News

POST TYPE

ABOUT US

ပဋိပက္ခအလယ်က လူ့အခွင့်အရေးအတွက် သမားတော်များ
04-Sep-2016

အစ္စရေးနိုင်ငံသားဆိုလျှင် နှစ်မျိုးရှိသည်။ ဂျူးလူများစုနှင့် အာရပ်ပါလက်စတိုင်းများ ဖြစ်ကြသည်။ သတင်းများတွင် အားလုံးမြင်ကြသည့်အတိုင်း ပဋိပက္ခများက မကြာခဏရှိသည်။ အစ္စရေး အစိုးရ၏ မူဝါဒများကြောင့် ပါလက်စတိုင်းများ ကန့်ကွက်ရင်း လှုပ်ရှားထကြွမှုများလည်း ဖြစ်တတ်သည်။ အစ္စရေး လူမှုရေးတွင် ဂျူးလား အာရပ်လားဆိုသည့် ခွဲခြားသုံးသပ်မှုက ရှိနေသည်။ ဘယ်လူမျိုးလဲ၊ ဘယ်လိုဘာသာ ကိုးကွယ်သလဲ ဆိုသည်ကို ခွဲခြားလို့ မရသည့် အလုပ်အကိုင်တစ်မျိုး ရှိသည်။ ထိုအလုပ်ကား ဆရာဝန် အလုပ်ပေတည်း။ ဆရာဝန်များသည် မိမိလူနာကို ထိုသို့ ခွဲခြားလေ့ မရှိကြ။ နိုင်ငံသားလား၊ ခိုးဝင်လား၊ စာရွက်စာတမ်း ရှိသလား၊ စာရွက်စာတမ်းမဲ့လား၊ မွတ်ဆလင်လား၊ ဂျူးလား၊ ကျား/မ လား ခွဲခြားခြင်း မရှိကြ။ အစ္စရေးတွင် နတ်လူသာဓုခေါ်လောက်သော ကျန်းမာရေး၊ လူမှုရေး လှုပ်ရှားမှုတစ်ရပ် ရှိပါသည်။ ထိုလှုပ်ရှားမှုကို ဆရာဝန်များက ဦးဆောင် ကြသည်။ ဆရာဝန်များထဲတွင် ဂျူးလည်းပါသည်။ အာရပ်လည်း ပါသည်။

အစ္စရေးတွင် ပါလက်စတိုင်း အုံကြွမှုကြီး ၁၉၈၈ တွင် စတင်ကတည်းက ဂျူးနှင့် ပါလက်စတိုင်း ဆရာဝန်များ လက်တွဲတည်ထောင်ခဲ့သည့် လူ့အခွင့်အရေးအတွက် သမားတော်များ Physicaians for Human Rights-Israel လှုပ်ရှားမှုက စတင်ခဲ့ခြင်း ဖြစ်သည်။ ဦးဆောင်တည်ထောင်သူမှာ ဒေါက်တာရူချာမာမာတွန် ဖြစ်ပြီး အစ္စရေးနှင့် ပါလက်စတိုင်း ဆရာဝန်များ ပူးပေါင်းပါဝင်ခဲ့ကြသည်။ သူတို့၏ ခံယူချက်ကား လူ့အခွင့်အရေး၊ လူမှုတရားမျှတမှုနှင့် ကျန်းမာရေး ဝန်ထမ်းတို့၏ ကျင့်ဝတ်များအရ “ကျန်းမာရေး ကောင်းမွန်မှု ဆိုသည်မှာ လူတိုင်းအတွက် အခြေခံအခွင့်အရေး ဖြစ်သည်” ဟူ၍ ဖြစ်ပေသည်။ အဆိုပါ လှုပ်ရှားမှုသည် ကျန်းမာရေး ဝန်ဆောင်မှု ပေးခြင်းနှင့် ဘေးထုတ်ခံထားရသော လူ့အစုအဖွဲ့များနှင့် အစိုးရယန္တရားများက ကန့်သတ်ထားသော နေရာများကို ရောက်အောင် ကျန်းမာရေးဆိုင်ရာ အသိပညာပေးရေး ဝန်ဆောင်မှုများ ပေးခြင်းတို့ကို ပူးတွဲလုပ်ဆောင်ခြင်း ဖြစ်သည်။ ထိုအခါ ဆရာဝန်များသည် တော်လှန်ရေးသမားဆန်သော အလုပ်များ လုပ်ကြရတော့သည်။ ၎င်းတို့လူနာများ ရှိရာ နေရာများရှိ အုပ်စိုးသူတို့၏ မူဝါဒများ၊ ဖိနှိပ်မှုများကို ဆန့်ကျင်ကာပြန်မှုများ ပြုလုပ်ရပေတော့သည်။ 

သိမ်းပိုက်ခံ ပါလက်စတိုင်း ဒေသထဲ ဆရာဝန်များအဖွဲ့ လှည့်လည်သွားလာရသည်မှာ လွယ်ကူလှသည်တော့ မဟုတ်ပါ။ အမျိုးသမီးဆေးခန်းများ ဆိုပြီး လှည့်လည်သွားလာသည့် အစီအစဉ်တစ်ရပ် ထားရှိကာ ကျန်းမာရေးနှင့် သက်ဆိုင်သော ပညာပေးရေး လုပ်ငန်းများကိုပါ ပါလက်စတိုင်း အမျိုးသမီး အစုအဖွဲ့များအား လှည့်လည်ဟောပြော ကုသပေးမှုများ လုပ်ဆောင်ပေးနေသည်။ ဂျက်ဖာဒေသတွင် အခြေစိုက်သော Open Clinic ဆိုလျှင် နေ့စဉ် လူနာ ၁၀၀ ကျော်ကို ကြည့်ပေးနေကြသည်။ နှစ်ဘက်မျိုးနွယ်စု နှစ်ရပ်လုံး ပါဝင်သည့် ဆရာဝန်များအဖွဲ့သည် ဖမ်းဆီးထိန်းသိမ်းခံရသူများ၊ အကျဉ်းသားများ အတွက်လည်း အလုပ်လုပ်ပေးနေလျက် ရှိသည်။ တိုက်ပိတ်ခြင်း၊ နှိပ်စက်ခြင်းနှင့် အခြားလူမဆန်သော ဖိနှိပ်ဆက်ဆံမှုများကိုလည်း ဆန့်ကျင်ကန့်ကွက်ရင်း ဆေးဝါးကုသမှုများလည်း ဝင်ရောက်လုပ်ဆောင်ပေးလျက် ရှိသည်။ 

နယ်မြေတစ်ခုကို ရွှေ့ပြောင်း ဝင်ရောက်အလုပ်လုပ်ကိုင်နေသူများသည် ကျန်းမာရေး ပြဿနာ မဖြစ်အောင် ဂရုစိုက်ကြရသည်။ ဖြစ်လာလျှင်လည်း ခက်ခဲစွာ ရုန်းကန်ပြီး ကျန်းမာရေး စောင့်ရှောက်မှုကို ရှာဖွေကြရသည်။ တော်လှန်သော သမားတော်များ အစုအဖွဲ့သည် ရွှေ့ပြောင်းများ၊ စာရွက်စာတမ်း အစုံအလင် မရှိသော ပြည်သူများ အတွက်လည်း အဖွဲ့ငယ်သက်သက်ထားကာ လူမှုအခွင့်အရေးများ ဖြစ်ကြသော ကျန်းမာရေး၊ လူမှုဖူလုံရေးနှင့် ပညာရေး စသည်တို့ကို ဝင်ရောက်ကြည့်ရှု စောင့်ရှောက်မှုများ ပြုလုပ်ပေးကြရသည်။ ထို့ကြောင့် လူ့အခွင့်အရေးအတွက် သမားတော်များ လှုပ်ရှားမှု ဆေးခန်းများတွင် အစ္စရေးသို့ လာရောက်အလုပ်လုပ်ကြသော နိုင်ငံရပ်ခြား အလုပ်သမားများ၊ မိသားစုများ၊ လာရောက်ခိုလှုံကြသူများ၊ ပါလက်စတိုင်း အမျိုးသမီးများနှင့် ကလေးငယ်များ စုရုံးနေကြလေ့ ရှိသည်။ Open Clinic များကို မှီခိုနေရသည့် စာရွက်စာတမ်းမဲ့ ပြည်သူနှစ်သိန်းခွဲခန့် ရှိသည်ဟု ၂၀၁၀ ခုနှစ်က ရရှိသော ကိန်းဂဏန်းများက ဖော်ပြနေသည်။

ပါလက်စတိုင်း ရပ်ကွက်များတွင် နေထိုင်ရသော ပြည်သူများသို့ အိမ်တိုင်ရာရောက် သွားရောက်ကုသ ဝန်ဆောင်မှုများလည်း ပေးပါသည်။ ထိုသို့ လုပ်ဆောင်ပေးရခြင်းမှာလည်း အကြောင်းရှိသည်။ ပါလက်စတိုင်း ရပ်ကွက်များမှ ထွက်လာသူများသည် စစ်ဆေးရေးဂိတ် အတော်များများကို ဖြတ်ကျော်ကြရသည်။ ကျန်းမာရေးစောင့်ရှောက်မှု ရှိရာသို့ လူနာက မလာနိုင်သည့်အခါ ဆရာဝန်များက ဆေးအိတ်များဆွဲ၍ သွားရလာရသည့် အခြေအနေများ ရှိပါသည်။ နိုင်ငံရေး စစ်ရေး အခြေအနေများအရ ဂါဇာကမ်းမြှောင်ဒေသကို ပိတ်လိုက်သောအခါ လက်ဆွဲအိတ် ဆေးခန်းများ လည်ပတ်ရ အလွန်ခက်ခဲသွားပါတော့သည်။ ၂၀၀၈ ဂါဇာစစ်ပွဲကာလအတွင်း ပါလက်စတိုင်းများ အနေဖြင့် ဂါဇာနယ်စပ်ကို ဖြတ်ကျော်လာပြီး ကျန်းမာရေးစောင့်ရှောက်မှု လာရောက်ခံယူရန် အလွန်ခက်ခဲသွားခဲ့ပါသည်။ PHRI လှုပ်ရှားမှုမှ ဆရာဝန်များသည် ခက်ခဲစွာ ကြိုးစားပြီး ဂါဇာနယ်စပ်ကို ဖြတ်ကျော်ခဲ့ကြကာ စစ်ဘေးသင့်ဒေသသို့ ရှစ်ကြိမ်တိုင်တိုင် သွားရောက်ခဲ့ပြီး ဆေးဝါးပစ္စည်းများကို လေးကြိမ်တိုင်တိုင် ရအောင်သွင်းခဲ့ပါသည်။ ယခုအချိန်အထိ ထောင်သောင်းချီသော ဂါဇာဒေသခံ ပြည်သူများ၏ ကျန်းမာရေးကို စောင့်ရှောက်ပေးလျက် ရှိသည့် ဘာသာလူမျိုး နှစ်ရပ်လုံး ပါဝင်သည့် ဆရာဝန်အုပ်စု ဖြစ်ပါသည်။ 

နိုင်ငံရေးစနစ်များ၊ လူမှုရေးစနစ်များက လူမျိုးဘာသာ ခွဲခြားမှုများ ရှိသော်လည်း ကျန်းမာရေး  လိုအပ်ချက်က လူမျိုးဘာသာ ခွဲခြားမှု မရှိပါ။ လူတိုင်း ကျန်းမာရေး မကောင်းသော အခြေအနေများကို ကျော်လွှားကြရသည်။ လူမျိုးဘာသာ မခွဲခြားဘဲ လက်တွဲအလုပ်လုပ်နေသော အဆိုပါ အစ္စရေးဒေသခံ ဆရာဝန်များ၏ သတ္တိနှင့် စေတနာက ချီးကျူးဖွယ် ဖြစ်သည်။ လူမှုရေးစနစ်၊ လူမှုဖူလုံရေးစနစ်နှင့် အခြေခံလူ့အခွင့်အရေးများ ကောင်းမွန်စွာ မရရှိသည့်အခါတွင် ကျန်းမာရေး စောင့်ရှောက်မှု ဆိုးဝါးမှုများ လိုက်လာလေ့ရှိသည်။ ဆေးကုပေးရုံဖြင့် ထိုဒေသများ၏ အခက်အခဲများ ပြေလည်မသွားနိုင်သည်ကို ထိုဆရာဝန်များ ကောင်းကောင်းသိပါသည်။ ထိုအခါ တော်လှန်သော ဆရာဝန်များသည် မူဝါဒများ အထိပါ ဝင်ပါ ပြောဆိုရပ်ခံရတော့သည်။ သူတို့အဖွဲ့သည် အော်လ်တာနေးတစ် နိုဘယ်ဆုခေါ် အများအကျိုး ကမ္ဘာ့အကျိုး ထမ်းဆောင်သူများကို ပေးသည့် မှန်ကန်သော သက်မွေးမှု ပညာသည်ဆုကိုလည်း ရရှိထား၏။
         
သန့်ဇင်စိုး

ABOUT AUTHOR

(သန့်ဇင်စိုး)