News

POST TYPE

ARTICLE

နိုင်ငံ့ဝန်ထမ်းများ သင့်လျော်သည့် လစာရရှိရေး အစွမ်းကုန်ကြိုးစားပေးမည်ဟု ဒေါ်အောင်ဆန်းစုကြည်ဆို
နေပြည်တော်၊ ဇူလိုင် ၁၀

နိုင်ငံ့ဝန်ထမ်းများ လုပ်ခလစာအပြင် ကောင်းမွန်သည့် အထွေထွေခံစားခွင့်များ ရရှိစေရန် အစိုးရအနေနှင့် အစွမ်းကုန် ကြိုးစားဆောင်ရွက်ပေးသွားမည် ဖြစ်ကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားလိုက်သည်။

“ကျွန်မတို့ ဝန်ထမ်းတွေ သင့်လျော်မျှတတဲ့ လုပ်ခလစာ ရရှိရေး၊ ကောင်းမွန်တဲ့ အထွေထွေခံစားခွင့်တွေ ရရှိခံစားနိုင်ရေးအတွက် အစွမ်းကုန် ကြိုးစားဆောင်ရွက်ပေးသွားမှာ ဖြစ်ပါတယ်” ဟု ၎င်းက ဆိုသည်။

နေပြည်တော်ရှိ MICC2 တွင် ယနေ့ပြုလုပ်သည့် ကမ္ဘာ့နိုင်ငံများမှ ကျင့်သုံးသည့် နည်းလမ်းများကို ဆွေးနွေးလေ့လာခြင်းနှင့် ပြည်သူ့ဝန်ထမ်းများ လုပ်ငန်းခွင်တွင် စိတ်အားထက်သန်စွာဖြင့် ဝန်ဆောင်မှု ပေးနိုင်ရေး လှုံ့ဆော်မြှင့်တင်ခြင်း အသိပေးပညာမျှဝေမှု ဖိုရမ်သို့ တက်ရောက်၍ ၎င်းက အထက်ပါအတိုင်း ပြောကြားခဲ့ခြင်း ဖြစ်သည်။ 

“ပြည်သူ့ဝန်ထမ်း အများစုရဲ့ လုပ်ခလစာ နှုန်းထားဟာ အခြားနယ်ပယ်တွေက ဝန်ထမ်းတွေနဲ့ နှိုင်းယှဉ်ရင် နိမ့်ကျနေသေးတယ် ဆိုတာကို ကျွန်မတို့ သိပါတယ်။ ဒီကိစ္စနဲ့ ပတ်သက်ပြီး ပွင့်ပွင့်လင်း လင်းပဲ ပြောပြလိုပါတယ်။ ဒီပြဿနာကို  ချက်ချင်းဖြေရှင်းပေးနိုင်မယ့်နည်း မရှိသေးပါဘူး။ လုပ်ခလစာ တိုးမြှင့်ပေးတဲ့အခါမှာ လေးလေးနက်နက် စဉ်းစားသုံးသပ်ပြီး ရေရှည်တည်တံ့အောင် ဖြည်းဖြည်းချင်း တိုးမြှင့်ပေးရမှာ ဖြစ်တဲ့အပြင် နိုင်ငံတော်ရဲ့ ရသုံးမှန်းခြေငွေစာရင်း အခြေအနေနဲ့ အညီလည်း ဆောင်ရွက်ရပါတယ်” ဟု ၎င်းက ထပ်လောင်းပြောသည်။

လစာတိုးမြှင့်ရေးသည် ဝန်ထမ်းများ မျှော်လင့်သကဲ့သို့  ချက်ချင်းမဖြစ်နိုင်သေးသော်လည်း အစိုးရအနေနှင့် အခြားနည်းလမ်းများဖြစ်သော အလုပ်ခွင် ဖန်တီးခြင်း၊ မိသားစုဝင်များအတွက် နေမှုထိုင်မှု အခြေအနေများ ပိုကောင်းမွန်လာခြင်းတို့ကို ဖြစ်မြောက်ရန် ကြိုးပမ်းဆောင်ရွက်သွားမည် ဖြစ်ကြောင်း၊ လက်ရှိတွင် စတင်လုပ်နေသည့် လုပ်ရပ်တစ်ခု အနေနှင့် အဆင့်မြင့် ဝန်ထမ်းအိမ်ရာများ ဆောက်လုပ်နေပြီး နိုင်ငံတော်အပေါ် သစ္စာရှိရှိဖြင့် နှစ်ရှည်လုပ်ကိုင်ခဲ့သော အငြိမ်းစားယူမည့် ဝန်ထမ်းအားလုံး အတွက် လုံလုံခြုံခြုံ၊ သိက္ခာရှိရှိ နေထိုင်သွားနိုင်ရန် အိမ်ရာများ ဆောက်လုပ်ပေးသွားမည် ဖြစ်ကြောင်း ၎င်းက ရှင်းပြသည်။

စစ်မှန်သည့် ဒီမိုကရေစီစနစ်ကို အခြေခံသော အစိုးရအဖွဲ့ ထွက်ပေါ်လာရေးအတွက် တဖြည်းဖြည်း အသွင်ကူးပြောင်းလာသည်နှင့်အမျှ ဝန်ထမ်းအဖွဲ့အစည်းများ၏ အခန်းကဏ္ဍသည် ပိုမိုပြီး အရေးကြီးလာမည် ဖြစ်ပြီး အုပ်ချုပ်ရေးယန္တရား အဆက်ပြတ်မသွားရေး၊ အဖွဲ့အစည်း တစ်ခုလုံး၏ မှတ်တမ်းများ မမေ့ပျောက်သွားရေး၊ ဘာသာရပ်ဆိုင်ရာ ကျွမ်းကျင်မှု အပါအဝင် နိုင်ငံတော် ယန္တရားကို ဟန်ချက်ညီညီ တည်တည်ငြိမ်ငြိမ် လည်ပတ်စေရန် ကိစ္စအရပ်ရပ်ကို ပြည်သူ့ဝန်ထမ်းများကသာ ထိန်းသိမ်းထားရမည် ဖြစ်ကြောင်း ၎င်းက ထပ်လောင်းပြောသည်။

မိမိတို့နိုင်ငံသည် ထူးကဲသော နည်းပညာနှင့် လူမှုရေးဆိုင်ရာ စိန်ခေါ်မှုများနှင့် ရင်ဆိုင်နေရပြီး ယင်းစိန်ခေါ်မှုများထဲ  ရှုပ်ထွေးနက်နဲတဲ့ မူဝါဒချမှတ်မှုနှင့် အလျှော့အတင်း လုပ်ရမည့် ကိစ္စများလည်း ပါရှိနေကြောင်း၊ အခြားနိုင်ငံများတွင် ဆယ်စုနှစ်ပေါင်းများစွာ ဖြေရှင်းယူရသော  ပြဿနာများကို မြန်မာနိုင်ငံက လာမည့် နှစ်အနည်းငယ်အတွင်း ဖြေရှင်းယူရမည့် အနေအထား ရှိနေကြောင်း ၎င်းက ပြောကြားသည်။

“အခြားနိုင်ငံတွေရဲ့ အောင်မြင်မှု၊ မှားယွင်းမှုတွေကို သင်ခန်းစာယူပြီး တစ်ဖက်မှာလည်း နည်းပညာသစ်တွေ၊ တီထွင်ကြံဆမှုတွေနဲ့ အခွင့်အလမ်းတွေကို ခုန်ပျံကျော်လွှား ရှာဖွေ ကြိုးပမ်းအားထုတ် ဆောင်ရွက်ကြရမှာ ဖြစ်ပါတယ်” ဟု ၎င်းက ထပ်လောင်းပြောသည်။

ဝန်ထမ်းတစ်ဦးချင်းစီအတွက် လုပ်ရည်ကိုင်ရည်နှင့် စွမ်းရည်အလားအလာ ရှိမှုကို သုံးသပ်ပြီး ဘက်လိုက်မျက်နှာသာပေးခြင်းနှင့်  နီးစပ်သူကို ချီးမြှောက်သည့် အထင်အမြင် စိုးစဉ်းမျှပင် မရှိစေရန်  အစွမ်းကုန် ကြိုးစားရမည်ဖြစ်ကြောင်း ဝန်ထမ်းများ အနေနှင့် ခွဲခြားဆက်ဆံမှုကို မည်သည့်နည်းနှင့်မျှ မလုပ်ရန် သတိထားရမည်ဖြစ်ပြီး မည်သည့် နောက်ခံအသိုင်းအဝိုင်းမှဖြစ်စေ အကောင်းဆုံးနှင့် အတော်ဆုံး ဝန်ထမ်းလောကအတွင်း ဝင်ရောက်ပြီး အနေမြဲစေမယ့် ဝန်ထမ်းရွေးချယ်ခန့်အပ်ရေး စနစ်ကိုသာ  ကျင့်သုံးဆောင်ရွက်ရမည် ဖြစ်ကြောင်း နိုင်ငံတော်၏ အတိုင်ပင်ခံပုဂ္ဂိုလ်က ပြောကြားခဲ့သည်။