News

POST TYPE

ARTICLE

စားသုံးဆီ စစ်ဆင်ရေး
14-Jul-2016 tagged as ဆီ စစ်ဆင်ရေး

ဆီတိုင်း မစားသင့်သော်လည်း ရွေးချယ်စရာရှားသည်။ မည်သို့ရွေးရမည်မှာလည်း ခပ်ခက်ခက်။ မြန်မာနိုင်ငံတွင် စားသုံးဆီ အမျိုးမျိုးရှိသည်။ ပြည်တွင်းဆီစားသုံးမှုမှာ တစ်နှစ်လျှင် တန်ချိန်ငါးသိန်းခွဲမှ ခြောက်သိန်းအထိရှိနေသည်။

ထိုဆီများအနက် စံမမီ စားသုံးဆီ၊ ဘေးအန္တရာယ်ရှိ စားသုံးဆီ၊ စားသုံးရန် မသင့်သော စားသုံးဆီ၊ မြောင်းဆီ၊ ကြော်ပြီးသားဆီကို ပြန်လည်ရောနှောထားသော  ဆီ၊ အနံ့အသက်နှင့် ဓာတုဗေဒ ရောနှောထားသော ဆီ၊ စက်မှုလုပ်ငန်းသုံးပြီးသား အရောအနှောဆီ၊ သတ်မှတ်ထောက်ခံချက် မရှိသော  ဆီ၊ တရားမဝင် ထုတ်လုပ်ရောင်းချနေသော ဆီ၊ လိုင်စင်မရှိ တံဆိပ်ကပ် ရောင်းချနေသော စားသုံးဆီများလည်း ပါဝင်သည်။

အထက်ပါ စားသုံးဆီများကို ပြည်တွင်း ဈေးကွက်တွင် လှိုင်လှိုင်တွေ့ရသည်။ မသန့်ရှင်းသော စားသုံးဆီ သတင်းအမျိုးမျိုး  ထွက်သည်။ လတ်တလောတွင် အမျိုးမျိုးသော စားသုံးဆီများ၏ ဈေးနှုန်းကိုလိုက်၍ ပြည်သူများက ရွေးချယ်ဝယ်ယူ စားသုံးနေကြရသည်။
သို့သော် ဝယ်ယူစားသုံးနေရသော  စားသုံးဆီ၏ စိတ်ချလုံခြုံမှု၊ ဘေးအန္တရာယ် ကင်းရှင်းမှု မည်မျှရှိသည်ကို မည်သူမျှ အတပ်မပြောနိုင်၊ မသိနိုင်ကြပေ။

“အရင်ကတော့ ဒီလိုပဲ တံဆိပ်မပါတဲ့ အလွတ်ရောင်းနေတဲ့ ဆီကို ဝယ်စားတယ်။ ဆုံဆီလို့ ပြောရောင်းကြတာပဲ။ ဒါပေမဲ့  အဲဒီဆီထဲမှာ ဘာတွေပါမှန်းမသိ၊ ဘယ်လို ထားသိုမှန်းမသိနဲ့ စိတ်ထဲမသတီလို့ ခုနောက်ပိုင်း ပါကင်ပိတ်၊ တံဆိပ်ကပ်ထားတဲ့ ဆီကို သေချာကြည့်ဝယ်တော့တယ်” ဟု တာမွေမြို့နယ်တွင် နေထိုင်သူ အိမ်ရှင်မတစ်ဦးက ပြောပြသည်။
ပြည်သူများစားသုံးမည့် စားသုံးဆီ တရားဝင် မဝင်၊ ဝယ်ယူစားသုံးရန် သင့် မသင့်ကို ကျန်းမာရေးဝန်ကြီးဌာန လက်အောက်ရှိ အစားအသောက်နှင့် ဆေးဝါးကွပ်ကဲရေး ဦးစီးဌာန (FDA) က စိစစ် ထောက်ခံချက်ပေးပြီး စားသုံးဆီ ထုတ်လုပ်၊ တင်သွင်း၊ ရောင်းချသူများက တာဝန်ခံ၊ တာဝန်ယူကြရသည်။

မြန်မာနိုင်ငံတွင် FDA ထောက်ခံ ချက်ရထားပြီးသော စားသုံးဆီတံဆိပ်မှာ  ၂၇ ခုသာရှိကြောင်း နေပြည်တော် FDA ရုံးချုပ်မှ တာဝန်ရှိသူတစ်ဦးက ပြောကြားသည်။

ပြည်တွင်းဈေးကွက်တွင် အမှန်တကယ် စားသုံးဆီ ထုတ်လုပ်ရောင်းချနေသော စက်မှုလုပ်ငန်းပေါင်း ၃၀၀၀ ခန့် ရှိပြီး ယင်းစက်မှုလုပ်ငန်းများမှာ စက်မှုကြီးကြပ်ရေး လိုင်စင်နှင့် စည်ပင်သာယာ လုပ်ငန်း လိုင်စင်တို့ဖြင့် ထုတ်လုပ်ရောင်းချနေမှုက  ပိုများကြောင်း မြန်မာနိုင်ငံ ဆီစက်လုပ်ငန်းရှင်များ အသင်း ဥက္ကဋ္ဌ ဦးခင်စိုးက ဆိုသည်။
ထိုအဆိုကိုကြည့်လျှင် FDA ထောက်ခံချက် ရထားပြီးသော ဆီစက်လုပ်ငန်း အရေအတွက်မှာ စုစုပေါင်း ဆီစက်လုပ်ငန်းများ၏ ၁ ရာခိုင်နှုန်းပင်မရှိကြောင်း တွေ့ရပြီး တရားမဝင် ထုတ်လုပ်နေသော ဆီစက်များလည်း ရှိနေသေးသည်။

“အများစုကတော့ FDA ထောက်ခံချက်မရှိဘဲ လုပ်နေကြတာ။ တချို့လည်း  FDA လျှောက်ထားဆဲမှာ စက်မှုလိုင်စင်၊  စည်ပင်လိုင်စင်တွေနဲ့ လုပ်ငန်း လည်ပတ်နေကြတာပေါ့” ဟု ဧရာဝတီမြေပဲဆီစက် လုပ်ငန်းရှင်လည်းဖြစ်သူ ဦးခင်စိုးက ဆိုသည်။

ယခုအခါ ပြည်တွင်းဈေးကွက်အတွင်းရှိ စားသုံးဆီများကို စစ်ဆေး အရေးယူတော့မည်ဖြစ်ကြောင်း FDA က အသိပေးထားပြီး ဖြစ်သည်။
ယခုနှစ် ဇူလိုင်လကုန်အထိ ဆီစက် လုပ်ငန်းရှင်များ၊ စားသုံးဆီရောင်းဝယ် ဖောက်ကားသူများကို အသိပညာပေး လုပ်ငန်းများ လုပ်ဆောင်သွားမည်ဖြစ်ပြီး ယင်းနောက်ပိုင်းတွင် စတင်အရေးယူမည် ဖြစ်သည်။ 

“စားသုံးဆီကို စည်ပင်လိုင်စင်၊ စက်မှုလိုင်စင်တွေ တံဆိပ်ကပ်ရမယ်၊ ဒါတွေကို ဈေးကွက်ထဲမှာ တကယ် ကပ်-မကပ်  လိုက်စစ်မယ်။ ပြီးတော့ FDA  ထောက်ခံချက်ပေါ့။ ဒီသုံးခုထဲက တစ်ခုမှမရှိဘူးဆိုရင်တော့ ဥပဒေအရ အရေးယူရမှာပေါ့” ဟု  နေပြည်တော် FDA ရုံးချုပ်မှ တာဝန်ခံက  ဆိုသည်။

အရေးယူမှုစတင်ချိန်တွင် သတ်မှတ်လိုင်စင်၊ ခွင့်ပြုချက်၊ ထောက်ခံချက်များရှိ မထားပါက အမျိုးသား အစားအသောက် ဥပဒေ၊ စားသုံးသူကာကွယ်ရေး ဥပဒေ၊ စည်ပင်သာယာဥပဒေ တို့ဖြင့် အရေးယူ ခံရမည်ဖြစ်သည်။

ပြည်တွင်းဈေးကွက်အတွင်းရှိ စားသုံးဆီ စစ်ဆေးခြင်းစီမံချက်ကို ယခုနှစ် မေလအတွင်းက နေပြည်တော်တွင် ပြုလုပ်ခဲ့သော ဆွေးနွေးပွဲမှ စတင်ခဲ့ခြင်းဖြစ်ပြီး ယင်းဆွေးနွေးပွဲ၏ ရလဒ်အဖြစ် အရည်အသွေး ပြည့်မီ၍ ဘေးအန္တရာယ် ကင်းရှင်းသော စားသုံးဆီများ ဖြစ်ပေါ်လာရေး ဆောင်ရွက်သွားမည် ဖြစ်ကြောင်း ဦးခင်စိုးက  ပြောသည်။

စားသုံးဆီ ထုတ်လုပ်၊ ရောင်းချနေသူ များအနေနှင့် လတ်တလောတွင် စက်မှု ကြီးကြပ်လိုင်စင်နှင့် စည်ပင်သာယာလုပ်ငန်း လိုင်စင်တို့ ရှိထားမည်ဖြစ်ပြီး နောက်တစ်ဆင့် တွင် FDA ထောက်ခံချက်ပါ ရှိထားရပေမည်။

စားသုံးဆီ လက်လီ၊ လက်ကား ရောင်းချသူများသည် ဝယ်ယူလိုက်သည့် စားသုံးဆီဆိုင်၏ ငွေရှင်းပြေစာ (ဘောက်ချာ) ကို သိမ်းဆည်းထားရန်လိုပြီး ယင်းသို့သိမ်း ဆည်းထားခြင်းမရှိပါက ဥပဒေအရ ရင်ဆိုင်ရမည့်သူ ဖြစ်သွားနိုင်ကြောင်း နေပြည်တော် FDA ရုံးချုပ်မှ တာဝန်ခံက ဆိုသည်။

“လက်လီရောင်းတဲ့ ခွက်ချိန်သမား တွေက ဝယ်ထားတဲ့ ဘောက်ချာကို သိမ်းထားရမယ်။ ဘောက်ချာမပြနိုင်ရင်၊ ဘယ်သူ့ဆီက ဝယ်ထားတယ်ဆိုတာ မပြနိုင်ရင် သူသည် တရားခံဖြစ်သွားမယ်။ ဘယ်လိုအရေးယူမလဲ ဆိုတော့ ဓာတ်ခွဲစစ်ဆေးတဲ့ အဖြေပေါ်မှာပဲ မူတည်တယ်” ဟု ရန်ကုန်တိုင်းဒေသကြီး FDA ညွှန်ကြားရေးမှူး ဒေါ်ခင်စောလှက ပြောသည်။
မြန်မာနိုင်ငံအနှံ့တွင် လက်လီရောင်းချနေသော၊ ခွက်ချိန်ဖြင့် ရောင်းချနေသော ဆိုင်များစွာရှိနေပြီး ယင်းတို့ကို အသိပညာပေးမှုများ ပြုလုပ်ရန် လိုအပ်နေသည်။

“ဟုတ်လား၊ အဲလိုလုပ်မယ်ဆိုတာ သိတောင်မသိဘူး။ ဒါဆို ဈေးတွေ တက်ဦးမလားပဲ။ နိုင်ငံခြားကသွင်းလာတဲ့ ဆီတွေကျတော့ သူတို့ ဘယ်လိုလုပ်မှာလဲ” ဟု မအူပင်မြို့ရှိ ကုန်စုံဆိုင်ပိုင်ရှင်တစ်ဦးက ဆိုသည်။

ပြည်တွင်းတွင် ထုတ်လုပ်သော စားသုံးဆီများတွင် သက်ဆိုင်ရာဌာနအလိုက် လိုင်စင်၊ ခွင့်ပြုချက်၊ ထောက်ခံချက်များ ရှိရမည်ဖြစ်သလို ပြည်ပမှတင်သွင်းလာသော စားသုံးဆီ များတွင်လည်း FDA က ထုတ်ပေးသော သွင်းကုန်ကြီးကြပ်မှုလိုင်စင် ကဲ့သို့ ထောက်ခံချက်များ ရယူပြီးမှသာ တင်သွင်းရခြင်းဖြစ်ကြောင်း နေပြည်တော် FDA ရုံးချုပ်တာဝန်ခံက ရှင်းပြသည်။

ဈေးကွက်အတွင်းရှိ စားသုံးဆီများ ကို စိစစ်၊ သိမ်းဆည်းမှုပြုလုပ်ရာတွင်  လုပ်ငန်းရှင်များကို အချိန်အနည်းငယ် ပေးရန်လိုအပ်ပြီး သို့မဟုတ်ပါက ဈေးကွက်အတွင်း ကုန်စည်ရှားပါးကာ ဈေးနှုန်း မြင့်တက်နိုင်ကြောင်း ဆီလုပ်ငန်းရှင် ဦးသိန်းဟန်က ဆိုသည်။
အရည်အသွေးပြည့်မီ၍ ဘေးအန္တရာယ် ကင်းရှင်းသော စားသုံးဆီများ ပြည်သူများ ရယူစားသုံးနိုင်ရေး ပထမအဆင့်မှာ မကြာမီ စတင်တော့မည်ဖြစ်သည်။

ယခုစီမံချက်မှာ ကျန်းမာရေးနှင့် ညီညွှတ်မှုမရှိသော စားသုံးဆီများ ဈေးကွက်အတွင်းမှ ပပျောက်သွားရေး ဖြစ်သည့်အတွက် ဈေးနှုန်းအခြေအနေကို စားသုံးသူက ချင့်ချိန် ရွေးချယ်သွားလိမ့်မည် ဖြစ်ကြောင်း ဦးခင်စိုးက ဆိုသည်။

“ဈေးပေါပြီးတော့ ပြည်သူတွေကို  ဒုက္ခပေးနေတဲ့ဆီတွေ ပေါများနေလို့ ဘာလုပ်မှာလဲ။ ကျန်းမာရေးနဲ့ ညီညွတ်တဲ့  စားသုံးသင့်တဲ့ဆီ ဖြစ်စေချင်တာပါ” ဟု ၎င်းက ပြောသည်။

ယင်းစီမံချက်၏ နောက်အဆင့်များ တွင် FDA ထောက်ခံချက် ရယူထားသော  စက်မှုလုပ်ငန်းများကိုသာ လုပ်ငန်းလုပ်ကိုင်ခွင့် ပြုမည်ဖြစ်သည်။ စက်မှုလိုင်စင်နှင့် စည်ပင်သာယာလိုင်စင် ရထားသော ဆီစက်လုပ်ငန်းရှင်သည် တစ်နှစ်အတွင်း FDA ထောက်ခံ ချက်မရယူနိုင်ပါက လုပ်ငန်းရပ်ဆိုင်း၊ ပိတ်သိမ်းရလိမ့်မည် ဖြစ်ကြောင်း နေပြည်တော် FDA ရုံးချုပ်ထံမှ စုံစမ်းသိရှိရသည်။

ယခုစီမံချက်ကို FDA ၊ စားသုံးသူများသမဂ္ဂ၊ မြန်မာနိုင်ငံ ဆီစက်လုပ်ငန်းရှင်များ အသင်း၊ မြန်မာနိုင်ငံရဲတပ်ဖွဲ့၊ စားသုံးသူရေးရာ ကော်မတီစသည့် အဖွဲ့အစည်းများက  တစ်နိုင်ငံလုံးအနှံ့ ပူးပေါင်းချိတ်ဆက် ဆောင်ရွက်သွားမည် ဖြစ်သည်။

နောက်ပိုင်းတွင် ထောက်ခံချက်၊ သတ်မှတ်ချက်များပါသော တံဆိပ်များ ကပ်နှိပ်ထားသော စားသုံးဆီများကိုသာ ရောင်းချခွင့်ပြုမည့် အဆင့်အထိ လုပ်ဆောင်သွားမည် ဖြစ်ကြောင်း နေပြည်တော် FDA  ရုံးချုပ်တာဝန်ခံက ဆိုသည်။
တရားဝင်မှတ်ပုံတင်၊ တံဆိပ်အမှတ် အသားများနှင့် ရောင်းချသည့်အတွက် စားသုံးသူများတွင် အခွင့်အရေးများ ရရှိလာနိုင်သည်။ ထိုစားသုံးဆီတွင် ချို့ယွင်းချက်တစ်ခုခု ရှိလာပါက တရားစွဲဆိုနိုင်သည်အထိ စားသုံး သူကာကွယ်ရေး၊ အခွင့်အရေးများ ရှိလာနိုင်သည်။

“ဆီဆိုတာလည်း တံဆိပ်နဲ့ရောင်းတဲ့ စနစ်ပဲ ရှိသင့်တော့တယ်။ သေချာ မှတ်ပုံတင်ပြီး တရားဝင်လိုင်စင်နဲ့ တံဆိပ်နဲ့ရောင်းရင် စားသုံးသူတွေ အတွက်လည်း ကောင်းတယ်၊ အာမခံချက်ရှိတယ်၊ စိတ်ချလုံခြုံမယ်”  ဟု ဆီလုပ်ငန်းရှင် ဦးသိန်းဟန်က ဆိုလေသည်။

မသတီစရာ အရောအနှောဆီများ၏ နေဝင်ချိန်ပင်။ 
ဆီစစ်ဆင်ရေးစတော့မည်။

စစ်ငြိမ်းသူ

ABOUT AUTHOR

(စစ်ငြိမ်းသူ)