News

POST TYPE

ABOUT US

ပညာရှင်၏သတ္တိနှင့် ထောင်ဆယ်နှစ်
အမေရိကန်ပြည်ထောင်စု တက္ကဆက်ပြည်နယ် တက္ကသိုလ်တွင် ပါရဂူဘွဲ့ သင်ယူပြီးမြောက်သွားသော အိုမစ်ကိုကာဘီ ဆိုသည့် လူငယ် သိပ္ပံပညာရှင်သည် ၂၀၁၁ ခုနှစ်က မိသားစုရှိရာ အီရန်နိုင်ငံသို့ ပြန်သွားခဲ့သည်။ နေရပ်သည် သူ့အတွက် ကောင်းမွန်စွာ မကြိုဆိုခဲ့ပါ။ ဆောင်းရာသီ အားလပ်ရက်ပြီး၍ အပြန် လေဆိပ်တွင် သူအဖမ်းခံရသည်။ ရန်သူအစိုးရနဲ့ ပူးပေါင်းခြင်း၊ လုံခြုံရေးဆိုင်ရာ ထိန်းသိမ်းခြင်း စသည့် ခေါင်းစဉ်အစုံဖြင့် ထိန်းသိမ်းခံရသည်။ တကယ်တမ်း အဖမ်းခံရသည့် အကြောင်းကား အီရန်အစိုးရက ၎င်းတို့လုပ်နေသော နျူကလီးယားဆိုင်ရာ စမ်းသပ်ချက်များ သုတေသနများကို ဝင်လုပ်ပေးရန် ကမ်းလှမ်းခြင်းဖြစ်သည်။ အိုမစ်ကိုကာဘီးက ငြင်းလိုက်သည်။ နျူကလီးယားစွမ်းအင်ဖြင့် လက်နက်လုပ်လျှင် မည်မျှ ဖျက်အားပြင်းသည်ကို သိပ္ပံပညာရှင်ပီပီ အိုမစ် သိရှိနားလည်ထားသည်။ မိမိ၏ပညာကို လူသားမျိုးနွယ်ကို ဒုက္ခပေးမည့်နေရာတွင် မသုံးချင်သည့် ပညာရှင်တစ်ဦး၏ ပညာသည် ပီသသောသတ္တိ အပြည့်ဖြင့် ငြင်းဆန်လိုက်သည်။

ယခုဆိုလျှင် သူထောင်ထဲမှာ နေနေရသည်မှာ ငါးနှစ်ကျော်သွားခဲ့လေပြီ။ ကျောက်ကပ်ဝေဒနာ ခံစားနေရသည်မှာ ကြာနေပြီဖြစ်ပြီး အကြိမ်ကြိမ် ကုသမှုခံယူခွင့်ရရန် ငြင်းဆန်ခံရပြီးနောက် ထောင်ထဲတွင် ကျောက်ကပ်ကင်ဆာ ရနေသည်တဲ့။ ၎င်းကို ခြွင်းချက်မရှိ ပြန်လွှတ်ပေးကာ ကျောက်ကပ်ဝေဒနာကို ကောင်းမွန်စွာ ကုသခွင့်ပေးရန် လူ့အခွင့်အရေး အဖွဲ့များက အစဉ်တစိုက် တောင်းဆိုနေခဲ့သည်။

‘အိုမစ်ကိုကာဘီရဲ့ အသက်အန္တရာယ် တစ်နေ့တခြား ကြီးမားလာနေမှုကို နှိပ်စက်ညှဉ်းပန်းမှု ဖြစ်ပါတယ်’ ဟု အီရန် လူ့အခွင့်အရေး စောင့်ကြည့်ရေးအဖွဲ့ ဒါရိုက်တာ ဟာဒီဂါအီမီက ပြောကြားခဲ့သည်။ နိုင်ငံတကာ လွတ်ငြိမ်းချမ်းသာခွင့် အဖွဲ့အစည်း Amnesty International အဖွဲ့အစည်းကလည်း အိုမစ်သည် နိုင်ငံရေးအကျဉ်းသား တစ်ဦးဖြစ်ကာ အမြန်ဆုံး ပြန်လွှတ်ပေးရန် တောင်းဆိုထားသည်။ နိုင်ငံတကာ အစိုးရများက လူငယ်သိပ္ပံပညာရှင်၏ လွတ်လပ်မှုအတွက် တောင်းဆိုကန့်ကွက်မှုများ လုပ်နေသော်လည်း ၎င်းတို့အနေနှင့် တီဟီရန်အစိုးရ နားထောင်လာအောင် ပိုမို လုပ်ဆောင်သင့်ကြောင်း အဆိုပါ အဖွဲ့အစည်းက သတိပေးလိုက်သည်။

ဘာသာရပ်ဆိုင်ရာ ထူးချွန်မှုနှင့် မိမိပညာကို လေးစားတန်ဘိုးထားသည့် ပညာသည်ဆန်စွာ ရဲရင့်မှု တို့ကြောင့် အမေရိကန်ရူပဗေဒ အသင်းကြီးက အိုမစ်ကိုကာဘီကို ၂၀၁၄ ခုနှစ်တွင် အန်ဒရေဆာခါရော့ဗ်ဆု ချီးမြှင့်ခဲ့သည်။

“လူသားမျိုးနွယ်ကို အန္တရာယ်ဖြစ်နိုင်တယ် ဆိုတဲ့ စိုးရိမ်မှုကြောင့် ရုပ်ပိုင်း၊ စိတ်ပိုင်း နှိပ်စက်မှုတွေကို ကြံ့ကြံ့ခံပြီး သူ့ပညာကို အသုံးပြုခွင့် မပေးဖို့ ငြင်းဆန်ခဲ့သည့် သတ္တိကြောင့် ထိုဆုကို ပေးရခြင်းဖြစ်သည်” ဟု ယင်းအသင်းကြီးက ပြောဆိုထားသည်။ ၂၀၁၄ ခုနှစ်တွင်ပင် အမေရိကန် သိပ္ပံအသင်းကြီး (AAAS) က သိပ္ပံဆိုင်ရာ လွတ်လပ်မှုနှင့် တာဝန်ယူမှုဆိုင်ရာဆုကို ပေးအပ်ခဲ့သေးသည်။

အိုမစ်ကိုကာဘီသည် အီရန်နိုင်ငံရှိ တာ့မန်မျိုးနွယ်ဝင် လူနည်းစု ဆွန်နီမွတ်ဆလင်တစ်ဦး ဖြစ်သည်။ အီရန်တက္ကသိုလ်ဝင်ခွင့် စာမေးပွဲတွင် တစ်နိုင်ငံလုံး အဆင့် ၂၉ ချိတ်ပြီး ထူးချွန်စွာ ဝင်ရောက်ခွင့်ရသည်။ ၂၀၀၀ ခုနှစ်တွင် ရှရစ်ဖ်နည်းပညာတက္ကသိုလ်သို့ ဝင်ရောက်ခဲ့ပြီး အသုံးချရူပဗေဒနှင့် စက်မှုအင်ဂျင်နီယာ ဘာသာရပ်တို့ဖြင့် ကျောင်းပြီးခဲ့သည်။ ၂၀၀၇ ခုနှစ်တွင် စပိန်နိုင်ငံ ဘာစီလိုနာသို့ သွားရောက်ခဲ့ဟာ ဖိုတွန်အမှုန်ဗေဒဖြင့် မဟာသိပ္ပံဘွဲ့ ရရှိခဲ့သည်။ ၂၀၁၀ ခုနှစ်မှ တက္ကဆက်တက္ကသိုလ်တွင် ၎င်း၏ ပါရဂူဘွဲ့အတွက် စတင် အလုပ်လုပ်ခဲ့သည်။ စုပေါင်း စာတမ်း ၂၀ ကျော်ရေးသားခဲ့ကာ ပညာရပ်ဆိုင်ရာ ဂျာနယ်များတွင် ထည့်သွင်းဖော်ပြခြင်းများစွာ ခံခဲ့ရသူ ဖြစ်သည်။

ယခုထောင်ထဲတွင် ကင်ဆာဝေဒနာကို အပြင်းအထန် ခံစားလာရချိန်တွင် နိုင်ငံတကာ အသိုင်းအဝိုင်းက ၎င်းကို ပြန်လည်သတိထား အာရုံစိုက်လာမိသည်။ အီရန်နှင့် ကမ္ဘာတစ်ဝှမ်းမှ အိုမစ်ကို ထောက်ခံသူများက လူမှုကွန်ရက်မီဒီယာများတွင် ၎င်း၏ ကျန်းမာရေးအခြေအနေ ယိုယွင်းလာမှုကို ထောက်ပြပြီး အသိပေးလှုပ်ရှားမှုများ ပြုလုပ်နေလျက် ရှိသည်။ ပြီးခဲ့သည့် ဧပြီ ၂၀ ရက်နေ့က ကိုကာဘီ ကျောက်ကပ်ခွဲစိတ် ကုသမှုခံယူရသည်။ သို့သော် လူ့အခွင့်အရေး တက်ကြွလှုပ်ရှားသူများနှင့် မိသားစုဝင်များကမူ ၎င်းကို ထောင်ထဲက အခြေအနေအတိုင်း ဆက်ထားလျှင် ပြန်လည်ကျန်းမာလာ မည်မဟုတ်ဟု ယူဆလျက်ရှိသည်။

နိုဘယ်ဆုရထားသော ရူပဗေဒပညာရှင် ၃၁ ဦးနှင့် အခြားသိပ္ပံပညာရှင်များ စုပေါင်းပြီး အိတ်ဖွင့် ပေးစာတစ်စောင် အီရန်သမ္မတ ဟက်ဆန်ရိုဟာနီကို ပေးပို့ခဲ့သည်။ အီရန်နျူကလီးယား သဘောတူညီမှု အရေးအတွက် ညှိနိူင်းခဲ့သော အမေရိကန် နိုင်ငံခြားရေးဝန်ကြီး ဂျွန်ကယ်ရီနှင့် အီရန်ဝန်ကြီး ဂျာဗက်ဇာရစ် တို့ကိုလည်း ဆက်သွယ် တောင်းဆိုထားသည်ကို တွေ့ရသည်။ နျူကလီးယားအရေးကိစ္စများ ဆွေးနွေးရင်း အကျဉ်းသားလဲလှယ်ရေး ကိစ္စများကိုလည်း ဝန်ကြီးနှစ်ပါးက ဆွေးနွေးခဲ့ကြသည်။ ရေခြားမြေခြားရောက် အီရန်အနွယ်ဝင်များ အင်တာနက်တွင် ‘အိုမစ်ကို ပြန်လွှတ်ပေး’ ဆိုသည့် ရေးသားလှုပ်ရှားမှုများ ပြုလုပ်နေလျက် ရှိသည်။

အိုမစ်ကိုကာဘီ၏ ဇာတ်လမ်းက ‘နီးရာဓား ကြောက်ရတာပေါ့၊ သူ့ဆန်စား ရဲရမယ်လေ’ စသဖြင့် ပြောတတ်ပြီး ဖိနှိပ်သူများ၊ ဝိသမသားများနှင့် ပေါင်းစားသော ပညာရှင်များကိုလည်း မြင်ယောင် လာစေသည်။ အိုမစ်သည် ထိပ်တန်း သိပ္ပံပညာရှင် ဖြစ်သည့် အားလျော်စွာ အီရန်အစိုးရ၏ နျူကလီးယား စီမံကိန်းမှာ ဝင်လုပ်ပေးလျှင် အဆင့်အတန်းတစ်ရပ် အထိ အဆောင်အယောင်များ ရမှာ သေချာသလောက် ရှိသည်။ ထိုသို့ ငြင်းရန်အတွက် မိမိပညာကို ချစ်မြတ်နိုးစိတ် သာမက သတ္တိလည်းလိုအပ်သည်။ သူ့အနစ်နာခံ ယုံကြည်စွဲမြဲမှုကြောင့် ထောင်ထဲနေရစဉ်တွင်လည်း သေလောက်အောင် ရောဂါဝေဒနာဆိုးက ဖိစီးနေလင့်ကစား ဒေါက်တာအိုမစ် ကျော်ဖြတ်နေလျက် ရှိသည်။ တစ်ကမ္ဘာလုံးက ဝန်းရံနေကြသည်။ ပြန်လည်လွတ်မြောက်ကာ လူသားအကျိုးပြု နည်းပညာများ ဆက်လက်ဖန်တီးနိုင်စေဟု ဆုမွန်ကောင်း တောင်းမိပါသည်။

သန့်ဇင်စိုး