် ဘာတွေထည့်မယ်ဆိုတာကို ပြန်ကြားရေး (ဝန်ကြီးဌာန)နဲ့တော့ ညှိသင့်တယ်ထင်တယ်။ ဒါက ကျွန်တော်တစ်ဦးတည်းရဲ့ ပုဂ္ဂလိကအမြင်ပါ”ဟု နိုင်ငံခြားရေး ဝန်ကြီးဌာနရုံးမှ ဒုတိယအမြဲတမ်းအတွင်းဝန် ဦးအောင်ကျော်ဇံက Myanmar Now ကို ပြောသည်။

ပြန်ကြားရေးဝန်ကြီးဌာန ဒုတိယဝန်ကြီး ဦးအောင်လှထွန်းကလည်း အဆိုပါသတင်းစာနှင့် မြောက်ကိုရီးယားအကြား ဆက်နွှယ်မှု အတိုင်းအတာကို စာနယ်ဇင်းကောင်စီဘက်က စောင့်ကြည့်သင့်သည်ဟု ယူဆကြောင်း ပြောသည်။

“ခေတ်သစ်သတင်းစာ”နှင့် ပတ်သက်မှုအကြောင်း ရန်ကုန်၊ မရမ်းကုန်းမြို့နယ်ရှိ မြောက်ကိုရီးယားသံရုံးကို Myanmar Now က သွားရောက်မေးမြန်းရာတွင် သံရုံးတတိယအတွင်းဝန်က မှတ်ချက်ပေးရန် ငြင်းဆိုသည်။

မြန်မာ-မြောက် ဆက်ဆံရေး

မြန်မာသည် တစ်ချိန်က ကိုရီးယားကျွန်းဆွယ်မှ ရန်ဘက်နှစ်နိုင်ငံဖြစ်သည့် ကိုရီးယားနှစ်နိုင်ငံစလုံး နှင့်ရင်းနှီးသည့် သံတမန်ဆက်ဆံရေး ရှိခဲ့ဖူးသည်။

သို့သော်လည်း ၁၉၈၃ ခုနှစ်တွင် မြန်မာနိုင်ငံသို့ ချစ်ကြည်ရေးခရီး လာရောက်သည့် တောင်ကိုရီးယားသမ္မတ ချန်ဒူးဟွမ်နှင့်အဖွဲ့ကို ပြုံယမ်းက စေလွှတ်လိုက်သည့် သူလျှိုများက ရန်ကုန်တွင် လုပ်ကြံသတ်ဖြတ်ခဲ့အပြီး မြန်မာနှင့်မြောက်ကိုရီးယားကြား သံတမန် အဆက်အသွယ် အဆုံးသတ်သွားသည်။

အဆိုပါလုပ်ကြံသတ်ဖြတ်မှုအတွင်း တောင်ကိုရီးယားသမ္မတ အသက်ဘေးမှ လွတ်မြောက်ခဲ့သော်လည်း ၎င်း၏ အစိုးရအဖွဲ့ဝင် ဝန်ကြီးများ အပါအဝင် ၁၆ ဦး၊ မြန်မာသုံးဦး သေဆုံးခဲ့ပြီး ၄၈ ဦး ဒဏ်ရာရခဲ့သည်။

မြန်မာအာဏာပိုင်များက ရက်အနည်းငယ်အတွင်း မြောက်ကိုရီးယား လုပ်ကြံသတ်ဖြတ်ရေးသမားနှစ်ဦးကို အရှင်မိခဲ့ပြီး တစ်ဦးကို အသေဖမ်းမိခဲ့သည်။ ထို့နောက် မြောက်ကိုရီးယား သံတမန်များကို နှင်ထုတ်ခဲ့ကာ သံတမန်အဆက်အသွယ် ဖြတ်တောက်ခဲ့သည်။

နှစ်နိုင်ငံအကြား ဆက်ဆံရေးသည် ဆယ်စုနှစ်ပေါင်းများစွာ အေးခဲခဲ့သော်လည်း တပ်မတော်အစိုးရ လက်ထက်တွင် စစ်ရေးနှင့်သံတမန်ရေး အဆက်အသွယ် ပြန်ရှိလာခဲ့သည်။ မြောက်ကိုရီးယားထံမှ တပ်မတော် အစိုးရက နျူကလီးယား နည်းပညာ အကူအညီများ ရယူနေသည်ဆိုသော သတင်းများလည်း ထွက်ပေါ်လာခဲ့ပြီး တပ်မတော်ကမူ ထိုသတင်းများကို ငြင်းဆန်သည်။

မြန်မာနိုင်ငံတွင် မြောက်ကိုရီးယားသံရုံးကို ၂၀၀၇ ခုနှစ်တွင် ပြန်ဖွင့်ခဲ့သော်လည်း မြန်မာဘက်ကတော့ မြောက်ကိုရီးယားတွင် သံရုံး (သို့မဟုတ်) ကောင်စစ်ဝန်ရုံး ဖွင့်လှစ်ခြင်းမရှိသေးပါ။

သို့သော်လည်း မြန်မာနိုင်ငံတွင်ဖွင့်လှစ်ခဲ့သည့် မြောက်ကိုရီးယား စီးပွားရေး လုပ်ငန်းများကို ကုလသမဂ္ဂ လုံခြုံရေးကောင်စီ၏ ဆုံးဖြတ်ချက်နှင့်အညီ NLD ပါတီ အစိုးရက ပြန်လည်ထွက်ခွာစေခဲ့ကြောင်း နိုင်ငံခြားရေးဝန်ကြီးဌာနမှ အဆင့်မြင့်အရာရှိတစ်ဦးက ဇွန်လ ဒုတိယသီတင်းပတ်က VOA သတင်းဌာနကို ပြောသည်။

ထိုအထဲတွင် လွန်ခဲ့သည့် ခုနစ်နှစ်ခန့်ကတည်းက ရန်ကုန်၊ ဗဟန်းမြို့နယ် ဆရာစံလမ်းတွင် ဖွင့်လှစ်ခဲ့သည့် “ပြုံယမ်းကော်ယို”အမည်ရှိသည့် စားသောက်ဆိုင်တစ်ဆိုင်လည်း ပါဝင်သည်။

အဆိုပါလုပ်ရပ်အတွက် အမေရိကန်သမ္မတ ဒေါ်နယ်ထရမ့်က ဒေါ်အောင်ဆန်းစုကြည်ထံ ကျေးဇူးတင်ကြောင်း စာတစ်စောင်ကို ရေးသားပေးပို့ခဲ့သည်ဟု သိရသည်။

နှစ်နိုင်ငံအကြား အကဲဆတ်သည့် သံတမန် ဆက်ဆံရေး ရှိခဲ့ပြီးနောက် မြောက်ကိုရီးယားတို့က မြန်မာနိုင်ငံအတွင်း ၎င်းတို့အကြောင်း ရေးသားမှုများကို အမြဲတစေ စောင့်ကြည့်လေ့လာသည့်သဘော ရှိခဲ့သည်။

၂၀၁၀ ပြည့်နှစ်က မြန်မာစာရေးဆရာ (ဦး) ဟိန်းလတ်ရေးသားသည့် “ကင်ဂျုံအီ သို့မဟုတ် မြောက်ကိုရီးယား၏ ချစ်လှစွာသော ခေါင်းဆောင်ကြီး”အမည်ရှိ စာအုပ်ကို မြောက်ကိုရီးယားသံရုံးက အချက်အလက်များ မှားယွင်းသည်ဆိုသည့် စွပ်စွဲချက်ဖြင့် ထုတ်ဝေပြီး စာအုပ်များ ပြန်သိမ်းရန် စာရေးဆရာကို ဖိအားပေးခဲ့ဖူးသည်။

ကင်ဂျုံအီသည် လက်ရှိအာဏာရနေသည့် မြောက်ကိုရီးယားခေါင်းဆောင် ကင်ဂျုံအွန်၏ဖခင်ဖြစ်သည်။

“သူတို့ပြောပုံက ဒီလိုမြောက်ကိုရီးယားခေါင်းဆောင်စာအုပ်ဆိုတာ သူတို့နိုင်ငံက ကွန်မြူနစ်ပါတီက ထုတ်ရမှာ၊ ကျွန်တော်တို့ ထုတ်ရမှာမဟုတ်ဘူး ဆိုတာမျိုးနဲ့ပေါ့”ဟု စာရေးဆရာ ဟိန်းလတ်က Myanmar Now ကို ပြန်ပြောင်းပြောပြသည်။

အစိုးရအပြောင်းအလဲ ဖြစ်ပြီးနောက် အဆိုပါစာအုပ်ကို ဒုတိယအကြိမ် ထပ်မံပုံနှိပ်ခဲ့သော်လည်း မြောက်ကိုရီးယားဘက်က တစ်စုံတစ်ရာ ကန့်ကွက်ခြင်း မရှိတော့ဟု သူကဆိုသည်။

“အရင်အစိုးရလက်ထက်တုန်းက မြောက်ကိုရီးယားအရေးနဲ့ ပတ်သက်ရင် ပုံစံတစ်မျိုးဆိုတော့ ကျွန်တော့်စာအုပ်ကို ပြန်သိမ်းဖို့ စာပေစိစစ်ရေးကရော၊ (အဲဒီတုန်းက) ပြန်ကြားရေးဝန်ကြီး ဦးကျော်ဆန်းကရော ပြန်ပေးလိုက်ပါ ဆိုတဲ့ပုံစံမျိုး အမိန့်ပေးခဲ့လို့ ကျွန်တော့်စာအုပ် ပြန်သိမ်းခဲ့ကြတာပေါ့”ဟု သူကပြောသည်။

ထို့ပြင် မြောက်ကိုရီးယားခေါင်းဆောင် ကင်ဂျုံအွန်ကိုသရော်သည့် ဟောလိဝုဒ်ရုပ်ရှင် “The Interview” DVD ကို ရန်ကုန်တွင် ရောင်းချနေသည့်အပေါ် အရေးယူပေးရန် သံရုံးက တောင်းဆိုခဲ့သည်ဟု “ဧရာဝတီ”သတင်းဌာနက၂၀၁၅ ခုနှစ်တွင် ရေးသားခဲ့သည်။

၎င်းတို့အကြောင်း အဆိုးမြင်ရေးသားမှုများကို မာမာထန်ထန် တုံ့ပြန်ခဲ့သော်လည်း အခြားတစ်ဖက်တွင် မြောက်ကိုရီးယားတို့က ဝါဒဖြန့်ချိရေးသားမှုများကို ၂၀၁၂ ခုနှစ်ဝန်းကျင်ကတည်းက ကြော်ငြာသဘောမျိုးဖြင့် ပြည်တွင်းထုတ်ဂျာနယ်များတွင် ထည့်သွင်းလေ့ရှိသော်လည်း ယခုကဲ့သို့ စာမျက်နှာ အများအပြား ထည့်သွင်းရေးသားသည်ကို မတွေ့ဖူးကြောင်း ဦးဟိန်းလတ်က ပြောသည်။

အနိမ့်အမြင့် အတက်အကျများသော နှစ်နိုင်ငံ ဆက်ဆံရေးအကြားရှိ “ခေတ်သစ်သတင်းစာ”သည် မြောက်ကိုရီးယားတို့၏ သဘောထားကို ဖော်ပြရေးသားသည့် မြန်မာပုံနှိပ်မီဒီယာတစ်ခုအဖြစ် ဆက်လက်ရှိနေဆဲဖြစ်သည်။

ထက်ခေါင်လင်း (Myanmar Now)

  • TAGS