News

POST TYPE

ADVERTORIAL

ဒီနှစ် တက္ကသိုလ်ဝင်တန်း စာမေးပွဲ ဖြေဆိုခွင့်ဖောင် အပယ်မခံရလေအောင်
တက္ကသိုလ်ဝင်တန်း စာမေးပွဲကြီးသည် မြန်မာနိုင်ငံတွင် ကျောင်းသား၊ ကျောင်းသူ၊ မိဘများ၊ ညီအစ်ကို၊ မောင်နှမများ၊ ဆွေမျိုးသားချင်းများ စိတ်ဝင်စားရဆုံး၊ စိတ်လှုပ်ရှားရဆုံးသော စာမေးပွဲတစ်ခု ဖြစ်နေပါသည်။ ၂၀၁၇ ခုနှစ် မတ်လ ၈ ရက်မှ ၁၇ ရက်ထိ ကျင်းပခဲ့သော တက္ကသိုလ်ဝင်တန်း သိပ္ပံတွဲ၊ ဝိပ္ပံတွဲ၊ ဝိဇ္ဇာတွဲများ ဖြေဆိုရန် တစ်နိုင်ငံလုံး အတိုင်းအတာဖြင့် ဝင်ခွင့်လျှောက်လွှာ တင်သွင်းမှုပေါင်းမှာ ၇၆၇,၄၂၂ ဦး ရှိခဲ့သော်လည်း အမှန်တကယ် ဖြေဆိုခဲ့သူပေါင်းမှာ ၇၁၆,၁၈၈ ဦးသာ ရှိခဲ့ပါသည်။ 

‘၂၀၁၈ ခုနှစ် မတ်လအတွင်း ဖြေဆိုမည့် တက္ကသိုလ်ဝင်တန်း စာမေးပွဲဖြေဆိုခွင့် လျှောက်လွှာများကို ကျောင်းဖြေရော၊ အပြင်ဖြေရော စက်တင်ဘာလ ၁ ရက်မှ ၂၉ ရက်အတွင်း မြန်မာနိုင်ငံ စာစစ်ဦးစီးဌာနသို့ အပြီးတင်သွင်းရမည်’ ဟု မြန်မာနိုင်ငံ စာစစ်ဦးစီးဌာန ညွှန်ကြားရေးမှူးချုပ် ဦးမျိုးညွှန့်က ပြောကြားခဲ့ပေသည်။ 

မြန်မာနိုင်ငံတွင် အခြေခံပညာအထက်တန်းကျောင်းများ၊ ကျောင်းခွဲများ၊ တွဲဖက်အထကကျောင်းများနှင့် (ပုဂ္ဂလိက) ကိုယ်ပိုင်အထက်တန်းကျောင်းများ တက်ရောက်နေသူများကို ‘ကျောင်းဖြေ’ ဟု သိထားကြပါသည်။ တက္ကသိုလ်ဝင်တန်း စာမေးပွဲမှာ တစ်နှစ်ကျရှုံးပြီး အဆိုပါကျောင်းများ မတက်ဘဲ စာဖြေသူများကို ‘အပြင်ဖြေ’ ဟု နားလည်ထားကြပါသည်။ 

ကျောင်းဖြေသူများသည် မိမိတို့ အတန်းပိုင် ဆရာ၊ ဆရာမများမှတစ်ဆင့် သက်ဆိုင်ရာ ကျောင်းအုပ်ကြီးများထံသို့ လည်းကောင်း၊ အပြင်ဖြေသူများသည် မိမိတို့၏ သက်ဆိုင်ရာ မြို့နယ်ပညာရေးမှူး ရုံးများတွင် လည်းကောင်း၊ စာမေးပွဲဖြေဆိုခွင့်ဖောင်နှင့် ကတ်ပြားများကို သတ်မှတ်ထားသော ရက်အတွင်း အချိန်မီ တင်ရမည် ဖြစ်သည်။ 

စာမေးပွဲကြီး ဖြေဆိုမည့် လျှောက်လွှာရှင်များသည် မိမိတို့ ဖြေဆိုကြမည့် ဘာသာတွဲများ ၁၊ ၅၊ ၆၊ ၇၊ ၈ ဖြစ်ပါက အစိမ်းရောင် ဝင်ခွင့်လျှောက်လွှာနှင့် ကတ်ပြားအစိမ်းကို လည်းကောင်း၊ ဘာသာတွဲ ၂၊ ၃၊ ၄ ဖြင့် ဖြေဆိုမည့်သူများသည် ပန်းရောင်ဝင်ခွင့် လျှောက်လွှာနှင့် ပန်းရောင် ကတ်ပြားများဖြင့် လည်းကောင်း တက္ကသိုလ်ဝင်တန်း စာမေးပွဲဖြေဆိုခွင့်ကို ဖြည့်စွက်တင်ထားရမည် ဖြစ်ပါသည်။ 

ပြည်နယ်နှင့် တိုင်းဒေသအသီးသီးရှိ အခြေခံပညာဦးစီးဌာန လက်အောက်ရှိ မြို့နယ်ပညာရေးမှူးနှင့် ကျောင်းအုပ်ကြီးများအား မြန်မာနိုင်ငံ စာစစ်ဦးစီးဌာန အနေနှင့် စာမေးပွဲဖြေဆိုခွင့် လျှောက်လွှာတစ်စုံလျှင် ၂၀၀ ကျပ်၊ ငွေသွင်းတံဆိပ်ခေါင်းခ ၇၀၀ ကျပ်တို့ဖြင့် ရောင်းချရန် ညွှန်ကြားထားခဲ့သော်လည်း လက်တွေ့တွင် စာရေးသူ အနေနှင့် လေ့လာကြည့်ရာ ရန်ကုန်တိုင်းဒေသကြီးရှိ မြို့နယ်ပညာရေးမှူးရုံးများနှင့် အခြေခံပညာ အထက်တန်းကျောင်းများတွင်ပင် စာမေးပွဲဖြေဆိုခွင့် လျှောက်လွှာရောင်းချသည့် နှုန်းထားများ မတူညီကြောင်း သိရှိရပေသည်။ ဥပမာပြရလျှင် ရန်ကုန်တိုင်းဒေသကြီးရှိ သင်္ဃန်းကျွန်းမြို့နယ်တွင် လျှောက်လွှာတစ်စုံလျှင် ၃၀၀ ကျပ် (တံဆိပ်ခေါင်းခမပါ)၊ ဒေါပုံမြို့နယ်တွင် ၅၀၀ ကျပ် (တံဆိပ် ခေါင်းခမပါသေး) ဖြင့် စာရေးသူကိုယ်တိုင် ဝယ်ယူခဲ့ပါသည်။ အခြေခံပညာကျောင်း၊ အထက်တန်းကျောင်း အတော်များများတွင် စာမေးပွဲ ဖြေဆိုခွင့်ဖောင်နှင့် တံဆိပ်ခေါင်းခများအတွက် ကျောင်းသား၊ ကျောင်းသူတစ်ဦးလျှင် ၁၅၀၀ ကျပ် ကောက်ခံနေသော ကျောင်းများရှိသလို ၁၇၀၀ ကျပ် ကောက်ခံနေသော ကျောင်းများလည်း ရှိနေပါသည်။ 

တက္ကသိုလ်ဝင်တန်း စာမေးပွဲကြီး ဖြေဆိုခွင့် ကတ်ပြားများကို စာမေးပွဲကြီးမတိုင်မီ ၁၀ ရက်အလိုတွင် ကျောင်းဖြေဆိုသူများအတွက် မိမိတို့ တက်နေသည့် အခြေခံပညာ အထက်တန်းကျောင်းများ (အထက) တွဲဖက်ကျောင်းခွဲများ၊ (ပုဂ္ဂလိက) ကိုယ်ပိုင်အထက်တန်းကျောင်းများတွင် ထုတ်ယူနိုင်ပြီး အပြင်ဖြေများသည် မိမိတို့ စာမေးပွဲဖြေဆိုခွင့် တင်ထားခဲ့သည့် မြို့နယ်ပညာရေးမှူးရုံးများတွင် ထုတ်ပေးနေသည်မှာ ဆယ်စုနှစ်ပေါင်းများစွာ ရှိခဲ့ပေသည်။ ထိုစာမေးပွဲဖြေဆိုခွင့် ကတ်ပြားများကို ထုတ်ယူပြီးတိုင်း မိတ္တူတစ်စုံလောက် အနည်းဆုံး ကူးယူထားကြပါရန် စာရေးသူအနေနှင့် အကြံပြု တိုက်တွန်းလိုပါသည်။ 

ထိုစာမေးပွဲ ဖြေဆိုခွင့် အစိမ်းရောင်ကတ်ပြား (သို့မဟုတ်) ပန်းရောင်ကတ်ပြားကို တက္ကသိုလ်ဝင်တန်း စာမေးပွဲကြီး ဖြေဆိုသည့်နေ့တွင် သက်ဆိုင်ရာ စာစစ်ဌာနရှိ တာဝန်ခံက သိမ်းဆည်းလေ့ ရှိသည်။ အချို့စာစစ်ဌာနများတွင်မူ စာမေးပွဲကြီး ဖြေဆိုပြီးစီးသည်မှ သိမ်းဆည်းလေ့ ရှိပါသည်။  
စာရေးသူအနေနှင့် ပညာရေးလောကကို နှစ် ၃၀ လောက် ဖြတ်သန်းခဲ့သဖြင့် ကျောင်းသား၊ ကျောင်းသူများ၏ ဘဝကို ပုံဖော်ရာတွင် အရေးအကြီးဆုံး ဖြစ်နေသည့် တက္ကသိုလ်ဝင်တန်း စာမေးပွဲကြီး စာမေးပွဲဖြေဆိုခွင့် ဖောင်များ တင်ကြရာတွင် သတိပြုစရာ ဆောင်ရန်၊ ရှောင်ရန်တို့ကို တင်ပြလိုပါသည်။ 

၁။ စာဖြေမည့်သူတိုင်းသည် မိမိတို့၏ ဖခင်နှင့် မိခင်တို့၏ အမည်များကို အင်္ဂလိပ်လို ရေးသားရာတွင် စကားလုံးတိုင်းကို စာလုံးကြီး Capital Letter ဖြင့် ရေးသားရပါမည်။ ဥပမာ U MAUNG TUN, DAW HTAY HTAY WIN

၂။ ဓာတ်ပုံကို ကာလာ အရောင် သို့မဟုတ် အဖြူအမည်း တစ်လက်မ (သို့မဟုတ်) တစ်လက်မခွဲပတ်လည် အရွယ်အစား ပေးရမည်။

၃။ ဖြေဆိုမည့်သူသည် နှစ်တက် (Fresher) ဖြစ်လျှင် နဝမတန်း ခုံအမှတ်နှင့် ဖြေဆိုအောင်မြင်ခဲ့သည့် ကျောင်းအမည်နှင့် မြို့နယ်တို့ကို တိတိကျကျ ဖော်ပြရပါမည်။ ဖြေဆိုသည့် နှစ်ကျ (Repeater) ဖြစ်လျှင် နဝမတန်း ခုံအမှတ်အပြင် မနှစ်က ဖြေဆိုခဲ့သည့် တက္ကသိုလ်ဝင်တန်း ခုံအမှတ်၊ စာစစ်ဌာန၊ မြို့နယ်တို့ကို ဖြည့်စွက်ရပါမည်။ အကြောင်းအမျိုးမျိုးကြောင့် ခုံအမှတ်တို့ကို မေ့လျော့နေပါက မိမိဖြေဆိုခဲ့သည့် မြို့နယ်ပညာရေးမှူးရုံးတွင် စုံစမ်းနိုင်ပါသည်။ 

၎။ ဖြည့်စွက်ချက်၊ အမှားအယွင်းရှိပါက တာဝန်ရှိသူမှ လိုအပ်ချက်များကို တောင်းခံနိုင်ရန် ဖောင်၏ ဖုန်းနံပါတ်ဖြည့်သည့် နေရာတွင် မိမိအား အချိန်မရွေး ဆက်သွယ်နိုင်သည့် ဖုန်းနံပါတ်ကိုသာ ဖြည့်စွက်ပေးစေချင်ပါသည်။ 

၅။ ဖြေဆိုခွင့် ကတ်ပြားအစိမ်း (သို့မဟုတ်) ပန်းရောင်ပေါ်တွင် မည်သည့်အမှားကိုမျှ မပြုလုပ်ရပါ။ မှားခဲ့သော အမှားနေရာကို Correction Pen ဖြင့် လုံးဝမပြင်ရပါ။ အရမ်းအရေးကြီးပါသည်။ 

၆။ ထို့ကြောင့် မူရင်းဖောင်ကို မဖြည့်မီ အရင်ဦးဆုံး ဖောင်စာရွက်နှင့် ကတ်ပြားတို့ကို မိတ္တူကူးထားသင့်ပါသည်။ ပြီးမှ ထိုမိတ္တူစာရွက်ပေါ်တွင် တိတိကျကျ ဖြည့်စွက်ပြီး နားလည်တတ်ကျွမ်းသူ တစ်ဦးဦး ဆရာ၊ ဆရာမ၊ ကျောင်းစာရေး၊ မြို့နယ်ပညာရေးမှူးရုံးမှ အတွေ့အကြုံရှိသူ တစ်ဦးဦးအား ပြသပြီးမှ မူရင်းဖောင်နှင့် ဖြေဆိုခွင့် ကတ်ပြားပေါ်တွင် ဖြည့်စွက်သင့်ပါသည်။ 

၇။ မိမိဖြေဆိုရမည့် ဘာသာတွဲကို ဖြည့်စွက်ရာတွင် ဇီဝဗေဒ ဘာသာတွဲ၊ ဘောဂဗေဒ ဘာသာတွဲ စသည်တို့ကို မှားယွင်းစွာ မဖြည့်မိဖို့ လုံးဝ၊ လုံးဝ အရေးကြီးပါသည်။ 

‘သတိမမူ ဂူမမြင်’ သတိမူက မြူမှုန်ကိုပင် မြင်နိုင်စွမ်း ရှိသည်ကို အနာဂတ်လူငယ် ကျောင်းသားတိုင်း သတိချပ်သင့်လှပေသည်။ မိမိတို့ အနာဂတ် ရည်မှန်းချက်များ လှမ်းတက်ရာတွင် လှေကားထစ်သဖွယ် ဖြစ်သည့်၊ ပေါင်းကူးတံတားတစ်ခု ဖြစ်သည့် တက္ကသိုလ်ဝင်တန်း စာမေးပွဲဖြေဆိုခွင့်ဖောင်နှင့် ကတ်ပြားကို ပြီးစလွယ် ပေါ့ပေါ့တန်တန် သဘောထားပြီး ဖြည့်စွက်ခဲ့ပါက နှောင်း နောင်တရမည့်သူမှာ မိမိသာ ဖြစ်ပါကြောင်း၊ ထို့ကြောင့် အသိ၊ သတိနှင့်ယှဉ်ကာ ‘ဆောင်ရန်၊ ရှောင်ရန်’ တို့ကို အလေးထားဂရုပြုပြီး လုပ်ဆောင်သင့်ပါကြောင်း လေးလေးနက်နက် တိုက်တွန်းအပ်ပါသည်။
       
ဂျက်ဖရီတင်အုန်း (ရန်ကုန်စက်မှုတက္ကသိုလ်)