News

POST TYPE

ABOUT US

ထားဝယ် နှစ်ကျိပ်ရှစ်ဆူဘုရားများတွင် ရပ်ကွက်အမည် ထားဝယ်လို မရေးရ၊ ပြည်ထဲရေးက ထုတ်ပြန်ထားသည့် အမည်အတိုင်းသာ ရေးရမည်
20-Nov-2018
ထားဝယ်၊ နိုဝင်ဘာ ၁၉

ထားဝယ်တန်ဆောင်တိုင်ပွဲတော်တွင် ပူဇော်ခံမည့် နှစ်ကျိပ်ရှစ်ဆူဘုရားများတွင် ရပ်ကွက်/ကျေးရွာအမည်များကို ပြည်ထဲရေးဌာနမှ ထုတ်ပြန်ထားသော အမည်အတိုင်းသာ ရေးသားဖော်ပြရမည်ဟု ညွှန်ကြားထားကြောင်း ထားဝယ်မြို့နယ် အုပ်ချုပ်ရေးမှူးထံမှ သိရသည်။

တနင်္သာရီတိုင်းဒေသကြီးအစိုးရအဖွဲ့၏ ညွှန်ကြားချက်အရ ထားဝယ်မြို့နယ်အတွင်းရှိ ရပ်ကွက်/ကျေးရွာအုပ်စု အုပ်ချုပ်ရေးမှူးအားလုံးကို နိုဝင်ဘာလ ၁၅ ရက်တွင် ထပ်ဆင့်ညွှန်ကြားထားခြင်းဖြစ်ကြောင်း မြို့နယ်အုပ်ချုပ်ရေးမှူးက ပြောသည်။

ညွှန်ကြားစာတွင် “နှစ်ကျိပ်ရှစ်ဆူ ဘုရားများတွင် အသုံးပြုသည့် ရပ်ကွက်/ ကျေးရွာအမည်များကို ပြည်ထဲရေးဌာနမှ ထုတ်ပြန်ထားသော တိုင်းဒေသကြီး/ ပြည်နယ်များနှင့် နေပြည်တော်အတွင်းရှိ ခရိုင်/မြို့နယ်၊ မြို့/ရပ်ကွက်/ကျေးရွာ အုပ်စုနှင့် ကျေးရွာများ ပြန်တမ်းစာအုပ်ပါ အမည်အတိုင်းသာ သုံးနှုန်းစေရန်”ဟု ပါရှိသည်။

“အစိုးရအဖွဲ့က ပြည်ထဲရေး ရပ်ကွက်အမည်ပဲ ထည့်ခိုင်းတာလေ၊ ထားဝယ်လိုမျိုးလည်း (ရေးလို့) မရဘူး။ ထားဝယ်လိုလို မြန်မာလိုလို ရောနေမှာ စိုးလို့ပါ။ အခေါ်အဝေါ်တွေလွဲမှာစိုးလို့” ဟု မြို့နယ်အုပ်ချုပ်ရေးမှူးက ပြောသည်။

ထားဝယ်တန်ဆောင်တိုင် နှစ်ကျိပ်ရှစ်ဆူဘုရားများ မြို့တွင်းသို့ ဒေသစာရီ လှည့်လည်ပူဇော်ခံရာတွင် ဘုရားရှေ့ရှိ မီးလှည်းတွင် သက်ဆိုင်ရာ ရပ်ကွက်အမည်များကို ထားဝယ်လိုရေးသားမှုကို ရပ်ကွက်အချို့က လွန်ခဲ့သည် ဆယ်နှစ်ကျော်မှစတင် ပြုလုပ်လာကြခြင်းဖြစ်သည်။

ယခင်က ရှေးလူကြီးသူမများလည်း ဘုရားလှည့်ရာတွင် ရွာအမည်များကို ယင်းသို့ ထားဝယ်လို ရေးသည်ကို မြင်ဖူးခဲ့ကြောင်း လွန်ခဲ့သည့် ၁၁ နှစ်မှစပြီး ဘုရားလှည့်ပွဲတွင် ထားဝယ်လိုရေးခဲ့သည့် အိုးလုပ်အရှေ့ရပ်ကွက်၏ ယခုနှစ်ဘုရားပွဲ ကျင်းပရေး ကော်မတီဥက္ကဋ္ဌ ဦးစိုးအောင်က ပြောသည်။

ယခုနှစ်တွင်လည်း ရပ်ကွက်အချို့က ဘုရားရှေ့မီးလှည်းတွင် ရပ်ကွက်အမည်ကို ထားဝယ်လို ရေးသားထားကြပြီးဖြစ်သည်။

အိုးလုပ်ပြင်ရပ်ကွက်ဘုရားတွင်လည်း ယခုနှစ်၌ ဘုရားမီးလှည်းတွင် “အိုးလောက်ပန်”၊ သပိတ်တွင် “လှူဂေ့ဇို့”စသည်တို့ ရေးထားပြီး ထားဝယ်ဒေသခံများက ထားဝယ်လို ရေးထားသည်ကိုမြင်လျှင် ပြုံးပျော်ကြပြီး ယင်းသို့ ပျော်နေသည်ကို မြင်လို၍ ရေးခြင်းဖြစ်ကြောင်း ဦးစိုးအောင်က ပြောသည်။

“အစိုးရကို စော်ကားတာမှ မဟုတ်တာ၊ လုပ်မယ်၊ ရိုင်းစိုင်းတဲ့စကားလုံးတွေမှ မဟုတ်တာ၊ လာတားရင်တော့ ဖြုတ်ရမှာပေါ့လေ၊ ဘာထိခိုက်လဲလို့တော့ မေးချင်တယ်”ဟု ဦးစိုးအောင်က ပြောသည်။

အချို့ဘုရားများမှာ ဘုရားလှည့်ရန် ရက်နီးကပ်နေပြီဖြစ်သည့်အတွက် ရပ်ကွက်အမည်ပြန်ပြင်ရန် မဖြစ်နိုင်တော့ဟု ပြောကြသည်။

ထားဝယ်လိုမထည့်ရဆိုလျှင် နောက်နှစ်တွင် ဘုရားကြီးဂေါပကကတစ်ဆင့် ကြိုပြောသင့်ပြီး အများက ထားဝယ်လိုမထည့်လျှင် ကိုယ်လည်း ထည့်မည်မဟုတ်ကြောင်း ရပ်ကွက်အမည်ကို “ဗြို့ထဲဝါ”ဟု ရေးထားပြီးဖြစ်သည့် မြို့တွင်းရပ်ကွက် နှစ်ကျိပ်ရှစ်ဆူဘုရား ဂေါပကဥက္ကဋ္ဌ ဦးဖေသိန်းဝင်းက ပြောသည်။

“ထားဝယ်လိုနဲ့ ရေးထားတာကို ပြန်ပြင်ဖို့တော့ မရှိဘူး။ အခုဆိုရင် ရက်နီးနေပြီဖြစ်လို့ ပြန်ပြင်ဖို့က အခက်အခဲရှိတယ်”ဟု ဦးဖေသိန်းဝင်းက ပြောသည်။

ထားဝယ်လိုရေးခြင်းကို ကန့်သတ်မှု တားမြစ်မှုအား ထားဝယ်မြို့ခံအချို့က မနှစ်မြို့ကြပေ။

ထားဝယ်စာပေနှင့် ထားဝယ်ယဉ်ကျေးမှုကို ပြန်လည်ဖော်ထုတ်နေကြချိန်၊ ထားဝယ်စာ၊ ထားဝယ်စကားကို စာသင်ကျောင်းများတွင် သင်ကြားနိုင်ရေးအထိ ကြိုးပမ်းနေချိန်တွင် ထားဝယ်ပွဲတော်တွင် ထားဝယ်လို မရေးသားကြခြင်းက မဖြစ်သင့်ဟု ဆိုကြသည်။

“အဲလို ကန့်သတ်လိုက်တာကို မကောင်းဘူးလို့ မြင်တယ်။ ထားဝယ်ရိုးရာဆိုတာ ရှိပြီးသား၊ ထားဝယ်လူမျိုးဆိုတာလည်း အရင်ကတည်းက ရှိပြီးသား၊ ထားဝယ်သူ၊ ထားဝယ်သားပျောက်မှ ထားဝယ်စကားပျောက်မယ်။ မြန်မာစာရော၊ ထားဝယ်လိုရော နှစ်ခုလုံးရေးသင့်တယ်”ဟု ကရပ်ပြင်ရပ်ကွက်နေ ဦးလှမိုးက ပြောသည်။

ထားဝယ် တန်ဆောင်တိုင်နှစ်ကျိပ် ရှစ်ဆူ ဘုရားလှည့်ပွဲကို တန်ဆောင်မုန်း လဆန်း ၁၄ ရက်(နိုဝင်ဘာလ ၂၁ ရက် နေ့ ညတွင်) နှစ်ကျိပ်ရှစ်ဆူ လှည့်လည်ပူဇော်ခံသည့် လမ်းတစ်လျှောက်တွင် ဘာသာရေးနှင့် မသက်ဆိုင်သော သီချင်းများ မဖွင့်ရေး၊ အဂါရဝ ဖြစ်စေသည့် ဖျော်ဖြေမှုများ၊ ဘာသာရေးနှင့် မသက်ဆိုင်သော ဖျော်ဖြေမှုများမရှိစေရေး ကြပ်မတ်ဆောင်ရွက်ရန်တို့ကိုလည်း ညွှန်ကြားထားသည်။

ထို့ပြင် အသံချဲ့စက်ဖွင့်ခွင့်နှင့်ပတ်သက်၍ ရပ်ကွက် (သို့မဟုတ်) ကျေးရွာအုပ်စုအုပ်ချုပ်ရေးမှူးဥပဒေ၊ နည်းဥပဒေနှင့်အညီ ဖြစ်စေရေးအတွက် ကြိုတင်ခွင့်ပြုချက်တောင်းခံရန်နှင့် မီးရှူး မီးပန်းများ ပစ်ဖောက်ခြင်း မရှိစေရေး ကြပ်မတ်ဆောင်ရွက်ရန်လည်း ညွှန်ကြားထားကြောင်း ရပ်ကွက်အုပ်ချုပ်ရေးမှူးများထံမှ သိရသည်။

Dawei Watch