News

POST TYPE

ARTICLE

YBS ၅၅ ယာဉ်လိုင်း ပိတ်သိမ်းခြင်း ခံရမှုအပေါ် နိုင်ငံရေးအမြင်ဖြင့် သုံးသပ်ချက်
12-Jul-2017 tagged as YBS

၉.၇.၂၀၁၇ ရက်နေ့ထုတ် ကြေးမုံသတင်းစာ၊ စာမျက်နှာ (၁၄)တွင် “YBS ၅၅ ယာဉ်လိုင်းအား လိုင်းပိတ်သိမ်းကာ အများပိုင် ကုမ္ပဏီစနစ် ယာဉ်လိုင်းဖြင့်သာ အစားထိုး ပြေးဆွဲစေမည်”ဟူသော သတင်းတစ်ပုဒ်ကို ဖတ်လိုက်ရပါသည်။ သတင်းအနေနှင့် ဇူလိုင် ၇ ရက်၊ မွန်းလွဲ  ၂ နာရီခန့်က ရန်ကုန်-ပြည်လမ်းပေါ် ပျဉ်းမပင်ကျေးရွာတွင် YBS ၅၅ လိုင်းမှ ယာဉ်တစ်စီး တိုက်ရော့ပြုတ်ကာ YBS ၃၇ ယာဉ်အား တိုက်မိ၍ ခရီးသည် ၁၀ ဦး သေခဲ့ရခြင်းကြောင့်ဟူသော ဖြစ်စဉ်ကို အခြေခံထားသည်။

ယနေ့ မြန်မာနိုင်ငံတွင် ဒီမိုကရေစီဝါဒ သဘောတရားမှာ လွှမ်းမိုးလျက်ရှိပါသည်။ စာရေးသူအနေနှင့် သုံးသပ်ရသော် ဒီမိုကရေစီသည် ဝါဒ သဘောတရားမဟုတ်၊ လုပ်နည်းစနစ်တစ်ရပ်သာ ဖြစ်ချေသည်။ “ဒီမိုကရေစီနည်းလမ်း”ဟူသော စကားလုံးကို များစွာ သုံးစွဲလျက်ရှိခြင်းက ဒီမိုကရေစီသည် နည်းလမ်းတစ်ရပ်သာ ဖြစ်ကြောင်း ညွှန်းဆိုသည်။ ထိုဒီမိုကရေစီ နည်းလမ်းကို လူတိုင်း ကျင့်သုံးနိုင်ပါသည်။ ဂရိခေတ် အေသင် ဒီမိုကရေစီသည် ဂရိနိုင်ငံသားတစ်စု၏ ဒီမိုကရေစီသာဖြစ်သည်။ ကျွန်များမပါဝင်။ ထို့အတူ ယနေ့ တရုတ်ပြည်နှင့် ဗီယက်နမ်တို့တွင် အောင်မြင်စွာ အကောင်အထည် ဖော်နေသည်မှာလည်း “ပါတီတွင်း ဒီမိုကရေစီ”သာ ဖြစ်သည်။ ထို့ကြောင့် ဒီမိုကရေစီဘက်တော်သားဟု ဆိုသည်နှင့် ပြည့်စုံမှု မရှိဘဲ ၎င်းဒီမိုကရေစီသည် အခြေခံဝါဒအားဖြင့် ဘယ်စနစ်ကို အခြေခံသည်ကို ကြည့်ဖို့လိုပါသည်။ လက်တစ်ဆုပ်စာ လူတန်းစားကို အခြေခံသလား၊ ကျယ်ပြန့်စွာဖြင့် အားလုံးကို အခြေခံသလား ဆိုသည်ကို ဆန်းစစ်ဖို့လိုပါသည်။

စာရေးသူအနေနှင့် စာရေးသက်တမ်းတစ်လျှောက် ရေးသားဖော်ထုတ်ခဲ့သော အကြောင်းအရာမှာ Individual Right ခေါ် ပုဂ္ဂလိက တစ်ဦးချင်း၏ အခွင့်အရေးကို အခြေခံပါသည်။ လူသားဝါဒ (Humanism) နှင့် ပုဂ္ဂလိကဝါဒ (Individualism) တို့ကသာ နိုင်ငံရေးစနစ်ဝါဒဟု ပြောလိုပါသည်။

သို့ပါ၍ ယနေ့ မြန်မာနိုင်ငံရေးဝါဒ ဘယ်ကို ဦးတည်နေသည်။ ဘယ်ကဲ့သို့ ရပ်တည်နေသည်ကို သိရှိရန် လိုအပ်လာပါသည်။ မြန်မာနိုင်ငံတွင် နိုင်ငံရေးရေချိန် အဘယ်မျှ ရှိသည်ကို သုံးသပ်ရန်လိုပါသည်။ YBS ၅၅ ယာဉ်လိုင်းပိတ်ခံရမှုသည် ယာဉ်တစ်စီး၏ ပေါ့ဆမှုတွင် အခြေခံသဖြင့် “ဝိုင်းကြီးချုပ်”စနစ်ဖြင့် အရေးယူခံရသည်ဟု ဆိုရပါမည်။

အဘယ်ကြောင့်ဆိုသော် ထိုမတော်တဆမှု ဖြစ်ပွားသောယာဉ်မှအပ ပိတ်သိမ်းခံရသော အခြားယာဉ်များမှာ ယာဉ်တိုက်မှုတွင် ပါဝင်ခဲ့ခြင်းမရှိပေ။ ပြစ်မှုလည်း ကျူးလွန်ခဲ့ခြင်း မရှိပေ။ အကယ်၍ ယာဉ်လိုင်းတစ်ခုလုံးအား မဆင်မခြင် မောင်းနှင်မှုများကြောင့် ပိတ်ရသည်ဆိုပါကလည်း ယခင်ကတည်းကပင် လုပ်ရမည့်ကိစ္စဖြစ်ပါသည်။

ကျွန်တော်တို့၏ နိုင်ငံသား သက်ဦးဆံပိုင် အာဏာရှင်များ လက်ထက်ကပင် ဝိုင်းကြီးချုပ်စနစ် ရှင်သန်ခဲ့သည်။ ဒဏ္ဍာရီအရပင်ဆိုစေ “ကျန်စစ်သား မင်းလောင်းကလေး”ကြောင့် အရွယ်တူကလေးတွေ အသတ်ခံရသည်။ ကြူပင်ခုတ် ကြူငုတ်မကျန်စေရ ဟူသည့်အတိုင်း အင်းသူကြီး “ငကြူ”၏ သားသမီးများပါ ဘိုးတော်ဘုရား၏ မီးလောင်တိုက်သွင်း သတ်ဖြတ်ခြင်း ခံရသည်။ စဥ့်ကူးမင်းဆိုလျှင် သူတစ်ဦးတည်းသာမဟုတ်၊ မိဖုရားများ၊ လူမမည်ကလေးများပင်လျှင် မီးလောင်တိုက်သွင်းခံရသည်။ မြန်မာမင်း အုပ်ချုပ်ပုံ စာတမ်းတွင်လည်း မီးလောင် တိုက်သွင်းပြီး သေဒဏ်ပေးခံရလျှင် လူအရေအတွက်အလိုက် ကုန်ကျမည့် လောင်တိုက်၊ ထင်း၊ ဝါး စသည်တို့ တွက်ချက်တင်ပြရသည့် ကိစ္စပါဝင်သည်။ သို့ပါ၍ ဝိုင်းကြီးချုပ်စနစ်ကား အာဏာရှင်စနစ်၏ အငွေ့အသက်ဟု ပြောချင်သည်။

တပ်မတော်အစိုးရ လက်ထက်တွင်လည်း သက်ဦးဆံပိုင်စနစ်ကဲ့သို့ ရက်ရက်စက်စက် သတ်ဖြတ်ခြင်း မပြုစေကာမူ “ဖခင် ဗိုလ်ချုပ်ကြီး”အရေးယူခံရလျှင် သား “အရာရှိငယ်”ကပါ ထွက်ရသည် စသည့် အငွေ့အသက်က ပါလာသည်။

ယနေ့ ဒီမိုကရေစီ ဘက်တော်သား အာဏာပိုင်ဆိုသည့် ပုဂ္ဂိုလ်များသည်လည်း မြန်မာ့လူ့အဖွဲ့အစည်း အတွင်းမှ ရှင်သန်လာကြရာ၊ သတိဖြင့် မတွန်းလှန်လျှင် ထိုအငွေ့အသက်များ ပါလာကြပေမည်။ ထို့အငွေ့အသက်တို့မှ ကင်းလွတ်သူကား “ဒေါ်အောင်ဆန်းစုကြည်”တစ်ဦးတည်းသာ ရှိပါလိမ့်မည်။ ကျန်သော အာဏာပိုင်ပုဂ္ဂိုလ် အားလုံးအနေနှင့် သတိချပ်ရပါလိမ့်မည်။ ပြီးခဲ့သည့် အစိုးရတွင်လည်း ဖြစ်ပွားမှုများ ရှိခဲ့သည်။ အကောင်းဆုံး သာဓကမှာ နေပြည်တော်အလွန် တံတားအောက်သို့ ရာဇာမင်းယာဉ်တစ်စီး ထိုးကျ၍ လူ့အသက်များ ဆုံးရှုံးရာမှ “ရာဇာမင်း”ယာဉ်လိုင်း ပိတ်သိမ်းခံရသည့်ကိစ္စဖြစ်သည်။ ပြီးခဲ့သည့်အစိုးရမှာ အာဏာရှင်ကို အမွေခံခဲ့ကြသူများဖြစ်၍ မဆန်းပါ။ ယနေ့ ဒီမိုကရေစီဘက်တော်သား အုပ်ချုပ်သူ အသိုင်းအဝိုင်းမှာ အာဏာရှင်ဘီလူးကို တွန်းလှန်ခဲ့သူများ ဖြစ်သည်။ ထိုအာဏာရှင်ဘီလူး၏ နေရာတွင် မိမိတို့ ရောက်လာခဲ့ပြီဖြစ်သည်။ နေရာ ယူခဲ့ပြီဖြစ်သည်။ ယခင်ဘီလူး၏ လုပ်ကိုင်ပုံကိုကြည့်ကာ မသိမသာ အတုခိုးနေပါက “အာဏာရှင် ရက္ခိုသ်ဘီလူး”နေရာတွင် “အာဏာရှင် လူ့ဘီလူး” ဖြစ်လာပေမည်။

သို့ပါ၍ အာဏာရ ပုဂ္ဂိုလ်များသည် အာဏာရှင်ဘီလူး တော်လှန်ရေးသမားဘဝနှင့် မပြီးပေ။ “အပူဇော်ခံ ရုက္ခစိုး” ဖြစ်အောင် ကြိုးစားရပေမည်။

နည်းလမ်းက ရှိပါသည်။ လူပုဂ္ဂိုလ်တစ်ဦးချင်းကို အခြေခံသည့် ပုဂ္ဂလိကဝါဒ ထွန်းကားဖို့ ဆောင်ရွက်ပါ။ တစ်ဦးချင်းအနေနှင့်အပေါ် အတွေးအခေါ် ဆင်ခြင်၊ သုံးသပ်၊ ဆုံးဖြတ်ပါ။ ဤဝါဒသည် အသစ်အဆန်း မဟုတ် ပညာရှင်သောမတ်စ်ဂျက်ဖာဆင်မှ စခဲ့သည့် အမေရိကန်ပုဂ္ဂလိက ဝါဒကို လေ့လာရုံသာ ဖြစ်သည်။

သို့ပါလျှင် ၅၅ YBS တွေအပေါ် တစ်ဦးချင်း တစ်စီးချင်း စဉ်းစားပါ။ ယာဉ်လိုင်းတစ်ခုလုံး ပိတ်သည်ကို မတရားဟု သူတို့ခံစားရလျှင် တရားရုံးမှတစ်ဆင့် သူတို့ကို (ပယ်ဖျက်ခွင့်) တောင်းခံပါစေ။ ဒေါ်အောင်ဆန်းစုကြည်ကိုယ်တိုင်ကပဲ (Rule of Law) ဟု ပြောခဲ့သည်မဟုတ်လား။

ပုဂ္ဂလိကဝါဒကို အခြေခံသော ဒီမိုကရေစီစနစ် မြန်မာနိုင်ငံတွင် ထွန်းကားပါစေ။

ဒေါက်တာအောင်မျိုး