News

POST TYPE

ABOUT US

လမ်းဘေးက ရတနာသိုက်များ
13-Nov-2016 tagged as


“တစ်ခုခု မပြောခင် အရင်စဉ်းစားပါ။ တစ်ခုခု မစဉ်စားခင် အရင် စာဖတ်ပါ”ဟု အမေရိကန် စာရေးသူ ဖရန်လီဘိုးဝစ်ဇ်က ပြောဖူးပါသည်။ စဉ်းစား တွေးကြံမှုများတိုင်းသည် အပေါင်းလက္ခဏာ ဆောင်သော အရွေ့တစ်ခုကို ဦးတည်စေဖို့ရာ လေ့လာမှု ပြုရပါသည်။ ခေတ်အဆက်ဆက် ပြောင်း၍ ပုံသဏ္ဍန်များ ပြောင်းသွားပါသော်လည်း စာအုပ်များသည် လေ့လာမှုများ၏ အဓိက ရင်းမြစ်နေရာ တစ်ခု ဖြစ်နေဆဲဖြစ်သည်။ သုတ သတင်း အချက်အလက်များ၊ ရသ ခံစားမှုများကို အဆိုပါ စာအုပ်များက ပေးနိုင်၏။ အခက်အခဲကား ထိုစာအုပ်များကို နေ့စဉ် လက်လုပ်လက်စားများက ဝယ်ဖို့ မတတ်နိုင်ကြခြင်း ဖြစ်သည်။ စာအုပ်ဆိုင်ကြီးများတွင် တင်ထားသော စာအုပ်များက နွမ်းပါးသော လူတန်းစားအတွက် နေ့စဉ် ဆန်၊ ဆီ၊ ဟင်းချက်စရာလောက် အရေးကြီး စာရင်းတွင် မပါဝင်နိုင်ပါ။ ငှားရမ်းခ သက်သာသော စာအုပ်ဆိုင် အများစုကလည်း အပျင်းပြေဖတ် စာအုပ်များလောက်ကိုသာ ဝယ်တင်နိုင်သည်။ ထို့ကြောင့် စာကြည့်တိုက်များကို သွားရန် လိုအပ်ခြင်း ဖြစ်သည်။


“စာကြည့်တိုက်လို့ ပြောလိုက်ရင် စကားလုံးက အလိုလို ခန့်ထည်သလို ဖြစ်နေပြီး ရပ်ကွက်ထဲ၊ ရွာထဲနေတဲ့ လူအများစုနဲ့ ကျောင်းသား ကလေးတွေက မသွားဖြစ်တော့ဘူး။ တချို့ ကျောင်းစာကြည့်တိုက်တွေဆိုရင် တံခါးကြီး သော့ခတ်ထားတာ။ စာကြည့်တိုက် သုံးဖို့ကိုလည်း ပညာ မပေး၊ အားမပေးထားဘူး။ ကလေးတွေကလည်း ကြာတော့ စိတ်မဝင်စားတော့ဘူး”ဟု ရန်ကုန် အခြေစိုက် ပရဟိတ လူငယ်များ ကွန်ရက်မှ ဦးဆောင်ပါဝင်နေသူ တစ်ဦးက ထောက်ပြသည်။ ရန်ကုန် အခြေစိုက် ပရဟိတ လူငယ်များ ကွန်ရက်သည် ပညာရေး အထောက်အကူပြု ပရဟိတ လုပ်ငန်းများတွင် တက်ကြွစွာ ပါဝင်လေ့ရှိပြီး We Read, We Share ဟု အမည်ပေးထားသည့် စာဖတ်မှု မြှင့်တင်ရေး လှုပ်ရှားမှု တစ်ရပ်ကိုလည်း ပြုလုပ်နေလျက် ရှိသည်။ သူတို့လှုပ်ရှားမှုက စာအုပ်ဝယ်ရန်၊ စာကြည့်တိုက် သွားရန် အဆင်မပြေသေးသော အသားမကျသေးသော ရပ်ရွာများမှ ပြည်သူများ၊ ကျောင်းသားကလေး သူငယ်များ၏ လက်တစ်ကမ်းကို စာအုပ်များ လွယ်လွယ်ကူကူ ရောက်စေရန်ဖြစ်သည်။ လှပစွာ ဆင်ယင်ထားသော စာကြည့်တိုက် သတ္တုပုံးလေးများကို လူကြီး ဖတ်ရန် သုတရသများ၊ ကလေး ဖတ်ရန် ရောင်စုံပုံနှိပ် ကာတွန်း စာအုပ်များ၊ ကလေးဂျာနယ် မဂ္ဂဇင်းများ ထည့်ပေးပြီး ငှားပေးခြင်း ဖြစ်သည်။ ကိုယ်တိုင်ယူ၊ ကိုယ်တိုင်ဖတ်၊ ကိုယ်တိုင်ပြန်အပ်၊ သဒ္ဒါပေါက်လျှင် စာအုပ်များကို ကိုယ်တိုင် လှူနိုင်ပါသည်။


ရန်ကုန်အခြေစိုက် ပရဟိတ လူငယ်များ ကွန်ရက်၏ We Read, We Share စာကြည့်တိုက် လှုပ်ရှားမှုလေး မဖြစ်ခင်ကတည်းက “ဖတ်ပြီးပြန်ထား”ဟု အမည်ရသည့် စာကြည့်တိုက်မှူးမဲ့၊ စောင့်ကြည့်သူမဲ့ စာကြည့်တိုက်ပုံးကလေးများ ရှိနှင့်ပြီးသား ဖြစ်သည်။ မည်သည့် နိုင်ငံခြား အထောက်အပံ့ Project များမှ ရလာသည့် ဝင်ငွေများ မပါဘဲ မိမိတို့ စိုက်ထုတ် မတည်ပြီး စတင်ခဲ့သော စာပေဒါန တစ်ရပ် ဖြစ်ကြောင်း “ဖတ်ပြီးပြန်ထား”လှုပ်ရှားမှု၏ လူမှုကွန်ရက် Facebook စာမျက်နှာတွင် ဖော်ပြထားသည်။ ရောင်းသူမဲ့ အအေးဆိုင်များ သတင်းကို လူမှုကွန်ရက်များတွင် တွေ့လာပြီးနောက် စာအုပ်များကိုလည်း မိမိ ကိုယ်တိုင်ယူပြီး ကိုယ်တိုင် ပြန်အပ်သည့်စနစ်ဖြင့် စာကြည့်တိုက်ပုံးလေးများကို ထူထောင်ကြည့်မည်ဟု စိတ်ကူးရခဲ့ကြောင်း “ဖတ်ပြီးပြန်ထား” စာကြည့်တိုက်လေးများတွင် ဦးဆောင်ပါဝင်သူ တစ်ဦးဖြစ်သည့် ဒေါက်တာ ထက်နေလင်းဦးက အပတ်စဉ်ထုတ် ဂျာနယ်တစ်စောင်နှင့် တွေ့ဆုံမေးမြန်းခန်းတွင် ပြောကြားခဲ့ပါသည်။ လူထု စာ များများ ဖတ်ရန်၊ စောင့်ကြည့်သူ မပါသည့် စာကြည့်တိုက်မျိုးနှင့် လူထုက အဆင်သင့်ဖြစ်ပြီလော ဆိုသည်ကို စောင့်ကြည့်ရန်၊ လူထုအတွက် လူထုက ဆောင်ရွက်သည့် လှုပ်ရှားမှု တစ်ရပ်ဖြစ်လာဖို့ ရည်ရွယ်ကြောင်း ၎င်းက ရည်ရွယ်ချက်များကို ရှင်းပြသည်။

 

“ဖတ်ပြီး ပြန်ထား စာကြည့်တိုက်လေးတွေ ပုံစံကို သဘောကျမိတယ်။ ဒါကြောင့် သူတို့လှုပ်ရှားမှုရဲ့ တာဝန်ရှိသူတွေကို ခွင့်ပြုချက် တောင်းပြီး ကျွန်တော်တို့လည်း ခုလိုမျိုး စာကြည့်တိုက်ပုံးကလေးတွေ လိုက်ထောင်ဖြစ်တယ်။ လောလောဆယ် ရန်ကုန်မှာ ငါးလုံးနဲ့ မအူပင်မြို့နယ်က လက်ပံကုန်းရွာမှာ တစ်လုံး စမ်းပြီးတော့ ထောင်ထားပါတယ်။ ရန်ကုန်က နှစ်လုံးနဲ့ ရွာက တစ်လုံးကတော့ လည်ပတ်နေပါပြီ။ ငှားတဲ့သူတွေ လာကြပါတယ်”ဟု ရန်ကုန် အခြေစိုက် ပရဟိတ လူငယ်များ ကွန်ရက်က ကိုမောင်မောင်ငယ်က ပြောကြားသည်။ မြို့ပေါ်တွင် ထောင်ထားသော စောင့်ကြည့်သူမဲ့ စာကြည့်တိုက်များကို အများက နှစ်ခြိုက်ကြကာ ငှားရမ်းကြပြီး ပြန်လာမထားကြတာလား၊ ဖတ်လို့ မပြီးတာလား မသဲကွဲဘဲ အချို့ စာအုပ်များ ပြန်မလာသဖြင့် စာအုပ် လိုအပ်ချက် ရှိကြောင်း ၎င်းက ထောက်ပြသည်။ ကျေးရွာများတွင် တည်ထားသော အဆိုပါ စာကြည့်တိုက်ပုံးလေးများကတော့ အောင်မြင်သည်။ ကလေးများ ပျော်ရွှင်စွာ စာအုပ်ယူကြ၊ ပြန်လာအပ်ကြသည့် ဓာတ်ပုံများကို အဆိုပါ လှုပ်ရှားမှုများ၏ လူမှုကွန်ရက် မီဒီယာများပေါ်တွင် တွေ့ရသည်။


မိမိတို့ ရပ်ရွာနားတွင် ယခုလို စာကြည့်တိုက်လေး လာထောင်ထားသောကြောင့် နှစ်သက်မိကြောင်း၊ အားလျှင် စာဖတ်နိုင်တော့မည် ဖြစ်ကြောင်း၊ တတ်နိုင်သမျှ မိမိတို့လည်း စောင့်ရှောက်မည်ဖြစ်ကြောင်း ရွှေပြည်သာမြို့တွင် စိုက်ထူထားသည့် အခမဲ့ စာကြည့်တိုက်ပုံးလေး အနီးတွင် ဆိုင်ကယ် ကယ်ရီဆွဲသည့် အမျိုးသား တစ်ဦးက ဆိုသည်။ ရန်ကုန် အခြေစိုက် ပရဟိတ လူငယ်များ ကွန်ရက်မှ ကိုမောင်မောင်ငယ်ကတော့ လက်ရှိ ထောင်ထားသော အခမဲ့ စာကြည့်တိုက်ပုံးလေးများ၏ ရေရှည် ရလဒ်ကို စောင့်ကြည့်ကာ ကျေးလက်ဒေသများတွင် ရပ်ရွာများနှင့် ပူးပေါင်းပြီး အလားတူ စာကြည့်တိုက်များ တိုးချဲ့ သွားမည်ဖြစ်ကြောင်း ပြောပြသည်။ “လောလောဆယ် လိုတာကတော့ စာအုပ်တွေပါပဲခင်ဗျာ။ ကိုယ်ဖတ်ပြီးသား စာအုပ်လေးတွေကို ကျွန်တော်တို့ကို လာလှူပေးပါ။ အလျဉ်းသင့်တဲ့ စာကြည့်တိုက် ပုံးတွေထဲကို ထည့်ပေးပါ့မယ်”ဟု We Read, We Share လှုပ်ရှားမှုမှ ကိုမောင်မောင်ငယ်က ဆိုသည်။ “ဖတ်ပြီးပြန်ထား” စာကြည့်တိုက်များ လှုပ်ရှားမှုကတော့ ၎င်းတို့၏ စာကြည့်တိုက်ပုံးလေးများထဲသို့ စာအုပ် ထည့်သွားပြီး လှူနိုင်ကြောင်း၊ အမှတ်တရ Selfie ဓာတ်ပုံများဆွဲကာ လူမှုကွန်ရက်သို့ တင်ပေးနိုင်ကြောင်း အများပြည်သူ ပါဝင်သည့် နည်းစနစ်ကို အသုံးပြုကာ စာအုပ် အလှူခံသည်ကို ၎င်းတို့ လူမှုကွန်ရက် စာမျက်နှာအရ သိရှိရသည်။


မိမိတို့ ဖတ်ပြီးသား စာအုပ်လေးများကို လှူဒါန်းလိုသည်ဖြစ်ပါက “ဖတ်ပြီးပြန်ထား” စာကြည့်တိုက်လေးများ ပုံးကလေးများထဲသို့ ဖြစ်စေ၊ ရန်ကုန် အခြေစိုက် ပရဟိတ လူငယ်များ ကွန်ရက်၏ We Read, We Share စာကြည့်တိုက်ပုံးပြာလေးများထဲသို့ ဖြစ်စေ မိမိအမည်၊ ဖုန်းနံပါတ်စသည်တို့ ရေးပြီး သွားထည့်ပြီး လှူနိုင်ပါသည်။ စာအုပ်တွေ ခိုးမှာ မကြောက်ဘူးလားဟု ဝိုင်းမေးကြကြောင်း စာကြည့်တိုက်ပုံး တစ်လုံးအတွက် စေတနာ့ဝန်ထမ်းလုပ်ပေးနေသူ ကိုပြောင်ကြီးက ပြန်လည် ဖောက်သည်ချသည်။ “စာအုပ်တွေကို မခိုးရက်အောင် စတစ်ကာလေးတွေ ကပ်ထားပြီး၊ အတွင်းစာမျက်နှာ အလွတ်တွေမှာလည်း စာကြည့်တိုက်ပိုင် ဖြစ်တဲ့အကြောင်း မည်သည့် နည်းနှင့်မဆို ရရှိပါက ပြန်လာပေးဖို့ အကြောင်း ကျွန်တော်တို့ တံဆိပ်တုံး ထုပြီး သတိပေးထားပါတယ်”ဟု ရွှေပြည်သာမြို့သစ်၊ ရန်ကုန်တွင် တည်ထားသော We Read, We Share စာကြည့်တိုက်ပုံးလေး တစ်လုံးအတွက် စေတနာ့ဝန်ထမ်း လုပ်နေသည့် ကိုပြောင်ကြီးက ရှင်းပြသည်။ အများပြည်သူ ပါဝင်သော စာကြည့်တိုက် လှုပ်ရှားမှုလေးများ အောင်မြင်ကြပါစေ။


သန့်ဇင်စိုး


  • VIA
  • TAGS