News

POST TYPE

ADVERTORIAL

ပစ္စည်းပို့ ဝန်ဆောင်မှု လုပ်ငန်းလုပ်မယ်ဆိုရင် (စဉ်းစားစရာ ကိုယ်ပိုင်စီးပွားရေး အိုင်ဒီယာ)
13-Oct-2016 tagged as


တစ်ပိုင်တစ်နိုင် လုပ်ငန်းတစ်ခု အနေနဲ့ အရင်းအနှီးလည်း သိပ်မကြီးတဲ့ ပစ္စည်းပို့ဝန်ဆောင်မှု လုပ်ငန်း လုပ်ဖို့ စဉ်းစား ကြည့်ဖူးပါသလား။

အဲ့ဒီလို လုပ်မယ်ဆိုရင် ဘယ်က စလုပ်မလဲ၊ ဘာတွေ လိုအပ်သလဲ၊ ဘယ်လိုမျိုး ပို့ရမလဲ စတဲ့ စတဲ့ သိဖို့ လိုအပ်နေတဲ့ အကြောင်းအရာတွေက အများကြီးပါ။

အဲ့ဒီလိုသိဖို့ လိုအပ်နေတာတွေထဲကမှ ပစ္စည်းပို့ ဝန်ဆောင်မှု လုပ်ငန်း လုပ်ဖို့အတွက် လိုအပ်တဲ့ အခြေခံအချက် တချို့ကို စုစည်းဖော်ပြ လိုက်ပါတယ်။

အွန်လိုင်းကနေလည်း လုပ်နိုင်တယ်

ကိုယ်ပိုင်စီးပွားရေး တစ်ခုလောက် လုပ်ကြည့်ချင်ကြတဲ့ သူတွေအထဲ အလုပ် တစ်ဖက်၊ ကျောင်း တစ်ဖက်နဲ့ အိမ်အတွက် အပိုဝင်ငွေ ရှာချင်ကြတဲ့ သူတွေလည်း ရှိကြပါတယ်။ 

ဒီလိုမဟုတ်ဘဲ ကိုယ်ပိုင် လုပ်ငန်းလေး တစ်ခုတော့ လုပ်ချင်ပါရဲ့။ အရင်းအနှီး အများကြီး မသုံးနိုင်ဘူး ဆိုတာမျိုးတွေလည်း ရှိကြမှာပါ။

ပစ္စည်းပို့ ဝန်ဆောင်မှု လုပ်ငန်းဟာ အရင်းအနှီး များများသုံး၊ နေရာ ကောင်းကောင်း တစ်ခုခုမှာ ရုံးခန်း ဒါမှမဟုတ် ဆိုင်ဖွင့်ပြီး လုပ်လို့ရသလို အရင်းအနှီး အများကြီး မရင်းနိုင်တဲ့သူတွေ၊ စီးပွားရေး လုပ်ငန်း တစ်ခုလုပ်ဖို့ နေရာ အခက်အခဲ ရှိကြတဲ့သူတွေ အနေနဲ့ အွန်လိုင်းပေါ်ကနေတစ်ဆင့်လည်း လုပ်လို့ရတဲ့ လုပ်ငန်း တစ်ခုပါ။

အရင်းအနှီး များများ မသုံးနိုင်လို့ အွန်လိုင်းပေါ်ကနေတစ်ဆင့် ကိုယ်ပိုင်လုပ်ငန်းလေး တစ်ခုလောက် လုပ်ချင်တဲ့သူတွေအတွက် သိဖို့လိုအပ်တဲ့ အချက် တချို့ကို ဖော်ပြထားတာ ဖြစ်ပါတယ်။

အဓိက အချက်

အွန်လိုင်းပေါ်ကနေ အခြေပြုပြီး ပစ္စည်းပို့ ဝန်ဆောင်မှု လုပ်ငန်း တစ်ခု လုပ်မယ်လို့ ဆုံးဖြတ်လိုက်ပြီ ဆိုပါစို့။ အဓိက အချက်က ဘာဖြစ်မလဲ။

ကိုယ့်လုပ်ငန်း ဘယ်လို လည်ပတ်မယ် ဆိုတာက လုပ်ငန်း မစခင် စဉ်းစားရမှာပါ။

ဘယ်နှရက်အတွင်း ရောက်အောင် ပို့မလဲ၊ ပိုက်ဆံကို ဘယ်လို ရှင်းမလဲ၊ ဈေးနှုန်း ဘယ်လောက်ယူမလဲ၊ ဘယ်လို နည်းလမ်းနဲ့ ပို့မလဲ စတဲ့ လုပ်ငန်းနဲ့ ပတ်သက်တာတွေကို စဉ်းစား ဆုံးဖြတ်ရမှာပါ။

ဘယ်နှရက်အတွင်း ရောက်အောင် ပို့ပေးဖို့လိုမလဲ

ပစ္စည်းပို့ ဝန်ဆောင်မှု လုပ်ငန်းတွေ အနေနဲ့ ပုံမှန်ဆိုရင်တော့ နှစ်ရက်အတွင်း၊ အလွန်ဆုံး တစ်ပတ်အတွင်း ပို့ပေးလေ့ ရှိကြပါတယ်။

ဒါကြောင့် ကိုယ်ကလည်း တခြားလုပ်ငန်းတွေထက် ပိုပြီး မြန်မြန်ဆန်ဆန် မပို့နိုင်ရင်တောင် တန်းတူလောက်တော့ ပို့နိုင်အောင် ကြိုးစားရမှာ ဖြစ်ပါတယ်။

ပိုက်ဆံ ဘယ်လိုရှင်းမလဲ

ပစ္စည်းပို့ ဝန်ဆောင်မှု လုပ်ငန်းကို ပစ္စည်း အပ်ကြတဲ့သူတွေကလည်း အထူးသဖြင့် Online Shopping တွေသာ များပါတယ်။

ဒါဆိုရင် ပစ္စည်းရဲ့ ကျသင့်ငွေကို ကိုယ့်အိတ်ထဲက အရင်စိုက်ပြီး ပစ္စည်းအပ်တဲ့ သူကို ရှင်းထားမလား၊ တစ်ဝက်ကြို ရှင်းထားတာမျိုး လုပ်မလား၊ ဒါမှမဟုတ် ကိုယ်က ပစ္စည်းပို့ပြီး ပိုက်ဆံရလာမှပဲ ပစ္စည်းအပ်တဲ့သူကို သွားရှင်းမလား ဆိုတာမျိုးကလည်း လုပ်ငန်းစမယ် ဆိုတာနဲ့ ကြိုပြီး စဉ်းစားထားရမှာပါ။

ပစ္စည်းပို့ပေးဖို့ အပ်တဲ့သူက ကိုယ်နဲ့ ပုဂ္ဂိုလ်ရေး ရင်းနှီးမှုရှိရင် ပစ္စည်းဖိုးငွေကို ကိုယ်က ကြိုပြီး စိုက်ရှင်းပေးထားရင် အလုပ်အပ်တဲ့သူရဲ့ စိတ်ကျေနပ်မှုကို ရရှိနိုင်မှာ ဖြစ်ပါတယ်။ တကယ်လို့ ပစ္စည်းအပ်တဲ့ သူတွေက ကိုယ်နဲ့ မသိတဲ့လူတွေ ဆိုရင်တော့ ဒုတိယ နည်းလမ်းဖြစ်တဲ့ တစ်ဝက် ကြိုရှင်းတာက အဆင်ပြေမှာပါ။ ပစ္စည်းပို့ပေးပြီးမှပဲ ပိုက်ဆံရှင်းပေးမယ် ဆိုရင်တော့ အလုပ် အပ်တဲ့သူတွေက သိပ်သဘောတွေ့မယ် မထင်ပါဘူး။

ဈေးနှုန်း ဘယ်လို သတ်မှတ်မလဲ

အများအားဖြင့်တော့ မြို့တွင်းကို ၁၅၀၀ ကျပ်၊ မြို့ပြင်ကို ၂၀၀၀ ကျပ် ဝန်းကျင်ယူကြပါတယ်။ ဒီတော့ ကိုယ်ကလည်း နေရာပေါ် မူတည်ပြီး ဘယ်လောက် ယူမှာလဲဆိုတာ ဆုံးဖြတ်ရမှာပါ။ ကိုယ်က ခုမှ စလုပ်ပြီး ဝန်ဆောင်ခ များများ ယူထားမယ်ဆိုရင်တော့ အရင်ရှိနေတဲ့ လုပ်ငန်းတွေနဲ့ ပြိုင်ဆိုင်ရတာ ခက်ခဲနိုင်ပါတယ်။

ဒါ့ကြောင့် ဝန်ဆောင်ခ နည်းနည်း ယူပြီး လုပ်ငန်း များများကို ဆွဲဆောင်မလား၊ ဝန်ဆောင်ခ များများ ယူမှာလား ဆိုတာလည်း စဉ်းစားရမှာပါ။

တချို့ ပစ္စည်းပို့ ဝန်ဆောင်မှု လုပ်ငန်းတွေက ပစ္စည်း အလေးချိန်၊ အရေအတွက်၊ ဆိုဒ်အကြီးအသေးပေါ် မူတည်ပြီး ဈေးနှုန်းကို ပြောင်းလဲ ကောက်ခံတာမျိုးလည်း ရှိကြပါတယ်။

အလုပ်အပ်တဲ့သူဆီ သွားယူရတဲ့ လာယူခ ယူမှာလား၊ မယူဘူးလား ဆိုတာလည်း စဉ်းစား ဆုံးဖြတ်ရမှာပါ။

ခု ပြောပြခဲ့ပြီးတဲ့ အချက်အလက်တွေက Customer သိဖို့ လိုအပ်တဲ့ အချက်အလက်တွေပါ။ ဒီလို Customer အချက်အလက်တွေအပြင် လုပ်ငန်း လည်ပတ်မှုနဲ့ ပတ်သက်ပြီး ထပ်ပြီး စဉ်းစားရမယ့် အချက်အလက်တွေ ရှိပါသေးတယ်။

ဘယ်လို နည်လမ်း အသုံးပြုပြီး ပစ္စည်းလိုက်ပို့မလဲ

လိုင်းကားနဲ့ ပို့မလား၊ အငှားကားနဲ့ ပို့မလား၊ ကိုယ်ပိုင်ကားနဲ့ ပို့မှာလား၊ စက်ဘီးနဲ့ ပို့မှာလား ဆိုတာတွေ ဆုံးဖြတ်ရမှာပါ။

လိုင်းကားနဲ့ ပို့မယ်၊ စက်ဘီးနဲ့ ပို့မယ်ဆိုရင်တော့ ပစ္စည်း အများကြီး သယ်လို့ မရတဲ့အပြင် သယ်ပိုးလို့ မလွယ်ကူတဲ့ ပစ္စည်းမျိုးပါရင်လည်း အခက် တွေ့စေနိုင်ပါတယ်။

ကိုယ်ပိုင်ကား ရှိရင်တော့ ကိုယ့်ကားနဲ့ကိုယ် ပို့ရတာ အဆင်ပြေပေမယ့် ကိုယ်ပိုင်ကား မရှိဘူးလို့ အငှားကားနဲ့ ပို့မယ်ဆိုရင် ဘယ်လို စီမံကြမလဲ။

ကိုယ်ပို့မယ့် လမ်းကြောင်းကို ကြိုတင်ဆွဲထားတာကလည်း အငှားကားနဲ့ ပို့မယ်လို့ ဆုံးဖြတ်ထားတဲ့သူတွေအတွက် နည်းလမ်းကောင်း တစ်ခုဖြစ်မှာပါ။

ဒီအတွက် ကားခကျသင့်နိုင်တဲ့ ငွေပမာဏနဲ့ ကိုယ့်အတွက်ရမယ့် ဝန်ဆောင်ခကြား အမြတ်ကျန်အောင် လမ်းကြောင်းကို တွက်ချက်နိုင်ဖို့ လိုမှာဖြစ်ပါတယ်။

ကဲ အခုဆိုရင် ဘယ်နှရက်အတွင်း ရောက်အောင် ပို့မယ်၊ ပိုက်ဆံရှင်းမယ့် ပုံစံ၊ ဈေးနှုန်းတွေ သတ်မှတ်ပြီးရုံ သာမက ပို့မယ့်နည်းလမ်းကိုပါ ဆုံးဖြတ်ပြီးပြီဆိုရင် ဘာဆက်လုပ်ရမလဲ။

ဖေစ့်ဘွတ် စာမျက်နှာ တစ်ခု ပြုလုပ်ပါ

ပစ္စည်းပို့ ဝန်ဆောင်မှုကို ပစ္စည်းအပ်ကြတဲ့သူတွေက Online Shopping အများစု ဖြစ်တဲ့အတွက် အွန်လိုင်း စာမျက်နှာ တစ်ခု ပြုလုပ်သင့်ပါတယ်။

အွန်လိုင်း စာမျက်နှာ ဆိုရာမှာလည်း မြန်မာနိုင်ငံ အခြေစိုက် Online Shopping အများစုရှိတဲ့ ဖေစ့်ဘွတ်မှာ ပြုလုပ်သင့်ပါတယ်။

အဲ့ဒီစာမျက်နှာမှာ ကိုယ့်လုပ်ငန်းနဲ့ ပတ်သက်တဲ့အကြောင်းတွေ၊ ဝန်ဆောင်ခ ဈေးနှုန်းတွေ၊ အသေးစိတ်ကို ဖော်ပြထားသင့်ပါတယ်။

တကယ်လို့ ပစ္စည်းအလေးချိန်၊ အရေအတွက်၊ ဆိုဒ်အကြီးအသေးပေါ် မူတည်ပြီး ဈေးနှုန်းကို ပြောင်းလဲ ကောက်ခံတာမျိုး လုပ်မယ်ဆိုရင်လည်း ကိုယ့်လုပ်ငန်း စာမျက်နှာမှာ အဲ့ဒီအကြောင်းကို ဖော်ပြထားသင့်ပါတယ်။

စာမျက်နှာ ပြုလုပ်ပြီးသွားရင်ရော…..။

အသိပေးပါ

ကိုယ့်လုပ်ငန်း စာမျက်နှာကို လူသိများအောင် လုပ်ရမှာပါ။

Online Shopping စာမျက်နှာတွေ၊ အရောင်းအဝယ် ပြုလုပ်နေကြတဲ့ ဂရုတွေမှာ ကိုယ့်ရဲ့ စာမျက်နှာကို မျှဝေ (Share) တာကလည်း ကိုယ့်စာမျက်နှာကို လူသိများစေနိုင်တဲ့ နည်းလမ်း တစ်ခုပါ။

ဖေစ့်ဘွတ်ကို ပိုက်ဆံပေးပြီး ကြော်ငြာ ( Boost) လုပ်ခြင်းအားဖြင့်လည်း ကိုယ့်ရဲ့ စာမျက်နှာကို လူသိအောင် လုပ်နိုင်ပါသေးတယ်။
ကိုယ့်ရဲ့ စာမျက်နှာကို လူတွေလည်း သိလာပြီ၊ ကိုယ့်လုပ်ငန်းကလည်း တဖြည်းဖြည်း ပုံပေါ်လာပြီ ဆိုပါစို့….။

ဘယ်လို အခက်အခဲတွေ ရှိလဲ

အခက်အခဲတွေလည်း ကြုံတွေ့ကြရမှာပါ။

ကြုံတွေ့နိုင်တဲ့ အခက်အခဲတွေကရော ဘာတွေဖြစ်မလဲ..?

အမြင်သာဆုံးကတော့ လမ်းပိတ်တာပါ။ လမ်းပိတ်တဲ့အတွက် ပစ္စည်းပို့တာမှာ ပုံမှန်ထက် ပိုပြီး အချိန် ယူရတာမျိုးတွေ ရှိလာနိုင်ပါတယ်။ လက်ခံမယ့်သူက အချိန် အတိအကျနဲ့ ရောက်စေချင်တဲ့အခါ ပုံမှန်ထက်ပိုပြီး အချိန်ယူ ရနိုင်ပါတယ်။

နောက်ပြီး အလုပ်အပ်တဲ့သူက ဘယ်နှရက်အတွင်း ပို့စေချင်တယ် ဆိုပေမယ့် လက်ခံမယ့်သူက အဲ့ဒီရက်အတွင်း လက်မခံနိုင်တာမျိုးလည်း ရှိပါတယ်။ ဒါမျိုးဆိုရင်တော့ အလုပ်အပ်တဲ့သူနဲ့ ဖြေရှင်းရမှာပါ။

နောက်ထပ် ကြုံနိုင်ရတာကတော့ ပစ္စည်းနဲ့ ပတ်သက်ပြီးတော့ပါ။ အထဲမှာ ဘာပစ္စည်းပါမှန်း မသိနိုင်တဲ့အတွက် စပြီး ချိတ်ဆက်ကတည်းက ဥပဒေနဲ့ မညီတဲ့ ပစ္စည်းမျိုးတွေ မပို့ပေးဘူးဆိုပြီး ပြောဆိုထားသင့်ပါတယ်။

တကယ်လို့ ကိုယ်နဲ့ မသိတဲ့၊ ရင်းနှီးမှု မရှိတဲ့သူတွေက အပ်တာဆိုရင်တော့ ပစ္စည်းထုတ်ကို ဖောက်ကြည့်တာမျိုးလည်း ရှိတယ်လို့ လက်ရှိ ပစ္စည်းပို့ ဝန်ဆောင်မှု လုပ်နေတဲ့သူတွေက ဆိုပါတယ်။

ကိုယ့်လုပ်ငန်းလေး အဓွန့် ရှည်အောင်

အရေး အကြီးဆုံးကတော့ Customer တစ်ယောက်နဲ့ ပထမဆုံး ဆက်ဆံတဲ့ အချိန်မှာ စိတ်ကျေနပ်အောင် လုပ်ပေးနိုင်ဖို့ကိုပါ။

တကယ်လို့ Customer က ကိုယ့်ရဲ့ ဝန်ဆောင်မှုကို စိတ်ကျေနပ်ခဲ့တယ်ဆိုရင် နောက်လိုအပ်တဲ့ အချိန်မျိုးမှာ ကိုယ့်ဆီကို ဦးစားပေး အနေနဲ့ အလုပ် အပ်နိုင်ပါတယ်။

ကိုယ့်လုပ်ငန်းရဲ့ စာမျက်နှာပေါ်မှာ လုပ်ငန်းနဲ့ ပတ်သက်တဲ့ အကြောင်းအရာတွေ ဖော်ပြတာမျိုး၊ စာမျက်နှာကို အသက် ဝင်နေအောင် ပို့စ်ဆက်တိုက်တင်နေတာမျိုးလည်း လုပ်သင့်ပါတယ်။

ဒါမှ ကိုယ့်လုပ်ငန်း မရပ်သေးဘူး ဆိုတာမျိုး လူတွေ သတိထားမိကြမှာပါ။

(အထက်ပါ ဆောင်းပါးအတွက် အချက်အလက်များကို ScrupulousDeliveryService မှ ကူညီဖြေကြား ထားပါတယ်။)

  • VIA
  • TAGS