ပဲခူးတိုင်းအနောက်ခြမ်း သာယာဝတီခရိုင် ငဖြူကလေးကျေးရွာ၌ နိုဝင်ဘာ ၂ရက်နေ့က အသက် ၆ဝ နှစ်အထက်များအတွက် ကြိုတင်မဲများ လိုက်လံကောက်ခံနေစဉ်NLD ပါတီ၏ပြည်သူလွတ်တော်တံဆိပ်နေရာတွင် ကြိုတင်ဆန္ဒပြုထားခြင်းများအား ပါတီလေးခုမှ ကန့်ကွက်ထားပြီး ထူးခြားမှုမရှလျှင် ဥပဒေအရ အမှုဖွင့်မည်ဟု ပြည်ထောင်စုကောင်းကျိုးဆောင်ပါတီ သာယာဝတီမြို့နယ် အမှတ်(၁) မဲဆန္ဒနယ်မှ တိုင်းလွတ်တော်ကိုယ်စားလှယ် ဒေါ်လွယ်လွယ်ဝင်းကပြောကြားသည်။

ပဲခူးတိုင်း အုတ်တွင်းမြို့နယ် ကြွယ်ဂံကျေးရွာအုပ်စု ခင်တန်းကျေးရွာတွင် ရွေးကောက်ပွဲမဲဆွယ်ကာလက စိုက်ထူထားသည့် NLD ပါတီကိုယ်စားလှယ်လောင်းမဲဆွယ်ဆိုင်းဘုတ်တစ်ခု နိုဝင်ဘာ ၇ ရက် နံနက် ၈ နာရီကျော်သည်အထိ ဖြုတ်သိမ်းခြင်းမပြုသေးသည်ကို တွေ့ရှိရသည်ဟုဒေသခံတစ်ဦးက ပြောကြားသည်။

ရွေးကောက်ပွဲနီးလာချိန်မှာ ဦးဝီရသူထွက်ပေါ်လာမှုနဲ့ တပ်ချုပ်ရဲ့ပြောဆိုမှုတွေဟာ ရွေးကောက်ပွဲကို ကသိကအောက် ဖြစ်အောင်လုပ်တာလို့ NLD သဘာပတိအဖွဲ့ဝင် ဦးဝင်းထိန်က သုံးသပ်ပြောဆိုခဲ့ပါတယ်။

ဗိုလ်ချုပ်မှုးကြီး ငြိမ်း ဦးသန်းရွှေ ကိုယ်တိုင် ယနေ့ ညနေပိုင်းက ကြိုတင်မဲပေးခဲ့ကြောင်း နေပြည်တော် ပြည်ထောင်စုနယ်မြေ ရွေးကောက်ပွဲကော်မရှင် ဥက္ကဌ ဦးသိန်းထွေး ကပြောသည်။

မကွေးတိုင်း အောင်လံမြို့ ရွာထောင်ရပ်ကွက်မှ ကြိုတင်မဲပုံးကို နိုဝင်ဘာ ၄ ရက်နေ့က ရဲစခန်းသို့ ပို့ဆောင်စဉ်မိုးမိသဖြင့် ကြိုတင်မဲ ၁၅၂ မဲ ပျက်စီးခဲ့ကြောင်း မကွေးတိုင်းမဲဆန္ဒနယ်-၁၂ မှ အမျိုးသားလွှတ်တော်ကိုယ်စားလောင်း ဦးမြတ်ကိုက ပြောကြားသည်။

မိတ္ထီလာမြို့နယ် ရေချိုကျေးရွာ အမှတ် ၁ မဲရုံ၌ နိုဝင်ဘာ ၅ ရက်နေ့ နံနက် ၉ နာရီဝန်းကျင်က ကျေးရွာရွေးကောက်ပွဲကော်မရှင်အဖွဲ့ခွဲ အတွင်းရေးမှူးနှင့်အဖွဲ့ဝင်တို့က လုံခြုံရေးကြိုးတပ်ထားသော မဲပုံးသုံးပုံးကို မဲရုံကိုယ်စားလှယ်များက တားမြစ်နေသည့်ကြားမှ ကားပေါ်တင်ကာ မိတ္ထီလာမြို့တွင်းရှိ အ.ထ.က(၁) Quarantine သို့ သွားခဲ့သည့်အတွက် အမျိုးသားဒီမိုကရေစီအဖွဲ့ချုပ်ပါတီနှင့်အငြင်းပွားမှုဖြစ်ခဲ့ကြောင်း ယင်းပါတီ ရပ်မိရပ်ဖအဖွဲ့ဝင်များထံမှ သိရသည်။

မကွေးတိုင်း၊ ချောက်မြို့နယ် ဆားလယ်ကျွန်းကျေးရွာအုပ်စု၊ ဆားလယ်ကျွန်းကျေးရွာရွေးကောက်ပွဲကော်မရှင်ဥက္ကဋ္ဌနှင့် အတွင်းရေးမှူးတို့ကိုအရေးယူပေးရန် ကျေးရွာသားတစ်ဦးက နိုဝင်ဘာ ၅ ရက်နေ့ည ၁၀ နာရီဝန်းကျင်တွင် လာရောက်အမှုဖွင့်ခဲ့သည်ဟုချောက်မြို့နယ် စလေနယ်မြေရဲစခန်းထံမှ သိရသည်။

ဧရာဝတီတိုင်း၊ မြန်အောင်မြို့နယ်၊ ကနောင်မြို့၊ ပေါက်ကုန်းစွန်းကျေးရွာအုပ်စု၌ အောက်တိုဘာလ ၄ ရက်နေ့က ကြိုတင်ဆန္ဒမဲလက်မှတ်များ မှားယွင်း ထုတ်ပေးမှုအပေါ် ပါတီအချို့က ပယ်မဲအဖြစ်သတ်မှတ်ပေးရန် တင်ပြခဲ့ကြောင်း ယင်းမြို့နယ်ရွေးကောက်ပွဲကော်မရှင်ထံမှ သိရသည်။

လာမည့်နိုဝင်ဘာ ၈ ရက်နေ့တွင် ကျင်းပမည့်ရွေးကောက်ပွဲတွင် ရှမ်းပြည်နယ်မြောက်ပိုင်း “ဝ” ကိုယ်ပိုင်အုပ်ချုပ်ခွင့်ရဒေသမှ မဲဆန္ဒရှင် သုံးသောင်းကျော်အတွက် မဲရုံ ၄၈ ရုံဖွင့်ပေးမည်ဖြစ်ကြောင်း ဟိုပန်မြို့နယ် ရွေးကောက်ပွဲကော်မရှင်ထံမှ သိရသည်။

ပြည်ထောင်စုနေ့စဉ်သတင်းစာ၏ သတင်းထောက်များအနေဖြင့် သတင်းမီ‌ဒီယာကတ်ထုတ်ပေးထားသည့် ကြံ့ခိုင်ရေးပါတီဝင်များကို ခရိုင်ရွေးကောက်ပွဲ ကော်မရှင်က ရွေးကောက်ပွဲနေ့တွင် သတင်းယူခွင့်ပြုလိုက်ကြောင်း ချောက်မြို့နယ် အမျိုးသားဒီမိုကရေစီအဖွဲ့ချုပ်ထံမှ သိရသည်။

ချောက်မြို့တွင် Quarantine ဝင်နေသူများ၊ ဆေးရုံတက်နေရသည့်လူနာများနှင့် အချုပ်သားများထံမှ ကြိုတင်ဆန္ဒမဲကောက်ယူခြင်းလုပ်ငန်းကို နိုဝင်ဘာလ ၄ ရက်နေ့ကဆောင်ရွက်ခဲ့သည်ဟု မြို့နယ်ရွေးကောက်ပွဲကော်မရှင်ရုံးထံမှ သိရသည်။

လာမည့်နိုဝင်ဘာ ၈ ရက်နေ့တွင် ကျင်းပမည့် အထွေထွေရွေးကောက်ပွဲတွင် မိတ္ထီလာမြို့နယ်ရှိ မျက်မမြင်မဲဆန္ဒရှင်များအတွက် မဲရုံနှစ်ရုံထားရှိမည်ဖြစ်ကြောင်း မိတ္ထီလာမြို့နယ် အထွေထွေရွေးကောက်ပွဲကော်မရှင်ခွဲ ဥက္ကဋ္ဌ ဦးဇော်ဝင်း ကပြောကြားသည်။

ရှမ်းပြည်နယ်မြောက်ပိုင်း မူဆယ်မြို့နယ် ပန်ဆိုင်း(ကြူကုတ်)မြို့ အမှတ်-၃ ရပ်ကွက်ရှိ ရပ်ကွက်အုပ်ချုပ်ရေးမှူးအိမ်တွင် ကြိုတင်မဲပေးခြင်းနှင့် မဲပုံးသိမ်းဆည်းထားမှုကို SNLD ကိုယ်စားလှယ်လောင်းက ကန့်ကွက်ခဲ့သည်ဟု ရှမ်းတိုင်းရင်းသားများ ဒီမိုကရေစီအဖွဲ့ချုပ် SNLD ပါတီထံမှ သိရသည်။

ရွေးကောက်ပွဲအပြီး အောင်နိုင်ရေးရလဒ်တွင် ရာနှုန်းပြည့်အနိုင်မရရှိပါကလည်း ဒေါသမထားရန်နှင့် ပြဿနာမရှာရန် အမျိုးသားဒီမိုကရေစီအဖွဲ့ချုပ် (NLD) ပါတီခေါင်းဆောင် ဒေါ်အောင်ဆန်းစုကြည် ကပြောကြားလိုက်သည်။

လာမည့် ရွေးကောက်ပွဲတွင် ဓနုကိုယ်ပိုင် အုပ်ချုပ်ခွင့်ရဒေသအတွင်း၌ လက်ရှိအာဏာရပါတီ NLD၊ ပြည်ခိုင်ဖြိုးပါတီ၊ သူရရွှေမန်း၏ ပြည်ထောင်စု ကောင်းကျိုးဆောင်ပါတီ(UBP)၊ တိုင်းရင်းသား စည်းလုံးညီညွတ်ရေးပါတီ၊ အမျိုးသားဒီမိုကရေစီ အင်အားစုပါတီ(NDF)၊ ဓနုတိုင်းရင်းသားလူမျိုးများ ဒီမိုကရေစီပါတီ (အိုးစည်ပါတီ)၊ ဓနု အမျိုးသားများအဖွဲ့ချုပ်ပါတီ(DANU) တို့မှ ရွေးချယ်ထားသော ကိုယ်စားလှယ်လောင်းများက ဝင်ယှဉ်ပြိုင်ကြမည်ဖြစ်ပြီး ပြည်နယ်လွှတ်တော်ကိုယ်စားလှယ်လောင်းတစ်ဦးသာ တစ်သီးပုဂ္ဂလအဖြစ် ဝင်ယှဉ်ပြိုင်မည် ဖြစ်သည်။